Ol Brata mo Sista long Kraes
Letem yumi glad moa long rilesensip long saed blong spirit we i stap finis bitwin yumi mo luk hamas ol defdefren fasin mo ol presen we yumi evri wan i gat i kam faswan.
Ol dia fren blong mi, yumi bin gat ol naesfala sesen blong konfrens tedei. Yumi evriwan i bin filim spirit blong Lod mo lav blong Hem tru ol naesfala mesej we ol lida blong yumi oli bin serem. Mi filim spesel janis ia blong toktok long yufala long naet ia olsem las spika blong sesen ia. Mi prea se Spirit blong Lod bae i gohed wetem yumi taem yumi glad tugeta olsem ol tru brata mo ol sista long Kraes.
Dia profet blong yumi, Russell M. Nelson, i bin talemaot: “Tedei, mi stap singaotem ol memba blong yumi long evri ples blong lidim rod blong stopem gud ol fasin mo ol aksen we oli no gat jastis long man. Mi plis long yufala blong promotem respek long evriwan long ol pikinini blong God.”1 Olsem wan wol waed mo Jos we i no stop blong gro, stap folem invitesen ia we i kam long profet blong yumi i wan impoten samting blong stap bildimap kingdom blong Sevya long evri nesen blong wol.
Gospel blong Jisas Kraes i tijim se yumi evriwan i ol stret spirit pikinini boe mo gel blong papa mo mama long heven we oli lavem yumi tumas2 mo se yumi bin laef olsem wan famli long ples we God i stap long hem bifo we yumi bon i kam long wol ia. Gospel i tijim tu se Oli krietem yumi evri wan folem pikja mo i semmak long God.3 Mekem se, yumi evri wan i semmak long fes blong Hem,4 from Hem “i mekem wan man nomo, nao olgeta man [mo woman] long wol oli kamaot long man ya.”5 From hemia, yumi evri wan i gat wan tabu fasin, ol semak samting, mo paoa blong save mekem samting, from i gat, “wan God we i Papa blong everi man,we i moa hae, we i save everi samting mo i stap long wanwan long yumi .”6
Olsem ol disaepol blong Kraes, oli invaetem yumi blong mekem fet blong yumi i kam antap, mo lav long ol brata mo sista blong yumi long saed blong spirit, taem yumi joenem hat blong yumi tugeta fulwan tru long yuniti mo lav, nomata ol wiknes blong yumi, taem yumi mekem olsem, paoa blong yumi i kam antap blong stap soemaot respek long ol pikinini boe mo gel blong God.7
?I no hemia semmak situesen we ol pipol blong Nifae oli bin eksperiensem blong kolosap tu handred yia afta we Kraes i givhan long olgeta?
“Mo i tru we i no save gat wan pipol we i moa hapi long medel blong evri pipol we han blong God i mekem olgeta. …
“Mo tu, i no bin gat Ol Man blong Leman, o eni kaen pipol we oli singaotem Ol Man blong be oli stap wan; oli ol pikinini blong Kraes, mo oli gat raet long kingdom blong God.
“!Mo hamas nao oli bin kasem blesing!”8
Presiden Nelson i tokbaot i go moa, hamas i impoten blong stap talemaot valiu mo respek blong ol narawan taem hem i talem: “Krieta blong yumi evriwan i singaotem wanwan long yumi blong lego fulwan ol fasin blong no gat jastis long man we i agensem eni grup blong ol pikinini blong God. !Eniwan long yumi we i gat fasin blong no gat jastis long ol narafala kala blong skin, i nidim blong sakem sin! … Hem i stret blong wanwan long yumi blong mekem wanem yumi save mekem long ol ples we yumi save gat paoa blong kipim valiu mo respek long evri pikinini boe mo gel blong God, we oli nidim.”9 Wanem i tru i we, blong tritim evri wan se oli impoten, i nidim blong yumi respektem se yumi evri wan i no semak.10
Stap tingting long tabu samting we i fasem yumi wetem God olsem ol pikinini blong Hem, daereksen ia we i kam tru long Presiden Nelson i wan stamba tingting we i no gat tu tingting long hem mo i mekem ol man i kam tugeta long tingting moa bitim blong krietem ol samting blong spolem nara man mo seraot long medel blong yumi .11 Be, olsem we Pol i wonem ol man Efesas, yumi mas luksave se, blong kasem stamba tingting ia, bae i nidim blong mekem wanwan mo karem tugeta ol efot blong mekem samting tru long fasin blong putum tingting i stap daon, no stap flas, fasin blong save wet longtaem wetem yumi wanwan.12
I gat wan stori blong wan man jiu we i wan tija blong loa, we i stap glad blong lukluk san we i stap girap wetem tu fren blong hem. Hem i askem tufala, “?Olsem wanem nao bae yu save se naet i finis mo wan niufala dei i stat?”
