Ewe Popun Angangen Pristut
Seni Preseten Dieter F. Uchtdorf
Oruan Chon Aninis non ewe Aiwen Presetensi
Weweiti ewe popunen ewe kapas allim me ewe popunen ewe pristut epwe anisikich ne kuna popunapen non pekin nang.
Ua aucheani ewe tufich mi amwarar ne chufengen ren pwi kewe chon ewe pristut me fiti kemi ne pwapwaiti amwararan me ningan ewe kapas allimen Jises Kraist. Ua mwareitikemi ren ami nuku, angangoch, me wenechar.
Kich meinisin mi chiechifengen pokiten kich meinisin mi fen angei an Kot we pristut seni ekkewe mi nom rer ewe mumutan me manamanen ewe pristut mi pin. Ei esap eu kukun feioch. A eu wis mi fokkun pin.
Ewe Manamanen Popun
Non ekkei fansoun ua ekieki usun ru wis mi auchea ua angei nupwen ua emon chon komoch ewe pristut non ewe Mwichefen.
Aiwen nein ekkei wis a feito nupwen ua emon tiken. Ua fiti fan ren ai famini non eu pranchen ewe Mwichefen non Frankfurt, Germany. Aua feioch pun mi wor chommong aramas mi murino non am pranch. Emon me neir i ewe presetenin pranch, Pwich Landschulz. Ua ingeiti i, ina mo pwe a usun ese urumot, me napengeni a ufouf ren echo suit mi chon. Ua chechemeni nupwen ua emon anuon ua urumot ren chienei kewe pwe am we presetenin pranch a nikinikinin ekkewe chon nom.
Iei ua takir nupwen ua ekieki usun ei pokiten ren chommong mettoch naman ekkewe serafon ewe Mwichefen ikanei ra ekieki pwe ua pwan usun chok ai we presetenin pranch.
Won eu Raninifel, Preseten Landschulz a tingor an epwe kapas ngeniei. Akkom ua ekieki, “Met ua fori mi mwan?” Ua ekieki usun ekkewe mettoch ua fori mi tongeni efisi ei chufengen ne poraus nefinen emon presetenin pranch me emon tiken.
Preseten Landschulz a tingor pwe upwe tonong non eu kukun rum—ese wor eu ofisin ewe presetenin pranch non am imwen fan—ikewe a kokoriei pwe upwe wisin presetenin ewe mwichen tiken.
“Ei wis mi fokkun auchea,” a apasa, me a awewei ngeniei pwata. A wewe ngeniei met i me ewe Samon ra mochen upwe for me ifa usun ua tongeni angei aninis.
Use chechemeni meinisin met a apasa nge ua fakkun chechemeni met ua mefi. Ua nuokus nge eu Ngun seni nang a urano netipei nupwen a kapas ngeniei. Ua mefi pwe iei ewe Mwichefelin ewe Chon Amanau. Me ua mefi pwe ewe koko a feito pokiten pwarata seni ewe Ngun mi Fel. Ua chechemeni pwe ua mefi usun ua ekkis tamano nupwen ua tou seni ewe rum.
A fen 60 ier seni ena ran, me ua chok aucheani ekkewe memefin nuku me tong.
Nupwen ua ekieki usun ei poraus, ua achocho ne chechemini fitemon tiken mi nom non am pranch non ena fansoun. Ua nuku pwe mi wor ruemon. Nge, naman ei a fen nuseni met mi ennet.
Nge ese nifinifin mi wor emon chok ika engon me ruemon, ua mefi pwe ua feioch, me ua mochen wesen achocho pwe usap enichipungu ai we presetenin pranch ika ewe Samon.
Iei ua sinei pwe ewe presetenin pranch a tongeni chok kokoriei nge esap ekieki usun nupwen a kokoriei ngeni ei wis. A chok tongeni ereniei nukunapen ekkewe rum ika non am mwichen pristut pwe ngang upwe ewe minafon presetenin ewe mwichen tiken.
