Ol Tabu Lesen blong Stap Olsem Papa mo Mama

I Kam long Elda Valeri V. Cordón

Blong Olgeta Seventi

Papa mo mama i patna wetem Papa long Heven blong lidim ol naesfala pikinini blong olgeta i gobak long heven.

?Yu bin holem wan niubon bebi long han blong yu? I gat wan laet we i kamaot long evri niubon bebi, we i karem wan spesel lav i kam we i joenem olgeta mo fulumap hat blong papa mo mama blong olgeta wetem glad.¹ Wan man blong raet blong Meksiko i raetem, “Mi bin lanem se taem we wan niubon bebi i skwisim fingga blong papa blong hem long smol han blong hem, hem i holemtaet papa blong hem blong oltaem.²

Blong stap olsem wan papa mo mama i wan long ol naesfala eksperiens blong laef. Papa mo mama i patna wetem Papa long Heven blong lidim ol naesfala pikinini blong olgeta i gobak long heven.³ Tedei mi laekem blong serem sam long ol lesen long hao blong stap olsem wan papa mo mama olsem we i stap insaed long ol skripja mo ol profet we oli laef i tijim blong helpem yumi kamaot long ol olfala praktis blong bifo.

Klaem go kasem Hae Ples blong Gospel Kalja

Yumi mas klaem kasem hae ples blong gospel kalja wetem ol famli blong yumi. Presiden Russell M. Nelson i talem: “Ol famli i nidim blong kasem gaed we i kam long heven. Papa mo mama i no save givim inaf kaonsel long ol pikinini aot long eksperiens, fraet, o sore blong olgetawan.”⁴

Nomata long ol defren kalja blong yumi, ol fasin blong lukaotem pikinini, mo ol eksperiens blong yumiwan, i maet impoten blong lukaot long ol pikinini, be ol samting ia oli no inaf blong helpem ol pikinini blong yumi blong gobak long heven. Yumi nidim akses long “ol impoten samting mo … ol praktis, we i moa hae”⁵ wan kalja blong lav mo wanem yumi wantem, we hem i blong wok tugeta wetem ol pikinini blong yumi long wan moa “hae mo tabu wei.”⁶ Presiden Dallin H. Oaks i tokbaot kalja blong gospel olsem “wan wei blong laef, wan set blong valiu mo wanem yumi wantem mo ol praktis. … Kalja blong gospel ia i kamaot long plan blong sevem man, ol komanmen blong God, mo ol tijing blong … ol profet we i stap laef. I lidim yumi long wei we yumi tijim mo lukaotem ol famli blong yumi mo laef blong yumi wanwan.”⁷

Jisas Kraes i senta blong gospel kalja ia. I impoten blong karem gospel kalja i kam insaed long ol famli blong yumi, blong krietem wan gudfala envaeromen we sid blong fet bae i save mekem flaoa. Blong klaem kasem ples we i moa hae, Presiden Oaks i bin invaetem yumi blong “lego eni praktis blong yuwan o famli praktis we i go agensem ol tijing blong Jos Ia blong Jisas Kraes.”⁸ Ol papa mo mama, taem yumi fraet blong stanemap gospel kalja, bae i letem enemi blong i kam insaed long ol hom blong yumi o moa nogud, insaed long ol hat blong ol pikinini blong yumi.

Taem yumi jusum blong mekem gospel kalja i stamba kalja insaed long famli blong yumi, afta tru long strong paoa blong Tabu Spirit,⁹ wetem fasin blong yumi blong lukaot pikinini naoia, ol tradisen, mo ol praktis bae oli muv, i kam stret, i kam klia, mo i kam bigwan.

