A Ennetin Tongei Kich

Seni Elter Paul E. Koelliker

Seni ekkewe Fik

Pokiten ewe kokkoten famini mi for seni chon nang, sia tongeni weweiti ukukun an Semach won Nang tong mi unus fan iten emon me emon kich.

Ua tongei ai upwe fiti ekkewe misineri. Ra uren nuku, epinukunuk, me tong ennet. Ra angangen misineri mi usun chok unusen eu manau non chok 18 ngeni 24 maram. Ra war pwe ir mi usun monukon non pekin ngun ren ar ennetin mochen kaeo, me nupwen ra feino ra watteno, ra monnota ne pworacho ngeni meinisin osukosuk fan meser. Ua pwan tongei ekkewe misineri mi chinnap, minne ra uren tipetekison, mirit, me kapasen kinamwe. Ra awora eu niffangen pochokun me tong ngeni ekkewe misineri unukur. Ir meinisin ekkewe misineri me ekkewe chinnap ra eu mwich mi manaman, mi och, minne ra ekkesiwini manauen ekkewe ir mi kuu seni ar angang.

Ekkiseno ua ausening ngeni ruemon ekkei misineri nupwen ra aporausa usun ar angang. Non ena fansounen chechemeni ra ekieki usun ekkewe aramas ra fos ngeni won ena ran, ekkoch ra etiwatiwoch nap seni ekkoch. Nupwen ra ekiek usun met a fis, ra eisini, “Ifa usun sia tongeni anisi emon me emon ne pwisin mochen sinei pwan och usun Semach won Nang? Ifa usun sia anisir ne mefi Ngunun we? Ifa usun sia tongeni anisir ne sinei pwe sia tongeir?”

Non ai ekiek ua tongeni kuna ekkei ruemon mwan ukukun unungat are ruanu ier mwirin ar kewe misin. Ua ekieki pwe ra kuna punuer me ra wisen angang non mwichen elter are ra aiti eu mwichen anuon. Iei, rese ekieki usun ekkewe chon kutta, ra pwan kapas eis usun ekkewe chon ar mwich are ekkewe anuon ra kokko pwe repwe tumunu. Ua kuna ifa usun ar angangen misineri a tongeni winiti eu awewen tumunu ekkoch non unusen manauer. Nupwen ei mwichen chon kuno mi wenechar ra niwin seni ar kewe misin ngeni chommong ekkewe eif won fonufan, ra winiti aramas mi auchea non ewe angangen kouta ewe Mwichefen.

Meni ewe soufos Lehi me non ewe Puken Mormon a ekieki usun ekkei sokkun kapas eis usun chok ekkei misineri nupwen a ausening ngeni pwonuen noun kewe at usun ewe tan me emwen a weri:“Iwe, ikkei popun an Leiman me Lemuel pweni semer we, iwe, pwan pokiten ir mwanichin noun ewe sam, iwe, ra pwan pwen pokiten rese sinei kokotun Kot ewe a forata ir”(1 Nifai 2:12).

Meni sia mefi ewe osukosuk minne Lehi a weri ren ruemon noun kewe at watte. Nupwen sia kuna emon semirit a rikino, emon chon kutta ese mo etiwa, are emon at ese achocho ngeni wisan, netipach ra watteno usun chok Lehi me sia eis, “Ifa usun ua tongeni anisir ne mefi me ausening ngeni ewe Ngun mi Fel pwe resap rikino ren osukosuken fonufan?” Mi wor ru wokisin ua ekieki usun minne ra tongeni anisikich ne kuna ewe aan seni ekkei mettoch me mefi ewe manamanen An Kot tong.

Nifai a awora eu kiien ewe asamen kaeo ren met a fis ngeni pwisin i: “Ngang Nifai, … seni ai mochen sinei ekkewe angangen Kot mi akkanangefou, ina minne, ua pwisin kokkori ewe Samon; iwe, nengeni pwe i mi feitiw churiei, iwe, a apwetetei netipei pwe upwe nuku ekkewe kapas meinisin semei we a akkapasa; iei minne, use pwan u ngeni ai upwe usun chok pwi kewe” (1 Nifai 2:16).

