Jeneral Konfrens
Stap Wokbaot long Kavenan Rilesensip Wetem Kraes
Oktoba 2023 jeneral konfrens
10:24

Stap Wokbaot long Kavenan Rilesensip Wetem Kraes

I Kam long Presiden Emily Belle Freeman

Yang Woman Jeneral Presiden

Hem we oli kilim mo brekem from yumi bae i letem ol harem nogud blong laef ia i kam long yumi, be Hem i no askem blong yumi go tru ol had taem ia yumiwan.

Gud fren blong mi IIan i bin talem long mi abaot wan wokbaot long Isrel. “Oli singaotem, Wokbaot blong Jisas,” hem i talem, “from se hem i rod we i stat long Nasaret kasem Kapaneam, we plante oli bilivim se Jisas i bin wokbaot long hem.” Mi disaed long taem ia se mi wantem blong wokbaot long wokbaot ia, mekem se mi stat blong mekem plan blong wan trip i go long Isrel.

Sikis wik bifo trip ia, mi brekem angkol blong leg blong mi. Hasban blong mi i wari abaot kil ia; bigfala wari blong mi naoia i olsem wanem bae mi wokbaot long wokbaot blong Jisas wan manis afta. Mi mi wan strong hed lelebet, mekem se mi no kanselem ol tikit blong plen.

Mi tingbaot we mi mitim tua gaed blong mi blong Isrel long naesfala moning blong Jun. Mi jamaot long bas mo pulumaot ol stik blong wokbaot wetem wan ni skuta. Tua gaed blong mifala Mya, i lukluk simen long leg blong mi mo talem, “Am, mi no ting se bae yu save mekem wokbaot ia wetem situesen blong yu.”

“Ating olsem,” mi ansa. “Be i nogat samting we i stap stopem mi blong mi traem.” Hem i sakem hed smol mo mifala i stat. Mi lavem hem from hemia, blong bilivim se mi save mekem long wokbaot ia nomata se leg i brok.

Mi traem blong wokbaot long ol hil mo ston blong wan sot taem miwan. Afta, Mya i luksave hamas mi givim miwan blong wokbaot mo hem i karemaot wan tintin rop mo fasem long ol handel blong skuta blong mi, mo i stat blong pulum. Hem i pulum mi i go antap long ol hil, tru long ol plantesen blong lemon, mo folem saedsaed blong Solwota blong Galili. Long en blong wokbaot ia, mi talem tangkyu long swit tua gaed we i bin helpem mi blong winim wan samting we bae mi no save mekem miwan.

Taem Lod i singaotem Inok blong travel long ples mo testifae abaot Hem, Inok i tingting tu taem.1 Hem i wan yang boe nomo mo i no save toktok gud. ?Olsem wanem nao bae hem i wokbaot long rod ia wetem situesen blong hem? Samting ia i brokem hat blong hem mo i mekem hem i blaen. Ansa blong Lod long wanem i stap holemtaet Inok i simpol mo kwik: “Wokbaot wetem Mi.”2 Olsem Inok, yumi mas tingbaot se Hem we oli kilim mo brekem from yumi3 bae i letem ol harem nogud blong laef ia i kam long yumi, be Hem i no askem blong yumi go tru ol hadtaem ia yumiwan.4 Nomata hamas ol stori blong yumi oli hevi, o taem naoia we rod blong yumi i fasfas, bae Hem i invaetem yumi blong wokbaot wetem Hem.5

Tingting long yangfala man ia long hadtaem ia we i mitim Lod long wan drae ples. Jekob i travel longwe long hom blong hem. Long naet, hem i bin drim wan drim we i gat wan lata, be, tu i holem ol impoten kavenan promes, we i tekem tu wanem we mi laekem blong singaotem faef-fingga promes.6 Long naet ia Lod i stanap long saed blong Jekob, i introdiusum Hemwan olsem God blong Haos blong Jekob, mo afta i promes se:

  • Mi bambae mi stap wetem yu,

  • blong lukaot long yu,

  • mo bambae mi tekem yu yu kambak long ples ya bakegen,

  • bambae mi no save lego yu,

  • go go mi mekem olgeta samting ya we mi promes long yu blong mekem.7

Jekob i gat wan joes blong mekem. Hem i save jusum blong laef mo save nomo abaot God Papa blong Hem, o hem i save jusum blong laef long wan laef we hem i komitim hemwan long kavenan we hem i mekem wetem God. Plante yia afta, Jekob i testifae abaot wan laef we hem i laef long hem insaed long ol kavenan promes ia: “Oltaem, taem mi gat trabol, hem i stap givhan long mi, mo i stap kampani wetem mi long evri ples we mi mi pas long hem.”8 Semmak olsem we Hem i bin mekem blong Jekob, Lod bae i ansa long wanwan long yumi long trabol taem blong yumi sapos yumi jusum blong fasem laef blong yumi wetem Hem. Hem i bin promes blong wokbaot wetem yumi long rod.

