Ewe Pochokunen, Murinon Eniwinin ewe Nongonongun Kraist
Ua tingor ami oupwe manaueni ewe nongonongun Kraist iteitan, eniwini, me wesewesan me anisi ekkoch won aner.
Fitu ier a no, punuwei we, Ruth, noum ewe nengin, Ashley; me ngang am ouwa fiti ekkoch turis won efoch wafotun sein kunou non ewe fonuen Hawaii non United States. Efoch kayak mi chok kanetiw winikaman ngeni ewe konik, ussun efoch wafotun ewe chon fotun a mot sapengeni mwan me a aea efoch fotun mi wor chon me ruepek ne fotunei seni mwan ngeni mwirin won epek mwirin epek. Ewe kokkot pwe ita am oupwe fotun ngeni ruu kukkun fonu towaw seni orun Oahu me niwin sefan. Uwa nukunuk pun nupwen ua emon onuon, ua fen fotunei ekana kayak seni epek tori epek ekkewe konikin ekkewe chuk. tipetekia ese fokkun fisioch, ika met?
Noum ewe chon emwen a ngenikem kapasen ourour me pwar ngenikem kewe kayak am oupwe wawa. Ra sokoseni ekkewe uwa fen pin fotunei me mwan. Ita ururun upwe mot asan ewe wa, nge uwa mototiw non. Nupwen uwa tota won ewe wa, choui we a napeseni met uwa fen oruni, me use kon posono me non ewe konik.
Nupwen aua poputa, uwa fotun mwitir nap seni Ruth me Ashley. Mwirin ekis fansoun uwa akomono senir. Inamo ika uwa ingeiti mwitiri, ua kouno ne fotun me witir ar repwe toriei. Ew watten noo—13 centimeters ukukun waten 1 a ku nepekin wai we me a onupaeitiw non ewe konik. Ren ewe fansoun uwa onupsefanieta ewe wa me otures ai upwe tosefanita won, Ruth me Ashley ra fen pasineino, nge ua kon ngasepwich ai upwe popusefan ne fotun. Mwen ai upwe tongeni opungochu ai ngasangas, pwan ew no, ei ew a ennetin watte—a arapakan 20 centimeters 2 a ku wai we me a pwan onupasefanieitiw. Ren ewe fansoun ua tufichin ai upwe toursefani ewe wa, a much peisei ua nuokus pwe usap chiwen tufichin tota won.
Kuna ussun nonnomui we, ewe chon emwen a fotunoto me a aposano wai we, a fori an epwe mecheres ai upwe tota won. Nupwen a kuna pwe mi chok weires fetanin ngasangasei ne fotun won pusin ai, a foti efoch san ngeni wai we me a poputa ne fotun, a chok nukiei. Mwitir chok a murinono ai ngasangas me uwa poputa ne pusin fotun won pusin ai. Atewe a epichano ewe san, me uwa tori ewe aewin fonu nge ese chiwen wor aninis. Ai we uwa tour, ua oturuweitiw won ewe pi, ua pekus.
Mwirin an ewe mwicheich ra asoso, ewe chon emwen a osokukun ne ureniei, “Mr. Renlund, ika ke chok soposopono ne fotun, ne sopweno mwokutum, ua ekieki kosap osukosuk. Ua opuru an kapasen ourour nupwen am ouwa fotun ngeni ewe oruen fonu me niwinsefan ngeni am ewe nenien poputa. Fan ruu, ewe chon emwen a fotunuto unuki me apasa ngeniei pwe uwa angang murino. Kewe mo watten no ra ku nepekin wai we, nge use nupono.
