Sipwe Monnota me Nimenimoch ne Angang
Seni Preseten Thomas S. Monson
Manaman repwe fis ekkis meinisin nupwen sia weweiti ewe pristut, sofoniti me aea non pungoch, me anganga nuku.
Ami pwi achengicheng kana, a men och ach tufichin chusefan fengen. Iteiten fansoun ua fiti ewe mwichenapen pristut, ua anchang usun ekkewe afanafanen ekkoch noun Kot kewe souemwen ir mi afanafan non ekkewe mwichenapen pristut an ewe Mwichefen. Chommong ra fen mano, nge seni tipachemen tupuwer, seni anonnonen ngunur, me seni pwichikaren netiper, ra awora ngeni kich emwen seni ewe Ngun mi Fel. Upwe aporausa ngeni kemi fitu mettoch ra fen afanafan usun ewe pristut.
Seni ewe Soufos Joseph Smith: Pristut mi eu nongonong ese much, a fen nom ren Kot seni fansoun ese much, ngeni fansoun ese much, ese wor nepoputan are nesoponon.”1
Seni anon Preseten Wilford Woodruff, sia kaeo: “Me ren anen ewe Pristut mi Pin Kot a poporaus ngeni me tutumunu chon fonufan; Iwe ekkewe chong nang ra feitiw fonufan ne uwei poraus ngeni chon fonufan ir ekkewe mwan ra angei me asamonu ewe pristut nupwen ra manau non pekin futuk; iwe mettoch meinisin Kot a fori faniten an aramas manau ese much, seni chok fansoun aramas ra keren feito won fonufan ngeni amanauen chon fonufan, a fis me epwe sopweno ne fifis me ren manamanen ewe pristut ese much.”2
Preseten Joseph F. Smith a wisen afatochu pwe: “Ewe pristut …ena … ewe manamanen Kot a ewisa ngeni mwan me ra tongeni angang won fonufan faniten ewe manau ese much an chon fonufan, non iten ewe Sam me ewe Nau me ewe Ngun mi Fel, me ra tongeni angang non punugupungoch; rese pwisin angei wor ena mwumwuta, are boroni seni pinon aramasen noom, nge ewe mwumwuta mi nom ikenai non ekkei ranin manauach mi awora ren chon nang me ngun seni asan, wenewenen seni ewe Kot mi Nap.”3
Iwe saigonon seni Preseten John Taylor: “Ifa ewe pristut? … Ena ewe mun Kot, ese nifinifin ika won fonufan are won nang, pwe me ren ena manaman, pungun finata, are nongonong mettoch meinisin mi nemenem won fonufan are won nang, iwe me ren ena manaman mettoch meinisin ra angei aninis me pochokun. A nemeni mettoch meisin—emweni mettoch meinisin—apochokuna mettoch meinisin—me riri ngeni mettoch meinisin Kot o ennet ra chiechi ngeni.”4
Sia fokkun feioch ne nom ikkei non ekkei ranin soponon, nuwpen an Kot we pristut a nom won fonufan. Sia fokkun feioch ne mwarei ena pristut. Ewe pristut ese kon weweoch ngeni eu niffang nge fen eu wis ne angang, eu feioch ne aninis, me eu tufich ne efeiochu manauen aramas.
Ach wisen angang mi feito ren ekkei tufich. Ua men tongei me aucheani ewe kapas wis me mettoch meinisin a wewe ngeni.