Nge ese fori ena, a awora fansoun fan itei ne anisiei ne weweiti esap chok met ai angang me wisei minefo nge, met mi pwan auchea ina popun ewe wis.
Use tongeni monuki ena mettoch.
Ewe popun ei poraus esap ne chok awewe ifa usun ne awora kokko non ewe Mwichefen (ina mo iei a eu nesen mi och won napanapan ifa usun ne fori). Mi eu nenien appiru ngeniei usun ewe manamanen souemwenin pristut mi anena ewe ngun me a amokutu emon ngeni foffor.
Fansoun meinisin sipwe chechemeni ekkewe popun ese much pwata sia fori ekkewe mettoch sia angei annuk pwe sipwe fori. Mi namwot pwe ekkewe nongonongen ewe kapas allim repwe eu kinikinin manauach, sipwe kaeo fan chommong. Ese wewen pwe epwe tipingau. Nge, nupwen sia aiti ekkewe nongonong non imwach ika non fan, sipwe mut ngeni ach pwapwa ren ewe kapas allim me ewe ekkei an ach kapasen pwarata ne awora saram, pwichikar, me pwapwa ngeni netipan ekkewe sia aiti.
Seni ewe minafon tiken ngeni ewe prist tekia mi watte ierin, kich meinisin mi wor chommong mettoch sipwe fori non wisach non ewe pristut. Ekkewe mettoch mi auchea non ach angang, mi namwot sipwe fori. Nge me non ekkewe popunen angangen pristut ena sia tongeni kuna ewe mochen me pochokunen met sia fori.
Ewe popun a amwasanga ngunuch me a epinano ach angang. Ewe pwata a pesei ngeni ngunuch.
Ewe popun a esinei, nge ewe pwata a ekkesiwini.
Chommong Mettoch mi “Murino” ne Fori
Pwan eu wisen ewe pristut ua ekieki usun a feito ngeniei chommong ier mwirin nupwen mi fen wor pwisin ai famini. Aua fen niwin ngeni Frankfurt, Germany, me ua keran angei eu wis non ai nenien angang epwe anomota chommong ai fansoun me ekiek. Non ei fansoun mi fokkun osukosuk, Elter Joseph B. Wirthlin a kokoriei pwe upwe emon presetenin steik.
Non ai interfiw ren i, ua ekieki usun chommong mettoch, eu me neir ua nuokus pwe esap naf ai fansoun ne fori ei wis. Ua mefi tipetekison me feioch ren ei koko, nge ua ekieki ika upwe tongeni etiwa ei wis. Nge ena ekiek mi chok mochomoch pokiten ua sinei pwe Elter Wirthlin mi koko seni Kot me a fori ewe angangen ewe Samon. Met ua tongeni fori tiweon ai upwe etiwa?
Mi wor ekkoch fansoun nupwen sipwe tonong non rochopwak ren nuku, sia apinukunuk pwe Kot epwe emweni kich nupwen sia fofor ren nuku. Iwe ua etiwa, pwe ua sinei pwe Kot epwe anisiei.
Non ekkewe ran nupwen ua poputa ewe wis, am steik mi tufich ne angei emwen seni fitemon sensei me chon emwen mi napanap non ewe Mwichefen—ekkoch mwan usun Elder Russell M. Nelson me Preseten Thomas S. Monson ra feito ngeni neniem. Ar afanafan mi usun eu feioch seni nang me a amwasanga netipem. Ua chuen anomu ekkewe mettoch ua makei non ekana mwich. Ekkei Mwan ra aitikem met a wewen ne forata ewe muun Kot me ren ar kouta kapasen pwarata me apochokunata famini. Ra anisikich ne kuna ifa usun aupwe anganga ennetin me nongonongen ewe kapas allim ren nonnomuch me non ena fansoun. Ne apasa sefan, ekkewe chon emwen mi anisikem ne kuna ewe popun ewe kapas allim, me mwirin aua feino angang.
