Epinukunukun Pwon Mi Pin non Jises Kraist
Nupwen sia tonong non imwen ewe Samon, sia fiti ew sai mi pin ach sipwe kaeo ach sipwe winiti noun Kraist chon kuno mi kon tekia me pin.
Achengicheng pwi me fefinei, Uwa iotek pwe amo sipwe fokkun ekesiwin ren kewe kapasen pesepes seni nouch kewe souemwen non ei wiken me pwapwa non met ukkan sani ne apasa, “epinukunukun pwon mi pin non Jises Kraist.” Ei epinukunuk ewe wesewesen pungun feioch sipwe angei seni an Kot pwon ngeni ekkana ra aponueta ar pwon mi pin me ra auchea repwe nom nukanapen nonomun sosotun ach fansoun.
Ewe pekin forutan minafon imw an ewe Samol non ewe fonufan unus, a fis fan emwenien President Russell M. Nelson, a fori watten apwapwa nefinen kewe chochon Mwichefen me pwarata pwe a ew auchean esisin ren ewe wattenon muu an ewe Samon.
Nengen sefaniti won ai we amwararen memef atun efeiochun ewe Feather River California Tempel non ewe October, uwa ekieki ika fan ekkoch sia chok rukeneno non ewe pwapwan woren ew minefon tempel non teninimwach kewe me neniach me sia ponuki ewe popun mi pin ren ekkewe pwon mi pin ra fis non ewe tempel.
Makken fan mesen ew me ew tempel ew eingeingen kapas: “Pin ngeni ewe Samon.” 1 Ekkei amwararen kapas mei afata ngenikich pwe nupwen sia tonong non imwen ewe Samon, sia fiti ew sai mi pin ach sipwe kaeo ach sipwe winiti noun Kraist chon kuno mi tekia me pin. Nupwen sia fori ekkewe pwon mi pin non nonnomun mi pin me mwen Kot me pwon pwe sipwe tapweno mwirin ewe Chon Amanau, sia angei ewe manamanen ach sipwe ekesiwini netipach, asofo sefani ngunuch, me anapano nefinach ngeni I. Ren ei ew angang mi fiti popun a watto epinipin ngeni ngunuch me forata ew riri mi pin ngeni Kot me Jises Kraist, ion a pwon pwe sipwe tongeni feiochuni ewe nifangen manau ese much. 2 Ewe pungunon ei sai mi pin pwe sia angei ew epinukunuk mi pin me tekia ren manauach ran me ran non ach kewe pwon mi pin sia fori ren Jises Kraist.
Ren ei epinukunuk ina ewe asechikin ach riri mi pin ngeni Kot me a tongeni anisi kich ne anapano ach nikitu ngeni me kinisou ren Jises Kraist me An asoren achasefan. A pesei kich sipwe tongei me anisi ekkoch, me a apochokuna ngunuch ach sipwe nomw non neni mi nimengaw minne a awatteno rochopwak me tipemwaramwar. A apochokuna kich ach sipwe okufu ewe a efisata ach tipemwaramwar me netipengaw, nuokus me ningeringer, netipeta me epinukunukungaw ren ewe chon u ngeni ne sotuni ne tonong non anononun netipach, akaewin nupwen manau a weires, sosot ra tameno, ika nonomun mettoch ra weires. Eu wikisin non pukfel a awora ngingin kapasen ourour ren emon me emon kich nupwe sia anonga non ewe pochokunen asapwanin sosotun fonufan ikenai: “Kosap aturano minne om pwisin epinukunuk.” 3
Achengicheng pwi me fefinei, ekkewe ra angei epinukunuk non ewe pwon mi pin mine ra fori non ewe imwen ewe Samon meren Jises Kraist ewe a wor ren ew me nein ekkewe pochokunen manaman minne sia tongeni tufichin angei non ei manau.
