Famini mi Pwon
Seni Preseten Henry B. Eyring
Aewemonun Chon Aninis non ewe Aewin Presetensi
Ese wor met mi fen tonong are epwap tonong non ami famini mi auchea nap seni ekkewe feiochun riri fengen.
Ua kinisou pwe ua tongeni chufengen remi non ei mwich minne chon an Kot we pristut meinisin won fonufan mi tongeni fiti. Sia feioch pwe Preseten Thomas S. Monson a nemeni kich. Pwe i Presetenin ewe Mwichefen, i ewe emon chok mwan mi manau mi wisen angei ekkewe kiien ririfengeni famini me pwan meinisin ekkewe efeiochun pristut mi namwot ne angei manau ese much, ewe feiochun Kot mi napanap.
Mi wor emon sam a ausening nepwinei mi pochokununo sefan pokiten a mochen angei ena niffangen ririfengen ren unusen netipan. Ir me punuan we ra tongei nour kewe ruemon, emon at me emon nengin. Usun chok pwan ekkoch a tongeni kuna pwapwa non pekin nang nupwen a annenani ekkei kapas pwe ach chiechi non ei manau epwe fis non an manau, chinon chok epwe wor ach ning ese much, minne sise mo apwapwaiti iei.1
Ena sam mi ausening rech nepwinei a sinei ewe an ngeni ena neni mi ning. Ese mecheres. I a fen sinei. Mi namwot nuku non Jises Kraist, ennetin aier, me ekkesiwinin netipan mi fis me ren aninisin emon pisop pwe epwe mefi an ewe Samon omusomusen tong.
Ekkesiwin mi amwarar a fis nupwen a feino ngeni ewe tempel mi pin ren eu feioch minne ewe Samon a awewe ngeni ekkewe ir A ewisa ngeni me non ewe aewin tempel non ach fansoun. A fis non Kirtland, Ohio.
Ewe Samon a annuku ngenir ne feino ngeni Ohio. Epwe ngenir an annuk me repwe feioch ren manaman seni nang me ikkewe.
Repwe feino seni ena neni, pokiten a wor An angang mi napanap fan iten ekkewe Sounang, ne amanaua Israel. Epwe emwenir ia A mochen repwe feino ia, me ese wor met a tongeni eppeti I.2
Fan iten chienei we a pochokununo me fan iten meinisin chon pristut, eu angang mi nap epwene fis ina ne emwen non amanauen ewe kinikinin Israel minne sia wisen amanaua, ach kewe famini. Chienei me punuan we ra sinei pwe a anamwota ririfengen me ren ewe manamanen Pristut seni Melkisetek non an Kot tempel mi pin.
A tingoreiei pwe upwe wisen ririfengenir. Ir me punuan we ra mochen epwe muttir fis. Nge ren osukosuken kokkoten mwichenapen mwichefen, ua mut ngenir me ar we pisop ne kokkot fengen ren ai chon aninis ne fini ewe ran mi och.
Ua fakkun mairu me pwapwa nupwen ewe sam a ereniei non fan pwe ewe ririfengen epwe fis non April 3. Ina ewe ran non 1836 nupwen Elijah, ewe soufos mi siwin, a feino ngeni ewe Tempel non Kirtland ne efeiochu Joseph Smith me Oliver Cowdery ren ewe manamanen ririfengen. Ekkena kii mi nom non ewe Mwichefen ikenai me epwe sopweno tori muchenon fansoun.3
Ina ewe chok mwumuwtan nang seni ewe Samon ngeni Peter usun A pwon: “Upwe ngonuk ekkewe kien Muun nang, iwe minne kopwe fotekni won fonufan epwe fotek me won nang o minne kopwe epichano won fonufan epwe pichino me won nang.”4
Ewe niwinsefaniton Elijah a efeiochu meinisin chon pristut. Elter Harold B. Lee a afata nupwen a kapas non mwichenapen mwichefen, anon Preseten Joseph Fielding Smith. Oune auseningoch: “Ua angei ewe pristut; ami kana mwan ikkei oua angei ewe pristut; sia angei ewe Pristut seni Melkisetek—minne Elijah me ekkoch soufos me Peter, James, me John ra pwan angei. Nge ina mo a wor ach mwumwutan papatais, ach mwumwutan isetta pau won mokur ren niffangen ewe Ngun mi Fel me efeiochu ekkoch me fori ekkei mettoch meinisin, ika esap punun ewe manamanen ririfengen sise tongeni fori och mettoch, esap wor pungochun met sia fori.”
