Alimahan ang mga Gamot, ug ang mga Sanga Motubo
Ang mga sanga sa imong pagpamatuod mokuha og kalig-on gikan sa imong nagkalawom nga pagtuo sa Langitnong Amahan ug sa Iyang Hinigugmang Anak.
Usa ka Karaang Chapel sa Zwickau
Ang tuig 2024 maingon ta nga mahinungdanong tuig para kanako. Nagtimaan kini sa 75 ka tuig sukad ko nga nabunyagan ug nakompirmahan nga miyembro sa Ang Simbahan ni Jesukristo sa mga Santos sa Ulahing mga Adlaw didto sa Zwickau, Germany.
Ang akong pagkamiyembro sa Simbahan ni Jesukristo bililhon para kanako. Ang maihap uban sa katawhan sa Dios sa pakigsaad, uban kaninyo, mga kaigsoonan, maoy usa sa labing dagkong pasidungog sa akong kinabuhi.
Kon maghunahuna ko sa akong personal nga panaw sa pagkadisipulo, ang akong hunahuna mobalik ngadto sa karaan nga dako ug matahom nga balay sa Zwickau, diin akong gihandom ang mga panumdoman sa pagtambong og mga panagtigom sa sakramento sa Simbahan ni Jesukristo isip usa ka bata. Didto ang binhi sa akong pagpamatuod nakadawat sa labing una nga pag-alima.
Kini nga chapel adunay karaang organ nga bombahan og hangin aron motingog. Kada Dominggo usa ka batan-ong lalaki ang sangonan sa pagduso ug bira sa lig-on nga gunitanan nga maoy mopatingog sa organ. Usahay duna koy dakong kahigayonan sa pagtabang niining mahinungdanon nga buluhaton.
Samtang manganta ang kongregasyon sa atong minahal nga mga himno, mobomba ko sa tanan nakong kusog aron dili mahutdan og hangin ang organ. Gikan sa lingkoranan sa tigbomba sa hangin, makita nako ang talagsaong katahom sa dikolor nga mga bildong bintana, may usa nga naghulagway sa Manluluwas nga si Jesukristo ug may lain nga naghulagway ni Joseph Smith diha sa Sagradong Kakahoyan.
Makahinumdom pa gihapon ko sa akong sagradong mga pagbati samtang nagtan-aw ko niadtong nasilawan sa adlaw nga mga bintana samtang naminaw sa mga pagpamatuod sa mga Santos ug nanganta sa mga himno sa Zion.
Nianang balaan nga dapit, ang Espiritu sa Dios mipamatuod sa akong hunahuna ug kasingkasing nga tinuod kadto—si Jesukristo mao ang Manluluwas sa kalibotan. Kini ang Iyang Simbahan. Si Propeta Joseph Smith nakakita sa Dios nga Amahan ug ni Jesukristo ug nakadungog sa Ilang mga tingog.
Sayo niining tuiga, samtang gihatagan og buluhaton didto sa Uropa, nakahigayon ko sa pagbalik sa Zwickau. Ikasubo lang, kadtong minahal nga karaang chapel wala na didto. Giguba kini daghang tuig na ang milabay aron adunay lugar sa dakong apartment nga bilding.
Unsa ang Mahangtoron, ug Unsa ang Dili?
Moangkon ko nga sakit ang pagkahibalo nga kining minahal nga bilding sa akong pagkabata karon usa na lamang ka panumdoman. Sagrado kadto nga building para nako. Apan bilding lang kadto.
Sukwahi niana, ang espirituhanong pagsaksi nga akong naangkon gikan sa Espiritu Santo niadtong daghang tuig nga milabay na wala mahanaw. Sa tinuod, mas nalig-on kini. Ang mga butang nga akong nakat-onan sa akong pagkabatan-on mahitungod sa sukaranan nga mga baroganan sa ebanghelyo ni Jesukristo mao ang akong lig-on nga pundasyon sa tibuok nakong kinabuhi. Ang koneksiyon sa pakigsaad nga akong gimugna uban sa akong Langitnong Amahan ug sa Iyang Hinigugmang Anak nagpabilin kanako—sa dugay nga panahon human nga gibungkag ang chapel sa Zwickau ug ang dikolor nga bildo nga mga bintana nangawala.