Non eu me eu wisei, non eu me eu neni, ngang mi fifiti mwichen pristut fan 72 ier—seni chok ewe fansoun ua seikita ngeni wisen tiken nupwen a 12 ieri. Fansoun mi ennetin fefeino chok. Wisach mi chok fiti fetanin fansoun. Wisach ese kirocheno are kisikisino. Tatakisin osukosuk ra feito o feino, nge ewe maun faniten ekkewe ngunun aramas mi chok sopweifocheno. Kapasen ewe Samon ngeni kich chon pristut ekkis meinisin ia sia nonnom ia a feito non fatafatoch. Ewe Samon a era pwe mwan meinisin repwe kaeo wiser me tinikin ne angang non ewe wis a seikita ngeni.5
Ewe kokon wis a feito ngeni Atam, Noah, Abraham, Moses, Samuel, me David. A feito ngeni ewe Soufos Joseph Smith me emon me emon ekkewe soufos mwirimwirin. Ewe kokon wis a tori atewe Nifai nupwen a angei annuk seni ewe Samon, me ren Seman we Liai, an epwe niwiniti Jerusalem ren pwin kewe pwe repwe angei ekkewe chon seleich piras seni Leipan. Pwin Nifai kewe ra ngunungun, ra apasa pwe eu mettoch mi weires ar repwe fori. Ifa ponuen Nifai? A era, “Ngang upwe feino fori ekkewe mettoch minne ewe Samon a annuku ngeniei, pwe ngang ua sinei pwe ewe Samon ese annuku och ngeni noun aramas ika mo ese fen ammonata aner ar repwe apwonueta minne a annuku ngenir.”6
Nupwen ewe chok kokko a tori kich, met sipwe ponueni? Sipwe ngunugun, usun chok Leiman me Lemuel, me apasa, “Och angang mi weires a finata ngeni kich”?7 Are sipwe usun chok Nifai non ach sipwe apasa, “Ngang upwe feino. Ngang upwe fori”? Sipwe mochen angang me anneasochis?
Fan ekkoch a usun nge ita ewe miritin Kot a tipwaroch are a men weires, nge mi wor eu nesen mi fokkun auchea ach sipwe kaeo non ei manau ena pwe nupwen Kot a fos me aramas ra anneasochis, ena emon epwe pungupungoch fansoun meinisin.
Nupwen ua ekiek usun ewe kapas wis me ifa usun forun wisach a tongeni aochu manauach pwan manauen aramas, ua chechemeni ekkewe kapasen emon soumak mi itefouno:
Ua annut o tan
Pwe manau a pwapwa
Iwe ua neno, o nengeni
Pwe manau a eu wis
Iwe ua angang, o nengeni pwe—
Wis a awora pwapawa.8
Robert Louis Stevenson a awewe non pwan eu napanap. A era, “Ua sinei wewen pwapwa, pwe ua fori angangoch.”9
Nupwen sia fori wisach me anganga ewe pristut, sipwe kuna ennetin pwapwa. Sipwe weri pwapwan apwonuetan ach angang.
Sia fen kaeo ekkewe wisen ewe pristut a nom rech, ese nifinifin ika sia angei ewe Pristut seni Aaron are Melkisetek. Ua pesei kemi ami oupwe ekiek usun ekkana wis iwe oupwe pwan fori mettoch meinisin fan om pochokun ne apwonueta ir. Ika oupwe fori, mi namwot oupwe nimenimoch. Mi namwot epwe wor pouch mi monnota, pouch mi nimenimoch, me pouch mi mochen pwe sia tongeni fiti angangen awora met Semach won Nang a mochen aramas repwe angei seni I. Ika sise nimenimoch, manamanen ewe pristut a tongeni poutuno seni kich, iwe ika a poutuno seni kich, a poutuno ach tufichin manau feifeita. Sipwe nimenimoch ne angang.
Preseten Harold B. Lee, emon sensen Mwichefen mi nap, a era: “Nupwen emon a angei ewe pristut, a winiti emon chon angangen ewe Samon. Epwe ekiek usun wisan usun chok a nom fan angangen ewe Samon.”10
Nupwen a fifis ewe Oruan Maunin Fonufan, nepoputan ewe ier 1944, eu mettoch usun ewe pristut a fis nupwen ekkewe soufiun Merika ra fonueni ewe to itan Kwajalein, eu fonuen ekkewe Marshall Islands a nom non ewe Setin Pacific nefinen Australia me Hawaii. Emon chon nuspeipa a nom Hawaii—esap i emon chon Mwichefen—a aporausa met a fis. Iei met a makkei non ewe porausen nuspeipa non 1944, a awewe pwe ir me fitemon aramas ra nom non ewe oruan tettenin soufiu nesekurun ekkewe soufiun Merika won ewe to itan Kwajalein. Non ar fefetan, ra kuna emon soufiun Merika a chapetiw non set, a watte kinasan. Ewe sat a onuwen parapar ren chaan. Mwirin ra kuna pwan emon soufiu a feino ren chienan soufiou mi feingaw. Ewe oruemonun soufiu a pwan kinas, poun we ese tongeni amokutu poun we nepekin. A eki mokuran ewe emon a chapetiw non sat pwe ete kokotiw nesat. A puchoreta pwe emon epwe anisir. Ekkewe ekkoch ra nengeni ewe emon a anisi o ra ponueni, “Atenan, sise togeni anisi aten mi feingaw.”