Esap fansoun nangatam me mwen aua weweiti pwe mi wor chommong mettoch eu presetensin steik mi tongeni fori—fokkun chommong, ennet, ika ause finata met mi aucheanap, repwe nu senikem ekkewe ir mi auchea. A poputa pwe mi wor chommong mettoch mi auchea, me ra siwini am ekiek seni ewe kokot aua angei seni Pwich kewe. Mi wor chommong mettoch mi “och” ne fori, nge ir meinisin rese auchea.
Aua kaeo eu nesen mi auchea: ika eu mettoch mi murino ese wewen pwe mi namwot sipwe aea ach fansoun me tufich. Ach mokutokut, me kokot repwe emwen seni me anonga won ekkewe popunen ach angangen pristut nge esap seni fisitan fonufan. Ika ese ina usun, ra tongeni siwini ach achocho, akukunatiw ach pochokun, me sia tongeni chok ekieki usun ekkewe mettoch sia sani, non pekin ngun are inis, minne, rese nom nukunapan manauen emon chon kaeo.
Pwi kana, sia sinei pwe mi namwot ach sipwe nemeni ach mochen pwe sipwe ekieki usun ekkewe mettoch mi tongeni anapano ach tongei Kot me aramas meinisin, apochokuna pupunu, apochokuna famini, me kouta ewe muun Kot won fonufan. Usun efoch iran foun ira ren chommong panan me chon ira, mi namwot sipwe puku ekkoch panan pwe sipwe tumunu pwe sia aea ach pochokun me fansoun ne angang won ewe ennetin popun—ne “awora foun ira och”!1
Kese Anemon Chok
Iwe ifa usun sipwe sinei met sipwe finata? Wisach meinisin pwe sipwe pwisin finata met mi auchea. Iwe nge, a annuk ngenikich pwe sipwe kakaeo ekkewe pukfel, anneasochisi kapsen ekkewe soufos, me wesen ekieki me iotek usun, fiti nuku.
Pwii kana, Kot epwe aponueta an kewe pwon. Me ren ewe Ngun mi Fel, epwe kapas non ach ekiek me netipach usun ewe aan sia finata non eu me eu kinikinin manauach.
Ika netipach mi nimenimoch—ika sise kuta ach pwisin ning nge fen ningen Sam mi Napanap, ika sia achocho ne fori netipan, ika sia mochen efeiochu manauen ach famini me aramas meinisin—sisap anemon ne fetan. Usun Preseten Monson a achema ngenikich, “Nupwen sia fori ewe angangen ewe Samon, ewe Samon epwe anisikich.”2
Semom won Nang epwe feino mwen mesom. Epwe nom won peniemwanom me peniefefenom, me Ngunun epwe nom non netipom, me Noun kewe chon nang repwe pwenuk me apochokunok.3
Ewe Manamanen Foffor
Pwi kewe mi acheingicheing, feiochun nang ren angangen pristut mi fis pokiten ach tinikin ne angang, ach mochen asoreno, me ach mochen fori met mi pung. Sipwe ekkewe ir ne foffor ren pwisin ach nge esap wor epwe foffor woch. Afanafan mi murino, nge afanafan ese efisi foffor mi usun ekei nge ese wor pwichikar ika konik ese tongeni awesano kaka.
Nupwen sia anganga ekkewe nongonong, ewe manamanen ewe kapas allim a mamarita me ewe manamanen ewe pristut a amwasanga ngunuch.
Thomas Edison, ewe mwan a fori teinki, a era pwe “eu ekiek mi chok auchea nupwen sia anganga.”4 Usun chok, ekkewe nongonongen ewe kapas allim a anapano auchean nupwen sia anganga.
