A Wor Kapasen Tong Ikei
Amo emon me emon kich sipwe kaeo ach sipwe kapas me rongorong An tong ikei, non netipach me imwach, me non wisach non fan, urumot, iamwir, me angang.
Nouch kewe semiriten Kinter ra konu, “A fen wor kapasen tong ikei.”1
Ngang uwa fen ngeni Sister Gong epa mwaramwar foun ewe mi nok. Uwa mwakei non dot-dot, dot-dot, dot-dot-dash. Ekkana ra sinei sokkun napanapen makken founumak repwe nounou ne kapas fengen pwe esap wor epwe esina met ra porous ussun repwe asina kewe foun mak I, I, U. Nge uwa apachanong aruwen sokkun napanapen makken foun mak Non Mandarin Chinese, “ai” wewen “tong.” Iwe, fan ruu-makkan, ewe porous e ara “Ai tong ngonuk.” Susan achengicheng, “Ai, tong ngonuk.”
Sia kapasen tong non chommong kapas. Uwa sinei pwe aramas ra marar fengen ren uputiw, pupunu, ika mumu ekkewe ra nom fengen non famini ra kapas non 7,168 sokkun kapas ikenai.2 Non ach Michefen sia kapas non 575 kapas mi makketiw ewe sia oruni ach sipwe kapas non, fiti chommong ngingin kapas. Sia pwan kapas fengen non ururun, enletin popun, me memef ren chunga, kon, poruk, esisin, non ika nefinan an emon memef.3
Ikenai, sipwe kapas ussun unungat kapasen ewe kapas allimen tong: ewe kapasen kirekiroch me sufon, ewe kapasan angang me fangeno, me ewe kapasan fori me manaueni ekkewe pwon mi pin ngeni Kot me pwon fengen nefinach.
Ewin, ewe kapas allimen kapasen kirekiroch me sufon.
Ren kirekiroch me sufon, Sister Gong a aisini kewe semirit me sarafo, “Ifan ussun om sinei an inom me semom me famini tongeok?”
Non Guatemala, semirit ra apasa, “Inei me Semei ra achocho ne angang ar repwe amongoni ach famini.” Non North America, semirit ra apasa, “Inei me semei ra anea tutunap me amouruwei nepin.” Non ewe Fonu mi Pin, semirit ra apasa, “Inei me semei ra tumunuwei.” Non Ghana, West Africa, semirit ra apasa, “Inei me Semei ra anisiei ren nei kewe Semirit me ekkewe mettoch Sarafo ra mochen angang ngeni.”
Emon semirit a apasa, “Ina mo ika inei a pekus mwirin an angang unusen ikenai, inei we atou urumot rei nukun.” Inan we a kechiw nupwen a rong pwe an fangeno iteitan mi namot. Emon fopun a apasa, “Ika mo am me inei we ause tipeew, Ngang uwa nuku inei we.” Inan we apwan kechiw.
Fan ekkoch sia mochen sinei kapasen tong ikei sia ausening me kinisou ngeni.
Ren tong me sufon, ach sakrament me ekkoch mwicheich a fis faniten Jises Kraist. Sia kapas menin ren ewe Achasefan an Jises Kraist, ren pusin ach me ennetin, esap chok ren achasefan mine a fis. Sia eita ngeni Jises Kraist an we Michefen mi niwinefanito, Ewe Michefenin Jises Kraist ren Aramas Mi Pin Non Fansoun Soponon. Sia iotek non ach sufonoch nupwen sia apasa Samach won Nang me tong kinamwe nupwen sia kapas fengen. Nupwen sia asina Jises Kraist ren ewe tongen pwon non tempel, sia akukunu ach sia “no ngeni ewe tempel” me anapaengeni ren ach “no ngeni Jises Kraist non ewe imwen ach we Samon.” Ew me ew pwon mi pin a mongunungun, “A fen wor kapasen tong ikei.”