Anena ach mochen ne sinei och mettoch a atufichi ngunuch ne rongorong ewe mongungun nang. Ach kuna eu napanapen anena me tumunu ena mochen ina wisen emon me emon kich—misineri, sam me in, sense, souemwen, me chon mwichefen meinisin. Nupwen sia mefi ena mochen non netipach, sia ammonata ne feioch seni ach kaeo seni ewe oruan wokisin.

Non June 1831, nupwen souemwenin Mwichefen me nom ra angei wiser, Joseph Smith a kaeo pwe Setan a nonnom won ewe fonu, me a otupotup fetan won ekkewe fonu. Ne fiu ngeni ei mettoch mi ngaw, ewe Samon a apasa pwe Epwe ngenikich eu awewe non mettoch meinisin, pwe sisap tupuno (nengeni D&C 52:14).

Ekkewe awewen mi pisekin aninis, fifis, are aan minne emon a tapweno mwirin pwe epwe awena ngeni an Kot popun. Ika sia tapweno mwirin, sipwe tipetekison, sineioch, me sipwe tongeni sinei nefinen mongungun ewe Ngun mi Fel me ekkewe mongungun ariki. Ewe Samon a aitikich pwe ekkewe aramas mi chechech fan an manaman repwe pochokununo, me repwe efisata uwan mwareiti me mirit, anongonong won ekkewe pwarata me ennet a ngenikich (nengeni D&C 52:17).

Ewe feiochun iotekin tipetekison, fiti ennetin netip, a mut ngeni ewe Ngun mi Fel ne kuu netipach me a anisikich ne chechemeni met sia sinei me mwen sia uputiw won ei fonufan. Nupwen sia weweochu an Semach won Nang we kokkot fan itach, sia poputa ne etiwa wisach ne anisi ekkoch ne kaeo me weweiti An kokkot. Ach anisi ekkoch ne chechemeni mi chufengen ren ifa usun sia pwisin manaueni me aea ewe kapas allim me aea non manauach. Nupwen sia manaueni ewe kapas allim non napanapan ewe Samon Jises Kraist a aitikich, ach tufichin anisi ekkoch a watteno. Ei poraus mi eu awewen ifa usun ei nongonongn a pwak.

Ruemon misineri ra fichifich won eu asam, ra anean repwe kuna emon epwe etiwa ar poraus. A suk ewe asam, emon mwan mi watte a chuirir non mongungu ese chiechioch: “Ua nuku pwe ua fen erenikemi pwe ousap fichifich sefan won ai asam. Ua erenikiemi pwe ika oua niwinsefan, esap och ngenikemi. Oupwe suno iei.” A muttir apunga ewe asam.

Nupwen ekkewe elter ra feino, ewe misineri mi watte, a isetta poun won afaran ewe emon misineri mi kukkun ne awora kinamwe me pesepes. Rese sinei, nge ewe mwan a nengenir me ren ewe asamochu ne pii pwe ra weweiti an poraus. A ekiekin epwe kunar ne takir me nikitano an kapas ngeni ar achocho ne churi. Iwe nge, nupwen a kuna ewe pwaratan kirokiroch nefinen ekkewe ruemon misineri, a pweteteno netipan. A suki ewe asam me a tingorei ekkewe misineri ne niwinsefanito me aporausa ar poraus ngeni i.

Sia mefi Ngunun we nupwen sia etiwa netipen Kot me sia manaueni An kokkot. Ewe Chon Amanau a aiti, “Ika oupwe tong fengen nefinemi, iwe, aramas meinisin repwe sinei pwe ami nei chon kaeo” (John 13:35). Ei nongonongen tong fengen nefinach me awatteno ach tufichin anonga won Kraist non ach ekiek, fos, me foffor mi aucheanap non ach winiti chon kunon Kraist me sensein An kapas allim.

