![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F97%2Ff7%2F97f7c9aa2095484db5f139cff6cd84c3ea05dcf6%2F97f7c9aa2095484db5f139cff6cd84c3ea05dcf6.jpeg/full/!250,/0/default)
Iwe Kukkun Semerit Repwe Tumunur
Mwan me fefin repwe weweiti pwe akkeuin wiser—ewe rese tongeni pichino seni—mi ngeni pwisin ir me mwirin ngeni nour kewe.
Ekkoch ier ano fan eu pwin mi patapat non eu nenien sai won train non Japan, ua rong emon mi fichifich won ewe asamwachon ai nenien mour. Ina emon at mi uta mi fou mi wor mangaku mi nimengau a foti won mesan. Mi wor kukkun man won unusan chowan. A kamoch eu kap minen tin a parang me efoch sipun, ewe esinnan emon mi woungau. Ua achocho ne suki ewe asam pwe upwe ngeni i moni, nge ewe train mi feino.
Usap monuki usun na at mi echik mi chok uta non ewe patapat, mi kamoch efou kap minen tin a po. Usap pwan monuki ai memefen anisingau nupwen ewe train mi feino seni me i mi chok uta non ewe nenien sai.
Ekkoch ier mwirin non Cusco, eu tettinimw non ekkewe Andes non Peru, am me Elter A. Thoedore Tuttle mi fiti eu mwichen sakrament non eu rum mi kukkun me mi suk ngeni ewe an. A fen nepwin,me nupwen Elder Tuttle mi afanafan, emon kukkun at, a usun wonu ierin, mi pwa non ewe asam. Mi chok ufouf non ufouf mi nimengau me mi watte.
Nepekin ewe rum mi wor eu cheipen ren eu sepien pinewa fan itan ewe sakrament. Ei at mi wongau mi kon echik mi kuna ewe pinewa me a fetan ngeni. Mi kan ngeni ewe cheipen nupwen emon fefin mi kuna i. Ren mesan ewe fefin, i mi wauou atewe ngeni ewe pwin. Ua kechiu non netipei.
Mwirin ewe kukun at a niwin. A pwan fetan ngeni, a nengeni ewe pinewa me a nengeniei. Nupwen a pwan tori ewe neni ewe fefin mi pwan tongeni kuna i sefan, ua eitieno pei kewe, me i a kaito ngeniei. Ua kamoch i.
Iwe, usun minen awewe, ua amommotiw i won noun Elter Tuttle we seia. Mwirin ewe ioteken nesoponon, ewe at mi echik mi suno fan ewe pwin.
Nupwen ua niwin ngeni imwei, ua ereni Presiten Spencer W. Kimball usun met a fis. I mi kon pwapwa me a ereniei, “Ka kamoch eu eif non na fansoun.”A apasa ngeniei fan fitu, “Met afis mi napano wewen nap seni met ka pwisin sinei.”
Mi arrapakan fan 100 ua tori ekkewe fonuen Latin America, ua kutta ewe kukkun at ren mesen ekkewe aramas. Iei ua weweiti met Preseten Kimball a ereniei.
Ua pwan kuna emon at mi chechech won ekkewe aanen Salt Lake City. Mi pwan eu pwin mi kon patapat. Am aua no seni eu mongon Kirisimas non eu hotel. Won ewe aan mi wor wonumon ika wanumon at mi akkurang. Epwe fen och ika ir meinisin mi nom non imwer pwe resap nom non ewe patapat.
Emon me neir ese wor ufan saket. A mwet ekis meinisin pwe ete fou. I a feino won pwan eu aan mi kukkun, a feino ngeni eu kukkun, imw mi osupwang me an we pet esap nafoch an mangaku pwe ete fou.
Nepwin, nupwen ua nom non ai we pet, ua iotek fan itan ekkewe ese wor ar pet mi tongeni apwichir.
Ua nom non Osaka, Japan, nupwen Maunen Fonufan Ru a wes. Ewe tenenimw a tattakis, me won ekkewe aan mi wor pisekin imw, fonu, me maun. Napengeni ekkewe ira meinisin mi tano, me ekkewe mi chuen uta ekkewe pan ira mi chok koupi me ekkewe ira mi chuen nuf ar pwara ne tinato ekkoch foun ira.