Mekem Hom i Senta blong Lanem Gospel

Presiden Russell M. Nelson i tijim se hom i mas “senta blong lanem gospel.”¹⁰ Stamba tingting blong lanem gospel “i blong jenisim laef moa i go long Papa long Heven mo Jisas Kraes, mo blong helpem yumi kam olsem Tufala.”¹¹ Letem yumi tingting long tri impoten responsabiliti olsem wan papa mo mama we ol profet mo ol aposol oli tokbaot we i save helpem yumi stanemap wan hae gospel kalja insaed long ol hom blong yumi.

Faswan: Tij Wetem Fridom

Papa long Heven i givim instraksen long Adam abaot Jisas Kraes mo doktrin blong Hem. Hem i tijim hem blong “tijim olgeta samting ia long ol pikinini [blong hem], mo yu no holemtaet wan samting.”¹² Long nara toktok, Papa long Heven i tijim Adam blong tijim ol samting ia fri nomo, wetem gudfala hat mo no haedem wan samting.¹³ Ol skripja oli talem long yumi se “Adam mo Iv i bin blesem nem blong God, mo tufala i bin talemaot evri samting ia long ol boe mo ol gel blong tufala.”¹⁴

Yumi tijim ol pikinini blong yumi wetem gudfala hat taem yumi spendem moa taem wetem olgeta. Yumi tijim olgeta mo no haedem wan samting taem yumi tokbaot ol topik we i had blong tokbaot olsem “skrin taem,” blong yusum ol risos we Jos i mekem i rere i stap.¹⁵ Yumi tij fri nomo taem yumi stadi olgeta skripja wetem ol pikinini blong yumi taem yumi yusum Kam Folem Mi mo letem Spirit i kam tija.

Nambatu:Lukluk long Wan Olsem Wan Disaepol

Long buk blong Jon, yumi ridim se i gat sam long ol man Jiu oli askem kwestin long Sevya abaot aksen blong Hem, Jisas i daerektem olgeta i go long man we Hem i lukluk long Hem olsem wan eksampol, Papa blong Hem. Hem i tijim: “Mi, Pikinini blong God, mi no save mekem wan samting nating long tingting blong mi nomo. Mi save mekem ol samting ya nomo we mi luk Papa blong mi i stap mekem. Ol samting we Papa blong mi i mekem, mi tu mi mas mekem.”¹⁶ Papa mo mama, ?wanem eksampol nao yumi nid blong soem long ol pikinini blong yumi? Fasin blong Stap Olsem Wan Disaepol

Olsem papa mo mama, yumi save tijim olsem wanem i impoten blong putum God faswan, be yumi mas mekem i gud taem yumi putum ol samting blong wol long saed mo kipim Sabat dei hem i tabu evri wik. Yumi save tijim hao ol tempol kavenan i impoten taem we yumi tokbaot doktrin blong selestial mared, be bae yumi mekem i kam gud taem yumi givim ona long ol kavenan blong yumi taem yumi tritim ol patna blong yumi wetem respek.

3. Invaetem blong Tekem Aksen.

Fet long Jisas Kraes i mas stamba blong testemoni blong ol pikinini blong yumi, mo ol testemoni ia oli mas kam long wanwan long ol pikinini ia tru long revelesen blong olgetawan.¹⁷ Blong helpem ol pikinini blong yumi blong bildim ol testemoni blong olgeta, mifala i leftemap tingting blong olgeta blong yusum fasin blong mekem joes blong jusum wanem i raet¹⁸ mo rere long olgeta blong wan laeftaem long kavenan rod ia blong God.¹⁹

Bae hem i gud blong leftemap wanwan long ol pikinini blong yumi blong akseptem invitesen blong Presiden Nelson blong letem olgetawan i gat responsabiliti long testemoni blong olgeta long Jisas Kraes mo gospel blong Hem, blong wok from, blong lukaotem gud blong mekem se i gro, blong fidim trutok blong hem, mo no mekem doti long hem wetem ol giaman tijing blong ol man mo woman we oli no bilif.²⁰

