Pwapwa non ewe Niffangen ekkewe Kiien Pristut

Seni Preseten Russell M. Nelson

Presetenin Ewe Mwichefenin Jises Kraist ren Aramas mi Pin non Fansoun Soponon

Kiien pristut a nemeni ifa usun ewe pristutun Kot epwe aea ne fori an ewe Samon popun me efeiochu meinisin ion mi etiwa ewe niwinsefaniton kapas allim.

Pwi me fefinei achengicheng, ikenai eu ranin uruwo fan itei me Preseten Dallin H. Oaks. A fen 40 ier ano, non April 7, 1984, nupwen aua koko ngeni ewe wis Mwichen ekkewe Engon me Ruemon Aposel.¹ Am oua fen pwapwati iteiten ew me ew mwichenap seni ena fansoun, pachenong ei iei. Am oua fen pwan feioch sefan ren ew niffang mi pin a puputo meren ewe Ngun. Ua epinukunuku pwe opwe eniwini ne kaeo kapasen ei mwichenap non unusen ekkan maram repwe feitto.

Nupwen ai ua uputiw,² a wor onu tempel ra aea non ewe Mwichefen—eu me eu non St. George, Logan, Manti, me Salt Lake City, Utah; pwan eu non Cardston, Alberta, Canada; me Laie, Hawaii. Akomwan a wor ruu tempel non Kirtland, Ohio, me Nauvoo, Illinois. Nupwen unusen ewe Mwichefen a mokut ngeni notou, ra echimwa ekkewe Souneng ar repwene nikitano ekkewe ruu tempel.

Ewe Tempel Nauvoo a tano ren an ewe chon kek akkei. A fen forsefan me efeioch seni Preseten Gordon B. Hinckley.³ Ewe tempel Kirtland amen osukosuk ren ekkewe chon oputa ei Mwichefen. Mwirin ekiss ewe Community of Kraist a angei ewe Kirtland Tempel, ewe minne a ani ren chommong ier.

Ewe maram ano, am oua awora esinesin pwe Ewe Mwichefenin Jises Kraist ren Aramas mi Pin non Fansoun Soponon a monano ewe Kirtland Tempel, fiti pwan ekkoch neni a fokkun auchea non uruo non Nauvoo. Am oua kinisou ren ekkewe menemenochun me namoten kewe aporous sia ani me ekkewe sou emwen seni ewe Community of Christ a emwen ngeni ei etipeew.

Ewe Kirtland Tempel a fokkun auchea me non ewe Niwinsefaniton ewe kapas allimen Jises Kraist. Ekkoch mettoch a fis me ikana afen wor osini won ren ewe engorou ier, me ra auchea ren an ewe Samon we niwinsefaniton Mwichefen epwe ounusochuono an misin non fansoun soponon.

Ewe a kon auchea me nein ekkei mettoch mi fis a fis non Raninifenin Easter, April 3, 1836.⁴ Non ewe ran, Joseph Smith me Oliver Cowdery a fis ngenir eu murinon mettoch ren amwararen chufengen. Ewin, ewe Samon Jises Kraist a pwano. Ewe Soufos a rekotuni pwe “mesan ewe Chon Amanau usun chok ngeten ekei; metan mokuran mi pwechepwech ussun chok nimenimochun snow; mesemesan a saram nap seni saramen ewe akkar; me neuwan a usun ngingin ewe pupwatten konik.”⁵

Non ei fansoun chufengen, ewe Samon a pwarata usun I. A apasa, “Ngang ewe aewin me ewe amuchunon; Ngang ewe mi manau, Ngang ewe a ninnio; Ngang chon peni kemi ngeni ewe Sam.”⁶

Iwe Jises Kraist a affata pwe I a etiwa ewe tempel pwe Imwan me a fori ei amwararen pwon: “Ngang upwe pwarano inisi ngeni nei kewe aramas non ai umoumoch non ei imw.”⁷

Ei auchean pwon a fis ngeni meinisin tempel ra efeioch ikenai. Upwe tingor kopwe ekipwichi met wewen an ewe Samon pwon ngonuk.