Yumi singaotem hemia, blong stap wokbaot long rod blong kavenan—wan rod we i stat wetem kavenan blong baptaes mo i lidim yumi i go long ol kavenan we oli moa dip we yumi mekem insaed long tempol. Ating bae yu harem ol toktok ia mo tingting long wan jeklis blong tikim. Ating wanem yu stap luk hem i wan rod blong ol samting we i nidim blong mekem. Taem yu lukluk kolosap moa, bae yu luk wan samting we i moa intresting. Wan kavenan i no abaot wan kontrak nomo, nomata se hemia tu i impoten. Hem i abaot wan rilesensip. Presiden Russell M. Nelson i bin tijim, “Kavenan rod hem i evri samting abaot rilesensip blong yumi wetem God.”9

Tingting long wan mared kavenan. Deit blong mared hem i impoten, be i impoten semmak long rilesensip we tufala i bildim tru long laef blong tufala afta. Hemia i semmak mo tru wetem wan kavenan rilesensip wetem God. Ol kondisen i stap mo bae i gat ol samting we yumi biliv blong i hapen long rod. Be yet, Hem i invaetem wanwan long yumi blong kam olsem we yumi save mekem, wetem wan ful hat, mo blong “go fored”10 wetem Hem long saed blong yumi, blong stap trastem se ol promes blesing blong Hem bae oli kam. Skripja i rimaenem yumi plante taem long ol blesing we i kam long taem blong Lod mo long wei blong Hem: I save 38 yia,11 12 yia,12 o naoia.13 Olsem we wokbaot blong yu bae i askem, bae Hem i sapotem yumi semmak.14

Misin blong Hem i blong helpem yumi. Jisas Kraes bae i kam long yumi long ples we yumi stap long hem mo olsem we yumi stap. Hemia i risen blong garen, blong kros, mo tum. Hem i sendem Sevya i kam blong helpem yumi win.15 Be blong stap long ples we yumi stap long hem nomo, bae i no karem fridom we yumi stap lukaotem i kam. Semmak olsem we Hem i no bin lego Jekob long graon, Lod i no wantem blong lego wan long yumi long ples we yumi stap long hem naoia.

Misin blong Hem i blong leftemap yumi. Bae Hem i wok insaed long yumi16 blong leftemap yumi i go long ples we Hem i stap long hem, mo long rod ia, bae Hem i letem yumi blong kam olsem Hem. Jisas Kraes i kam blong leftemap yumi.17 Hem i wantem helpem yumi blong kam olsem Hem. Hemia i risen blong tempol.

Yumi mas tingbaot, i no ol hadtaem long rod ia hemwan we bae i mekem yumi kam olsem god, hem i kompanion—Sevya blong yumi. Mo hemia i risen blong kavenan rilesensip.

Taem mi stap long Isrel, mi bin visitim Western Wall. Long ol man Jiu, ples ia i moa tabu bitim evri nara ples long Isrel. Hem i smol pat ia nomo we i stap long ol tempol blong olgeta. Plante oli werem ol naes klos blong olgeta taem oli visitim tabu ples ia; fasin blong jusum klos blong olgeta hem i wan saen blong soem komitmen long rilesensip blong olgeta wetem God. Oli visitim wol ia blong ridim skripja, wosip, mo talem ol prea blong olgeta. Oli krae evri dei, mo prea evri dei blong gat wan tempol long medel blong olgeta, from oli wantem tumas wan haos blong kavenan. Mi laekem tumas komitmen blong olgeta.

Taem mi aot long Isrel mo kambak hom, mi stap lisin moa kolosap long ol storian raon long mi abaot ol kavenan. Mi luk save we ol pipol oli stap askem, ?From wanem mi mas wokbaot long kavenan rod? ?Mi nidim blong go long wan haos blong mekem ol kavenan? ?From wanem mi werem tabu klos? ?Hem i impoten tumas blong mekem wan kavenan rilesensip wetem Lod? Ol ansa long ol gud mo impoten kwestin ia oli simpol: hemia i dipen long wanem level blong rilesensip we yu wantem eksperiensem wetem Jisas Kraes.18 Wanwan long yumi i mas faenemaot ansa blong yumiwan long ol dip kwestin ia we i blong yumiwan.