Preseten Smith a sopweno:
A sopweno: “Ekkewe feioch mi tekia, feioch mi napanap minne mi namwot ren manau ese much non ewe muun Kot, minne mi chok tongeni angei non ekkoch neni, ese wor emon a pungun fori chinon chok a wor an mumuta ne fori seni ewe emon a angei ekkewe kii. …
“… Ese wor emon mwan won ei fonufan mi pungun feino me fori ekkewe efeiochun ei kapas allim chinon chok ewe Presetenin ewe Mwichefen, minne a angei ekkewe kii, a mutata. A ngenikich mwumwuta, a ngenikich ewe manamanen ririfengen non ach pristut pokiten a angei ekkena kii.”5
Ekkena chok kapas a feito seni Preseten Boyd K. Packer nupwen a mak usun ewe manamen ririfengen. Ai sinei ekkei kapas mi ennet a awora ngeniei kinamwe, usun chok ewe famini upwe ririfengeni won April 3: “Peter epwe angei ekkewe kii. Peter epwe angei ewe manamanen ririfengen ne ririfengen won fonufan are epichi won fonufan me epwe ina usun won nang. Ekkena kii mi nom ren ewe Presetenin ewe Mwichefen—ngeni ewe soufos, chon oesini, me chon pwarata. Ena manamanen ririfengen mi pin mi nom non ewe Mwichefen iei. Ese wor met mi pinino me ren ekkewe ir mi sinei auchean ei mwumwuta. Ese wor met mi tutumunu nap seni ei. Mi wor ekkoch chok mwan mi [angei] ei manamanen ririfengen won ewe fonufan non eu fansoun—non tempel meinisin mi wor mwan mi angei ewe mwumwutan ririfengen. Ese wor emon epwe angei chinon chok seni ewe soufos, chon oesini, me chon pwarata me Presetenin Ewe Mwichefenin Jises Kraist ren Aramas mi Pin non Fansoun Soponon.”6
Feiton Elijah a awora ewe manaman ngeni ewe pristut nge netipen aramas repwene pwan siwin: “Ewe ngunun, manamanen, me kokkon Elijah mi, pwe ika a wor om manamanen angei ewe kiien pwarata, feioch, manaman me feiochun unusen ewe Pristut seni Melkisetek me ewe muun Kot won fonufan; me angei, me fori meinisin ekkewe feiochun ewe muun Kot, tori epwe okunnu netipen ekkewe sam ngeni nour kewe, me netipen ekkewe semirit ngeni semer, pwan ekkewe ir mi nom won nang.”7
Ena memefin netipan mi kun a fen fis ngeni chienei me chon an famini. Meni a fis ngonuk non ei mwich. Meni ka kuna non tupuwom, ussi chok, mesen semom are inom. Meni fefinom are pwium. Meni emon noum we nengin are at.
Meni ra nom non ewe nenien ngun are won ekkoch fonu mi touau. Nge pwapwa a feito seni om mefi ami ririfengen rer mi ennet pokiten oua ririfengen rer are oua tongeni ririfengen rer seni efeiochun pristut minne Kot epwe apwonueta.
Chon ewe Pristut seni Melkisetek mi pwan sam non famini mi ririfengen ra kaeo met repwe fori. Ese wor met epwe fis are met a fen fis non om famini mi auchea usun ekkewe feiochun ririfengen. Ese wor met mi auchea nap seni sufoniti ewe pupunu me pwonen famini oua fen fori are oupwene fori non an Kot kewe tempel.
