“Mosonoson, me Sinei Pwe Ngang ewe Kot.”
Sia tongeni mosonoson me sinei pwe Kot i Samach won Nang, kich noun semirit, me Jises Kraist i ach Chon Amanau.
Fansoun ew kaneton ranin efinun me ranin apioni non asapwan ren eu minafon imwen ewe Samon, Ua emweni eu mwichen chon makkei porous non ew fansoun katon fetan non unusen ewe neni mi pin. Ua awewei auchean me popun tempel non Ewe Mwichefenin Jises Kraist ren Aramas mi Pin non Fansoun Soponon me ponuweni eu me eu ar kewe murinon kapas eis.
Me mwen aupwe tonong non ewe rumwen celestial, ua awewei pwe ei kinikinin me non ewe imwen ewe Samon we a esisinata ewe kinamwe me ningochun imw nang mine sia tongeni tonong non mwirin ei manau. Ua pesei ngeni noum kewe wasona pwe resapw kapas nupwen ra nom non ewe rumwen celestial, nge ua men pwapwa ai upwe ponuweni sokkun kapas eis ika sia no ngeni ia sipwe feino ia mwirin ei.
Mwirin am tou seni ewe rumwen celestial me nupwen aua chufengen ikewe aua feino ia, ua eisini noum kewe wasona ika mi wor met ra kuna ra mochen repwe kakapas fengen won. Emon me nein ekkewe chon makkei news a kapas ren unusen netipan, “ese fifis ngeni ei ei sokkun non unusen manauei. Use mwo sinei nge epwe wor ei sokkun non fonufan; Use nuku nge epwe wor sokkun mosonoson.”
Ua fokkun mairu ren wenecharen me fatochun an ewe aramas we kapas. Me nikinikin ewe chon mak a esisina eu auchean napanapen pekin mosonoson—porachongeni me suseni ewe osukosukan non ei nenian fonufan.
Mwirin ua ekipwichi usun met ewe chon mak a apasa ua ekieki usun ekkei sokkun osukosuk non manauach—osukosuk, okurang, fitikoko, tanech, me tumunungaw mine a atenechakicheno—a chemeto eu uwekisin: “Mosonoson chok, me sinei pwe Ngang Kot.”1
Ua iotek ewe Ngun mi Fel epwe asarama emon me emon kich nupwen sipwe ekieki usun eu tekian me ningen neni mi mosonoson non manauach—eu memefin mosonosonun ngun a otufichi kich ach sipwe sinei me chechemeni pwe Kot i Samach won Nang, kich Noun semirit, me Jises Kraist ach Chon Amanau. Ei murinon feioch a fich ngeni meinisin chon Mwichefen ekkewe ra nukuchar ne winiti “aramas pwon ngeni ewe Samon.”2
Mosonoson
Non 1833, ekkewe souneng non Missouri ra kuna sokkun riafou me nini. Ekkewe mwichen aramas chon fori fitikoko ra oturereu seni imwer kewe non kinikinin Jackson, me ekkoch memper non ewe Mwichefen ra sotuni ne nonom non ekkoch neni mi kanoto. Nge ewe nini mi sopwosopwono, me a chommong ra mano. Non ei koukun riafou, ewe Samon a pwarano an emwen ngeni ewe Soufos Joseph Smith non Kirtland, Ohio:
“Nge Nengeni, ekinamwei netipemi usun Saion; pwe futuk meinisin a nom non pei; mosonoson me sinei pwe ngang ewe Kot.” 3
Ua nuku pwe ewe Samon a mochen sipwe “mosonoson” me pwan ekkoch nap seni sisap kapas me sisap mwokut. Nge met a mochen sipwe chechemeni me anonga ach ekiek won I me An manaman “fansoun meinisin me non mettoch meinisin, me non neni meinisin [sia] nonom ia.”4 Nge, “mosonoson” epwe eu an epwe achema ngeni kich sipwe nonga ach ekieki won an ewe Chon Amanau nenien mosonosonen ewe ngun ewe a apochokuna kich ach sipwe fori me engino seni ekkewe mettoch mi weires.
Ouweta won ewe Fau
Ennetin nuku a chok anonga ekieki non me won ewe Samon Jises Kraist—non I ewe Ningen Kot me noun Kot Anamon me non I ewe angangen angasano a unusoch.