Wan long tufala i ansa, “Hem i taem yu lukluk i go long is mo save luksave wijwan i wan sipsip be i no wan nanigot.”
Afta, narawan i ansa, “Hem i taem we yu lukluk i go long en blong graon mo luksave wan olif tri be i no wan fig tri.”
Afta tufala i tanem tufala i go long tija ia we i gat fulap save mo askem hem semmak kwestin ia. Afta we hem i tingting plante, hem i ansa, “Hem i taem we yu save lukluk i go long Is mo luk fes blong wan man mo save talem se,‘hem i sista blong mi; hem i brata blong mi.’”13
Ol dia fren blong mi, mi save promesem yufala se laet blong wan niu dei i saen moa gud long laef blong yumi taem yumi luk mo tritim ol narawan wetem respek mo luksave valiu blong olgeta mo olsem ol tru brata mo sista blong yumi long Kraes.
Long taem blong seves blong Hem long wol ia, Jisas i soem gud prinsipol ia taem Hem i “go olbaot mo mekem ol gud samting”14 long evri pipol, i stap invaetem olgeta blong kam long Hem mo tekpat long gud fasin blong Hem, nomata ol fasin we oli bon wetem, ples we oli stap long hem o ol fasin blong ol kastom blong olgeta. Hem i givhan, hilim mo oltaem i stap rere blong givhan long nid blong evri wan, speseli olgeta we long wan taem oli tingting long olgeta se, oli defren, se oli no impoten o oli no pat. Hem i no tanem baksaed long eniwan be i tritim olgeta i semmak mo wetem lav, from Hem i luk olgeta olsem ol brata mo sista blong Hem, ol pikinini boe mo gel blong wan Papa.15
Wan long olgeta taem we i pulum tingting blong man i taem we hemia i hapen, i taem we Sevya i travel i go long Galili, mo i wantem blong pas tru long rod we i go long Sameria.16 Afta, Jisas i jusum blong sidaon long wel blong Jekob. Long ples ia Hem i stap, wan woman Sameria i kam blong fulumap jag blong wota blong hem. From we Hem i save finis, Jisas i toktok long hem mo talem, “Ei, yu givim smol wota long mi. Mi wantem dring.”17
Woman ia i sek se wan Jiu i askem help long wan woman Sameria mo talemaot sapraes blong hem se, “?!Ei! Yu yu wan man Judia ya. Mo mi mi wan woman Sameria. ?Olsem wanem yu askem wota long mi?from ol man Jiu oli no gat rilesensip wetem ol man Sameria.”18
Be Jisas i stopem fogud tradisen ia we oli holem longtaem bitwin Ol Man Samaria mo Ol Man Jiu, wetem lav Hem i givhan long woman ia, stap helpem hem blong andastanem huia Hem stret—i we, Mesaea ia we bae i talem evri samting mo we hem i stap wet long taem we Hem bae i kam.19 Risal blong naesfala givhan i mekem se woman ia i ron i go insaed long siti blong anaonsem long ol pipol wanem we i bin hapen, hem i talem, “!Ei! Yufala i kam luk Ating hem i Mesaea ya?”20
Mi gat bigfala sore long olgeta we oli tritim nogud olgeta, oli se oli no impoten, o mekem nogud tru long ol pipol we oli no gat filing mo gudfala tingting, from se, long eksperiens blong laef blong mi, mi bin luk fastaem soa we ol gudfala pipol oli safa long hem taem ol narafala man oli jajem olgeta o putumaot olgeta from se oli mestem ol toktok, lukluk o laef long ol defren wei. Mo tu, mi bin filim wetem tru hat blong mi harem nogud from olgeta we maen blong olgeta i stap nomo long tudak, olgeta we gol blong olgeta i sot nomo, mo olgeta we hat blong olgeta i strong nomo tru ol bilif ia se oli moa gud bitim ol narawan long olgeta we oli defren long olgeta. From we lukluk blong olgeta i sot, i blokem paoa blong olgeta blong luk huia olgeta olsem ol pikinini blong God.