Minafon memper ra apasa pwe kapasan Mwichefen napengeni ra mochen chon awewei. Am aua takir ren am ekieki pwe “imwen steik” a tongeni wewen pwe ew annon ochoch pif ren mongon nekunion, “imwen wart” a tongeni wewe ngeni pioing, “sukkun nenien eksersais” a tongeni etiwa kich ach sipwe fori mokur, afarach, pukuwach, me autun pechech nukun ach fan nenian parkun taraku. Nge, ouse mochen, sipwe awora wewe me kirekireoch nupwen sia kaeo minafon kapasen tong fengen. Minafo ngeni fan, emon minafon chon Michefen ra ureni pwe an we skato a kon mwoch. Ese pwan ekieki, i a ponuweni, non ititin, “Netipe a ekesiwin, kose mochen nikitu ngeni ai skato epwe tapweto.”4
Ekkwe kapas sia aia a tongeni akana fengenkich ika atowawakicheno seni ekekoch sounang me chiechiach. Fan ekkoch sia kapas ren angangan misineri, angang non tempel, aninisin aramas me tufichin angang usun chok ekkoch repwe nuku sia ekieki sia fori ekkei angang won pusin ach. Sipwene kapas fansoun meinisin fiti kirekiroch me sufon ren an Kot angang me ning me ewe tipachem, umoumoch me chenin Jises Kraist me An we acheasefan.5
Aruwan, ewe kapas allimen kapasen angang me fangeno.
Nupwen sia chusefan non fan iteitan wiik ach sipwe aucheani me pwapwaiti ewe ranin Sabbath, sia tongeni pwari ach pwonen sakrament ngeni Jises Kraist me emon me emon kich seni wisach non Mwichefen, chiechioch ngeni aramas, .chiechi fengen me angang
Nupwen uwa eisini ekkewe sou emwenin Mwichefen non ewe neni met ra ekipwichi, pwich me fefinach kewe ra apasa, “Ekkoch nouch chon fan rese etiwa wiser kewe seni Michefen. Kokkon angang ngeni ewe Samon me emon me emon kich non An Michefen a awora tufichin om kopwe marino non kirekireoch, tufichin fori mettoch, me tipetekison. Nupwen sia angei ach efeioch, sia tongeni angei an ewe Samon mokkutun memef ne aitieta me apochokuna ekkoch me pusin kich. Ewer, ewe ekesiwinin nonomun mettoch me porausen non manauach epwe appetti ach tongeni angang, nge anean esap ach mochen. Ren King Benjamin, sia apasa, “Ika a wor rei upwe fangeno”6 me ngeni meinisin ukukun ach tongeni.
Souemwenin steik me wart, sipwe fori wisach. Nupwen sia kokko (me kepichino) pwi me fefinei ach sipwe angang non An ewe Samon Michefen, ouse mochen sipwe fori fiti sufonoch me mokkutun memef. Anisi emon me emon epwe mefi katiwoch me pwan ar repwe tongeni fetanoch. Ouse mochen mwich fengen me ausening ngeni fefinach chon emwen. Amo sipwe chechemeni, nupwen Preseten J.-Rueben Clark a aitikich, non an ewe Samon Michefen sia angang ian sia koko ngeni, “menni neni emon epwe ew me nein kutta are poponi.”7
Nupwen am me Sister Gong aua pupunu, Elter David-B. Haight a ourourakich: “Kamochuno ew kokko non ewe Michefen. Akaewin nupwen manau a osukosuk, “I a apasa, “a auchea kopwe mefi an ewe Samon tong fan iten ekana ka angang ngenir me fan itom nupwen ka angang.” Ai pwon pwe a wor kapasen tong ikei, ikanan, me ekis meinisin nupwen sia ponuweni ewer ngeni nouch chon angnag non Michefen ne angang ngeni ewe Samon non An Michefen seni Ngunun me ach pwon mi pin.
An ewe Samon niwinsefaniton Michefen a pwan nenien ach ngaseno ren ach nenien Zion. Nupwen sia fen ngeni, angang, pwapwa, me kaeo An tong fengen, sia akko fengeni kich non An kapas allim. Amo sipwe tipefesen nukun ika osukosukon won mecha nge tipeew nupwen sia koon fengen non ach wart. Sia tumunu chunap me fiu ngeni kaimu nupwen sia soun iamwir ren ngasangasach non imwen emon me emon.
Atun memper ra chufengen ren preseten, Uwa mefi ar anonnonun tong ngeni memper non sakopatan poraus. Am wa sa nuseni imwen memper non an steik, ew steik preseten a apasa pwe are ami ouwa nomw non ew imw mi wor nenian tukken ika ew imw mi pipi punun, angang seni Michefen ew ach tufich epwe soun fiti fangeno. Nge, I a nenengeni, nupwen sia angang fengen me fangeno non ewe kapas allim, sia kuna chok kukun tipis me watten kinamwe. Nupwen sia mut ngeni I, Jises Kraist a anisi kich sipwe apasa An tong ikei.
