Ewe Manamanen Riri Fengen
Ewe manamanen ririfengen a amanauwa emon me fefeitan famini a tifuch ngeni meinisin noun Kot semirit.
A fen wor osini seni ewe fansoun Isaiah1 pwe non ekkewe ran soponon, noun ewe Samon kewe aramas pwon, ewe imwen Israel, repwe “ioifengenionong seni ar nakatamen toropaseno, seni ekkewe fonuen neset, me seni ekkewe ruanu kinikinin fonufan”2 me niwinsefanito ngeni “ekkewe fonuen ar kewe neuo.”3 Preseten Russell M. Nelson a fen porous fan chommong non pochokun ussun ei ochufengen, a eita ngeni “ewe mettoch a kon auchea a fis won fonufan ikenai.”4
Met popun ewe ochufengen?
Ren pwarata ngeni ewe Soufos Joseph Smith, ewe Samon a affata ew popun usun ewe tumunun ekkewe aramas pwon. I a apasa, “Ewe ochufengen won ewe fonuen Zion, me won an kewe steik, [epwe] pekin eppet, me ren nenien op seni ewe monumon, me seni watten song nupwen epwe niu nge ese wor nofitin won unusen ewe fonufan.”5 “Watten song” non ei nikinik meni epwe weweoch pwe ina pukupukun pungunon anneasonap a chou fetan ngeni annuk me annukun Kot.
Akkauchean, ewe ochufengen ren ewe popun wato ekkewe feiochun angangen amanaua me manau tekia ngeni meinisin ion repwe angeir. Iei ussun ekkewe pwon mi pin ra kawor ngeni Abraham ra katou. Ewe Samon a ureni Abraham pwe seni mwirimwirin me pristut “meinisin ekkewe faminien fonufan [repwe] feioch, pwan mwo ren ekkewe feiochun ewe Kapas Annim, minne ikana ekkewe feiochun amanau, pwan mwo manau ese much.”6 Preseten Nelson a awewei iei ussun: “Nupwen sia etiwa ewe kapas allim me sia papatais, sia wata woch iten Jises Kraist mi pin. Papatais ina ewe tit mi emwen ngeni ach winiti chon angei ekkewe pwon meinisin mi kawor me nom me ren ewe Samon ngeni Abraham, Isaac, Jacob, me mwirimwirir kewe.”7
Non 1836, Moses a pwa ngeni ewe Soufos Joseph Smith non ewe Kirtland Tempel me “atoura … ekkewe kien ewe ioni fengeni Israel seni ekkewe ruanu kinikinin ewe fonufan”8 Non chok pwan na fansoun, Elias a pwato me “wato ewe kinikinin fansoun ewe kapas allimen Abraham, a apasa pwe non kich me mwirimwirich meinisin tappin aramas mwirich repwe feioch.”9 Ren ei mumuta, iei sia uwei ewe kapas annimen Jises Kraist—ewe porousoch ren ngaseno me non I—ngeni meinisin kinikinin me aramasen ewe fonufan me ioni fengeni meinisin ion epwe tonong non ewe pwonen ewe kapas annim. Ra winiti “mwirimwirin Abraham, me ewe mwichefen me muu, me ra kefinita meren Kot.”10
Non chok pwan ewe fansoun non ewe Kirtland Tempel mi wor ounumonun chon nang a pwa ngeni Joseph Smith me Oliver Cowdery. Ua kapas ussun ewe soufos Elijah, me ewe mumuta me kewe kii a eniwinato ewe ua mochen kapas ussun ikenai.11 Ewe manaman ne opungano meinisin an pristut angangepin me fori ar repwe fofo fengen won fonufan me non nang—ewe manamanen riri fengen—ina kien ochufengeni me amonata ew aramas pwon won ir me ruepek ewe eppet.
