Stap Lukluk Famli blong God tru long Bigfala Glas
Mi biliv se yumi save kamaot, lukluk tru long ae blong fet, luk yumi mo ol famli blong yumi wetem hop mo glad.
Taem we las bon gel blong mitufala, Berkeley, i smol, mi stat blong yusum glas blong rid—kaen ia we i mekem evri samting i bigwan. Wan dei mitufala i sidaon tugeta mo stap ridim wan buk, mi lukluk long hem wetem lav be long semtaem mi harem nogud from se, i luk olsem kwiktaem nomo, hem i bigwan finis. Mi stap tingting “!Taem i go kwik tumas! !Hem i bigwan nao!”
Taem mi karemaot glas blong mi blong waepemaot wota blong ae, mi luk se, “!o wet—hem i no bigwan, ol glas ia nomo i mekem hem i bigwan! I oraet nomo.”
Samtaem yumi stap lukluk kolosap nomo long olgeta we yumi lavem. Tedei long naet, mi invaetem yufala blong kamaot mo lukluk long wan defren glas—wan glas we i no save finis we i lukluk moa long bigfala pikja, we i stori blong yufala we i moa bigwan.
Long taem we man i stat traem blong go long spes, ol roket ia we i nogat man long hem, i no gat ol windo. Be long taem blong misin blong Apollo 8 i go long mun, ol astronot oli gat windo. Taem oli stap flot long spes, oli sek long eksperiens ia blong luk wol blong yumi mo tekem naesfala pikja ia, we i karem atensen blong ful wol. Ol astronot ia oli gat wan eksperiens we i gat moa paoa we i mekem oli givim wan nem long pikja ia: Bigfala lukluk we i naes tumas.
NASA
Lukluk tru long wan niufala open ples i jenisim evri samting. Wan man blong travel long spes i talem “i mekem ol samting i kam smol long wan saes we yu ting se yu save manejem evri samting. … Yumi save mekem i hapen. Pis long wol—i no wan problem. I givim paoa long pipol … kaen paoa ia.”1
Olsem ol man long wol, lukluk blong yumi i fas wetem wol i stap. Be lukluk blong God i bigwan i kavremap ful wol ia. Hem i luk evri kriesen, yumi evriwan, mo Hem i fulap wetem hop.
? I posibol blong stat blong luk olsem God i lukluk, nomata we yumi laef long wol ia—mo filim naesfala filing blong lukluk ia? Mi biliv se yumi save mekem, tru long ae blong fet, kamaot mo lukluk long yumiwan mo ol famli blong yumi wetem hop mo glad.
Ol skripja oli agri. Moronae i tokbaot olgeta we fet blong olgeta “i strong tumas” se i tru “oli luk … wetem wan ae blong fet, mo oli bin glad.”2
Wetem wan ae we i lukluk nomo long Sevya, oli filim glad mo oli bin save trutok ia: Hem i from Kraes nao, evri samting ia i kam blong hapen. Evri samting we yu mo yu mo yu i wari long hem—!bae evri samting ia i ORAET! Mo olgeta we oli luk wetem wan ae blong fet oli save filim se bae evri samting i oraet blong naoia.
Mi bin go tru long wan hadtaem long yia 13 blong mi long hae skul we mi no stap mekem ol gudgudfala joes. Mi tingbaot mi stap luk mama blong mi i stap krae mo tingting sapos mi bin mekem hem i harem nogud. Long taem ia, mi wari se ol wota blong ae blong hem, i minim se hem i lusum hop long mi, mo sapos hem i no filim hop long mi, ating bae i nogat wan wei blong gobak.
Be papa blong mi i praktisim blong kamaot mo blong lukluk i go longwe. Hem i lanem tru long eksperiens se wari i filim moa olsem lav, be hem i no semmak.3 Hem i yusum ae blong fet blong lukluk se evri samting bae i kam blong hapen, mo hop blong hem long wei ia i jenisim mi.
