Ekkesiwin ngeni An Kapas Allim me ren An we Mwichefen

Seni Enter Donald L. Hallstrom

Seni ewe Presetensien ekkewe Fik

Ewe popunen ewe Mwichefen ina ne anisikich ne manaueni ewe kapas allim

Ua tongei ewe kapas allimin Jises Kraist me Ewe Mwichefenin Jises Kraist ren Aramas mi Pin non Fansoun Soponon. Fan ekkoch sia siwini ekkewe kapas kapas allim me Mwichefen, nge rese nonno wewen. Nge ra kanefengen, me ir me ru mi auchea ngenikich.

Ewe kapas allim mi ewe kokkoten Kot mi amwarar, minne, kich noun kewe, mi tufichin angei meinisin mi nom ren ewe Sam (nengeni D&C 84:38). Ei a iteni manau esemuch me an Kot niffang mi nap seni meinisin (nengeni D&C 14:7). Eu kinikinen ewe kokkot mi auchea ena manauach won fonufan, eu fansoun ne awatteno nuku (nengeniMoroni 7:26), ne aier (nengeni Mosiah 3:12), me achasefanikich ngeni Kot (nengeni Jacob 4:11).

Pokiten apwangapwangen inisich ei manau epwe weires, pun epwe wor “apponuen mettoch meinisin” (2 Nifai 2:11) me sise tongeni pwisin nimeti ach tipis, emon Chon Amanau mi namot. Nupwen Elohim, ewe Kot Esemuch me Seman ngunuch meinisin, a pwarata An kokkoten manau esemuch, mi wor emon me neich a era: Ngang iei, kopwe tinieino (nengeni Abraham 3:27). Itan Jehovah.

A uputiw seni emon Sam won Nang, non pekin ngun me inis, mi wor an manaman ne pworacho ngeni fonufan. A uputiw seni emon in seni fonufan, A tongeni mefi metek me riafoun manau won fonufan. Ewe Jehovah mi napanap mi pwan iteni Jises me a pwan angei ei it Kraist, a wewen Messiah ika Emon mi Kefinata. An angang mi napanap ena ewe Achesefan, minne Jises ewe Kraist a feitiw fan mettoch meinisin (nengeni D&C 88:6), pwe epwe tufichin moni tipisin emon me emon kich.

Ewe Mwichefen a for me ren Jises Krais non An angangen afanafan won fonufan, “kouta won ewe nongonong a foruta me ekkewe uwanporon me ekkewe soufos” (Ephesus 2:20). In Non ei sengan fansoun (nengeni D&C 128:18),, ewe Samon a aniwinato met a nom me, a ereni ewe Soufos Joseph Smith, Upwe foruta ai mwichefen ren poum (nengeni D&C 31:7). Non ena fansoun me iei Jises Kraist i mokuren An Mwichefen me soufos, chon kuna, me chon pwarata mi wor ar mumuta ra tupuni i won fonufan.

Ei Mwichefen mi amwarar. Aramas meinisin mi achocho ne weweiti me sufiniti kokkotun, angangan, me ochun ei mwichefen. Ewe Mwichefen mi awora prokramin ekkewe semirit, serafo, mwan, me fefin. Mi wor imwen fan mi ning mi nuseni 18,000. Tempel mi amwarar, iei a tori 136, mi nom won unusan fonufan, me ra kokkota ne fori pwan 30 . Ekkewe misinieri mi nuseni 56,000, seni serafo ngeni chinap, ra angang won 150fonu. An ewe Mwichefen angangen anisi mi osupwang won unusen fonufan mi pwarata kirokirochun ekkewe chon mwichefen. Ach prokramin anisi mi osupwang a anisi ekkewe chon mwichefen me anisir ne anonga won ir pwisin ese pwan wor tapin. Ekkewe sou emwen rese angei moni me ekkewe sounang mi angang fengen non eu napanap mi amwarar. Ese wor tapin ei Mwichefen won unusan fonufan.

Nupwen ua uputiw, am famini mi nom non eu kukun imw nepekin eu imwen fanen ewe Mwichefen seni nom, ewe Honolulu Tabernacle. Iei ua omusomus ngeni chienei non ewe Pisoprik mi Nemeni, ekkewe ra wisin tumunu ekkewe imwen ewe Mwichefen, nge nupwen ngang emon kukun at ua tota won me totiw fan me won unusan ena neni, seni fan ewe nenien konik me pwan ngeni asan won ewe imw non ewe nenien tanki. Aua pwan mwet (usun Tarzan) seni efoch ngeni pwan efoch wuun mi itiw seni ekkewe iran banyan non ewe neni.

Ewe Mwichefen mi auchea ngenikem. Aua fiti chommong mwich, nap seni met sia fiti ikenai. Sia fiti Kinter neanawasen Uruanu. Mwichen Fin Anisi nesesoren Oru. Mwichen Serafo pwinin Anungat. Won Ammon mi wor mokutokuten ewe wart. Won Raninfel ekkewe mwan me anuon ra fiti mwichen pristut nesesor. Nukunapen ewe ran aua fiti Sukunen Raninfel. Mwirin sia pwan niwin nepwin ne fiti mwichen sakrament. Ren ach feino me feito seni mwich mi usun unusan ach fansoun sia aea ren mokutokuten Mwichefen won Raninfel me napengeni meinisin ekkewe ran non ewe wik.