Hemia i blong mi: Mi stap wokbaot long rod ia olsem wan “gel blong Papa mo Mama long Heven we Tufala i laekem mi tumas ,”19 oli save gud20 mi mo trastem gud mi.21 Olsem wan pikinini blong kavenan, mi save kasem ol promes22 blesing. Mi bin jusum23 blong wokbaot wetem Lod. Oli bin singaotem24 mi blong stanap olsem wan witnes blong Kraes. Taem mi filim se rod ia i had tumas long mi, mi kasem moa paoa25 wetem sore blong Hem we i givim mi paoa. Evritaem mi go long haos blong Hem, mi eksperiensem wan moa dip kavenan rilesensip wetem Hem. Mi kam klin26 tru long Spirit blong Hem, mi endao27 wetem paoa blong Hem, mo mi set apat28 blong bildim kingdom blong Hem. Tru wan proses blong stap sakem sin evri dei mo tekpat long sakramen evri wik, mi stap lanem blong stanap mo no muvmuv29 mo blong go raon blong stap mekem gud fasin.30 Mi wokbaot long rod ia wetem Jisas Kraes, mo lukluk fored long dei ia we Hem i promesem se bae Hem i kam bakegen. Afta bae oli silim mi blong Hem31 mo girap olsem wan tabu32 gel blong God.

Hemia i from wanem mi wokbaot long rod blong kavenan.

Hemia i from wanem mi hang strong long ol promes blong kavenan.

Hemia i from wanem mi go insaed long kavenan haos blong Hem.

Hemia i from wanem mi werem tabu klos olsem wan samting blong stap rimaenem mi oltaem.

From se mi wantem blong laef long wan laef we mi komitim mi long kavenan rilesensip wetem God.

Ating yu wantem hemia tu. Stat long ples we yu stap long hem.33 No letem situesen blong yu i stopem yu. Tingbaot, spid o ples we yu stap long hem long rod i no impoten olsem fasin blong stap gro.34 Askem wan we yu trastem, we i stap long rod blong kavenan, blong i presentem yu long Sevya we oli kam blong save. Lanem moa abaot Hem. I impoten tumas blong mekem rilesensip ia taem yu mekem kavenan wetem Hem. I nomata long yia o situesen blong yu. Yu save wokbaot wetem Hem.

Afta we mifala i finis blong wokbaot long Wokbaot blong Jisas, Mya i no tekembak rop blong hem. Hem i lego i stap nomo long skuta blong mi. Long ol nekis dei, ol yangfala pikinini boe blong ol brata mo sista blong mi mo ol fren blong olgeta, oli pulum mi raon long ol rod blong Jerusalem, wan afta wan.35 Oli bin mekem sua se mi no mestem ol stori blong Jisas. Mi tingbaot bakegen paoa blong jeneresen we i stap kam antap. Yumi save lan aot long yufala. Yufala i gat wan tru hat blong wantem save lida ia we i Jisas Kraes. Yufala i trastem paoa blong rop we i fasem yumi long Hem. Yufala i gat wan spesel presen ia, blong karem tugeta ol narawan i go long Hem.36

Tangkyu bigwan se yumi wokabaot long rod ia tugeta, mo stap leftemap tingting blong ol narawan folem rod,37 Taem yumi serem ol eksperiens blong yumiwan wetem Kraes, bae yumi stap givim yumiwan moa. Mi talem witnes blong mi abaot hemia, long nem blong Jisas Kraes, amen.

Ol Not

  1. Ol pipol blong Inok oli bin go longwe long God, oli fogetem Kraes mo “oli lukaot ol kaonsel blong olgetawan long tudak” (luk long Moses 6:27–28). Long wan taem we Inok i lusum fet long man, Inok i tanem hem i go long Lod blong i lidim hem. Singaot ia we oli mekem i go long Inok i semmak singaot we Lod i stap mekem i kam long yumi evriwan: “Wokbaot wetem mi” (Moses 6:34; luk tu long Matiu 11:28). Be maet, olsem Inok yu yu no sua sapos yu save wokbaot long rod ia wetem situesen blong yu. Maet yu filim se sam samting i stopem yu long sam wei. Maet stret risen ia we i nidim yumi blong wokbaot long kavenan rod ia i from situesen blong yumi, from se i stopem yumi long sam wei mo yumi nidim help blong Hem.

  2. Luk long Moses 6:23–34.

  3. Luk long “Jesus of Nazareth, Savior and King,” Hymns, no. 181.

  4. Luk long Ita 12:27.

  5. Luk long Matiu 11:28–30

  6. Ol gel blong mi oli wantem talem slo ol faef-fingga promes ia long ol pikinini blong olgeta (ol apu pikinini blong mi) evri moning—wan rimaenda blong wan Papa long Heven we i save gud wanwan long ol pikinini blong Hem.