Ren ai soposopono ne fotunei ewe wa, uwa sopweno mwokutui me feiniochuno, okukunono pochokunen ekkewe no ar kuwei seni nepekin we. Ewe chok pwan nongonong a fis ngeni non manauen ngunuch. Sia winiti mi nipwakingaw nupwen sia amangakicheno me akaewin nupwen sia kouno. 3 Ika sia chok sopweno omokutun pekin ngun ren ach sopweno ne “fotun” ngeni ewe Chon Amanau, sia manau me tumun pokiten ach manau ese much a anongonong won ach nuku non I. 4
Omukutun pekin ngun a fis “non unusen manau nupwen sia enniwini ne etiwa ewe nongonongen Kraist.”5 Ren ach fori, President Russell M. Nelson a afanafana, a awora ew “pochokunen murinon eniwini.”6 Ewer, ekkewe kinikinin ewe nongonongun Kraist—ussun nuku non non ewe Samon Jises Kraist, aier, tonong non ew pwonen marar ngeni ewe Samon ren papatais, angei ewe niffangen ewe Ngun mi Fel, me nikitu tori soponon7—resap chok fis ussun fan ew-chok, cheki-ewe-porun met mi fis. Akkewin, “nikitu tori ewe soponon” esap ew kinikin mi imuno non ewe nongonongun Kraist—usun ita sia awesano ekkewe ruanu kinikin iwe mwirin asosono, akarungi nich, me utiwit ngeni mano. Apw, nikitu tori ewe soponon mi eniwin me eniwini an epwe murinono aea ekkewe ekkoch nongonongun Kraist, forata ewe “pochokunen murinon eniwini” minne Preseten Nelson a awewei.8
Eniwini wewen pwe sia eniwini me eniwini ne sinei ekkewe kinikinin ewe nongonongun Kraist non unusen manauach. Eniwiniochu wewen pwe sia oueta won me murinono fiti ew me ew eniwin. Inamo ika sia eniwini ekkewe kinikin, sise chok morokukun non kukumos nge ese wor ew anen feinno mwach. Nge, sia arap ngeni Jises Kraist ew me ew fansoun seni ewe angangen eniwini non ewe chok tetenin.
Omokutun a pachenong ir me ruu mwitirin me emwenin fetanin.9 Ika uwa fotunei ewe wafotun fiti pochokunei non ewe an ese pung, ua fen tongeni forata watten omwokutun, nge usap tori ikewe ururun upwe feino ie. Nono ngeni, non manau, a auchea sipwe “fotun” ngeni ewe Chon Amanau ach sipwe feitto ren I.10
Ach nuku non Jises Kraist a auchea an epwe koiasi iteitan.11 A koiasi nupwen sia iotek iteitan, kaeo ekkewe pukefel iteitan, ekiek won murinon Kot iteitan, aier iteitan, me aponueta ewe memefin ewe Ngun mi Fel iteitan. Ussun chok an ese murinno ngeni kich ach ponuku anach meinisin tori Raninifen me mwirin omuchu anach seni met ururun sipwe ani non ew wik, esap murino ngeni pekin ngun ach sipwe oukuku tumunun ach kapasen pwarata ngeni ew ran non ewe wik.12
Nupwen sia angei wisach ren pusin kapasen pwarata, 13 sia apochokuna omwokutun pekin ngun me ekis me ekis ne forata pochokunen nuku non Jises Kraist, me ewe nongonongun Kraist a winiti ewe nukanap chochon ewe popun manau.14 Omwokut a pwan ussun chok oueta nupwewn sia achocho ne anneasosichi ekkewe annukun Kot me aier. Aier a apwapwa me mut ngenikich ach sipwe kaeo seni ach mwan, minne ina ussun ach sia fefeita. Epwe wesewesen wor ach fansoun nupwen sia nupono non wach wafotun me kuna inisich non onononun konik. Seni aier, sia tongeni tosefanita asan me soposopono, inamo ika fan fite sia turuno seni.15 Ewe auchean kinikinin pwe sisap fangeta.
Ewe pwan ew kinikinin ewe nongonongun Kraist ina papatais, minne a pachenong ewe papatais ren konik me, seni ewe kopungunon, ewe papatais ren Ngun mi Fel.16 Nupwen papatais a ew mettoch mi fis fan ew chok, sia eniwini ne asofosefani ach pwon nupwen sia angei ewe sacrament. Ewe sakrament ese angei nenien papatais, nge a ochufengeni ekkewe mettochun non ewe nongonongun Kraist—nuku me aier—fiti ketiwen ewe Ngun mi Fel.17 Nupwen sia angei ewe sakrament, 18 sia etiwa ewe Ngun mi Fel non manauach ussun chok nupwen sia papatais me kopunguno.19 Nupwen sia aponueta ewe pwon mi pin a affat non kewe iotekin sakrament, ewe Ngun mi Fel a winiti chiechiach.
Usun ewe Ngun mi Fel ew watten aninisin non manauach, sia fetanoch me eniwiniochu ne awora napanap usun Kraist. Netipach ra siwin. Ach mochen fori mi ngaw a kukununo. Ach mochen fori mi murinno a napeno tori ach chok mochen “sopweno ne fori mi murinno.” 20 Me iei sia tongeni tufich ngeni ewe manamanen nang a auchea ngeni ach sipwe nikitu ngeni soponon.21 Ach nuku a napeno, me sia moneta ach sipwe eniwini ewe pochokunen, murinon eniwin sefan.