Ekkewe nier me mwan, Moroni a fen fori fateochun ngeni pwe Joseph Smith pwe Elijah epwe wato ekkewe auchean mumutan pristut: “Upwe pwar ngenikemi ewe Pristut, seni pou Elijah ewe soufos.”12 Joseph Smith a awewei mwirin: “Pwata tinato Elijah? Pokiten i a amochu ekkewe kien mumuta ne fori ekkewe angangepin ren ewe Pristut; me [tiwenon chok] ewe mumuta a kawor, ekkewe angangepin resap tongeni fis angangan non pung,”13ika ina, ekkewe angangepin resap pung non fansoun me fein feino.14
Non eu afanafan iei mi fat non kewe pukefel non ewe Doctrine and Covenants, ewe Soufos a apasa: “Enip epwe nikinikin uwekisin pochokun ngeni ekkoch mine sia kapas usun—eu manaman mine mi afat ika ririfengen non fonufan me ririfengen non nang. Inamo, non meinisin ierin ewe fonufan, inet chok ewe Samon a fen awora ew kinikinin fansoun ren ewe pristut ngeni ese nifinifin aramas seni ennetin pwarata, ika ese nifinifin sokkun mwan, ei manaman a kawor iteitan. Ina minne, met ekkewe mwan ra fori non mumuta, non iten ewe Samon, me fori ren ennetin me nikitu, me isoni ew pungun me nikitun rekotun pwan ewe chok, a winiti ew annuk won fonufan me non nang, me ese tongeni epwe kouno, anongonong ngeni ewe annukun ewe Jehovah mi napanap.”15
Sia soun ekieki ussun ewe mumutan riri fengen ussun a fis ngenii chok ekkoch angangepin non tempel, nge ena mumuta mi auchea ne fori angangepin a murino ngeni me ochu fengeni mwirin mano.16 Ewe manamanen riri fengen a awora ew ririn pungoch won ami papatais, ren awewe, pwe epwe sinnino ikei me non nang. Omuchunon, meinisin angangepin ren pristut ra fis fan kiien ewe Presetenin ewe Mwichefen, me usun Preseten Joseph Fielding Smith a awewei: “I [ewe Presetenin ewe Mwichefen] a ngeni kich mumuta, i a wanong ewe manamanen riri non ach pristut, pokiten i a amochu ekkena kii.”17
Mi pwan wor ew auchean popun non ewe ion fengenin Israel ewe a wor auchean wewen nupwen sia porous ussun riri fengen won fonufan me non nang—ina ewe koutan me angangen ekkewe tempel. Ewe Soufos Joseph Smith a aitikich: “Met ewe popun ewe ionfengenin ekkewe … noun Kot kewe aramas non och fansoun ewe fonufan? … Ewe popunapen pwe epwe kauta ngeni ewe Samon ew imw ikewe ia I a tongeni pwarata ngeni noun aramas ekkewe angangepin ren Imwan me ningan An we muu, o aiti ekkewe aramas ewe aanen amanau; pun mi wor ekkoch angangepin me annuk pwe, nupwen ra kaeo me achocho ngeniir, mi namwot pwe repwe fis non ew neni are imw mi kauta ngeni ena popun.”18
Ewe pungun pwe ewe manamanen riri fengen a kawor ngeni angangepinen pristut a pachenong, ewer, angangepin fan iten emon a fis non ewe neni a kefinita seni ewe Samon—An tempel. Ikei sia kuna ewe amwararen me pinin ewe manamanen riri fengen—a fori ew me ew angangen amanaua me manau tekia an famini epwe kawor ngeni ekkewe semirit noun Kot ian me inet ra nom ian won fonufan. Ese pwan wor ew sukunen Kot ika nuku ika mumuta a tongeni nonno ngeni ei sokkun unusen tufich. Ei manamanen riri fengen ina ew unusochun pwaratan ewe pungoch, umoumoch, me tong an Kot.