Mi fatoch ewe an. Ewe Pwonen Ngun mi Fel, epwe ririno ach pwonen tempel pwe sipwe angei non an fonufan, me ren ach anneasochis me asor. Preseten Harold B. Lee a awewe met wewen ne ririno me ren ewe Pwonen Ngun mi Fel, a aea kapasen Elter Melvin J. Ballard: “Sia tongeni otupu aramas nge sise tongeni otupu ewe Ngun mi Fel, me ach kewe feioch repwe much chinon chok ra pwan ririno me ren we Pwonen Ngun mi Fel. Ewe Ngun mi Fel mi emon a sinei netipen me ekiekin aramas me a awora an tipeu ngeni ekkewe feioch mi isoni fan iter. Mwirin a ririno, mi tufich, me ennet epwe fis.”8
Nupwen am me Sister Eyring aua ririfengen non ewe Logan Utah Tempel, use weweiti unusen auchean ena pwon. Ua chuen achocho ne weweiti met wewen, nge am me punuei we aua poputa ukukun am 50 ierin apupunu ren am tingorei ewe Ngun mi Fel non manauem me non am famini.
Nupwen ua keran emon sam, minne ua ririfengen me non ewe tempel me netipei a kunu ngeni punuei we me am famini, ua akkaewin churi Preseten Joseph Fielding Smith. Non ewe rumwen ewe Aewin Presetensi, minne ua fitanong, a ennetin pwarata ngeniei nupwen Preseten Harold B. Lee a eisiniei, usun Preseten Smith, pwe a momot unukun, “En mi nuku pwe ei mwan a tongeni ewe soufosen Kot?”
Preseten Smith a keran tonong non ewe rumw me ese mo kapas. Ua ennetin kinisou pwe ua tongeni pwonueni pokiten met a tonong non netipei: “Ua sinei.” me ua ennetin sinei usun chok ua sinei ewe akkar a tin pwe i a angei an ewe pristut manamanen ririfengen fan iten meinisin chon fonufan.
Ena fansoun a awora manaman ngeni an kapas fan iten am me punuei we nupwen, non eu mwichenapen mwichefen won April 6, 1972, Preseten Joseph Fielding Smith a apasata ei kapasen aurour: “Mi netipen ewe Samon ne apochokuna me tumunu ewe famini. Aua tingorei ngeni sam ne wisen nemeni ewe imw. Aua tingorei ngeni in ne etiwa me apochokuna punuer me repwe nenien appiru ngeni nour kewe semirit.”9
Upwe apasata ruanu mettoch oua tongeni fori pwe emon sam chon pristut ne ekieta me emweni om famini ne niwinsefan ne nonnom ren Semach won Nang me ewe Chon Amanau.
Akkaewin, kopwe angei me tumunu ennetin pwarata pwe ekkewe kiien ewe pristut mi nom rech me ewe Presetenin ewe Mwichefen. Kopwe iotek ren ena iteitan ran. Pwonuan epwe feito ren napananon om mochen emweni om famini, non memefin epinukunuk, me wattenon pwapwa non om angang. Kopwe pwan pwapwa me nenneta, efeioch mi nap fan iten punuom me om famini.
Oruan ne tongei punuom. Mi namwot nuku me tipetekison ne aucheani an mochen nap seni pwisin om . Mi wor wisemi ne awora me tumunu ewe famini nupwen oua angang ngeni ekkoch. Mi tongeni anamwota meinisin ami pochokun.Ierin chinnap fiti samau a tongeni awatteno namwoten punuom. Ika ka fini ne aucheani an pwapwa nap seni pwisin om, ua pwon pwe om tong fan itan epwe watteno.