“Matapos ang langit ug ang yuta apan ang akong mga pulong magpabilin gayod sa kanunay.”
“Mangatumpag ang kabukiran ingon man ang kabungtoran, apan ang gugma ko kanimo dili gayod molubad, ug dili usab mahanaw ang akong kasabotan sa pakigdait nga akong gihimo uban kanimo,” nag-ingon ang Ginoo nga nahigugma kanimo.”
Usa sa labing importante nga mga butang nga atong makat-onan niini nga kinabuhi mao ang kalainan tali sa unsa ang mahangtoron ug unsa ang dili. Sa dihang ato kanang masabtan, ang tanan mausab—ang atong mga relasyon, ang mga pagpili nga atong himoon, ang paagi sa atong pagtagad sa mga tawo.
Ang pagkasayod unsa ang mahangtoron ug unsa ang dili, mao ang yawe sa pagpalambo og pagpamatuod ni Jesukristo ug sa Iyang Simbahan.
Ayaw Kasaypi ang mga Sanga sa mga Gamot
Ang gipahiuli nga ebanghelyo ni Jesukristo, sama sa gitudlo ni Propeta Joseph Smith, “[modawat] sa tanan, ug sa matag tipik sa kamatuoran.” Apan wala kana magpasabot nga ang tanang kamatuoran parehas og bili. Ang ubang mga kamatuoran maoy kinauyokan, kinahanglanon, sa gamot sa atong hugot nga pagtuo. Ang uban mga sumpay o mga sanga—bililhon apan kon makonekta lamang sila sa mga sukaranan.
Si Propeta Joseph Smith miingon usab, “Ang sukaranan nga mga baroganan sa atong relihiyon mao ang pagpamatuod sa mga Apostoles ug sa mga Propeta, mahitungod ni Jesukristo, nga Siya namatay, gilubong, ug mibangon sa ikatulong adlaw, ug mikayab ngadto sa langit; ug ang ubang mga butang nga may kalabotan sa atong relihiyon sumpay lamang niini.”
Sa laing pagkasulti, si Jesukristo ug ang Iyang maulaong sakripisyo mao ang gamot sa atong pagpamatuod. Ang ubang mga butang mga sanga.
Wala kini magpasabot nga dili importante ang mga sanga. Ang kahoy nagkinahanglan og mga sanga. Apan sama sa gisulti sa Manluluwas sa Iyang mga disipulo, “Ang sanga dili makabunga gawas kon magpabilin kini sa punoan.” Kon walay koneksiyon sa Manluluwas, ngadto sa pampahimsog nga anaa sa mga gamot, ang sanga malawos ug mamatay.
Kon bahin sa pag-amuma sa atong mga pagpamatuod ni Jesukristo, naghunahuna ko kon usahay masaypan ba nato ang mga sanga sa mga gamot. Kini ang sayop nga nakita ni Jesus sa mga Pariseo sa Iyang panahon. Gihatagan nila og dako kaayong pagtagad ang medyo ginagmay nga mga detalye sa balaod nga sa kataposan ilang nabaliwala ang gitawag sa Manluluwas nga “mas importanteng mga pagtulun-an”—mga sukaranang mga baroganan sama sa “hustisya, kaluoy ug pagkamatinud-anon.”
Kon gusto nimo nga alimahan ang usa ka kahoy, dili nimo sabyagan og tubig ang mga sanga. Buboan nimo ang mga gamot. Sa samang paagi, kon gusto ka nga motubo ang mga sanga sa imong pagpamatuod ug mamunga, alimahan ang mga gamot. Kon dili ka segurado mahitungod sa usa ka partikular nga doktrina o praktis o elemento sa kasaysayan sa Simbahan, pangita og katin-awan uban sa hugot nga pagtuo diha ni Jesukristo. Tinguhaa ang pagsabot sa Iyang sakripisyo alang kanimo, sa Iyang gugma alang kanimo, sa Iyang kabubut-on alang Kanimo. Sunda Siya diha sa pagpaubos. Ang mga sanga sa imong pagpamatuod mokuha og kalig-on gikan sa imong nagkalawom nga pagtuo sa Langitnong Amahan ug sa Iyang Hinigugmang Anak.