Emon kukkun nengin mi ufouf ren ufan mi nimengau a isoni ekkoch chen ira mi on. A usun ewe kukkun semerit ese sinei usun ewe watte tatakis mi unukun pun i chok achocho ne angei ekkewe chen ira. I a kuna ewe mettoch mi chuen ningoch won ei fonufan. Epwe fen och ika ua era i ewe mettoch mi chuen ningoch won ei fonufan. Nupwen ua ekieki usun i a anapano ai nuku. Non na semerit mi wor epinukunuk.
Mormon a aiti pwe “kukkun semerit mi manau non Kraist”1 me ese namwot repwe aier.
Non ewe ier engonrou tiwepuku, ruemon misineri mi a angang won ekkewe chuuk non eoran Merika. Fan eu ran, won ewe chuuk, ra kuna pwe aramas mi chufengen fan ewe chuuk. Ren ekkei misineri ese kon chommong aramas ne afanafan ngeni, iwe ra pweretiw ngeni ewe nenien chufengen.
Emon at mi monono fan ewe konik, epwe wor eu mi-ma. Seman me inan a tingor pwe ewe sou-patek epwe “apasa kapas” fan itan nour we at. Ekkewe misineri mi uta me katon nupwen ewe sou-patek mi nengeni ewe sam me ewe in me poputa an we afanafan. Ika ewe sam me ewe in mi mochen weri kinamwe seni ei mwanen namanam, repwe chok netipengau.
A puchor ngeniir pun rese mo papataisi nour we kukkun at. Ra amangano ewe papatais pokitan sokkopaten mettoch, iwe iei ese tufich. A kapas pochokun ngeniir pwe nour we at epwene feino ngeni hell. Tipisir. An riaffou ese much epwe tipisir.
Mwirin ewe afanafan a wes ra pwan wesino ewe peias, ekkewe elter mi fetan ngeni ewe sam me ewe in. “Am chon angangen ewe Samon,” ra ereni ewe in, “me aua feito ren poraus fan itom.” Ewe sam me in mi kechiu ra pwan ausening, ekkewe ruemon elter mi anneani seni ekkewe pwarata me ra apasta ar kapasen pwarata usun ewe aniwinsefaniton ekkewe kiien manau fan itan ekkewe mi manau are mano.
Ua ekis weweiti usun na sou-patek. I a achocho ne fori met a ekieki mi pung ren ewe ekis saram me mirit a nom ren. Nge epwe fen wor met epwe tongeni awora. Mi wor unusen ewe kapas allim.
Ekkewe elter mi feito usun chon aururu, sense, chon angangen ewe Samon, chon afanafanen ewe kapas allimen Jises Kraist ren mwumwuta.
Ekkei semerit ua kapas usun mi tupuni noun Semach won Nang kewe meinisin. “Ekkewe semerit ew niffang seni ewe Samon: me … a feioch ewe mwan a chommong noun assefich.”2
Forian manau eu wis mi watte fan itan ekkewe mi apupunu. Ina ewe osukosuken manau pwe sipwe sam me in non nimenimoch me tipachem. Ese wor mwan are fefin mi tongeni nouno semerit akkaemon chok. Mi namwot ren emon semerit epwe wor ruemon—emon sam me emon in. Ese wor eu napanap mi tongeni siwin ina napanap.
Me nom mi wor emon fefin mi kechiu me a ereniei nupwen i mi sukunen college a fori eu watte tipis ren chienan at. Ewe at a monnata pwe ewpe tongeni nieno ewe monukon me mwen a uputiw. Ren ekis fansoun ir ra souchingio me ra pwan apupunu fengen me ra nouno chommong semerit. I a ereniei pwe a kon riaffou pokitan mi nengeni an we famini, noun kewe, me a achang usun ewe emon semerit ese fitir.
Ika ekkei mi apupunu mi weweiti me aea ewe Achasefan, repwe sinei pwe ekkewe afisen manauer me riaffou mi tongeni su senir. Ese wor metek epwe nom feinfeino. Ese mecheres, nge esap ewe popunen manau pwe ewpe mecheres. Aier me ewe epinukunuk mi feito seni omusomus a fokkun niwininoch.