“Pun afen aponueta ekkewe popun ewe annuk, me a nemenano ir meinisin ekkewe a wor ar nuku non i; iwe ir ekkewe a wor ar nuku non i repwe kamwochuno won mettoch meinisin mi öch; ina minne a peni ewe mwokutukut an ekkewe noun aramas.”5
Jises Kraist i ach Chon Angasano,6 ach Chon Emwen,7 me Chon Amanau8 ren Samach ese Much me ewe fau minne sipwe oueta nongonongun manauach won.
Ilaman a awewei, “Chechemeni, chechemeni pwe won ewe fau ach we Chon Angasano, i ewe Kraist, ewe noun Kot, mine kopwe oueta om nongonong won; pwe nupwen ewe tefin epwe tinato an asepwan pochokun, ewer, an pochokun non ewe ouniar, ewer, nupwen an kewe sosot me pochokunen asepwan epwe toruk, esap oturuketiw non ewe nenien riafou ese much, pokiten ewe fau mine a kauta, ewe ennetin nongonong, eu nongonong ika aramas ra kouta won resap tongeni repwe turutiw.”9
Ewe Esisinen Kraist usun ewe “fau” won mine sipwe oueta ewe nongonongen manauach a fokkun weweoch. Kose mochen maketiw non ei uwekisin pwe ewe Chon Amanau esap ewe nongonong. Nge, a auchea sipwe oueta pusin en me an nongonongun auchea won I.10
Ewe nongonong eu kinikinin eu imw a pachengeni ewe puun. Eu pochokunen nongonong a tumunu seni sokkun osukosuk me sokkun mettoch mine epwe ataeno. Eu foforochun nongonong a eia choun napanapen eu kinikinin an epwe anonopoku esap chou me kinetiw fan puun me anisi koukun ewe kinikin.
Eu pochokunen aninisochun chufengen nefinen ewe puun me eu nongonong a fokkun auchea pwe ewe napanap epwe pochokun me nonomotam non fansoun me fansoun. Me eu sokkun napanapen angang, angke me mecha ra tongeni aea an epwe apacha nongonongen ewe imw ngeni “foun nongonong,” ewe mi pochokun, fouoch fau fan ewe imw puun me pwang.
Non chon eu wewe, ewe nongonongun manauach a namot epwe pachengeni ewe fau mine Kraist ika sia pochokun me engino. Ewe pwon mi pin me angange pin an ewe Chon Amanau ewe kapas allim mi niwinsefanito a tongeni awewe ngeni ewe angke me ewe mecha sia aea ne pachefengeni foun nongonongen ewe imw. Iteitan sipwe nukuchar ne angei, katon, chechemeni, me asofosefani ach kewe pwon mi pin, angken ngunuch ra fokkun fonukunuk me nikitu ngeni ewe “fau” an Jises Kraist.
“Ina minne, ekkewe ra nuku non Kot repwe tongeni ennetin apinukunuku ew fonufan mi murino, ewer, pwan mwo ew neni ren peniemwanin Kot, minne apinukunuk a feito seni nuku, a fis eu angke ngeni netipen aramas, minne a fori ar repwe pochokun me tipepos, ar repwe fori chommong angang mi öch fansoun meinisin, me emweni ir ar repwe mwareiti Kot.”11
Awesi me awateno “non fansoun me fansoun” 12 “tupwen [ofouta ach] ekiek esap wes,” ach “epinukunuk [a wesewesen pochokunono] mwen mesen Kot,” me “ewe Ngun mi Fel [i chienach] fansoun meinisin.”13 Sipwe winiti mi pochokun, fotonuk, kouta, me nonomochuno.14 Nupwen ewe nongonongen manauach a kauta won ewe Chon Amanau, sia feioch ach sipwe “mosonoson”—me ewe ngun mi fel a pesei ngeni kich pwe Kot i Samach won Nang, me kich noun semirit, me Jises Kraist i ach Chon Amanau.
Fansoun mi Pin, Neni mi Pin, me ewe Imw
Ewe Samon a fang ngeni kich ir me ruu fansoun mi pin me neni mi pin epwe anisi kich ach sipwe mefi me kaeo usun ei sokkun mosonosonun ngun.
Ren awewe, ewe Ranin Sabbath a ranin Kot, eu fansoun mi pin a epinipin ach sipwe chechemeni me fel ngeni ewe Sam non iten Noun we, sipwe fiti an pristut angangepin, me angei me asofosefani ach kewe pwon mi pin. Iteiten wik sia fel ngeni ewe Samon non ach kewe nenien kaeo me “chiechifengen me ekkewe souneng”15 non sakrament me pwan ekkoch mwich. Non An we ran mi pin, ekiekich, fofforuch, me mwokutuch ikkei ekkei esisin sia ngeni Kot me a esisinata usun ach tongei I.16 Iteiten raninfen, ika sipwe, sia tongeni mosonoson chok me sinei pwe Kot i Samach won Nang, kich noun semirit, me Jises Kraist i ach Chon Amanau.