Nupwen sia kaeo ewe Puken Mormon non Feito, Tapweto Mwiri ei ier, sia fen kuna usun an Nifai a pwarano murinon ewe manamanen ei sokkun epinukunukun pwon mi pin seni an nikitu nupwen a tori osukosuk me sosot an epwe angei ekewe seleich nupwen ewe Samon a annuku ngeni. Nifai, inamo ika a fokkun nununo an netipengaw ren ewe nuokus me nafangawen nukunuk ren Laman me Lemuel, a chok epinukunuku pwe ewe Samon epwe chok uwato ekkewe seleich ngenir. A apasa ngeni pwin kewe, “Ussun ewe Samon mi manau, me usun kich mi manau, sisap feitiw ngeni samach we non ewe fonu pon tori ach sipwe apwonueta ewe mettoch minne ewe Samon a annuku ngenikich.” 4 Pokiten an Nifai epinukunuk non an ewe Samon pwon, i a tongeni awesano met ewe a fen annuk ngeni pwe epwe fori. 5 Mwirin, non an mesepi, Nifai a kuna met a fisingeni ren ei sokkun epinukunuk, a mak, “Ngang Nifai, ua kuna ewe manamanen ewe Namen Kot, pwe a feitiw won ekkewe sounengin ewe mwichefenin ewe Nam, me won ekkewe aramas pwon noun ewe Samon, … me ra foutan wenechar meren ewe manamanen Kot non ning mi napanap.” 6
Uwa fen akom kuna ewe an ewe Samon murinon pwon me manaman a marino non manauwen noun Kot semerit, apochokuner ar repwe u ngeni nonnomun mokutukutun manau. Non ewe eu ran punuwei a wareiti imwem mwirin an iotek non ewe tempel me a ureniei ussun anononun an ku netipan met a fis ngeni ikkewe ia. Nupwen a tonong non imwen ewe Samon, a kuna emon mwan won efoch wincher mi akkamang ne mokut me emon fefin a weires an epwe fetan a wokuwok, ir me ruemon ra pworacho ne feito ar repwe fel ngeni ewe Samon non Imwan We. Nupwen punuwei we a fetanong non ewe nenien initiatory, a kuna emon murinon sister minne ese wor efoch poun— me achok aea poun we efoch—a fokkun angangoch me pomoch ne fori wisan ra ngeni.
Nupwen ngang me punuwei am oua poporaus usun ena mettoch, am owa tipeew ngeni pwe nimenimoch me epinukunuk seni memefin netip chok non ewe pwon ese much Kot a awora me non ewe pwon mi pin sia fori ngeni I non Imwan we a tongeni efisata an ekkana murinon chon kaeo noun Kraist ar repwe no seni imwer non na ran mi patapat, inamo ika met nonomun manauer.
Chiechiei achengicheng, ika mi wor ew mettoch sia tongeni angei—me eu mettoch sia tongeni ngeni nouch semerit me noun nouch semerit epwe anisi emon me emon non ekkewe tes me sosot mwach—epwe ach epinukunuk non ewe pwon mi pin afor meren Jises Kraist. Kamochunon ena sokkun watten feioch epwe anisir ne nonom ussun ewe Samon a pwonei ngeni Noun chon tapweno mwirin mi nikitu: “Nei chon kaeo oupwe utta non neni mi pin, me ousap mokut.”7
Ifa usun sipwe angei epinukunuk non Jises Kraist? A feito seni tipetekison, onomu manauach won ewe Chon Amanau, manaueni ekkewe nongonongun ewe kapas allimen Jises Kraist, angei ekkewe angangepinin amanaua me manau tekia, me epini ekkewe pwon mi pin sia fori ren Kot non Imwan mi pin.
Non soponon an afanafan non ewe mwichenap October 2019, nouch achengicheng soufos a achema ngeni kich usun ew auchean teten ren ach sipwe angei epinukunukun pwon mi pin, a apasa: “Pusin ach nimenimoch ne tonong non imwan ewe Samon mei auchea sipwe pusin amonata ngunuch. … Pusin an emon nimenimoch a auchea ew ukukun ekesiwinin ekiek me netip an epwe winiti usun chok ewe Samon, an epwe winiti emon aramas mi ennet, ne winiti nenien apiru mi murinno, me winiti emon aramas mi pin.”8 Ina minne, ika sia siwini ach amonata ach sipwe tonong non ewe tempel, sipwe siwini ach memefin non ewe tempel, minne epwe ekesiwini non manauwach me nukun ewe tempel. “Mwirin om epinukunuk epwe pochokunono mwen mesen Kot; me ewe nongonongun ewe pristut epwe nimenimochuno won ngunum ussun omurenipwin seni nang”9
Emon bisop uwa sinei a eita ngeni ewe klassin ekkewe ra watte non Kinter esap klasin “Kinter” nge ren ew klasin “monneta ngeni tempel”. Non January ewe pisop a korato ekkewe chon ewe klas me nour kewe sense ngeni an we ofes, ikewe ra porous ika ifa ussun repwe aani unusen ewe ier ne amonata ar repwe tonong non tempel. Ewe pisop a awora fansoun ne nenengeni ekkewe auchean kapas eis ren interfiun ewe taropwen mumuta ne tonong non tempel, minne ra fen pachenong non lessenin Kinter. A tingorei ekkewe semerit repwe moneta pun nupwen ra niwin sefanito non an bisop ofes murin eu ier, repwe epinukunuk, epinukunukun pwon mi pin, monetta ar repwe angei echo taropwen mumuta ne tonong non tempel me tonong non ewe Imwan ewe Samon. Ei ier ewe pisop a awora fomon noun fopun ekkewe ra fokkun meseik, amonata, me epinukunuk ar repwe no ngeni ewe tempel ra mochen ewe bisop epwe printini nour kewe taropwen mumuta ne tonong non tempel non Ranin New Year kunok 12:01 a.m.