Mwirin an ewe Chon Amanau chuto, Moses a pwato. Moses a ngeni Joseph Smith ekkewe kien ewe ochufengenin Israel me ewe niwinsefanin ekkewe engon einang.⁸

Nupwen ei nemesepwi a kesipeno, “Elias a pwato, me anuku ewe kinikinin fansoun ren ewe kapas allim an Abraham” ngeni Joseph.⁹

Iwe Elijah ewe soufos a pwato. An pwato a ounusochuono an Malachi we pwon pwe me mwen ewe oruwen niwinsefanito, ewe Samon epwe tinato Elijah epwe “okunu netipen ekkewe semenap ngeni ekkewe semirit, me netipen ekkewe semirit ngeni semer kewe.”¹⁰ Mwirin Elijah a ngeni Joseph Smith ekkewe kiien manamanen ririfengen.

Ewe auchean ekkei kii a niwinsefan ngeni ei fonufan seni ekkewe unumon chon atoura kapas seni nang fan emwenien ewe Samon ese tongeni tori pekinon koukun Kien pristut a onomu ewe mumuta me manaman an ewe presetensi. Kiien pristut a nemeni ifa usun ewe pristutun Kot epwe aea ne fori an ewe Samon popun me efeiochu meinisin ion mi etiwa ewe niwinsefaniton kapas allimen Jises Kraist.

Mi auchea kopwe sinei pwe me mwen forutan ewe tetenin ewe Mwichefen, ekkewe chon atoura kapas seni nang ra fen ngeni ewe Soufos Joseph Smith ewe Aaronik me Melkisetek Pristut me ra fen ngeni i kewe kiien ir me ruu ekkewe pristut.¹² Ekkei kii ra ngeni Joseph Smith ewe mumuta an epwe ota ewe Mwichefen non 1830.¹³

Iwe me pwan non ewe tempel Kirtland non 1836, otun keitin pwan ekkei unungat kien pristut—ikkei iter, ekkewe kiien ochufengenin Israel, ekkewe kien ewe kapas allimen Abraham, me ekkewe kiien manamanen ririfengen—akkon auchea. Ekkei kii ra mutata Joseph Smith—me meinisin ekkewe Preseten nukuchar non an ewe Samon we Mwichefen—repwe ochufengeni Israel won me ruepek ewe ponupon, ne efeiochu meinisin ekkewe semirit pwon ren ekkewe feiochun Abraham, ne fori eu pungun riri won pristut angangepin me pwon mi pin, me ririfengeni famini ese much. Manamanen ekkei kiien pristut ese kouk me amen murino.

Ekieki ifa usun manauom epwe men sokono ika ekkewe kiien pristut ese niwinsefanito won ei fonufan.¹⁴ Me nukun ekkewe kiien pristut, kose tongeni kopwe endow ren ewe manamanen Kot.¹⁵ Me nukun ekkewe kiien pristut, ewe Mwichefen epwe chok tongeni anganga auchean kinikinin asukun me aninisin aion nge esap pwan chommong. Me nukun ekkewe kiien pristut, esap emon me neich epwe tongeni angei ekkewe angangepin me pwon mine a ochufengeni kich me atongeach kewe ese much me mut ngeni kich ach sipwe pwan nonom ren Kot.

Ekkewe kiien pristut a asokano Ewe Mwichefenin Jises Kraist ren Aramas mi Pin non Fansoun Soponon seni ekkewe ekkoch emwicheich won fonufan. Chommong ekkoch emwicheich ra tongeni me fori mine manawom epwe och ren non ei manau. Nge ese pwan wor eu emwicheich a tongeni me epwe anisi manauom mwirin ei manau.¹⁶

Ekkewe kiien pristut ra ngeni kich mumuta ach sipwe anapano meinisin ekkewe pwonen feioch an Abraham ngeni meinisin ekkewe mwan me fefin ra aponueta ar kewe pwon. Angangen tempel a awora ekkei feioch mi amwarar ngeni meinisin noun Kot semirit, ese nefinifin ren ian ika inet re nom, ika nom iei. Mut ngeni kich sipwe pwapwa pwe ekkewe kiien pristut ra pwan nom sefan won fonufan!

