Blong Gud blong Laen blong Yu
Yu no stap olsem joen blong jen we i no strong long naesfala jen ia we yu statem o we yu kasem olsem wan presen. Stap olsem hem we i strong.
Sam yia i pas, taem mi stap givim seves long Saot Amerika Notwes Eria, mo stap long Peru, mi bin gat wan naes eksperiens we mi laekem blong serem wetem yu.
I bin hapen taem mi stap kambak hom afta long wan bisi wiken blong ol asaenmen. Long en taem mi finisim proses blong imigresen long eapot, mi faenem wan gudfala taksi draeva we mi stap yusum seves blong olgeta oltaem, i stap wet from mi. Hem i tekem mi long trak blong hem, mo mi sidaon biaen mo rere blong spel gud mo harem gud long kwaet trip ia i go hom. Afta we mifala i draev pasem sam bilding, draeva i kasem wan kol i kam long supavaesa blong hem, se mi jam long rong taksi. Oli putum wan nara trak blong tekem mi, mo supavaesa i askem draeva blong tekem mi go bak long eapot sapos mi wantem blong jenisim trak. Mi talem long hem se i no nid, mo mitufala i gohed i go. Afta sam minit we ples i kwaet, hem i lukluk long mi long mira blong luk i kam biaen mo askem, “?Yu yu wan Momon, no?”
Afta long kwestin ia, mi save se kwaet taem ia i finis ia nao. Mi no save stop blong tingting long ol samting we kwestin ia i save tekem mitufala i go long hem.
Mi bin lanem se nem blong hem i Omar, nem blong waef blong hem i Maria Teresa, mo oli gat tu pikinini—Carolina, i gat 14 yia, mo Rodrigo, i gat 10 yia. Omar i bin joenem Jos taem hem i pikinini yet. Famli blong hem oli bin aktiv, be long wan taem, papa mo mama blong hem oli stop blong go long jos. Omar i bin nomo kam long jos stat long taem hem i gat 15 yia. Mo long taem ia long trak, hem i gat 40 yia.
Long taem ia mi luksave se mi no bin tekem rong taksi. !I no bin wan janis! Mi talem long hem huia mi, mo mi stap long taksi blong hem from Lod i stap singaotem hem blong i kam bak long Hem.
Afta, mifala i storian long taem we hem mo famli blong hem oli bin ol strong memba blong Jos. Hem i gat ol naesfala swit memori blong famli haos naet, mo sam long ol singsing blong Praemeri. Afta i singsing sloslo, sam toktok blong “Mi Pikinini blong God.”1
Afta we mi karem adres blong hem, fon namba, mo raet blong serem wetem bisop blong hem, mi talem long hem se bae mi faenem wan wei blong stap long jos long fas dei we bae hem i kambak long jos. Mitufala i finisim trip blong mitufala long eapot kasem haos, mo smol trip blong mitufala tu i gobak long pas, mo mitufala i seperet.
Sam wik i pas bisop blong hem i kolem mi, i se Omar i stap plan blong go long jos long wan Sandei. Mi talem long hem se bae mi kam. Long Sandei ia Omar i kam wetem boe blong hem. Waef blong hem mo gel blong tufala oli no intres yet. Sam manis i pas, bisop blong hem i ringim mi bakegen, naoia i blong talem se Omar bae i baptaesem waef blong hem mo tufala pikinini blong hem, mo i invaetem mi blong stap long taem ia. Hemia i pikja blong Sandei ia we long taem ia oli konfemem olgeta i kam memba blong Jos.
Long semfala Sandei ia, mi talem long Omar mo famli blong hem se, sapos oli rere, long wan yia taem, bae mi gat ona ia blong mekem siling blong olgeta long Lima Peru Tempol. Hemia i wan pikja blong taem ia we bae mifala evriwan i no fogetem, afta long wan yia.
?From wanem mi stap serem eksperiens ia wetem yufala? Mi serem from tu(2) risen.
Faswan, blong toktok long ol gudfala memba we, from sam risen oli bin foldaon aot long gospel blong Jisas Kraes we i bin kambak bakegen. Namba tu(2), i go tu long ol memba we oli stap tekpat tedei be oli no stap fetful long ol kavenan blong olgeta olsem we oli sapos blong mekem. Long tugeta kes ia, bae i afektem ol jeneresen we oli stap kam, mo ol promes blesing we oli holem i stap blong ol jeneresen blong olgeta i stap long denja.
Letem yumi stat wetem fas situesen, ol gudfala memba we oli lego rod blong kavenan, olsem we i bin hapen long fren blong mi long Peru, Omar. Taem mi askem hem from wanem hem i wantem blong kambak, hem i se from hem mo waef blong hem i filim se ol pikinini blong tufala bae i moa hapi long laef wetem gospel blong Jisas Kraes. Hem i filim se i taem blong gobak long jos from gud blong ol pikinini blong tufala.
I sore blong luk taem yumi fas long ol inaktiv memba o olgeta we oli no memba blong Jos, we long wan taem, oli bin gat gospel insaed long famli blong olgeta mo oli lusum from desisen blong ol papa mo mama o apu, blong nomo wantem kam long Jos. !Kaen desisen olsem i save afektem famli blong olgeta blong oltaem!
