Sagrado nga mga Kasulatan—ang Pundasyon sa Hugot nga Pagtuo
Dili nato ibaliwala ang kamahinungdanon sa sagrado nga mga kasulatan diha sa mga pagkakabig ug sa pagpabiling matinud-anon sa ebanghelyo.
Ang akong asawa, si Mary, ug ako bag-ohay lang nakakita og usa ka T-shirt nga adunay hulagway sa libro ug may mensahe sa atubangan nga mabasa, “Mga Libro: Ang Orihinal nga Mabitbit nga Device.”
Naghunahuna ko bahin niining makapainteresado nga mensahe ug kon unsa ka mahinungdanon ang mahimo sa mabitbit nga mga device sa tanang matang. Sa pagsige og hunahuna, akong naamgohan nga ang bisan unsa nga device o bisan ang usa nga gibutangan og artificial intelligence dili gayod mahimong ingon ka importante o ka mahinungdanon sama sa espirituwal nga giya nga nagagikan sa balaanong pagpadayag.
Mabitbit man o digital, ang Balaan nga Biblia ug ang Basahon ni Mormon: Lain nga Tugon ni Jesukristo naghatag og espirituwal nga giya ug pagtulun-an gikan ni Jesukristo, ang Manluluwas sa kalibotan. Gihatagan nato og bili kini nga mga basahon alang sa dakong tahas niini sa pagrekord sa direksyon sa Dios ngadto sa karaang mga propeta ug sa mga tawo ug sa giya nga nahatag niini sa atong kaugalingong personal nga mga kinabuhi.
Inubanan sa mga pagtulun-an sa buhing mga propeta, kining sagrado nga mga kasulatan naghatag og direksyon sa doktrina alang nato sa kalibotan karon. Kini nga mga kasulatan labing gamhanan sa higayon nga kini mohatag og pagtudlo, pagbadlong, paghupay, ug pagkonsuwelo sa mga indibidwal ug mga pamilya nga nagtinguha og giya gikan sa Ginoo.
Ang mga kasulatan, inubanan sa espirituwal nga inspirasyon gikan sa Balaang Espiritu, nagpadayon nga nag-unang tinubdan nga nagpasiugda sa pagkakabig niadtong adunay masulob-on nga mga kasingkasing ug mahinulsolon nga mga espiritu ug nagtinguha sa pagsunod ni Jesukristo. Ang mga kasulatan motabang sa pagpalig-on sa pundasyon nga makabarog sa makanunayong paningkamot sa kaaway sa pagpakunhod sa pagtuo.
Ang bag-ong mga kinabig nakapanalanagin ug nahimong daw sama sa dugo nga naghatag og kinabuhi sa Simbahan sa tibuok kasaysayan niini. Usa ka ehemplo hilabihan ka bililhon ngari nako. Sa dihang batan-on pa ko nga bishop, duha ka talagsaong sister nga mga misyonaryo nagtudlo sa pamilya ni William Edward Mussman. Ang amahan, nga banggiitan kaayo nga abogado, usa ka general counsel sa dakong korporasyon. Ang iyang maunongon nga asawa, si Janet, mitabang sa pamilya sa pagpaningkamot sa pagpakabuhi og mas sama kang Kristo nga kinabuhi.
Ang ilang talagsaong anak nga lalaki ug babaye, anaa sa mga 20 kapin ang edad, gitudloan usab. Silang upat nakadawat sa mga leksiyon ug nagtambong sa simbahan. Ang sister nga mga misyonaryo mihatag og gibug-aton sa pagbasa sa Basahon ni Mormon ug pag-ampo alang sa pagpamatuod nianang sagrado nga kasulatan. Ang nakanindot, ang pamilya mainampoong nagbasa sa tibuok Basahon ni Mormon sa mubo nga panahon.
Ang mga misyonaryo sa stake, ang duha niadto kanhi mga presidente sa Relief Society, mikuyog nila sa panagtigom alang sa sakramento.
Samtang nagkaduol na ang bunyag sa pamilya, nakadawat sila og daghang basahon nga nagsaway sa Simbahan. Wala pay internet kaniadto, apan ang materyal mipuno sa dakong kahon nga karton.
Ang sister nga mga misyonaryo midapit nako isip bag-ong natawag nga 34 anyos nga bishop aron motabang pagtubag sa gipasupot nga mga pangutana. Sa dihang nagpundok kami sa ilang sala, ang dakong kahon sa mga pamphlet nga nagsaway sa Simbahan anaa sa tunga-tunga sa lawak. Mainampoon nakong giatubang kini nga buluhaton. Atol sa pangbukas nga pag-ampo, ang Espiritu mihunghong nako, “Kahibalo na siya nga tinuod kini.” Kini ang importante. Ang mga sister mituo nga ang uban sa pamilya aduna nay pagpamatuod. Dili lang sila segurado sa amahan.
Gipahibalo dayon nako siya nga ang Espiritu miaghat nako nga siya aduna nay pagpamatuod. “Tinuod ba kana?” Mitan-aw siya nako ug miingon nga ang Espiritu mikompirmar kaniya sa katinuod sa Basahon ni Mormon ug sa Simbahan.
Dayon nangutana ko kon kinahanglan pa ba nga rebyohon ang mga pamphlet, kon sila aduna nay espirituwal nga pamatuod.
Ang amahan mitubag nga dili na kinahanglan. Ang tanan sa pamilya miuyon sa iyang tubag.