Aunungatin, kopwe tingorei aninisin unusen ewe famini ne tong fengen nefinemi. Preseten Ezra Taft Benson a afanafana:
“Non pekin fansoun ese much, manau ese much mi eu wisen famini. …
“Nap seni meinisin, mi namwot semirit repwe sinei me mefi pwe oua tongeir, aucheanir, me kinisou ngenir. Mi namwot repwe sinei fan chommong. Iwe, iei wisen sam me in, me napengeni ewe in mi angoch ne fori.”10
Nge pwan eu popunapen mefi tong ina tong seni pwan ekkoch semirit non ewe famini. Tuttumunu seni pwii fan iten emon me emon epwe fis ren akkachocho me ren sam me in me aninis seni Kot. Oua sinei pwe mi ennet seni pwisin ami famini. Me iteitan fansoun oua anneani usun ewe osukosuk minne Lehi me punuan we mi wenchear, Sariah, ra weri, me non ewe Puken Mormon.
Ekkewe feioch ra angei mi awora eu emwen fan itach. Ra afanafanochu ewe kapas allimen Jises Kraist iteitan minne netipen semirit me pwan netipen ekkoch tettenin nour kewe a pweteteno ngeni Kot me nefiner fengen. Ren awewe, Nifai me pwan ekkoch ra makkei me eitau pour kewe ngeni chon famini ra fen chon u ngenir. Ewe Ngun mi Fel a apweteteno netipen fitu ngerou aramas me a ekkesiwini oput ren tong.
Eu napanapen ami oupwe for sefanni feiochun Lehi ewe Sam ina seni napanapan oua emweni iotekin famini me fansounen famini, usun chok pwinin famini. Kopwe ngeni semirit tufichin iotek nupwen ra tongeni iotek fan iten ekkoch neir mi namwot feioch. Kopwe muttir sinei nepoputan anini me kopwe esisinnata fofforun angang ngeni ekkoch, me angang fengen. Nupwen ra iotek fengen me angang fengen nefiner, netiper repwe pwetete me repwe kunu fengen me ngeni semer me iner.
Ewe aruanuan tufichin emweni om famini non napanapan ewe Samon a feito nupwen mi namwot apungu. Sia tongeni apungu ir non napanapan ewe Samon me emweni nouch kewe ngeni manau ese much.
Kopwe chechemeni ekkewe kapas, nge meni kese mo kuna ar manaman faniten emon chon ewe Pristut seni Melkisetek a ammonata an famini ren ar repwe manau usun chok non ewe muun selestial. Oua chechemeni ekkewe kapas. Ra fakkun itefouno:
Ese wor manaman are pesepes epwe nemeni ewe pristut—chinon chok tipetekison, pwetete, me tong ese much;
Kirokiroch, me ennetin mirit, minne epwe anapano ewe ngun ese wor nikotuputup—
Sipwe apungu ren pochokun, nupwen mi emwen seni ewe Ngun mi Fel; me mwirin sipwe pwarata tong ngeni i minne sia apungu, pwe ete ekieki pwe kich chon koum ngeni;
Me pwe ekkewe ir sia apungu repwe sinei pwe ach nukuchar mi pochokun nap seni mano.11
Me mwirin a feito ewe pwon mi watte auchean fan itach sam non Saion: Ewe Ngun mi Fel epwe chienach iteitan, me ach ketinas minen wenechar me ennet. Ach manaman epwe ach manaman ese much, me ach manaman epwe sopweno nge esap seni echimw.”12
Mi tekia ena nongonong fan itach, nge nupwen sia nemeni ach ekiek me ach namanam tekia me ren nuku, ewe Ngun mi Fel A tipeu ngeni, me pwon mi pin ra ennetin fis.
Kopwe feioch me ren om nuku pwe ewe Samon a tinato ekkewe kiien ewe pristut minne mi nom rech—ren ennetin chufengenin tong ren punuom, ren an ewe Samon aninis ne okunnu fengeni netipen noum kewe me ngeni semer me iner, me ren tong a emwenuk ne apungu me awora pesepes non eu napanap a etiwatiwochu ewe Ngun mi Fel.
Ua sinei pwe Jises mi ewe Kraist me ach Chon Amanau. Ua kapasen pwarata pwe Preseten Thomas S. Monson a angei me a aea meinisin ekkewe kiien ewe pristut won fonufan ikenai. Ua tongei me apochokunata i. Ua tongei me iotek fan itemi. Non iten Jises Kraist mi pin, amen.