Sama pananglit, kon gusto ka nga makaangkon og mas lig-on nga pagpamatuod sa Basahon ni Mormon, tutoki ang pagsaksi niini kang Jesukristo. Bantayi kon sa unsang paagi ang Basahon ni Mormon nagpamatuod Kaniya, unsa ang gitudlo niini mahitungod Kaniya, ug giunsa niini sa pagdapit ug padasig kanimo sa pagduol ngadto Kaniya.
Kon nagtinguha ka og mas makahuloganon nga kasinatian sa mga miting sa Simbahan o sa templo, sulayi sa pagpangita ang Manluluwas diha sa sagradong mga ordinansa nga atong madawat didto. Pangitaa ang Ginoo sa Iyang balaan nga balay.
Kon gibati nimo nga napul-an o nabug-atan kaayo sa imong calling sa Simbahan, sulayi sa pagpunting og usab sa imong serbisyo ngadto ni Jesukristo. Himoa kini nga maoy pagpadayag sa imong gugma alang Kaniya.
Alimahan ang mga gamot, ug ang mga sanga motubo. Ug sa tukmang panahon, mamunga kini.
Nakagamot ug Nakabarog nga Lig-on diha Kaniya
Ang lig-on nga pagtuo diha ni Jesukristo dili basta lang mahitabo. Dili, niining mortal nga kalibotan, ang mga tunok ug mga sampinit sa pagduhaduha dungan nga motubo. Ang himsog, mabungahon nga kahoy sa pagtuo nagkinahanglan og tinuod nga paningkamot. Ug ang usa ka mahinungdanong bahin niana nga paningkamot mao ang pagseguro nga lig-on kitang nakagamot diha ni Kristo.
Sama pananglit: Sa sinugdanan, tingali nadani kita sa ebanghelyo sa Manluluwas ug sa Simbahan tungod nga nakadayeg kita sa mahigalaon nga mga miyembro o sa kabuotan sa bishop o sa kalimpyo sa chapel. Kini nga mga sirkumstansiya importante gayod sa paglambo sa Simbahan.
Apan, kon ang mga gamot sa atong pagpamatuod dili gayod motubo nga mas lawom pa niana, unsa ang mahitabo kon kita mobalhin ngadto sa usa ka ward nga magtigom sa dili kaayo nindot nga bilding, uban sa mga miyembro nga dili kaayo mahigalaon, ug ang bishop misulti og usa ka butang nga makapasilo kanato?
Lain pa nga sanglitanan: Dili ba resonable nga maglaom kita nga kon atong sundon ang mga sugo ug maselyo sa templo, mapanalanginan kita og dako, malipayon nga pamilya nga adunay maalamon, masulundon nga mga anak, tanan kanila magpabilin nga aktibo sa Simbahan, moserbisyo og misyon, mokanta sa ward choir, ug moboluntaryo sa pagtabang sa paglimpyo sa meetinghouse kada Sabado sa buntag?
Naglaom gyod ko nga kitang tanan makakita niini nga mahitabo sa atong kinabuhi. Apan unsa kaha kon dili kini mahitabo? Magpabilin ba kita nga magsunod sa Manluluwas bisan unsa pa ang mga sirkumstansiya—mosalig Niya ug sa Iyang gimbut-an nga tukmang panahon?
Kinahanglang mangutana kita sa atong kaugalingon: Ang akong pagpamatuod ba gibase sa unsay akong gilaoman nga mahitabo sa akong kinabuhi? Nagdepende ba kini sa mga binuhatan o sa kinaiya sa uban? O lig-on ba kining natukod diha ni Jesukristo, “nakagamot ug nakabarog ug nalig-on diha kaniya,” bisan pa sa mausabon nga mga sirkumstansiya sa kinabuhi?
