Non Ach Chusefan
Seni Preseten Thomas S. Monson
Semach won Nang a sinei namwoten emon me emon kich. Amo sipwe uren Ngunun nupwen sia fiti mokutokutun ei mwichenap.
Pwi me fefinei kana achengicheng, non ach chusefan non eu mwichenapen ei Mwichefen, ua etiwa kemi me pwarata ai tong ngeni kemi. Sia chufengen iteiten wonu maram ne apochokuna fengeni kich, atora kapasen pesepes, awora kapasen chachari netip, me apochokuna nuku. Sia chufengen ne kaeo. Ekkoch neimi oua kutta aponuen kapaseis me sossot oua weri non manauemi. Ekkoch ra osukosuk ren mettoch mi weires. Nge meinisin ra tongeni angei saram, pochokun, me kinamwe nupwe oua mefi Ngunun ewe Samon.
Ika mi wor met mi namwot kopwe siwini non manauom, amo kopwe kuna ewe popun me ewe tipepochokun ne fori nupwen ka ausening ngeni kapasen ewe Ngun mi Fel. Amo kich meinisin sipwe asofo sefanni ach mochen manauoch pwe sipwe noun Semach won Nang mi nimenimoch. Amo sipwe sopweno ne fiu ngeni ingaw ekkis meinisin a nonnom ia.
Sia fokkun feioch ne feito fonufan non ei fansoun—eu fansoun mi amwarar non nangatamen fansoun fonufan. Kich meinisin sise tongeni nom non eu chok imwen chufengen, nge iei sia tongeni fiti mokuokutun ei mwichenap ren amwararen TV, ratio, fifi, satelait, me ewe internet—sia pwan tongeni katon won fon. Sia chufengen non eu, non fosun chommong fonu, sia manau won chommng fonu, nge kich meinisin sia nom fan eu chok nuku me eu chok nongonong me popun.
Seni nepoputan ei Mwichefen 182 ier ano, ikenai sia nom ekkis meinisin won fonufan. Ei angang mi nap sia fiti epwe sopweno ne choufetan, me epwe siwini me efeiochu manauen aramas. Ese wor manaman, ese wor pochokun won unusen fonufan a tongeni okufatiw ewe angangen Kot. Ese nifinifin met epwe fis, ei angang mi nap epwe chok sopweifocheno. Oua chechemeni kapasen ewe Soufos Joseph Smith: “Ese wor poun aramas mi tongeni eppeti feifeitan ei angang, kapasen esit epwe watte, chon koum repwe chufengen, mwichen soufiu repwe chufengen, kapas mwaken epwe fis, nge ewe ennetin Kot epwe choufetan non pochokun, non wenechar, akkanaemon, tori a etinong iteiten fonu, ekkis meinisin, won eif meinisin, me etinong sening meinisin, tori ekkewe popunapen Kot mi pwonueta, me ewe Siowa mi Nap a era pwe ewe angang a wes.”1
Pwi me fefinei kana, mi wor chommong met mi weires me osukosuk won fonufan ikenai, nge mi pwan wor chommong met mi och me apochokun. Usun chok sia apasa non ewe engon me aunugatin nongonongen achifoua, “Ika pwe epwe wor nimenimoch, tongofengon, me tapweno mwirin ekkei metoch.” Amo sipwe sopweno ne fori iei usun.
Ua kinisou ngeni kemi ren ami nuku me tongei ewe kapas allim. Ua kinisou ren ami tongofengen me tumunu fengen nefinemi. Ua kinisou ren ewe angang oua awora non ami kewe wart, pranch, steik, me tischrik. Ei sokkun angang a etufichi ewe Samon an epwe apwonueta chommong An popun won ei fonufan.
Ua kinisou ren ami kirokiroch ngeniei ekkis meinisin ia ua feino ia. Ua kinisou ren ami iotek fanasengesi. Ua mefi ekkana iotek me ua kinisou rer.
Iwe iei, pwi me fefinei kana, sia chufengen pwe sipwe kaeo me angei pwarata. Chommong poraus repwe fis non ekkei ru ran. Ua pwon ngeni kemi pwe ekkewe mwan me fefin repwe afanafana kemi ra kutta aninisin me emwenin nang nupwen ra ammonata ar kewe poraus. Ra angei pwarata usun met repwe apasa ngeni kich.
Semach won Nang a sinei kich meinisin me met mi namwot ngeni kich. Amo sipwe uren Ngunun nupwen sia fiti mokutokutun ei mwichenap. Iei ennetin ai iotek non iten ach Samon me Chon Amanau, Jises Kraist mi pin, amen.