Ina mo ukukun ai tongei ewe Mwichefen, a fis non ekkewe ran nupwen ua emon at, nupwen ua akaewin mefi pwe mi wor pwan och nukun ekkewe mwich. Nupwen ua nimu ieri, mi wor eu mwichenap non ewe imwen fan. Aua fetan won ewe aan seni imwen ngeni ewe imwen fan me aua momot non ewe engonun tenin nenien mot non ewe imwen fan. David O. McKay, Presetenin ewe Mwichefen, a wisin nemeni ewe mwich me a pwan afanafan. Use chechemeni met a era, nge ua weswesen chechemeni met ua kuna me mefi, Preseten McKay a ufouf ren echo suit mi pwech, me mokuran mi pwan pwech a fokkun amwarar. Ren orenien ekkewe fonu ne set, a pwan mwarei efoch mwaren pon ira. Nupwen a kapas, ua mefi eu mettoch mi pochokun. Mwirin ua weweiti met ua mefi ena memefin ewe Ngun mi Fel. Sia konu ewe konun nesoponon.

Ion a fiti ewe Samon? Io?

Iei ewe fansoun ne pwarata.

Ese wor ach nuokus ren ach kapas eis:

Ian a fiti ewe Samon? Ia?

(“Who’s on the Lord’s Side?” Hymns,no 260)

Nupwen 2,000 aramas mi konu ekkana kapas mi usun ra kapas eis ngeni ei, me ua mochen uta me apasa, “Ngang!”

Ekkoch ra ekieki pwe ach sou fiti fan ena met mi aucheanap. Ena sokun ekiek mi efeingau. Mi tufich pwe emon mi sou fiti fan nge a tongeni apwangapwang non ewe kapas allim. Upwe afata: ach fiti fan mi murino; nge, ese naf. Ach fiti fan mi pwarata ach kewe mochen non pekin ngun. Ika sia fiti ach kewe mwich, angei me apwonueta wis non ewe Mwichefen, me angang ngeni ekkoch, aramas ra kuna.

Nge mi sokofesen, ekkewe mettochun ewe kapas allim aramas rese kuna me mi weires ne sinei ukukur, nge ra fen aucheanap non pekin fansoun esemuch. Awewe, ifa watten ach nuku? Ifa watten ach mochen aier? Ifa auchean ekkewe efeiochun Mwichefen non manauach? Ifa watten ach achocho ne aponueta ach kewe pwon mi pin?

Ua aniwini: mi namot ewe kapas allim me ewe Mwichefen. Ennet, popun ewe Mwichefen ne anisikich ne manaueni ewe kapas allim. Sia ekieki: Ifa usun emon a tongeni sou fiti fan nekukunun nge a kouno nupwen ra watte? Ifa usun emon mwan ika fefin a sou fiti a chok kouno ne fiti? Ifa usun emon a netipengau pokiten emon sou emwen ika pwan emon chon mwichefen a awesano ar fiti fan? Naman ewe popun ena pwe rese mo unusen etiwa ewe kapas allim—ekkewe mettochen fansoun ese much.

Upwe pwarata unungat mettoch sipwe fori pwe sipwe kouta won nongonongen ewe kapas allim:

1. Awatteno ach weweiti usun Kot me Jises. Ach sinei usun me tongei ekkewe unumon chon ewe Mokuren Kot mi fokkun auchea. Ennetin iotek ngeni ewe Sam, non iten ewe Nau, me kutta emwen seni ewe Ngun mi Fel. Epwe pwan fiti om sou aneani me ekipwichi, me apochokunata nuku non Jises Kraist. “Pun epwe ifan usun an emon aramas epwe sinei ewe masta … i emon aramas mi touau me ren, iwe, ekkiekin netipan ngeni mi touaueno.” (Mosiah 5:13).

2. Ekieki usun ekkewe efeioch me pwon mi pin. Ika mi wor ekkoch efeioch kese mo angei non manauom, kopwe ammonata ne angeir. Mwirin mi namot sipwe tinikin ne apwonueta ach kewe pwon mi pin, sipwe weswesen aea ewe niffangen angei ewe sakrament iteiten wik. Chommong me neich sise siwin ren an manamanen nimeti pokiten sise sufoniti angangen ei efeioch mi pin.

3. Ochufengeni ewe kapas allim me ewe Mwichefen. Ren ach ekieki ususn ewe kapas allim, ewe Mwichefen epwe awatteno feiochun non manauach. Nupwen sia fiti iteiten mwich me sia ammonata ne kaeo ren ach anneani me pwan fiti nuku (nengeni D&C 88:118), ewe Ngun mi Fel epwe ach sensei. Ika sia feito pwe sipwe pwapwa, sisap angei. Preseten Spencer W. Kimball a kapas eis: “Met kopwe fori nupwen ka fiti eu mwichen sakrament mi atipetipengau?” A poneueni: “Use sinei. Use mo fiti eu mi ena sokun” (Gene R. Cook a makkei, non Gerry Avant, “Learning Gospel is Lifetime Pursuit,” Church News, Mar, 24, 1990, 10).

Non manauach sipwe mochen met a fis mwirin ewe Samon a churi ekkewe aramas non Merika me a foruta An Mwichefen. A mak non ekkewe pukfel: “Iwe, ir meinisin ra fein fetan nein ekkewe aramasen Nifai meinisin, ra afanafana ewe kapas allim an Kraist ngeni aramas meinisin won ewe fonu, iwe, meinisin ra etiwa ewe Samon tori ra mwich fengen non ewe mwichefen an Kraist, iei popun ei tappin aramas ra feioch” (3 Nifai 28:23).

Ewe Samon a mochen pwe chon An Mwichefen repwe unusan etiwa An kapas allim. Iei chok ewe napanap ne tumunu kich seni feingau non pekin ngun me awora pwapwa ese much. Fan iten Jises Kraist, amen.