Ol pikinini mo ol apu pikinini blong olgeta i aot long proteksen mo ol blesing blong gospel blong Jisas Kraes long laef blong olgeta. I moa sore se oli bin lusum ol promes blong wan famli we i no save finis we i bin blong olgeta long wan taem. Desisen blong wan i afektem wan ful jen blong ol laen blong hem. Fet we i pas long ol papa i kam, i bin brok.
Be olsem we yumi save, eni samting we i brok, oli save kam gud bakegen tru long Jisas Kraes. From risen ia, plis tingting long invitesen ia we i kam long Presiden Russell M. Nelson: “Nao, sapos yu bin aot long rod ia finis, mi stap invaetem yu, wetem evri hop insaed long hat blong mi, blong yu kambak, plis. Nomata wanem wari blong yu, nomata jalenj blong yu, i gat wan ples blong yu insaed ia, long Jos blong Lod. Yu mo ol jeneresen we oli no bon i kam long wol yet, bambae oli gat blesing from ol aksen blong yu naoia blong kambak long kavenan rod ia.”2
Naoia letem yumi tokbaot namba tu situesen, tedei i gat ol memba we oli stap tekpat be oli no fetful olsem we oli nidim blong stap fetful. Semmak olsem ol desisen blong yestedei we i afektem ril laef blong tedei, ol desisen blong tedei bae i afektem fiuja blong yumi mo fiuja blong ol famli memba blong yumi.
Presiden Dallin H. Oaks i bin tijim yumi:
Gospel we i kambak blong Jisas Kraes i leftemap tingting blong yumi blong tingting abaot fiuja Hem i stap tijim ol gudfala aedia abaot fiuja blong lidim ol aksen blong yumi tedei.
“Long narasaed, yumi evriwan i save sam we oli stap wari nomo long tedei: spendem tedei, glad long hem tedei, mo no tingting long fiuja.
“… Taem yumi mekem ol desisen naoia, oltaem yumi mas askem, ‘?Hemia bae i lidim mi go wea?’”3 ?Desisen blong yumi naoia bae i lidim yumi blong stap glad naoia mo long taem we i no save finis, o bae i lidim yumi go blong sore mo krae?
Sam oli maet tingting se, “Yumi no nid blong go long jos evri Sandei,” o “Bae yumi pem taeting taem ol samting i stap kam gud,” o “Bae mi no sapotem ol lida long topik ia.”
“Be,” oli talem, “mi save Jos ia i tru, mo bae mi neva lego gospel blong Jisas Kraes.”
Olgeta wetem ol tingting olsem oli no luksave olsem wanem fasin ia blong “givim olgetawan hafhaf nomo” olsem wan memba, i save afektem laef blong olgetawan mo blong laen blong olgeta. Maet ol papa mo mama bae oli gohed blong stap aktiv, be janis blong lusum ol pikinini blong olgeta i hae—long laef ia mo long taem we i no save finis.
Long olgeta we bae oli no kasem selestial glori wetem ol famli blong olgeta Lod i talem, “Olgeta ia, oli olgeta we oli no strong long testemoni long saed blong Jisas; taswe, oli no kasem hat blong king blong rul long kingdom blong God blong yumi.”4 ?Hemia nao wanem yumi wantem blong yumi mo ol pikinini blong yumi? ?Bae yumi save kam moa strong mo no givim yumi hafhaf blong gud blong yumiwan mo gud blong laen blong yumi?
Presiden M. Russell Ballard tu i tokbaot wan semmak wari olsem :
“Blong samfala, invitesen blong Kraes blong biliv mo stap i gohed blong stap olsem wan had samting. … Sam long ol disaepol oli faenem i had blong andastanem wan Jos polisi o tijing. Ol narawan oli faenem ol wari long histri blong yumi o sam fasin we i no stret evriwan long sam memba mo lida, long pas mo naoia. …
“… Desisen ia blong ‘nomo wokbaot’ wetem ol memba blong Jos mo ol lida we Lod i jusum bae i afektem yumi blong wan longfala taem we yumi no save luk naoia.”5
Hemia presen we i sore blong stap pasem i go—?be from wanem olsem? Nomata long wanem risen, i no inaf blong stap ting nating long nogud fasin we bae i spolem laef long saed blong spirit, blong ol jeneresen we i stap kam yet.
Ol dia brata mo sista blong mi, sapos yu stap go tru long wan long tufala situesen ia we mi stap tokbaot long mesej blong mi, plis tingting gud bakegen long rod blong wok we yu stap mekem. Yu save se i gat plan blong yumi long laef ia. Yu save se famli i save stap blong laef we i no save finis. ?From wanem yu mas putum famli blong yu long denja? Yu no stap olsem joen blong jen we i no strong long naesfala jen ia we yu statem o we yu kasem olsem wan presen. Stap olsem hem we i strong. I taem blong yu nao blong mekem hemia i hapen, mo Lod i save helpem yu.
Dip daon insaed long hat blong mi, mi invaetem yu blong tingbaot, blong lukluk fored mo skelem “bae hemia i lidim mi go wea” mo, sapos i gat nid, stap strong inaf blong jenisim rod blong yu bakegen blong gud blong laen blong yu. Long nem blong Jisas Kraes, amen.