Amonata esap chok ngeni ekkewe repwe aewin no non tempel. Kich meinisin sipwe amonata ach sipwe no ngeni ewe imwen ewe Samon. Eu steik uwa sinei a opuru ewe porous “Imwen kinamwe me kaeo, Mwichefenin awora aninis, me no ngeni Tempel.” No ngeni10 eu kapas mi amwarar a wewen anonga ekiek won ew anen emwen, nge a pwan wewen foti ngeni ika fopweniochu ren, wesino me punguno, nukuchar. Ach feino ngeni tempel a tumunu kich ngeni ewe Chon Amanau, a ngeni kich an mi wenechar me nukuchar nupwen sia nukunuk pwe sia ani epinukunukun pwon mi pin non Jises Kraist. Ina minne, kich meinisin sipwe wesewesen kutta me anapano ena sokkun fofo ren pwan ach awora ew fansoun churi ewe Samon non Imwan mi pin, ika ewe tempel mi kan ika towaw.11
Nouch achengicheng soufos, Preseten Russell M. Nelson, a achema kich usun ekkei auchean nongonong ren an apasa: “Ewe tempel a nom nukanapen apochokunen ach nuku me pwaracho non ngun pokiten ewe Chon Amanau me An nongonong ir kewe wesewesen aucheanapen ewe tempel. Mettoch meinisin sia kaeo me non ewe tempel, seni emwen me seni ewe Ngun, a anapano ach weweiti usun Jises Kraist. An kewe auchean angangepin a ri fengeni kich ngeni I seni pwonen pristut mi pin. Mwirin, nupwen sia aponueta ach kewe pwon mi pin, I a efeiochu kich ren An echikar, apochokunen manaman. Me o, epwe wesewesen namot ngeni kich An manaman non kewe ran mwach.”12
Ach Chon Amanau a mochen kich sipwe amonata ach sipwe weweiti, fiti fatochun, wesewesen ifa usun sipwe anganga nupwen sia fori ach kewe pwon mi pin ngeni Semach won Nang non Itan. I a mochen sipwe amonata ach sipwe weri ach kewe tufich, pwon, me wisach; ren ach amonata ngeni ach sipwe ani ewe tipacheman ngun me weweoch sia mochen non ei manau. Ua sinei pwe nupwen ewe Samon a kuna ekis merengetin mochen ika ew aiekunukunun oturesin tupon non ach mochen sipwe anonga manauach won I me won ekkewe angangepin me pwon mi pin sia fori non Imwan we, I epwe efeiochukich, non An an mi unusoch, fiti ekkewe manaman me umoumoch sia mochen.
Imwan ewe Samon ikena ia sia tongeni akasiwin non ekkewe an mi kon tekia me pin. Iwe, nupwen sia tou seni ewe tempel, akasiwin ren ach epinukunuk non ekkewe pwonen ekkewe pwon mi pin, eppet fiti manaman seni asan, sia uwei ewe tempel ngeni imwach me manauach. Uwa pwon ngonuk pwe nupwen ngunun imwen ewe Samon epwe nom non kich epwe ekesiwini kich, ren unusan.
Sia pwan sinei seni ewe tempel pun ika sia mochen ewe Ngunun ach ewe Samon esap kouk non manauach, sisap tongeni me esap wor memef ese murinno ngeni emon. Awora neni non netipach ika ekiekich ren memef ika ekiek ese och epwe awora kapas me foffor ese murinno, ika mo won internet ika non imwach, a efisata Ngunun ewe Samon epwe suseni netipach. Ina minne, ouse mochen ousap aturano ami epinukunuk, nge oupwe, mut ngeni ami epinukunuk epwe pochokun.
Ewe soposoponon me mwitirin koutan tempel epwe sopweno an epwe emeseika, amwasanga, me efeiochukich. Nge auchean, nupwen sia siwini ach amonata ach sipwe tonong non tempel, sipwe siwini ach memefin non ewe tempel, minne epwe ekesiwini non manauwach nukun ren ewe tempel. Amo ei akasiwin epwe ngenikich apinukunuk non ach kewe pwon mi pin ngeni Kot ren Jises Kraist. Kot mi manau, Jises is ach Chon Amanau, me iei An we Mwichefel mi niwinsefanito won fonufan. Uwa affata ekkei ennet non ewe it mi pin iten ewe Chon Amanau, Jises Kraist, amen.