“Mwirin,” ewe chon nuspeipa a makkei, “Ua kuna och mettoch use mo fen kuna. Atewe, a pwan watte kinasan, a achocho ne tori nepi fan inisin chienan soufiu mi arapakan an epwe mano. A “isetiw mokuran chienan won pechan we.… Use tongeni monnukano—ekkei ruemon at mi watte feingawen inisir—ir me ruemon … mi nikinikinin nimenimoch, are atoch, ina mo a watte feingawer. Iwe atewe a pworetiw mokuran asan ewe emon o a apasa, ‘Ua annuku ngonuk, non iten Jises Kraist me seni manamanen ewe pristut, pwe kopwe chok manau tori ua tongeni angei aninisin chon piuing.’” Ewe chon nuspeipa a osopwano ewe poraus: “Am me unumon, [am me ekkewe ruemon soufiu,] aua nom non piuing. Ekkewe toktor rese sinei [ifa usun ra chuen manau], nge ua sinei.”11
Manaman ra nom ekkis meinisin nupwen sia weweiti ewe pristut, asamonu an manaman me aea non pungupungoch, me anganga nuku. Nupwen nuku a ekisiwini tipemwaremwar, nupwen angangen kichioch a awesano kuttan mochenin netipach, ewe manamanen Kot a esenipato An popun.
Ewe kokon wis a tongeni feito non mosonoson nupwen kich chon pristut sia ponueni ekkewe wis sia angei. Preseten George Albert Smith, ena souemwen mi tipetekison, a era, “A nom fan wisom ne kaeo met ewe Samon a mochen iwe mwirin, ren ewe manamanen me pochokunen An Pristut mi pin, kopwe anapano om koko mwen mesen ekkewe chon orum… pwe aramas repwe pwapwa ne tapweno mwirum.”12
Iei chok sokkun koko—ese nono amwararen nge a chuen aninis ne amanaua ngunun emon—a feito ngeniei non 1950 nupwen ua keren seikita ngeni wisen pisop. Wisei kewe pwe emon pisop ra chommong o sokkopat, iwe ua kon achocho ren unusen ai tufich ne fori meinisin mi namwot fan wisei. Merika a fiti pwan eu sokkun maun non ena fansoun. Pokiten chommong chon mwichefen ra fiti angangen soufiu, eu wis a feito seni Popunapen Mwichefen pwe pisop meinisin repwe awora iteiten soufiu echo kopien ewe Church News me ewe Improvement Era, ena ekkewe puken Mwichefen non ena fansoun. A wor 23 mwan ra fiti soufiu non am we wart. Ren watte achocho, ekkewe mwichen pristut, ra awora ewe moni mi namwot ne awora ekkewe puk. Ua weweiti ewe angang, are fen ewe wis, ne makei 23 taropwe ngeni ekkei soufiu iteiten maram. Tori ikenai a chuen nom rei chommong ekkewe taropwe ua tinano ngenir o angei senir. Ua kan kechiu nupwen ua anneani ekkei taropwe. A men pwapwa ne anneani usun an emon soufiu pwon ne manaueni ewe kapas allim, an emon soufiun nesat finata ne nuku non an famini.