Ach aneno ei mochen a ammonakicheta ne nenengeni ekkewe awewe mi pwon. Kutta ekkewe awewe a emwenikich ngeni ekkewe nongonongen Kraist usun mi akkafanafan me ren ewe Chon Amanau me Noun kewe soufos. Eu awewen ei nongonong ina ne nikitu tori nesoponon: Nifai a makkei pwe ra feioch ekkewe repwe kutta ar epwe wato ai we Zion non na ran, pun repwe angei ewe nifang me ewe manamanen ewe Ngun mi Fel; iwe ika repwe achocho ngeni ewe soponon repwe seikita non ewe soponon ran, iwe repwe manau non ewe muun ewe Nam ese much (nengeni 1 Nifai 13:37).

Ifa ewe napanap sia tongeni apwapwaiti ewe niffang me manamanen ewe Ngun mi Fel? Ina ewe manaman a feito me ren ach sipwe chon kunon Jises Kraist mi nukuchar. Ach tongei I me aramas meinisin. Ewe Chon Amanau a isetta awewen tong nupwen A aitikich, “Iwe iei upwe ngeni kemi ew annuk mi fo: oupwe tong fengen. Ussun chok ngang ua tongei kemi, iwe oupwe pwan tong fengen” (John 13:34).

Preseten Gordon B. Hinckley a apungu ei nongonong nupwen a apasa: “Ach tongei ewe Samon ese chok kapasen pesepes, ika anenanen emon. Mi fen eu annuk. … Ach tongei Kot mi nom nein mettoch meinisin mi nimenimoch, mi murinno, me mi pung” (“Words of the Living Prophet,” Liahona,, Dec. 1996, 8; “Excerpts from Recent Addresses of President Gordan B. Hinckley,” Ensign,, Apr. 1996, 73).

An ewe Sam kokkot a awora ewe awewen nonnomun ewe famini ne anisikich ne kaeo, aea, me weweiti ewe manamanen tong. Won ewe ranin efisitan pwisin ai famini, am me ai kofot Ann aua feino ngeni ewe tempel me aua tonong non ewe pwonen pupunu. Ua ekiekin pwe ua fakkun tongeii won ena ran, nge ua chok keran weweiti usun tong. Nupwen emon me emon noum kewe me tettenin noum kewe ra tonong non manauem, am tong a watteno ne tongeir meinisin. A usun pwe ese wor muchenon ewe tufichin tong epwe watteno.

Ewe memefin tong seni Semach won Nang mi usun chok nang a utti kich. Nupwen sia oturau ekkewe minen aosukosuka mi utti kich ngeni ewe fonufan me sia aea ach tufichin finata ne kutta I, sia suki netipach ngeni eu manamanen nang a utti kich ngeni I. Nifai a awewe pwe “unusan inisi[n] a mono fan” (2 Nifai 4:21). Ewe chok manamanen tong a pesei ngeni Alma ne konu eu “konu ewe konun manau non tong” (Alma 5:26; pwan nengeni wokisin 9). A kuu Mormon non eu napanap minne a auroura kich ne “iotek … non pochokun en netip[ach],” pwe sipwe uren An tong (Moronai 7:48).

Pukfel minen nom me minefo mi uren minen achechemen tongen Semach won Nang fan iten Noun kewe semirit. Ua sinei pwe poun Semach won Nang mi eitau, me ra monnota ne turufi emon me emon kich me apasa ngenikich, “Ua tongek” ren mongungu mi pwetete, me pochokun.

Pokiten ewe awewen ewe famini mi kefinita, sia weweochu ifa usun Semach won Nang a ennetin tongei emon me emon kich. Ua kapasen pwarata pwe mi ennet. Kot a sinei me a tongeikich. A ngenikich eu tanen nenian mi pin me a kokkori soufos me aposel ne afanafana ekkewe nongonong me awewe pwe repwe emwenikich ngeni I. Nupwen sia achocho ne amwasanga ach pwisin mochen sinei pwan an ekkoch mochen sinei nupwen sia manaueni ekkewe kokkot sai kaeo, sipwe arap ngeni I. Ua pwarata pwe Jises mi ennetin ewe Noun Kot, ach Nenien Appiru, ach Chon Angaseno mi achengicheng, minne ua pwarata non iten Jises Kraist, amen.