Popunapen auchean ach Sabbath sipwe “feino ngeni ewe imwen iotek me asorano [ach] sakrament non ranin [ewe Samon] mi pin.”17 Ewe “imwen[s] iotek” ikewe sia chufengen ia non ewe Sabbath ekkewe imwen chufengen me ekkoch neni a punguno—neni mi pin asufon, fel ngeni, me kaeo. Eu me eu ekkewe imwen chufengen me neni ra epinipin seni ekewe pristut pwe epwe eu neni ewe Ngunun ewe Samon epwe nonom ia me ikewe noun Kot semirit repwe feito “ngeni ewe weweiti ren ar Chon Angasano.”18 Ika sipwe, sia tongeni “mosonoson” non ach kewe nenien fel ngeni mi pin me ennetin sinei pwe Kot i Samach won Nang, kich Noun semirit, me Jises Kraist ach Chon Amanau.
Ewe tempel pwan eu neni mi pin a epinipinino pwe sipwe fel ngeni me angang ngeni Kot me kaeo ekkewe ennet ese much. Sia ekiek, foffor, me pipisek mi sokono non imwen ewe Samon we seni ekkewe ekkoch neni sia nono ngeni. Non Imwan mi pin, ika sipwe, sia tongeni mosonoson me sinei pwe Kot i Samach won Nang, kich Noun semirit, me Jises Kraist ach Chon Amanau.
Ewe popun nongonongen ewe fansoun mi pin me neni mi pin mi fokkun chok nonofengen: sipwe enniwini ne eteneki ne nengen fichi Samach won Nang me An we Kokot, ewe Samon Jises Kraist me An Achasefan, ewe saramen manamanen Ngun mi Fel, me ekkewe pwonen ekkewe angangepin me pwon mi pin an ewe Chon Amanau kapas allim mi niwinsefanito.
Ikenai upwe eniwini eu nongonong Ua kapas usun iwe ekiseno ua aucheani. Imwach kewe epwe pwan wor ekkei ruu mettoch fansoun mi pin me neni mi pin ikewe emon me emon kich me famini ra nom ian “mosonoson“ me sinei pwe Kot i Samach won Nang, kich Noun semirit, me Jises Kraist i ach Chon Amanau. Suseni imwach we ngeni ach fenin Sabbath me non imwen ewe Samon we a fokkun auchea. Nge nupwen sia niwinsefan ngeni imwach fan ewe ngun mi fel ka mefi me pochokun ka angei me non kewe neni mi pin me urumot sia tongeni pesei ach ekiek won ewe popun kokot non manauach me ungeni sokkun sosot mi fis non neniach we fonuwen turutiw.
Ach feino ngeni Sabbath, tempel, me met sia fori non imwach kewe a tongeni anisi kich ren ewe manamanen Ngun mi Fel, ren fefeinon me pochokunen ewe pwon ngeni Samach me Noun we, me fiti “eu ennetin epinukunuk”19 non an Kot kewe pwon ese much.
Non imw me Imwen Fan sia chufengen ia sia eu non Kraist,20 meni epwe osukosuk won pekin meinisin, nge esap osukosuka non ekiekich me netipach. Meni sipwe nukunukumang ren nonomuch me sosotuch, nge sisap kuna riafou. Meni sipwe kuna nini, nge sipwe pwan esina pwe sise akanaemon.21 Sia tongeni angei pochokun non pekin ngun ne winiti me manauen pochokun, nikitu, me ennet.
Pwon me Kapasen Pwarata
Ua pwon pwe ika sia ouweta ach nongonongun manauach won ewe “fau” usun Jises Kraist, sia tongeni feioch seni ewe Ngun mi Fel me en me angei an ngunun mosonoson mine a anisi kich ne sinei me chechemeni pwe Kot i Samach won Nang, kich Noun semirit, Jises Kraist i ach Chon Amanau, me sia tongeni feioch ne fori me ungeni metoch mi weires.
Ua ennetin pwapwa ne pwarata pwe Kot i Samach won Nang, kich Noun semirit, me Jises Kraist i ach Chon Angasano me ewe “fau” foun ach Chon Amanau. Ua pwarata ei non ewe it mi pin iten ewe Samon Jises Kraist, amen.