Non ei summer, ai famini ra churi mwirinon chon ach Michefen me chiechi non Loughbrough me Oxford, England. Ekkei auchean chufengen a achemato usun an wart chufengen me angang a tongeni awora eu minefon me nikitu non ewe kapas allim, Fan ekkoch uwa mefi pwe, non chommong neni non ewe Michefen, an wart urumot, mi kokkotoch me pwonueta ren popun kapas allim, a tufich fotti fengeni kich ren watten ach manaueni me unusochuch.
Ew an wart mokutun sean urumot me ew mwichen aninisin emon me ew nenian souneng. Ar kokotochun urumot a anisi meinisin ne mefi auchear, kapach, me suki ngenir ew auchan wis. Ekkoch urumot a afou ierin me newoch, afisita achechem, me a tongeni uwei ren kukun ika ese wor momon. Apwapwan urumot non fan apwan etiwa chon unukuch me chiechiach.
Chufengen me angang napengeni ra mwinefengen. Sarafo kopwe sinei pun ika ka wesen mochen sinei emon iwe kopwe fiti ewe emon won ew natto me fiti ne chungani fengen non ew weweochun angang.
Ewer, ese wor emon me ese wor famini ra unusoch. Kich meinisin sia kutta aninis ren kapasan tong ikei. “Unusochun tong a ausuweno nuokus.”8 Nuku, angang, me fangeno a uwei kichita arap ngeni ach Chon Amanau. Watten ach tong, nukuchar, me achocho ach angang me fangeno non I, apwan watte ach poputa ne weweiti an Jises Kraist tong ennet me chengen fanitach.
Iwe a watto ngenikich ewe kapas allim ren pwonen nonom.
Sia nom non ew muun kichingaw. Napengeni ra “Uwa finata ngang” Usun ita nge ita sia sineiochu ifan usun ach sipwe akita.
Nge enlettin ese pung. Jises Kraist pusin a pwarata ei auchean kapas enlet.
“Pun are emon a aucheani pwisin manauan, epwe pout seni, nge are emon a ponuku manauan fan itei, iwe epwe kuna sefani.
“Ren met emon mwan (an fefin) feioch, ika i a angei unusan fonufan, me ponuku pusin ngunun?”9
Jises Kraist a awora annan - chiechifengen non pwon, manaman seni ewe senin mano. Ach pwon mi pin ren Kot me nefinach a tongeni achikara me apini chenin nefinach. Non enletin, Ewe Samon a sineiochu kich me tongei kich nap seni kich sia sinei ika tongei pwisin kich. Mi enlet, nupwen sia pwon non unusochun, sia tongeni akasiwini non manauch. An Kot manaman me tipachem a tongeni anisi kich ren sakopatan feioch, non An fansoun me annan.
Generative articial intelligence (AI) a aninis ren ewe angangen chiaku. Mworonan ekewe ran nupwen tufichin awewe ewe kapas “Ewe ngun a fori, nge ewe fituk a apwangapwang” usun “Ewe wain mi och, nge ewe fituk a ngaw.” Amwararan, aniwinin ew awewe ren ew foss aiti ew computer och foss nap seni an aiti ewe computer annukun itechik.
Nonongeni, ach pusin emweni, anniwin sosot a pwan ach annen ngun ren kaeo ewe kapas allim fosun tong me sufon, angang me fangeno, me ach pwon mi pin.
Iwe, ian me ifan usun Jises Kraist a kapas ngonuk non tong?
Ian me ifan usun kopwe rongorong An kapasen tong ikei?
Amo kich meinisin sipwe kaeo ach sipwe kapas me rongorong An tong ikei, non netipach me imwach, me non wisach non ewe kapas allim, non urumot, iamwir, me angang.
Non an Kot kokot, emon me emon kich ew ran sipwe mokut seni ei manau non ew ran ngeni enan manau mwirin. Nupwen sia churi ewe Samon, uwa neno won I an apasa, fiti kapasen aurour me pwon, “A fen wor kapasen ai tong ikei.” Non iten Jises Kraist mi pin, amen.