Taem we mi graduet long hae skul mo kam long BYY (Brigham Yang Yunivesiti), papa blong mi i sendem ol leta i kam, i rimaenem mi long huia mi. Hem i kam man blong sapotem mi, mo evriwan i nidim wan man blong sapotem olgeta—wan man blong sapot i no wan we bae i talem long yu, “Yu ron be i no kwik inaf,” olgeta bae i rimaenem yu wetem lav se yu save mekem.
Eksampol blong papa blong mi i olsem hemia blong drim blong Lihae. Olsem Lihae, hem i save se yu no go lukaotem blong fosem ol lavwan blong yu we oli filim se oli lus. “Yu stap long ples we yu stap long hem mo singaotem olgeta. Yu go long tri, stap long tri, gohed blong kakae frut ia mo, wetem smael long fes blong yu, !gohed blong askem olgeta we yu lavem mo soem tru long eksampol se blong kakae long frut ia i wan gud samting!”4
Pikja ia i helpem mi long taem we mi filim se mi daon taem mi faenem miwan long tri ia, kakae frut ia mo stap krae from se mi wari, mo hemia i helpem mi olsem wanem? Be, letem yumi jusum hop—hop long Krieta blong yumi mo long wanwan long yumi, fulmap yumi wetem wanem yumi save mekem blong kam moa gud long wanem yumi stap long hem naoia.
Sot taem afta we Elda Neal A. Maxwell i ded, wan ripota i askem boe blong hem wanem nao hem i misim moa. Hem i se ol taem blong kakae dina long haos blong papa mo mama blong hem, from oltaem hem i filim se hem i stap mekem ol gudfala samting mo hem i filim se papa blong hem i biliv long hem.
Hemia kolosap long taem we ol adalt pikinini blong mitufala oli stat blong kam long haos blong ol Sandei dina wetem ol man mo woman blong olgeta. Long taem blong wik mi traem blong stap mekem ol lis long maen blong mi long olgeta samting blong rimaenem olgeta long Sandei, olsem: “Blong traem helpem moa ol pikinini taem yu stap long haos,” o “No fogetem blong stap wan gudfala man mo woman blong lisin.”
Taem we mi ridim komen blong Brata Maxwell, mi sakemaot lis blong mi mo putum daon voes ia blong poenem fingga i stap kwaet, mekem se taem mi luk ol bigfala pikinini blong mi blong wan sot taem nomo evri wik, mi lukluk nomo long ol samting we bae i leftemap olgeta we oli stap mekem finis. Taem bigfala boe blong mitufala, Ryan, i ded sam yia afta, mi tingbaot se mi glad long ol taem we mitufala i bin spendem gud tugeta wetem plante glad mo plante gudfala filing.
Bifo yumi mekem samting tugeta wetem wan we yumi lavem, yumi save askem yumiwan kwestin ia “?Wanem we bae mi mekem o talem bae i help o mekem wan i harem nogud?” Ol toktok blong yumi i gat wan strong paoa, mo ol memba blong famli oli olsem ol blakbot, we oli stap stanap long fored blong yumi mo talem, “!Raetem tingting blong yu abaot mi!” Ol mesej ia, i nomata se oli minim o no minim blong talem, oli sud gat hop mo blong leftemap tingting.5
Wok blong yumi i no blong tijim wan man we i stap go tru long wan hadtaem se oli nogud o oli man blong mekem nogud. Samtaem yumi gat tingting ia blong korektem olgeta, be plante taem, letem yumi talem long olgeta we yumi lavem ol mesej we oli wantem blong harem nomata long toktok o no: “Ol famli blong yumi oli filim gud mo harem se oli komplit from we yu yu stap insaed.” “Bae oli lavem yu blong ful laef blong yu—no mata wanem i hapen.”
Samtaem, wanem yumi nidim hem i blong gat moa sore bitim blong givim advaes; lisen moa bitim blong toktok plante, wan we i harem yumi mo stap tingting, “?Bae mi mas filim olsem wanem blong talem wanem we oli jes talem?”
