Ewe Angangen Amanaua ren Ennetin Mamarita
Seni Pisop Richard C. Edgley
Awemon Chon Aninis a Keran Pichino seni ewe Mwichen Chon Nemeni Pisoprik
Amanaua ngun mi ewe angang ewe Chon Amanau a kokkori kich meinisin ne fori.
Non ekkewe maram sia keran tou seni ekkewe souemwenin mwichefen ra aucheani “ennetin mamarita” non ewe Mwichefen, pwe repwe ochufengeni meinisin ir ekkewe repwe etiwa me anneasochisi ekkewe pwon me efeiochun amanau fiti ekkesiwinin netip usun Alma a awewe (nengeni Alma 5:14). Eu napanapan efisata ennetin mamarita non ewe Mwichefen ina ne churi me amanaua ekkewe ir ra fen papatais nge ra patapatono, ir rese angei ekkewe feioch me angangen amanaua. Ina mo met wisach—sensen famini, sensen Sukunen Raninifel, pisop, sam, in, are Meinap Unusan—meinisin kich sia tongeni fiti angangen amanaua non napanapoch. Iwe, wisach pwe sipwe fiti ewe angangen ochufengeni meinisin ngeni Kraist—ach famini, ir rese choni ewe mwichefen, ir mi patapat, chon tipis—pwe repwe angei ekkewe efeiochun amanau.
Fan eu nesesoran Raninifel ukukun 30 ier me nom, nupwen ua emon chon ewe presetensi non steik, emon pisop a kokkoriei. A awewe pwe an wart a fakkun muttir watteno iwe ese chuen tongeni awora eu wis ngeni ekkewe chon mwichefen mi nimenimoch. A tungor ngenikem pwe aupwe aimufeseni ewe wart. Nupwen aua witi pungun, am chon ewe presetensi non steik aua finata pwe aupwe churi ewe wart me kokkori meinisin ekkewe mwan me fefin mi nimenimoch, me amwarar pwe repwe wisen misineri non ewe steik.
Usun pwe ewe unumon aramas ua churi a emon fefin chon sukkun. Mwirin aua kakapas ekkis, ua kokkori pwe epwe wisen misineri. A mosonoson ren ekkis fansoun. Mwirin a apasa, “Preseten, kese sinei pwe ua patapatano seni ewe Mwichefen?”
Mwirin ekkis mosonoson me rei, ua apasa, “Apw, use sinei pwe ka patapat.”
A pwonueni, “Use pochokun non ewe Mwichefen fan chommong ier.” Mwirin a apasa, “Kese sinei pwe nupwen ka patapta, ese mecheres ne niwinsefanito?”
Ua pwonueni, “Apw. Om wart a poputa kunok 9:00 nesesor. Ka feito non ewe imwen fan, me ka fitikem.”
A pwonueni, “Apw, esap mecheres. Ka noninen usun chommong mettoch. Noninen ika emon epwe kapwong ngonuk are ika kopwe anaemon chok non ekkewe mwich. Me ka noninen usun ika kopwe etiwatiwoch me ion chienom kewe.”
A poputa ne kechiw me a sopweno, “Ua sinei pwe inei me semei ra iotek fan chommong ier pwe upwe niwinsefan ngeni ewe Mwichefen.” Mwirin pwan ekkis mosonoson, a apasa, “Ren ekkewe unungat maram sia keran tou seni ua iotek pwe upwe weri pwara, pochokun, me ewe ann ne niwinsefanito.” Mwirin a pwonueni, “Preseten, om nuku pwe ei kokko mi pwonuen ekkena iotek.”
Ua pwan poputa ne kechiw me ua apasa “Ua nuku pwe ewe Samon a pwonueni om iotek.”
A etiwa ewe kokko; me a winiti emon misineri mi angoch. Me ua sinei pwe a awora pwapwangeni pwisin i pwan ngeni seman me inan me pwan ekkoch chon famini.
Mi wor ekkoch mettoch ua kaeo are chechemeni seni ei interfiu me pwan ekkoch usun chok:
-
Ua kaeo pwe mi wor chon tongei ekkewe chon mwichefen mi patapat me ra ikiotek iteitan ran ne tingor ngeni ewe Samon ren aninis ne amanaua ewe emon ra tongei.