Upwe tingor kopwe tumunufichi ne ekipwichi ekkei unungat makken kapas:

1. Ewe ochufengenin Israel a pwarata pwe Kot a tongei meinisin Noun semirit ekis meinisin.

2. Ewe kapas allimen Abraham a pwan pwarata pwe Kot a tongei meinisin Noun semirit ekis meinisin. A etiwa meinisin repwe feito ngeni I—“mi chon me mi pwech, fotek me pichino, mwan me fefin; … meinisin ra chok nonnopok me ren Kot.”¹⁷

3. Ewe manamanen ririfengen atekiaa pwarata usun nonnon an Kot tongei meinisin Noun semirit ekis meinisin me a mochen emonme emon repwe fini ar repwe niwinsefaniti imwer ren I.

Ekkewe kiien pristut ra niwinsefan seni ewe Soufos Joseph Smith a fori ei tufich ren meinisin mwan me fefin ra aponueta ar kewe pwon repwe pwapwa ren sokkun pusin ar tufichin ngun. Pwan iei sefan, amen chommong met sipwe kaeo seni ewe uruo mi pin ren ewe Kirtland Tempel.

An Joseph Smith we tingor non iotek faniten ewe Kirtland Tempel epwe aiti kich usun manamanen tempel epwe apochokunok me ngang ngeni ekkewe sosotun manau non ekkei ran soponon. Upwe pesei ngeni kemi oupwe kaeo usun ewe iotek a maketiw non Doctrine and Covenants section 109. Ena iotekin tingor, mine a feito seni pwarata, a aiti kich pwe ewe tempel iei “ew imwen iotek, ew imwen echikipin, ew imwen nuku, ew imwen kaeo, ew imwen ning, ew imwen tettenoch, ew imwen Kot.”⁵

Ei tetenin umoumoch me angang murinno a nap seni ew awewen anapanapen eu tempel. Iei eu pwon ussun met a tongeni fis ngeni ekkewe ra angang me fel non imwen ewe Samon. Ra tongeni ekieki ar repwe angei ponuen ar iotek, pusin pwarata, waten nuku, pochokun, ourur, anapono mirit, me anapono manaman.

Fansoun non ewe tempel epwe anisuk ne ekieki selestial me kuna nemasepwin ika wesen en ion, ion kopwe tongeni winiti, me ewe sokkun manau kopwe manaueni tori fefeino. Fel ngeni non tempel iteitan epwe anapano ewe an kopwe kuna pusin en me ifa usun kopwe kuchunong non an Kot we umoumochun kokot. Ua pwon ngonuk ena.

Sia pwan pwon pwe non ewe tempel sipwe pwan“angei unusen ewe Ngun mi Fel.”¹⁹ Ekieki met ena pwon a wewe ngeni non nikinikin ussun sukunon nang ngeni ekkewe ra nukuchar ne kuta ewe ennet ese much.

A wor rech pwan ourour ngenikich pwe meinisin ion mi fel ngeni non ewe tempel ra ani ewe manamanen Kot me ekkewe chon nang ra “emwenir.”²⁰ Ifa ukukun an awateno om na epinukunuk om kopwe sinei pwe ika emon fefin me mwan ra endowed ren ewe manamanen Kot, iwe kose akanamon non om nonnom non ei manau ? Met sokkun pesepes mine a pesengonuk pwe ekkewe chon nang repwe wesen anisuk?

Iei, sia pwon pwe “ese wor sokkun kirikiringaw” epwe okufu ekkewe rafen fel ngeni non imwen ewe Samon.²¹

Weweiti ewe auchean non ngun pwe mettoch meinisin non ewe tempel a tongeni otufichi emon me emon kich ikenai.

Achengicheng pwi me fefinei, iei ai pwon. Ese wor met epwe tongeni anisuk nap seni om kopwe nukuchar ngeni ewe wok mecha²² me nukun chok kopwe fel ngeni non ewe tempel iteitan ren ukukun om tongeni. Ese wor met epwe epetuk neanapano nupwen kopwe tonong non toputopun kirochun ei fonufan. Ese wor met epwe kon apochokuna om kapasen pwarata ren ewe Samon Jises Kraist me An we Achasefan ika anisuk kopwe weweiti an Kot we amwararen kokot. Eseor met epwe tongeni ekinamwei ngunumepwe kon och seni non fansoun om metek. Eseor met epwe suki nang epwe kon och seni. Ese wor!