Pwan ruemon mi apupunu mi kechiu ra feito rei ne ereniei pwe ra niwin seni ewe doctor ia a erenir pwe resap tufichin nouno semerit. Ra ennetin netipengau ren ei poraus. Ra mairu nupwen ua erenir pwe ir mi feioch. Ra ekieki pwata upwe ani ekkena kapas. Ua erenir pwe ir mi feioch nap seni ekkewe mi apupunu me tufich ne nouno semerit nge ir ra amam ika su seni wiser.
Ua erenir, “Mi och ami mi mochen nouno semirit, me ami mochen epwe efeiochu kemi non ei manau me mwirin pokiten epwe awora pochokunen ngunemi me ami ekiek. Nesoponon, oupwe feioch pokiten oua mochen nouno semirit me ouse tongeni, nap seni ekkewe ra tongeni nouno semirit me rese mochen.”
Mi chuen wor mwan me fefin rese mo pupunu iwe ese wor nour kewe. Ekkoch, ese pwan wor met ir mi tongeni fori, mi chok chuen amarita nour kewe akkaemon chok. Ekkei nonnomun mi chok ekis fansoun. Non ewe kokkoten manau ese much—esap non ei manau—ekkewe mi ekkiekoch me nikutu repwe angei ar pwon.
“Ika ach epinukunuku Kraist a chok murinno ngeni ei manau won fonufan, iwe sia atong nap seni ekkewe ekkoch aramas won unsuen fonufan.”3
Ewe popunapen ewe Mwichefen pwe emon mwan me ponuan me nour kewe repwe pwapwa non imwer, ra nom kinamwae pokitan ekkewe nongonong me annuken ewe kapas allim, me ra ririfengen ren ar kewe pwonen pristut. Mwan me fefin repwe weweiti pwe akkaeuin wiser—ewe rese tongeni pichino seni—mi ngeni pwisin ir me mwirin ngeni nour kewe.
Eu mettoch sia weweiti usun nupwen sia winiti sam ika in pwe ekkewe mettoch mi wesen auchea sia kaeo seni nouch kewe nap seni semach me inach. Sia essina pwe an Isaiah oesini mi ennet pwe “iwe kukkun semerit repwe tumunur.” 4
Non Jerusalem, “Jises a korato emon semerit pwe epwe uta mwer,
“Iwe a apasa, Upwe apasa ngenikemi pwe ika ousap siwin o ussun chok ekkewe semerit, iwe ousap tonong non ewe Muun nang.
“Ewe epwe nap seni meinisin non ewe Muun nang i ewe emon mi pwisin atekisonatiw o a ussun chok ei semerit.”5
“Jises a apasa, “Oupwe mut ngeni ekkewe semerit pwe repwe feito rei nge ousap amwochur, pun ewe Muun nang muun ekkei sokkun aramas.
“A iseta poun wor iwe a feinno.”6
Sia anneani non ewe Puken Mormon nupwen Jises Kraist a tori ewe Fonufan mi Fo. A efeiochu me echikarata ekkewe aramas me annuku pwe ekkewe semerit repwe feito ren.
Mormon a mak, “Ra pwan wato nour kewe semerit ra en me amotiwa noun won ewe puun unukun, iwe, Jises a chok uta nukanaper; iwe, ewe miwchen aramas ra mareseni ekkewe ekkoch ar repwe wato nour kewe tori meinisin ra feito ren.”7
A ereni ekkewe aramas ne fotupuku. Ren nour kewe ren I, ewe Chon Amanau mi fotupukutiw me a iotek ngeni Semach won Nang. Mwirin ewe iotek, ewe Chon Amanau a kechiu, “a angei nour kewe semerit ren emon me emon neir, iwe a efeiochur, a ioteki ir ngeni ewe Sam.
“Iwe, mwirin an wes ne efeiochur a pwan chok kechiw sefan.”8
Ua tongeni weweiti usun ekkewe memefen ewe Chon Amanau ngeni semerit. Mi wor chommong mettoch sia tongeni kaeo seni I non an achocho ne iotek fan itan, feiochu, me aiti “ekkewe semerit.”9
Ngang numpa 10 non ai famini ren 11 semerit. Ren ai sinei, semei me inei rese angang non eu wis watte non ewe Mwichefen.