-
Ua kaeo pwe ese chok mecheres are akinamwe pwe emon chon mwichefen mi patapat pwe epwe chok niwinsefan ngeni ewe Mwichefen. Mi namot aninis. Mi namot chiechi.
-
Ua kaeo pwe a wor chon mwichefen mi patapat ra achocho me ra mochen ne kutta ewe aanen niwinsefanito.
-
Ua kaeo pwe chommong chon mwichefen mi patapat repwe etiwa eu wis.
-
Ua kaeo pwe mi namot emon chon mwichefen mi patapat epwe nikinikinin nonnofengen pwe I emon noun ewe Kot mi tong.
Non ekkewe ier ua kaeo ifa usun ei interfiu epwene fis ika ua kapas ngeni ita pwe ua sinei pwe a emon chon Mwichefen mi patapat. Ami oupwe pwisin ekieki usun.
Mi wor eu fansoun non manauen chommong chon mwichefen mi patapat nupwen och mettoch a efisata ar mochen niwinsefanito ngeni ewe Mwichefenin Jises Kraist mi niwinsefan. Meni emon monukon. Meni emon a mano. Meni nupwen a tori eu fansounen netipechou. Meni a fis pokiten an emon chon tongeir tingor ngeni ewe Samon. Are meni mi mecheres usun pwe emon a tingor ngeni. Chommong repwe ekksiwin ika ra sinei pwe ra emon noun Kot we at are nengin mi auchea.
Apochokunata sefannin aramas mi eu kinikinin ewe angangen ewe Samon mi auchea. Ewe angangen amanaua mi wisen chon mwichefen meinisin, chon ewe Pristut seni Aaron me Melchizedek ra wisen emweni ei angang. Iwe, ina met ewe angangen pristut—emweni aramas meinisin ngeni ekkewe pwon mi pin; awora kinamwe, pwapwa, me aucheani pwisin en.
Seni ewe Puken Mormon kopwe chechemeni pwe nupwen Alma ewe mi Kukkun a kaeo pwe ekkewe Chon Zoram ra rikino seni ewe Mwichefen, a ochufengeni eu mwichen apochokuna ne amanaua ekkei aramas. Nupwen ra fori wiser, Alma tingor ngeni ewe Samon ren ekkei kapas:
Alma a iotek pwe ewe Samon epwe mut ngeniir pwe repwe angoch ne ochufengeni sefan ekkewe aramas ngeni Kot non Kraist.
A ereni ewe Samon pwe ngunur mi auchea me chommong me neir ir pwiir kewe; iwe a tingor ngeni pwe epwe awora ngeniir manaman me mirit pwe repwe tongeni emweni sefanni pwiir kewe ngeni I. (nengeni Alma 31:34–35; mi pachenong esisinnan).
Ekkoch maramas a no mwirin eu mwich ren chon minefo me chon mwichefen mi patapat,, emon mwan mi keran pochokun sefan ukukun ieri a feito rei me a apasa, “Ngang ua patapat napengeni unusen manauei. Ua rikino seni ewe Mwichefen me nom. Ua chok patapatono fan ekkei chommong ier. Nge ua niwinsefanito iei, pwan am me punuei aua angang non tempel.”
Ua kapas ngeni pwe epwe sinei pwe mettoch meinisin mi och, ua apasa: “Iwe mi ochuno meinisin iei.”
A pwonueni, “Apw, meinisin ese och. Ua niwinsefan ngeni ewe Mwichefen, nge meinisin nei kewe me tettenin nei kewe ra pout seniei. Me iei ua kuna pwe tettenin nei kewe ra pwan pout seniei—rese choni ewe Mwichefen. Meinisin ese och.”
Non am famini a wor emon neuwo a fiti ewe Mwichefen non Europe nepoputan ewe Mwichefen. Emon noun we at a patapatono. Am me Sister Edgley aua achocho ne kutta ekkewe tettenin ei neuwo.