Amwokutun ngun ngeni mwan a pwan pesei kich ach sipwe fori pwan ekkoch pwon mi pin ren Kot non imwen ewe Samon. Chomongun pwon mi pin ra akana kich ngeni Kraist me apochokunano ach akoko ngeni I. Seni ekkei pon mi pin, a wor ach watten tufich ngeni An manaman. An epwe fatoch, pwonen papatais me tempel resap ir, ekkewe popun manaman won winikaper. Ewe popun manaman ina ewe Samon Jises Kraist me Samach non Nang. Ach fori me apwonueta pwon mi pin ra forata ew anen Ar manaman non manauach. Nupwen sia manau anongonong ngeni ekkei pwon mi pin, sia chon anemwir ngeni meinisin an Samach won Nang.22 Ewe omwokut a kawor seni ach manaueni ewe nongonongun Kraist esap chok apochokuna ekkesiwinin nonomuch ngeni ach fetanin manaua esemuch nge a pwan pesei kich ach sipwe anisi ekkoch non ekkewe an mi fich ngeni.
Ekieki ifa ussun ewe chon emweni sai a anisiei mwirin ai we nupono won ewe wafotun. I ese puchor seni towaw ew kapas eis ese wor aninisin usun, “Mr. Renlund, metena ka fori non ena konik?” Ese fotunuto me song ngeniei me, apasa, “Mr. Renlund, ita kosap nom non ei sokkun nikinik ika inisum mi pochokun.” Ese poputa ne nukeano wai we nupwen uwa chok achocho ne tosefanita won. Me ese opunguwei fan mesen ewe mwichen aramas. Nge, a fen ngeniei ewe aninis a namot ngeniei non ena fansoun a namot ngeniei. I a ngeniei ourour nupwen uwa mochen etiwa. Me a awora fansoun an epwe pesei ei.
Nupwen sipwe iamwiri ekkoch, ese pwan och sipwe eis kapas eis ese aninisoch ika apasa met mi fen fatteno. Napengeni aramas ion ra tinisuk ra sinei pwe ra tinisuk. Sisap apungu ekkoch; ach ekiekin opungu ekkoch ese aninisoch ika ese ketiw, me napengeni ese nafoch porousan.
Anonou inisich ngeni ekkoch a tongeni emweni kich ach sipwe fori mwan mi efeiengaw, akkaewin ika sia opungano pwe sia kon pung nap seni ekkana ra osukosuk. Ena sokkun a ussun sia mwop non ew unungat meter 24 konik, kuna chienom a mwop non ruanu meter 25 konik, ekieki pwe i emon chon tipis watte, me ka mefi murinno ussun inisum. Inamo, kich meinisin sia tinisuk won pwisin ach. Ese wor neich a manaueni manau ese much.26 Sise tongeni. Jacob, non ewe Puken Mormon, a osukuna, “Chechemeni, mwirin [ach] siwini nonnomun inisich ngeni Kot, pwe epwe chok non me seni ewe chenin Kot pwe [sia] manau.”26 Meinisin a namot ngeni kich an ewe Chon Amanau we Achasefan esemuch, esap chok kinikinin.
A namot meinisin ach kirekiroch, weweiti, me tong nupwen sia fori fofforun ngeni chon aruch.28 Ekkana ra osukosuk “a namot repwe mefi ewe tong mi unusoch an Jises Kraist a pwa non [ach] kapas me fofor.”28 Nupwen sia fori angangen iamwir, sia pesei ekkoch fan chommong me awora aninis. Ika mo emon ese mochen epwe etiwa, sia sopweno ne iamwirir nupwen ir mi mutata. Ewe Chon Amanau a osukuna pwe “pun ngeni ena sokkun oupwe soposopono ne angang ngeni; pun ouse sinei ika non ew ran repwe niwin me aier, me feito rei ren unusen netip, iwe upwe echikarar; iwe ami oupwe wisen popun chon awora amanau ngeni ir.”29 An ewe Chon Amanau angang epwe echikara. Ach angang sipwe tong—sipwe tong me iamwir non ew sokkun an ekkoch repwe arap ngeni Jises Kraist. Iei ew me nein ekkewe uwan ewe pochokunen, murinon eniwinin ewe nongonongun Kraist.
Ua etiwok kopwe manaueni ewe nongonongun Kraist me eniwini, iteitan me anisi ekkoch non aner. Ua pwarata pwe ewe nongonongun Kraist a popunapen an Samach Kot non Nang ewe kokkot; iei, minne, An nongonong. Nupwen sia aea nuku non Jises Kraist me An Achasefan, sia feinno ren ewe anen pwon me awora popun ach anisi ekkoch ar repwe winiti noun Jises Kraist chon kaeo mi nikitu. Sia tongeni winiti chon anemwir non An Samach won Nang ewe muu, minne ina ewe tekian nikitu ne manaueni ewe nongonongen Kraist. Non iten Jises Kraist, amen.