  7. Luk long Jenesis 28:10–22. Kavenan blong Ebraham i bin wan impoten samting tu abaot naet ia. Ol impoten pat blong kavenan blong Ebraham oli gat wan impoten wok insaed long laef blong yumi mo insaed long gospel blong Jisas Kraes: (1) promes blong kasem ol samting we ol papa oli pasem i kam daon blong taem we i no save finis (ves 13); (2) jeneresen blong fiuja we i no save finis (ves 14); mo (3) ol blesing mo responsabiliti blong blesem evri nesen blong wol (ves 14).

  8. Jenesis 35:3; oli ademap long italik. Papa mo mama blong Jekob i daerektem hem blong i lego haos blong stap longwe long Esao, we i wantem putum laef blong Jekob long denja, mo gat janis ia blong mitim wan woman we hem i save maredem insaed long kavenan (luk long Jenesis 27:41–45; 28:1–2, 5).

  9. Russell M. Nelson, “Kavenan Ia We I No Gat En,” Liahona, Oktoba. 2022, 11.

  10. 2 Nifae 31:20.

  11. Luk long Jon 5:5, stori blong wota blong Betseda.

  12. Luk long Mak 5:25, stori blong woman we i tajem klos blong Kraes.

  13. Luk long Matiu 14:31, stori blong Pita we i wokbaot long wota.

  14. Luk long “Tijing blong Jisas Oli Stamba blong Yumi,” STSP, pej 6.

  15. Luk long 1 Nifae 11:16–33.

  16. Luk long Filipae 1:6; 2:13; Momon 1:7.

  17. Luk long Jon 12:32.

  18. Plante taem yu save luksave wan rod tru long ol samting olsem ol gaed pos o saen we i makem distens. Hem i wan wei blong mekem sua se yu stap long stret rod o stap mekem progres long raet daereksen. Yu save luksave wan rilesensip tu tru long ol ki samting olsem ol fasin. Sam long ol samting ia i tekem fasin blong biliv se bae wan samting o man i mekem wan samting (luk long Jeremaea 29:11; Doktrin mo Ol Kavenan 132:7). fasin blong lisin long ol man (luk long Mosaea 3:19; Alma 7:23; 13:28); tingting we i stap daon, obei, fasin blong save wet longtaem, stap akseptem samting, tras (luk long Ol Proveb 3:5); mo lav (luk long Rom 8:31–39).

  19. “Stamba Toktok blong Ol Yang Woman,” Gospel Laebri, oli ademap long italik; luk tu long Bonnie H. Cordon, “Beloved Daughters,” Liahona, Nov. 2019, 67.

  20. Luk long Jon 4:1–29, stori blong woman long wel.

  21. Luk long Alma 38:1–3.

  22. Luk long Namba 6:23–27.

  23. Luk long Josua 24:22.

  24. Luk long Doktrin mo Ol Kavenan 25:3, stori blong Ema Smit.

  25. Luk long 1 Korin 15:9–10.

  26. Luk long 2 Kronikel 20:1–17, speseli long ves 14.

  27. Luk long Doktrin mo Ol Kavenan 109:1–46.

  28. Luk long 1 Samuel 16:11–13.

  29. Luk long Esta 4:16, stori blong Esta.

  30. Luk long Ol Wok 10:38.

  31. Luk long Aesea 43:1–5.

  32. Luk long Dutronome 28:1–9.

  33. Wan gud fren i rimaenem mi se wan singaot blong mekem aksen, i impoten long eni rilesensip.

  34. Storian wetem Kristen Olsen, Septemba 2023.

  35. Long Mack Oswald, Camden Oswald, Ashton Matheny, mo Jack Butler, tangkyu blong stap pulum mi wetem yufala.

  36. “Bae yufala i tingbaot se mi bin invaetem ol yut blong Jos Ia blong Jisas Kraes blong Ol Lata-dei Sent blong joenem yut ami blong Lod blong tekpat long bigfala wok blong wol ia tedei—blong karem Isrel i kam tugeta. Mi bin givim invitesen ia long ol yut blong yumi from se, olgeta nao oli gat presen ia blong go aot blong luk ol narawan, mo serem wanem oli biliv long hem long wan wei we i save winim tingting blong man” (Russell M. Nelson, “Witnesses, Aaronic Priesthood Quorums, and Young Women,” Liahona, Nov. 2019, 39).

  37. “Kingdom blong God, … i olsem wan siti we oli protektem evri saed blong hem wetem ded. Wanwan man i gat ples blong hem long wol blong lukaotem mo no gat wan i save stanap long ples we narawan i stanap long hem, be ‘i nogat samting i stap stopem mifala blong stap singaot mo leftemap tingting blong wanwan long mifala’” (Martin Luther, in Lewis William Spitz, The Renaissance and Reformation Movements [1987], 335).