Fiti mumuta ngeni ewe manamanen riri fengen, netipach ra pusin kun ngeni ion kewe ra fen mano. Ewe ioi fengen ren fansoun soponon non ewe annuk mi pin mi pachenong ekkewe ra mano. Non ewe unusochun etetten an Kot, ekkewe mi manau rese tongeni sinei manau ese much non unusochun ika rese forata ew akoko ngeni “ekkewe semen,” ach kewe neuo. Ussun chok, ewe fefefita ren ekkana ra fen mano, ika ekkewe repwe pwan feinno non ewe eppetin mano me nukun ewe tufichin riri fengen, ese unus tori angangep an iten mi mano repwe ochu fengenir ngeni kich, mwirimwirir, me kich ngenir non ewe tetten mi murinno.19 Ewe mochenin aninis fengen me epek ewe eppet a tongeni nom non tetenin ew pwon mi pin kinikinin ewe minefon me pwon ese much. Non an Joseph Smith porous, sia mochen sipwe “ri fengeni ach mi ma repwe feitto [fiti kich] non ewe aewin manausefan.”20
Ewe pwarata mi tekia me pin usun manamanen riri fengen a nom non ewe chufengenin emon mwan me fefin non opupunu me ewe akoko fengenin aramas seni meinisin tappin aramas. Pokiten ewe mumuta ne emwen non ekkei angangepin mi fokkun pin, ewe Presetenin ewe Mwichefen a pwisin ewisa ngeni ekkoch. President Gordon B. Hinckley a apasa fan ew, “Ua fen apasa fan chommong pwe ika ese pwan wor met a tou seni meinisin ekkewe netipengaw me aweiresin me metekin ewe niwinsefanito nap seni ewe manamanen ririfengen an ewe pristut mi pin ne ochufengeni ekkewe famini feinfeino, epwe fen namot riaffoun we.”21
Ika ese wor ewe riri fengen ewe a forata famini fochofoch me akoko nefinen tappin aramas ikei me mwirin, sipwe poutuno fochofoch esap wor waran ika panan, esap pwan wor mwirimwiwrich ika tapin aramas. Iei ei ese posetiw, nonomun emon aramas mi pichino, nge pwan ew, ika ekkewe akoko rese mochen anneasosichi ewe apupunu me marar nefinen famini Kot a fen finata,22 won ekkewe ekkoch, repwe atano ewe ennetin popun an fonufan foruta. Ika ena epwe winiti met mi fifis, epwe nonno ngeni ewe fonufan a feiengaw ren onumamau ika “unusen namotongaw” non ewe fansoun ewe Chon Amanau epwe feito.22
Sia tongeni kuna pwata “pupunu nefinen emon mwan me emon fefin a finita meren Kot me ewe famini mi ionapei an ewe Chon Fori kokkot fan iten fetanin manauen noun kewe semirit ese much.”23 Ren pwan chok ewe fansoun, sia esina pwe non ewe fansoun iei ese unusoch, iei esap ewe ennetin ika fen ew wesewesen tufich ren ekkoh. Nge a wor ach epinukunuk non Kraist Nupwen sia uti ewe Samon, President M. Russell Ballard a achema neni kich pwe “pukefel me soufos non fansoun soponon ra apungano pwe meinisin ion a nikitu non an aponueta ekkewe pwon mi pin ren ewe kapas allim repwe ani ewe tufichin manau fefeita.”24
Ekkoch ra fen mefi netipengaw me apwangapwang nonnomun famini me mefi ekis mochenin chiechien famini fochofoch. Elter David A. Bednar a fori ei pesepes: “Ngeni ion a pin sinei ewe metekin mokur ren mufesenin pupunu non ami famini ika mefi ewe weiresin atai ewe annuk, kose mochen chemeni [pwe an Kot tettenin famini] a fen poputa meremw! Ew akoko non ewe seinen om kewe tappin aramas meni epwe ne fen tano, nge ewe pwan akoko mi tupwen me met nusun ewe sein mi chok auchea fochofoch. Ouwa tongeni apachata pochokun ngeni ami ewe sein me meni fen pwan aninis ne forsefani ekkewe akoko ra tano. Ena angang epwe taweno ekis me ekis.”25