Fan eu nekunion ua ngeni emon fefin non ewe wart ekkewe 23 taropwe ua makkei non ena maram. Wisan pwe epwe tinano ekkewe taropwe me tumunuochu nonnomun nenien ekkewe soufiu mi chok sisiwin. A nengeni echo futo, iwe a emenimen nupwen a eis, “Pisop, met kese fen ekkis osukosuk? Pwan iei echo taropwe ngeni Pwipwi Bryson. A iei ewe Engon me fisuen taropwe ka tinano ngeni nge ese ponueni.”
Ua ponueni, “Iwe, meni epwe ponueni non ei maram.” Iwe ennet pwe, a ponueni non ena maram. Ren ewe aewin fansoun, a ponueni ai we taropwe. Ua men aucheani ewe taropwe a titito ngeniei. A angang won eu fonu touau, a nom akkanaemon, me a pwositi fonuan. A makkei, “Pisop Achengicheng, use angoch ne mamak taropwe.” (Upwe fen tongeni ereni pwe a ina usun fitu maram me mwan.) An taropwe a sopweno, “Kinisou ren ekkewe puken Church News, nge akkaewein kinisou ren noum kewe taropwe ka kan titito. Ua poputa eu manau mi fo. Ua keren seikita ngeni wisen emon pris fan ewe Pristut seni Aaron. Netipei a ureno. Ua fokkun pwapwa.”
Pwipwi Bryson ese pwapwa nap seni noun we pisop. Ua kaeo pungochun ekkewe kapas “Forochu [wisom]; ena mi och; ewe Samon epwe apwonueta ewe nusun.”13
Chommong ier mwirin, nupwen ua fiti mwokutokutun ewe Salt Lake Cottonwood Steik nupwen James E. Faust a angang fan wisin Preseten, ua aporausa ena poraus non eu achocho ne pesei ekiekin nouch kewe soufiu. Newesinon ewe mwich, emon anuon mi atoch a feito rei. A kamoch pei me eis, “Pisop Monson, en mi chechemeniei?”
Ua muttir esinna ion atewe. “Pwipwi Bryson!” Ua apasa. “Kan ifa usum? Ifa wisom non ewe Mwichefen?”
Ren pwapwa a ponueni, “Ngang mi pochokun. Ua angang non ewe presetensin ai we mwichen elter. Ua mochen kinisou sefan ren om ekiekiei me ren ekkewe taropwe ka tinato minne ua kan aucheani.”
Pwi kana, mi namwot ami aninis ngeni fonufan. Kich mi fori meinisin mi namwot? Kich mi chechemeni anon Preseten John Taylor: “Ika ouse anapano wisemi, Kot epwe etipisi kemi ren ekkewe aramas oupwe fen tufichin amanaua ika oupwe fen forochu wisemi”?14 Mi wor pechan aramas ne apochokuna, pau ne kamoch, ekieki ne apochokuna, netip ne amwasanga, me ngun ne amanaua. Ekkewe feiochun fansoun ese much mi awiti kemi. Ami tufich pwe ousap chon katon ne chon angang non angangen pristut. Sipwe rongorong ngeni ekkewe kapasen achechem a nom non ewe Puken James: Ousap otupu kemi ren ami oupwe chok ausening ngeni an kapas, nge oupwe apwonueta non ami foffor.”15
Sipwe kaeo me ekieki wisach. Sipwe monnota me nimenioch ne awora angang. Non forun wisach sipwe tapweno ipweipen ewe Masta. Nupwen sia feten non anen Jises, sipwe kuna pwe A nap seni ewe monukan non Bethlehem, nap seni noun ewe chon taiku, nap seni ewe sense mi unusen napanap. Sipwe sinei pwe I ewe Noun Kot, ach “Chon Amanau me ach Chon Angasano. Nupwen a tori I ewe kokon wis, a ponueni pwe netipan ewe Sam epwe pwonueta, me ewe ningen ewe Sam ewe tori feinfeino.” 16 Amo kich meinisin sipwe fori iei usun, ua iotek non Itan mi pin, ewe iten Jises Kraist, ewe Samon, amen.