Tingbaot, God i givim long yumi ol famli olsem wan ples blong lanem mo krietem samting, so blong mekem ol mistek oli no posibol nomo, be i save hapen. Long en blong laef blong yumi, ?bae yu no sapraes blong luk se ol rilesensip ia, o iven ol hadtaem ia, oli ol samting ia nao we oli helpem yumi kam moa olsem Sevya blong yumi?. Wanwan hadtaem we yu fesem, i wan janis blong lanem olsem wanem blong gat lav long wan level we i moa dip—wan level we i olsem blong god.6
Letem yumi lukluk long famli rilesensip olsem wan strong trak blong tijim yumi ol lesen we yumi kam long ples ia blong lanem taem yumi tanem yumi i go long Sevya.
Yumi luksave, long wan wol we i nogud, se bae i neva gat wan hasban o waef, wan papa o mama, boe o gel, apu pikinini, tija, o fren we i stret evriwan—be i gat wan milian wei blong stap wan we i gud.7 Letem yumi stap long tri ia, tekem mo kakae long lav blong God, mo serem. Taem yumi leftemap ol pipol raon long yumi, yumi gobak hom tugeta.
Sore nomo, memori blong kakae long frut ia i no inaf, yumi nid blong kakae long hem bakegen mo bakegen long ol wei we i save stretem ol glas blong yumi mo konektem yumi wetem lukluk blong heven taem yumi openem olgeta skripja, we oli fulap wetem laet, blong ronemaot tudak, stap daon long ol ni blong yumi kasem taem ol prea blong yumi oli kam moa strong. Hemia i taem we ol hat oli sopsop, mo yumi stat blong luk wanem God i luk.
Long ol las dei ia, ating bigfala wok blong yumi bae hem i wetem olgeta we yumi lavem—ol gudfala pipol we oli stap long wan wol we i nogud. Hop blong yumi i jenisim ol wei we oli luk olgetawan mo huia olgeta stret. Mo tru long glas ia blong lav bae oli luk oli kam olsem huia.
Be enemi i no wantem yumi o olgeta we yumi lavem i gobak hom tugeta. Mo from se yumi stap long wan planet we i wok folem taem mo i gat en long namba blong ol yia, enemi i traem blong mekem yumi fraet. I had blong luk samting, taem yumi lukluk tumas long plante samting blong laef we i mekem se ples we yumi muv long hem i i moa impoten bitim spid blong yumi.
Tingbaot, “Sapos yu wantem, go kwik, go yuwan. Sapos yu wantem go longwe, go tugeta.”9 Tankyu tumas, God we yumi wosip long Hem, taem i no blokem Hem. Hem i luk huia olgeta we yumi lavem mo, huia yumi stret.10 so, Hem i gat fasin blong save wet longtaem wetem yumi, wetem hop se bae yumi save gat fasin blong save wet longtaem wetem wanwan long yumi.
Mi save talem stret se i gat sam taem we wol ia, hom blong yumi naoia, i filim olsem i wan ples blong stap harem nogud nomo—ol taem we mi gat wan ae blong fet mo nara ae i stap krae.11 ?Yu, yu save filing ia?
Mi filim olsem ia long Tiusdei.
?Yumi save jusum fasin blong profet blong yumi taem we hem i stap promesem ol merikel insaed long ol famli blong yumi? Sapos yumi mekem olsem, bae yumi filim glad, nomata ol trabol oli kam fulap long laef. Hem i stap mekem wan promes se yumi save gat eksperiens ia naoia, blong bigfala lukluk we i naes tumas nomata long wanem situesen yumi stap long hem.12
Blong gat ae ia blong fet naoia i blong karem semfala fet ia bakegen we yumi bin gat bifo yumi kam long wol ia. Hem i lukluk i go bitim ol hadtaem blong taem ia, mo letem yumi “mekem wetem glad hat, evri samting we i stap long paoa blong yumi; mo afta … stanap kwaet.”13
?I gat wan samting we i had long laef blong yu naoia, wan samting we i mekem yu wari mo yu no save fiksim? Taem i nogat ae blong fet, i luk olsem se God i lusum lukluk long evri samting, mo ?hemia i tru?