Non ewe angangen peias ren Sister Pat Holland, punuwen Elter Jeffrey R. Holland, non ewe July a no, Preseten Russell M. Nelson a afanafana: “Non fansoun, Patricia me Jeffrey repwe chusefan. Mwirin repwe chusefan ren nour kewe semirit me mwirimwirir kewe mi apwonueta kewe pwon ar repwe weri ewe unusen pwapwa Kot a fen iseni non nenien iseis fan iten Noun semirit mi nikitu. Ren ach sinei ena, sia weweiti pwe ewe akaewin auchean ran non manauen Patricia esap an ewe ranin uputiw ika ranin mano. An ewe ran a kon auchea June 7, 1963, nupwen i me Jeff ra riri fengen non ewe St. George Tempel. … Pwata ei a koon auchea? Pokiten ewe wesewesen popun fonufan a foruta pwe ekkewe famini repwe tongeni fisita me riri fengen. Angangen Amanaua ew an emon me emon angang, nge manaw tekia ew an famini angang. Ese wor emon epwe tongeni anamon ne manau tekia.”
Ese mo pwenino, punuwei we me ngang am ouwa fiti emon chiechiem achengicheng non ew rumwen riri non ewe Bountiful Utah Tempel. Ewin ai karan churi chiechiei ei nupwen neminewe a emon semirit non Córdoba, Argentina. Chienei we non ai we misineri me ngang am ouwa porous ngeni aramas non ew neni ekis chok towaw seni ewe ofesin misin, me neminewe a suki ewe asam nupwen am ouwa feitto ngeni imwan ewe. Non ew fansoun, neminewe me inan ewe me pwin me mongean ra choni ewe Mwichefen me ra fokkun nikitu. Neminewe a emon fefin nioch, me ei ran am oua nom non ewe tempel ren am oupwe ri fengeni saman me inan kewe ra mano mwirin ri fengenir ngeni neminewe.
Ew pean pupunu ra winiti chiechian non ewe ier ra tupunu saman me inan kewe ren ewe antare. Ewe fansoun a fokkun fansoun memefin tong fiti kechiw ewe a winiti unusen murinno nupwen chiechiem ewe fin Argentina a riri ngeni saman me inan kewe. Am ouwa chok onomon neim am ouwa nom non ewe mosonosonen anowasun a fokkun sokono, iwe nge ew me nein ekkewe auchean mettoch ewe a fis won fonufan a fen fis. Ua kinisou pwe wisei me ai chiechi fengen a unusono kunun fetanin seni fichifich won asaman neminewe ewe ussun emon onuon misineri ngeni iei, ekkei chommongun ier mwirin, ua fori angangepinen riri fengen ewe a akoko ngeni inan me saman kewe me tetenin aramas me akkom.
Iei ew fofor a fis iteitan non unusen fonufan non ekkewe tempel. Iei ewe omuchunon ipweipwan non ionfengeni ekkewe aramas pwon. Iei ewe akauchean tufich in ami choni ewe Mwichefenin Jises Kraist. Ua pwon pwe nupwen oupwe nikitu ne kukuta ena auchean tufich, non fansoun ika fansoun ese much epwe fokkun om.
Ua pwarata pwe ewe manamanen riri fengen me mumuta a niwinsefanito fonufan seni Joseph Smith mi wesewesen ennet, pwe met a chufengen me fonufan a pwan ennetin chufengen me non nang. Ua pwarata pwe Preseten Russell M. Nelson, ewe Presetenin ewe Mwichefen, i ewe emon mwan won fonufan ikenai minne seni an kii a emweni aean ei pochokunen manaman. Ua pwarata pwe ewe Achasefan an Jises Kraist a fori manau fochofoch ew ennet me ewe tufichin manau tekia nefinen famini a wesewesen pung. Non iten Jises Kraist, amen.