Semem me inem mi nukuchar non wiser ne emon sam me emon in. Semem mi emweni imwem ren aneasochis, ese for ren ningeringer are niokus. Me ewe awewe mi pochokun seni semem mi watteno ren ewe aurour mi pwetete seni inem. Ewe kapas allim mi pochokun non manauen am meinisin non ewe Packer famini me pwan mwirmwirim me mwirin ir me mwirin ir, ren ukkukun am aua fen kuna.
Ua anean pwe upwe angei eu apungoch usun chok semei we. Me mwen ua rong ekkena kapas “fokkun murinno” seni Semei won Nang, ua mochen akkom rong ekkena kapas seni semei won ei fonufan.
Fan chommong ua ekipwichi pwata ua angei ewe koko ne fori wisen Aposel me pwan Presetenin ewe Mwichen Engon me Ruemon Aposel nge ua feito seni eu imw ia ewe sam mi patapat non ewe Mwichefen. Use akkaemon chok mi feito seni na sokkun imw mi choni ewe Mwichen Engon me Ruemon Aposel.
Saigonon ua tongeni kuna me weweiti pwe ina ewe popun ua angei wisei. Me ua pwan tongeni weweiti pwe ren mettoch meinisin sia for non ewe Mwichefen kich ekkewe nouwis sipwe pwan awora eu aan pwe ewe sam me in me semerit mi tongeni nomono fengen ren ar kewe famini. Souemwenin ewe pristut repwe tumunu pwe ewe Mwichefen ewpe chuen efeiochu ewe famini.
Mi wor chommong mettoch sia for ne manaueni ewe kapas allimen Jises Kraist nge ese kouk won ekkewe taropwen rekot. Sia atepwanapwanino manauach ren imw me moni me afisafis. Ren ach fori ei, mi tufich pwe sipwe nusmwanino ewe popunen ewe kapas allimen Jises Kraist.
Fan chommong emon a feito rei me a apasa, “Preseten Packer, a kon och ika … ?”
Napengeni ua kounuer me erenir apii, pokitan ua ekieki pwe met repwene apasa usun eu afisafis mi minafo ika eu men epwe aweiresi manauen ewe famini.
Fansoun ren ewe famini mi pin sipwe sufoniti me tumunu na fansoun. Sia pesei ekkewe chon mwichefen ne pwar ar tong ngeni ar kewe famini.
Nupwen aua keran chok pupunu, am me punuei mi fini pwe aupwe etiwa menisin noum kewe mi uputiw non am famini ren ekkewe wis ne nounir me amarita ir. Ren ekis fansoun ra pwan forata pwisin ar kewe famini.
Fan ru non am apupunu, non ewe fansounen uputiw ren ruemon noum kewe at, ewe doktor a apasa, “Ua nuku ousap nouni ei pun epwe ma.”
Non ekkena fansoun am aua apasa pwe aupwe fangeta manauem ika noum we at mi tongeni manau. Non ewe fansounen am we tingor, aua essina pwe ei sokkun tong mi usun met Semach won Nang mi mefi usun kich meinisin. Ina ekiekin nang.
Iei nesoponon manauem, am me Sister Packer mi weweiti me pwarata pwe ach kewe famini mi tongeni nom feinfeino. Nupwen sia aneasochisi ekkewe annuk me manaueni ewe kapas allim, epwe tumunu kich me efeiochukich. Ren nouch kewe me noun nouch kewe me tettenin nouch kewe, aua iotek pwe emon me emon menisin non am we famini repwe pwan tongei ekkewe kukkun.
Sam me in, nupwen ka kamoch noum we monukon non poum kewe, ka tongeni kuna me weweiti usun anonnon me popunen manau. Kopwe weweiti pwata ewe Mwichefen mi ina usun me pwata ewe famini mi ewe mwich mi auchea fan itan ei fansoun me non fansoun ese much. Ua pwarata pwe ewe kapas allimrn Jises Kraist mi ennet, pwe ewe kokoten manausefan, mi pwan iteni ewe kokoten pwapwa, ena mi eu kokot fan itan famini. Ua iotek pwe ewe samon epwe efeiochu ekkewe famini non ewe Mwichefen, sam me in me semirit, pwe ei angang epwe fefeita usun met ese Sam a mochen. Ua pwarata ekkei mettoch non itan Jises Kraist, amen.