Mga Tradisyon, Kinaiya, Mga, ug Pagtuo
Ang Basahon ni Mormon naghisgot mahitungod sa mga tawo nga “higpit nga nagsunod sa mga ordinansa sa Dios.” Apan miabot ang madudahon nga ginganlan og Korihor, nagbugalbugal sa ebanghelyo sa Manluluwas, naghingalan niini nga “binuang” ug “kawang nga mga tradisyon sa ilang mga amahan.” Si Korihor “naglingla sa mga kasingkasing sa kadaghanan, hinungdan nga nahimo silang mga garboso sa ilang pagkadaotan.” Apan ang uban dili mailad, kay para nila, ang ebanghelyo ni Jesukristo labaw pa kay sa tradisyon.
Lig-on ang pagtuo kon aduna kini lawom nga mga gamot sa personal nga kasinatian, personal nga pasalig ngadto ni Jesukristo, wala magdepende kon unsa ang atong mga tradisyon o kon unsay isulti o buhaton sa uban.
Ang atong pagpamatuod sukdon ug sulayan. Ang pagtuo dili pagtuo kon dili gayod masukod. Ang pagtuo dili lig-on kon dili gayod maatbangan. Mao nga ayaw kasagmuyo kon ikaw adunay mga pagsulay sa pagtuo o wala matubag nga mga pangutana.
Dili kita angay nga magdahom nga makasabot sa tanan sa dili pa kita molihok. Dili kana pagtuo. Sama sa gitudlo ni Alma, “Ang pagtuo dili ang pagkaadunay hingpit nga kahibalo sa mga butang.” Kon dili kita molihok hangtod nga ang tanan natong mga pangutana matubag, labihan ang atong pagpugong sa maayo nga atong mahimo, ug atong gilimitahan ang gahom sa atong pagtuo.
Ang pagtuo maanindot kay magpadayon kini bisan kon ang mga panalangin dili moabot sama sa gilaoman. Dili nato makita ang umaabot, wala kita mahibalo sa tanang tubag, apan makasalig kita ni Jesukristo samtang magpadayon kita sa unahan ug pag-usbaw tungod kay Siya ang atong Manluluwas ug Manunubos.
Ang pagtuo molahutay sa mga pagsulay ug sa walay kaseguroan sa kinabuhi tungod kay lig-on kini nga nakagamot diha ni Kristo ug sa Iyang doktrina. Si Jesukristo, ug ang atong Amahan sa Langit nga nagpadala Kaniya, silang duha naglangkob sa usa nga walay pagtipas, hingpit nga masaligan nga tumong sa atong pagsalig.
Ang pagpamatuod dili usa ka butang nga imong itukod sa usa ka higayon ug padayon kining magbarog sa kahangtoran. Mas sama kini sa kahoy nga imong alimahan kanunay. Ang pagtanom sa pulong sa Dios sa imong kasingkasing mao lamang ang unang lakang. Sa higayon nga magsugod na sa pagtubo ang imong papamatuod, dayon magsugod na ang tinuod nga trabaho! Mao kana ang higayon nga imong “alimahan kini sa hilabihan nga pag-amping, aron mogamot kini, aron motubo kini, ug mohatag og bunga.” Nagkinahanglan kini og “dakong kakugi” ug “pailob sa pulong.” Apan ang saad sa Ginoo segurado: “Inyong maani ang mga ganti sa inyong pagtuo, ug sa inyong kakugi, ug sa pailob, ug sa pagkamainantoson, nga magpaabot sa kahoy nga mamunga alang kaninyo.”
Minahal nga kaigsoonan, adunay bahin kanako nga naghandom sa karaang chapel sa Zwickau ug sa dikolor nga bildo nga mga bintana niini. Apan sa nangaging 75 ka tuig, si Jesuskristo migiya kanako sa usa ka panaw sa kinabuhi nga mas mahinamon kay sa akong mahanduraw. Mihupay Siya kanako sa akong mga kasakit, mitabang kanako aron makakita sa akong mga kahuyang, miayo sa akong espirituwal nga mga samad, ug mialima kanako sa akong nagtubo nga pagtuo.
Maoy akong sinsero nga pag-ampo ug panalangin nga kanunay kita nga moalima sa mga gamot sa atong pagtuo diha sa Manluluwas, diha sa Iyang doktrina, ug sa Iyang Simbahan. Niini ako mopamatuod sa sagrado nga ngalan sa atong Manluluwas, atong Manunubos, atong Agalon—sa ngalan ni Jesukristo, amen.