Ewe tempel ina ewe sukun aan ngeni ekkewe wachemuken feioch an Kot fan iten emon me emon kich, pwe ewe tempel iei chok eu neni won fonufan ikewe sia tongeni angei meinisin ekkewe pwonen feioch an Abraham.²³ Iei popun sia fori ekkei meinisin non ukukun ach tongeni, fan emwenien ewe Samon, ach sipwe fori ekkewe efeiochun non tempel an epwe tour ngeni chon ewe Mwichefen. Iwe, sia pwapwa ne esinesin pwe sia kokotun ach sipwe ouweta eu minefon tempel non eu me eu ekkei 15 neni:

• Uturoa, French Polynesia

• Chihuahua, Mexico

• Florianópolis, Brazil

• Rosario, Argentina

• Edinburgh, Scotland

• Brisbane, Australia south area

• Victoria, British Columbia

• Yuma, Arizona

• Houston, Texas south area

• Des Moines, Iowa

• Cincinnati, Ohio

• Honolulu, Hawaii

• West Jordan, Utah

• Lehi, Utah

• Maracaibo, Venezuela

Pwi me fefinei achengicheng, ua pwarata pwe iei ewe Mwichefenin Jises Kraist ren Aramas mi Pin non Fansoun Soponon. I ewe mokuran. Kich Noun chon kuno.

Mut ngeni kich sipwe pwapwa non ewe niwinsefaniton ekkewe kien pristut mine a fori an epwe tufich ngonuk me ngang ach sipwe ani pwapwan meinisin feiochun ngun sia mochen me nimenimoch ne angei. Ua fokkun pwarata non ewe it mi pin, iten Jises Kraist, amen.

Esinesin

1. Ua wiseni ewe wis non ewe Mwichen Ekkewe Engon me Ruemon Aposel seni ewe January 11, 1983, nupwen Elter LeGrand Richards a mano. Elter Oaks a wiseni ena wis seni January 11, 1984, ren manon Mark E. Petersen.

2. September 9, 1924.

3. Ewe efeiochun ewe kousefanin ewe Nauvoo Illinois Tempel seni Preseten Gordon B. Hinckley a fis non June 27, 2002, ewe 158 en achechemen manon Joseph Hyrum Smith.

4. Eu chok wiik mwirin an ewe Soufos Joseph Smith efeiochu ewe Tempel Kirtland.

5. Doctrine and Covenants 110:3.

6. Doctrine and Covenants 110:4.

7. Doctrine and Covenants 110:7.

8. Nengeni Doctrine and Covenants 110:11.

9. Doctrine and Covenants 110:12. Iei soposopun ewe pwon ewe Samon a fen fori ngeni Abraham non ngoroun ier me mwan (nengeni Genesis 18:18; 1 Nifai 15:18).

10. Nengeni Moses 4:5–6.

11. Nengeni Doctrine and Covenants 110:13–16.

12. Nengeni Doctrine and Covenants 13; 27:7–8, 12.

13. Nengeni Doctrine and Covenants 20:1–4.

14. Nupwen ewe Samon a kapas ngeni Joseph Smith pwe ei kinikinin fansoun iei ewe fansoun nupwen “ese wor mettoch epwe witiwitino” (Doctrine and Covenants 121:28), pokiten ekkewe kien pristut a niwinsefanito won fonufan.

15. Nengeni Doctrine and Covenants 95:8; 109:22.

16. Nengeni Doctrine and Covenants 132:45–46.

17. 2 Nifai 26:33; auchean mi kapacheta.

18. Doctrine and Covenants 109:8.

19. Doctrine and Covenants 109:15.

20. Doctrine and Covenants 109:22.

21. Nengeni Doctrine and Covenants 109:24–26.

22. Wewen ewe kapasen Kot

23. Nengeni Doctrine and Covenants 110:12132:29–30