Sisap mut ngeni ekkewe nongonongen ewe pristut ne chok nom non netipach nge sise anganga non manauach. Ika mi wor eu pupunu are famini mi namot aninis---meni pwisin ach---sisap chok witiwit me katon. Iwe nge, sipwe kinisou ngeni Kot ren ewe kokkoten pwapwa mi masoueni nuku, aier, omusomus, me popsefan minefo. Aean annuken pristut epwe atufichingenikich pwe kich punuen emon, sam, me nau mi weweiti ewe popun angangen pristut me an manaman ne ochufengeni me tumunuochu ningan me pinon famini ese much.
Ewe Mwichenapen Mwichefen mi eu fansoun mi och ngeni rongorong me angang. Iwe, sisap “chok ausening ngeni an kapas, nge [sipwe] apwonueta non [ach] foffor.”5 Pwi kana, ua tingor ngenikemi oupwe ekieki usun ekkewe kapasen noun Kot kewe chon angang non ekei ran. Iwe mwirin oupwe fotupukutiw. Oupwe tingor ngeni Kot, Semach won Nang, ne asarama om ekiek me ku netipom. Tingor ngeni Kot ren emwen non manauemi me wisemi non Mwichefen, me non sossotun ei fansoun. Oupwe tapweno mwirin ekkewe memefin ewe Ngun mi Fel—ousap amanga. Ika oupwe fori meinisin ekkei, ua pwon pwe ewe Samon esap nikitanuk pwe kopwe anemon.
Sopweino non Songomang
Sia sinei pwe ina mo ach sia wesen achocho, fansoun meinisin mettoch rese fis usun sia kokot ngeni. Sia tongeni mwanino non manauach me ach angangen pristut. Fan ekkoch sia turutiw.
Nupwen ewe Samon a erenikich ne sopweno non songomang tori sia unusoch,6 a sinei pwe ese fis iei chok me mi namwot sipwe nikitu ngeni. Ach weweiti ewe popunen ewe kapas allim me ewe popunen ewe pristut epwe anisikich ne kuna ewe popun non pekin nang. Epwe amwasanga me apochokunata kich ne fori met mi pung, ina mo ra weires. Ach ekieki usun ekkewe nongonongen manaueni ewe kapas allim epwe efeiochukich ren fatafatoch, mirit, me emwen.
Sisap feino ren eu popun mi napanap?7 Ewer, pwi kana, sipwe feino!
Nupwen sia angei emwen seni ewe Ngun mi Fel, sipwe kaeo seni ach mwanino. Ika sia turutiw, sipwe pwata. Ika sia mangano, sipwe sopweino. Sisap kouno; sisap fangano.
Kich pwipwi chon an Kot we pristut, sipwe uta fengen, afaren emon ngeni afaren emon, ekieki usun ekkewe nongonongen an Jises Kraist we kapas allim mi niwinsefan me angang ngeni ach Kot me aramas meinisin ren nikitu me tong.
Kot mi Manau!
Pwi kewe mi acheingicheing, ua pwarata ngenikemi pwe Kot ewe Sam me Noun we, Jises Kraist, mi manau. Ir me ennet! Ir mi nom!
Kese anemon. Semom won Nang a tongek me a mochen efeiochuk me apochokunok non wenechar.
Kopwe sinei pwe Kot a kapas ngeni aramas non ach ei fanoun. Epwe kapas ngonuk!
Ewe Soufos Joseph Smith a kuna met a era pwe a kuna. Ewe Mwichefenin Jises Kraist ren Aramas mi Pin non Fansoun Soponon mi niwinsefan ngeni fonufan ren ewe manamanen ewe Kot mi Napanap.
Ai iotek pwe kich chon An pristut, sipwe angang ren ekkewe popunen angangen pristut, me aea ekkewe nongonongen ewe kapas allim mi niwinsefan ne siwini manauach me manauen ekkewe sia angang ngeni.
Nupwen sia fori ei, ewe manamanen ewe Achasefan epwe nimeti, me unusano ngunuch me napanapach tori sia winiti ekkewe mwan sia tongeni winiti. Usun ekkei mettoch ua pwarata fan itan Jises Kraist mi pin, amen.