A mecheres pwe am me punuei aupwe kuna pwe non ekkewe onu tappin aramas, meni a ukukun 3,000 chon famini mi poutuno. Iwe sipwe ekieki usun pwan ru tappin aramas. Meni a tongeni tori ukukun 20,000 ngeni 30,000 noun Semach won Nang kewe semirit mi poutuno.
Ewe kokko ne amanaua mi anongonong won eu nongonongen ewe Mwichefen mi aucheanap.
Ewe Chon Amanau a apasa pwe sipwe chechemeni pwe ngun meinisin mi auchea ngeni Kot.
Ewe Samon ach Chon Angaseno a mano non pekin inis me a ariaffouni riafoun aramas meinisin, pwe aramas meinisin repwe aier me feito ngeni I. …
Ewe Chon Amanau a apasa pwe ika sia angang non unusen manauach ne afanafana aier ngeni ekkoch me sia emweni emon chok ngeni I, sipwe fakkun pwapwa ren ena emon non muun ewe Sam (nengeni D&C 18:10–11, 15; mi pachenong esisinnan).
Ua tufichin amanaua ekkoch chon mwichefen mi patapat non manauaei. Iei nupwen ua aninis ne apochokuna emon non ewe Mwichefen, use ekieki usun emon chok ngun; ua kuna onu, fisu, are pwan ekkoch tappin aramas—fitu ngerou ngun. Me ua ekieki usun ewe wokisin nupwen ewe Chon Amanau a apasa pwe ika sia emweni emon chok aramas ngeni I, sipwe fakkun pwapwa (nengeni D&C 18:15).
Ngeni Noun kewe Aposel, ewe Samon a apasa, “Mi fakkun watte ei ras, nge mi chok chokukkun ekkewe chon angang” (Matthew 9:37). Ese namot ekkewe chon angang repwe chokukkun. A wor fitu ngerou chon pristut, mi nimenimoch me fitu minion chon ewe Mwichefen non meinisin kinikinin ewe fonufan. A wor mwichen souemwenin wart, mwichen pristut, Fin Anisi, me pwan ekkoch mwich ren ewe kokko ne amanaua aramas. Amanaua ngun mi ewe angang ewe Chon Amanau a kokkori kich meinisin ne fori.
Ekkiseno non ai kapas ua poraus usun an Alma iotek nupwen ir me chienan kewe ra feino won ar angangen amanauan ekkewe Chon Zoram. Non ewe Maunen Fonufan II ukukun 500 sounfiun Merika me pwan ekkoch ra kanupus. Pokiten ar riaffou me noninen pwe repwe feingau, eu mwichen 100 sounfiu ra kefinita ne amanaua ekkei chon kanupus. Mwirin ra mwichfengen, ewe meinap a kapas ngeniir iei usun: “Non ei pwinin ami oupwe chufengen ren ami souemwenin mwichefen, oupwe fotopukutiw, me oupwe pwon ngeni Kot pwe ika ami mi manau, ousap mut ngeni ekkei mwan ne riaffou pwan och.” (Nengeni Hampton Sides, Ghost Soldiers: The Forgotten Epic Story of World War II’s Most Dramatic Mission [2001], 28–29.) Ei angangen amanaua mi eu amanaua non pekin inis me non pekin ekiek. Sipwe akkachocho usun chok ne amanaua ekkewe ir mi riffaou non pekin ngun me ir repwe weri niwinin non pekin manau ese much? Sipwe pwan pwon ngeni ewe Samon usur chok?
Ne osupwano, ach pwon pwe kich chon an Kraist we Mwichefen mi ennet a puk seni ewe nongonong pwe ewe Samon a riaffou fan iten emon me emon kich—ewe ese choni ach mwichefen, ewe mi patapat, fiti ewe mi tipis, me iteitan chon pwisin ach famini. Ua nuku pwe sia tongeni awora ewe pwapwa, kinamwe, me ngarangarin ewe kapas allim me pwan fitu puku ngorou, me pwan fitu minion ren mwirimwirir. Ua nuku pwe sia tongeni fefeita pokiten iei an ewe Samon we Mwichefen, pwan me ren ach pristut me ach choni ewe mwichefen, sia kokko ne fefeita. Ua pwarata ekkei ngenikemi non iten Jises Kraist, amen.