O ating bigfala fraet blong yu i we yu go tru long had taem ia yuwan, be ?hemia i minim se God i fogetem yu, mo hemia i tru?
Hemia i witnes blong mi se Sevya i gat paoa ia, from Atonmen blong Hem, blong jenisim ol hadtaem we yu stap go tru long hem i kam wan blesing. Hem i givim wan promes “wetem wan kavenan we i no save jenis” se taem yumi traehad blong lavem mo folem Hem, “evri samting we [yumi] bin gat hadtaem wetem, bae oli wok tugeta blong gud blong [yumi].”14 Evri samting.
Mo from se yumi ol pikinini blong kavenan, !yumi save askem filing blong hop ia naoia!
Taem ol famli blong yumi oli no stret evriwan, yumi save mekem lav blong yumi long ol narawan i kam stret evriwan kasem taem lav ia i semmak oltaem, i no moa jenis, i nomata wanem kaen lav—kaen lav ia we i sapotem jenis mo letem yumi gro mo gobak.
Hem i wok blong Sevya blong karem olgeta we yumi lavem i gobak. Hem i wok blong Hem mo taem blong Hem. Hem i wok blong yumi blong givim hop mo wan hat we oli save kam hom long hem. “Yumi no gat raet ia blong [God] blong jaj o gat paoa blong Hem blong pemaot man, be yumi gat raet ia blong eksasaesem lav blong Hem.”15 Presiden Nelson i bin tijim tu se ol narafalaman oli nidim moa lav blong yumi bitim jajmen blong yumi. “Oli nid blong eksperiensem klin lav blong Jisas Kraes tru ol toktok mo aksen blong [yumi].”16
Lav i wan samting we i jenisim ol hat. Hem i risen ia nao from i klin gud bitim evri samting, mo ol narafala man oli save filim. Letem yumi holem taet ol toktok blong profet we oli givim 50 yia i pas: “I nogat wan hom, we i nogud hemia nomo sapos hem i stop blong traehad.”16 !I tru, olgeta we oli gat lav we i bigwan mo i longfala, oli win!
Long ol famli long wol, i simpol nomo, yumi stap mekem wanem God i bin mekem long yumi—soem rod mo hop se olgeta we yumi lavem bae oli folem rod ia, wetem save ia se rod we oli wokbaot long hem i blong olgeta blong jusum.
Mo taem oli go narasaed long vel mo kam moa kolosap tru wan strong koneksen long saed blong lav blong heven we i hom blong olgeta, mi biliv se bae oli harem save filing ia from lav we oli bin filim finis longwe.
Letem yumi yusum bigfala glas mo luk ol pipol we yumi lavem mo laef wetem mo serem naesfala wol ia wetem olgeta.
?Yu mo mi? !Yumi save mekem! !Yumi hang long hem mo hop long hem! Yumi save stap long tri, tekem mo kakae long frut wetem smael long fes blong yumi, mo letem Laet blong Kraes insaed long ol ae blong yumi blong yumi kam wan samting we ol narawan oli save luksave long ol hadtaem blong olgeta. Taem oli luk laet ia i laet long ol fes blong yumi, bae oli kam kolosap long hem. Yumi save tanem tingting blong yumi i go long stamba blong lav mo laet, “ moning sta ya we i stap saen gud,” Jisas Kraes.
!Mi talemaot testemoni blong mi se hemia—, evri samting ia—bae oli kam moa gud bitim we yumi save! Wetem wan ae long fet long Jisas Kraes, bae yumi luk se evri samting bae i oraet long en mo filim se bae i oraet blong naoia. Long nem blong Jisas Kraes, amen.