Olsem we ol profet blong bifo oli bin talem, yumi stap laef long ol dei blong tudak we i stap kam antap mo bae i go kasem long Seken Kaming blong Sevya.21 Impoten samting i we, wol i stap seraot long tu, oli soem bigwan tru long kala blong skin, politik mo laen blong sosol ekonomi. Ol kaen seraot olsem, samtaem long en i jenisim wei blong ol pipol oli tingting mo tekem aksen i go wetem wanem we ol narawan oli mekem. From risen ia, naoia i stap hapen we ol pipol oli luksave wei blong tingting mo tekem aksen, mo stap tokabaot ol narafala kalja, ol kala blong skin, hamas oli impoten o no impoten, mekem ol toktok we i no gat pruf, oli andastanem samting i rong, oltaem talem samting we i mekem narawan i harem nogud, gohed blong gat ol filing se man o woman ia i no gat valiu, oli no semmak, no gat respek, mo iven blong no gat jastis long narafala man. Stamba blong ol tingting ia i kamaot long ol fasin blong gat hae tingting, stap presem yuwan, jalus, gohed long ol fasin blong wol,22 we oli no semmak long ol fasin Olsem hemia blong Kraes. Fasin ia hem i no stret blong olgeta we oli stap traehad blong kam ol tru disaepol blong Hem.23 I tru, ol brata mo sista blong mi, i no gat ples blong gat ol tingting o aksen blong spolem narafala man insaed long komuniti blong Ol Sent.
Olsem ol pikinini boe mo gel blong kavenan, yumi save help blong karemaot kaen fasin olsem taem yumi stap lukluk long wanem we i klia i stap bitwin yumi mo wetem ae blong Sevya24 mo folem wanem we yumi gat we i semmak— we i tabu aedentiti mo rilesensip blong yumi. Blong ademap, yumi save traehad blong luk sado blong yumiwan insaed long ol drim, ol hop, mo ol harem nogud blong ol neba blong yumi. Yumi evri wan ol man mo woman we yumi stap wokbaot olsem ol pikinini blong God, yumi semmak long fasin blong yumi blong no stret gud evriwan mo long paoa blong yumi blong kam antap . Oli invaetem yumi blong wokbaot tugeta, long pis, wetem hat blong yumi i fulap long lav i go long God mo long evri wan—o, olsem we Abraham Lincoln i raetem, “tingting blong wantem mekem wan i harem nogud bae i no go long eniwan, be wetem jareti i blong evriwan.”25
?Yu stap tingting hevi long hamas prinsipol blong respek long wan man mo fasin blong tritim gud man ia , yumi stap soem tru ol simpol wei we yumi dresap blong go long haos blong Lod? Yumi evri wan i kam long tempol wetem wan stamba tingting we i fulap wetem tingting we i wantem blong stap klin mo wan hat we i tabu insaed long tabu ples we Hem i stap long hem. Werem waet klos, Lod Hemwan i akseptem yumi evri wan olsem ol pikinini blong Hem we Hem i lavem tumas, ol man mo woman blong God, ol laen blong Kraes.26 Yumi gat spesel janis blong mekem semmak odinens, kavenan, komitim yumiwan blong laef long wan hae mo tabu wei, mo kasem semmak promes we i no save finis. Blong kam wan long tingting ia, yumi luk yumi wanwan wetem ol niu ae, mo stap wok wan, yumi selebretem ol ol samting we i mekem yumi defdefren blong yumi olsem ol tabu pikinini blong God.