Stret mo gud fasin, blong Wan Papa mo Mama

Tabu plan blong Papa long Heven olsem wan papa, oli givimaot tru wan revelesen long Moses: “From luk, hemia i wok mo glori blong mi—blong mekem man i nomo save ded mo i kasem laef we i no save finis.”²¹ Presiden Nelson i ademap: “God bae i mekem evri samting we Hem i save mekem, blong i no save spolem fridom blong yu, blong helpem yu no mestem ol bigfala blesing blong ol taem we i no save finis.”²²

Olsem ol papa mo mama, yumi ol wokman blong God blong lukaotem ol pikinini blong yumi.²³ Yumi mas mekem evri samting we yumi save mekem blong krietem wan ples we ol pikinini blong yumi i save filim tabu wok blong Hem.

I neva bin plan blong Papa long Heven blong yumi ol papa mo mama blong sidaon long saed mo waj, stap wajem laef long saed blong spirit blong ol pikinini blong yumi i kamkamaot. Bae mi soem aedia ia blong lukaotem pikinini wetem gudfala tingting wetem wan eksperiens blong miwan. Taem mi stap go long Praemeri long wan smol branj long Guatemala, papa mo mama blong mi i tijim mi abaot hamas petriakel blesing i impoten. Mama blong mi i tekem taem blong hem i serem eksperiens blong hem taem hem i kasem petriakel blesing blong hem we i rij o spesel tumas. Hem i tijim mi doktrin we i go wetem petriakel blesing, mo hem i testifae long ol promes blesing. Gudfala fasin blong hem ia olsem wan gud mama, i givim mi insperesen blong gat strong tingting blong kasem petriakel blesing blong mi.

Taem mi gat 12 yia , papa mo mama blong mi i helpem mi blong lukaotem wan petriak. Hemia i bin wan nid from se i nogat wan petriak long distrik we mifala i stap long hem. Mi travel i go long wan petriak long wan stek we i stap 156 kilo mita. Mi tingbaot gud taem petriak i putum han blong hem antap long hed blong mi blong blesem mi. Mi bin save tru long paoa blong spirit we i talem stret se, i nogat tu tingting se Papa long Heven i bin save mi.

Blong wan 12 yia boe long wan smol taon, hemia i minim evri samting long mi. Hat blong mi i tanem i go long Papa long Heven long dei ia from se ol gudfala tijing blong papa mo mama, mo bae oltaem mi glad long olgeta

Sista Joy D. Jones, foma Jeneral Presiden long Praemeri, i bin talem: “Yumi no save wet se bae fasin blong jenis bae i jes hapen nomo olsem wetem ol pikinini blong yumi. Wok blong gat jenis wanwan taem, i no wan prinsipol blong gospel blong Jisas Kraes.”²⁴ Lav blong yumi mo ol invitesen we i kam tru insperesen i save mekem samting i defren long olsem wanem ol pikinini blong yumi i yusum fasin blong mekem joes blong olgeta. Presiden Nelson i talem, “!I nogat wan narafala wok we i moa hae bitim hemia blong stap olsem ol stret mo gudfala papa mo mama!”²⁵

Las Toktok

Ol papa mo mama, wol ia i fulap long ol giaman fasin, ol kalja, mo aedia we oli stap faet from ol tingting blong ol pikinini blong yumi. Bigfala bilding we i gat spes i soemaot ol man we oli yusum media evri dei. “Be tru long presen we i Pikinini blong Hem,” profet Moronae i tijim, “God i bin mekem rere wan rod we i moa gud yet.”²⁶

Taem yumi patna wetem God tru long ol kavenan mo kam ol wokman blong Hem, Hem bae i mekem wok blong yumi i kam tabu, givim insperesen long ol tijing blong yumi, mo mekem moa invitesen blong “ol pikinini blong yumi oli save gat save long wanem ples oli save lukluk long hem blong kam klin aot long ol sin blong olgeta.”²⁷ Long nem blong Jisas Kraes, amen.