I no longtaem i pas, mi help blong lidim ol bigman mo ol ofisol blong gavman tru long open haos blong Brasilia Brasil Tempol. Mo stop smoltaem long eria blong jenis wetem vaes presiden blong Brasil, mo mitufala i toktok raon long ol waet klos we evriwan oli stap werem insaed long tempol. Mi eksplenem long hem se, waet klos ia we oli yusum raon long wol i minim se yumi evri wan i semmak long God mo we, insaed long tempol, ol aedentiti blong yumi oli no se, vaes presiden blong kantri o wan jos lida, be aedentiti blong yumi we i no save finis hem i ol pikinini boe mo gel blong Papa long Heven we i gat lav.
Iguaçú Reva i stap ron tru long saot blong Brasil mo i kam emti insaed long wan plato we i fomem wan sistem blong ol wotafol we raon wol oli save olsem Iguaçú Falls—wan nambawan mo naesfala kriesen blong God long wol, wan long ol seven sapraes blong wol. Wan bigfala namba blong wota we i stap ron i go long wan singgel reva mo afta i seraot, mo i fomem handred long ol wotafol we oli no ron long semmak daereksen. Blong komperem, nambawan sistem ia blong wotafol i wan pikja blong famli blong God long wol, from yumi serem semmak ples we yumi bon i kam long hem, we yumi kasem tru long tabu ples mo rilesensip we yumi gat. Be, wanwan long yumi i ron long ol defdefren kalja, kantri, nasonaliti, wetem ol defren tingting, eksperiens mo ol filing. Nomata long hemia, yumi muv i go fored olsem ol pikinini blong God mo olsem ol brata mo ol sista long Kraes, blong no lusum tabu koneksen blong yumi, we i mekem yumi wan spesel pipol mo wan komuniti we Hem i lavem tumas.27
Ol dia brata mo sista blong mi, letem yumi putum tugeta hat mo maen blong yumi wetem save mo testemoni se yumi evri wan i semmak long fes blong God, se yumi evri wan i endao fulwan wetem semmak paoa mo evri samting we i blong yumi we i no save finis. Letem yumi glad moa long rilesensip long saed blong spirit we i stap finis bitwin yumi mo luk hamas ol defdefren fasin mo ol presen we yumi evriwan i gat. Sapos yumi mekem olsem, mi promesem yufala se bae yufala i ron long ol wei blong yufalawan, olsem we ol wota blong Iguaçú Falls i mekem, mo no lusum tabu koneksen blong yumi we i poenemaot yumi olsem wan pipol we Hem i jusum we oli, “ol pikinini blong Kraes, mo we oli gat raet long kingdom blong God.”28
Mi testifae long yufala se taem yumi gohed blong ron long wei ia long taem we yumi stap laef long wol ia, wan niu dei bae i stat wetem wan niu laet we bae i mekem laef blong yumi i saen gud mo saenem ol naesfala janis blong mekem i gat moa valiu, mo stap kasem blesing fulwan, tru long fasin we God i krietem blong putum i kam tugeta evri pikinini blong Hem.29 I tru bae yumi kam ol tul long han blong Hem, blong talemaot respek mo fasin blong no spolem nara man long medel blong ol pikinini boe mo gel blong Hem. God i stap laef. Jisas emi Sevya blong wol. Presiden Nelson hem i profet blong God long ol dei blong yumi. Mi talem witnes blong mi abaot ol trutok ia long tabu nem blong Jisas Kraes,amen.