Miingon siya nga aduna siyay mahinungdanong pangutana: Usa ka rason nga sila nakadawat og daghan kaayong basahon nga nagsupak sa Simbahan kay sila mga miyembro sa laing tinuohan. Dugang pa, nakahimo siya og dakong saad nga motabang sa pagtukod og bag-ong chapel alang niana nga tinuohan. Gipahibalo ko niya nga ang sister nga mga misyonaryo mitudlo niya sa kaimportante sa ikapulo, nga mapasalamaton niyang gidawat, apan naghunahuna siya kon sayop ba nga tumanon usab niya ang saad nga kanhi iyang gihimo. Ako mipaneguro niya nga ang pagbayad sa saad madungganon ug tukma.
Ang mga Mussman uban sa ilang anak nga lalaki, umagad nga babaye, ug anak nga babaye.
Ang tibuok pamilya nabunyagan. Paglabay sa usa ka tuig naselyo sila isip pamilya didto sa Oakland California Temple. Ako adunay pribilehiyo nga makatambong. Ang anak nga lalaki nakahuman sa abogasya, nakapasar sa California Bar Exam, ug dihadiha miserbisyo og matinud-anong misyon didto sa Japan. Nagtan-aw ko sulod sa daghang katuigan samtang ang sunod nga mga henerasyon nagpabiling matinud-anon sa ebanghelyo. Ako adunay pribilehiyo sa pagdumala sa pagselyo sa usa sa iyang mga apo nga babaye.
Ang mga pagkakabig nga nahitabo sa atong panahon karon sama niana ka talagsaon. Sa miaging Hunyo, si Coach Andy Reid, ang nangulo nga coach sa football sa Kansas City Chiefs, ug ako, kuyog sa uban pa nga nagrepresentar sa atong tinuohan ug sa ubang mga tinuohan, namulong sa usa ka kalihokan nga gitambongan sa lainlaing mga tinuohan didto sa Riverside Church sa Siyudad sa New York. Si Coach Reid mihatag og gibug-aton sa ikaduha nga mga tsansa ug sa pagtubag sa mga pagdapit ug mga oportunidad, nga maoy lintunganay sa ebanghelyo ni Jesukristo. Pagkasunod buntag, kuyog sa among mga asawa, si Tammy Reid ug si Mary, mitambong kami sa panagtigom alang sa sakramento didto sa Manhattan Second Ward. Usa kadto ka espirituwal nga tulumanon. Adunay daghang bag-o nga kinabig ang anaa sa kongregasyon. Lima sa mga miyembro nga bag-ohay lang nga nabunyagan, upat ang hingkod nga lalaki ug usa ka batan-ong lalaki, anaa uban sa mga sakop sa Aaronic nga Pagkapari nga nagpasa sa sakramento. Nalipay ko nga moreport nga ang susama nga pagdagsang sa bag-ong mga miyembro nahitabo sa tibuok Simbahan.
Mapasalamaton kita sa makita gayod nga pagdaghan niadtong mitubag sa sagrado nga mga pagdapit, miusab sa ilang mga kinabuhi, ug midawat sa oportunidad nga mosunod ni Jesukristo. Misulod sila sa dalan sa pakigsaad pinaagi sa hugot nga pagtuo, paghinulsol, bunyag, ug kompirmasyon sumala sa gitudlo diha sa Balaan nga Biblia ug sa Basahon ni Mormon.
Dili nato ibaliwala ang kamahinungdanon sa sagrado nga mga kasulatan diha sa mga pagkakabig ug sa pagpabiling matinud-anon sa ebanghelyo. Ang karaang mga propeta nga gihulagway diha sa Basahon ni Mormon nasayod kabahin sa misyon ni Jesukristo ug mitudlo sa Iyang ebanghelyo. Ang Basahon ni Mormon makatabang kanato nga mas maduol ngadto sa Dios samtang atong kat-onan, sabton, ug gamiton ang mga pagtulun-an niini. Si Propeta Joseph Smith mitudlo, “Ang [lalaki o babaye] mas maduol sa Dios pinaagi sa pagsunod sa mga lagda [sa basahon], kay sa bisan unsa nga basahon.”
Aron masayod nga ang Basahon ni Mormon mao ang pulong sa Dios, kita kinahanglan nga mobasa, mamalandong, ug mag-ampo mahitungod niini ug dayon molihok sumala sa mga pagtulun-an niini. Si propeta Moroni misaad nga ang Dios mopadayag sa kamatuoran sa basahon ngari kanato kon kita mag-ampo nga kinasingkasing, uban sa tinuod nga katuyoan, ug may hugot nga pagtuo kang Kristo. Ang pagtuon sa Basahon ni Mormon mahinungdanon aron molahutay ang pagkakabig.
Samtang maghunahuna kita sa relasyon tali sa Biblia ug sa Basahon ni Mormon isip mabitbit nga mga device, ang usa ka tawo tingali mangutana. Sa inyong hunahuna sa unsang paagi nga magamit ug magtinabangay ang duha ka basahon kon ang Ginoo mopahayag nga hiusahon ug “mahimong usa ka sungkod diha sa imong kamot”? Mao kana ang gipahayag sa Ginoo nga “sungkod ni Juda,” ang Biblia, ug ang “sungkod ni Jose,” ang Basahon ni Mormon.
Sa daghang mahinungdanong mga bahin, ang Basahon ni Mormon naghatag og sukaranang doktrina nga nagpasabot ug nagpalig-on sa Biblia. Ang doktrina sa Pag-ula ni Jesukristo mao ang usa ka dakong ehemplo.
Ang Biblia naghatag og tukma nga asoy bahin sa mortal nga pangalagad ni Jesukristo, lakip na sa Iyang kamatayon ug Pagkabanhaw. Ang Basahon ni Mormon mas klaro mahitungod sa Pag-ula ni Jesukristo, butang nga gipasabot sa mga propeta sa detalyado nga paagi sa wala pa ang Iyang pagkamatay.
Ang ulohan sa Alma kapitulo 42 nagpakita sa kamahinungdanon sa doktrina sa Pag-ula ni Jesukristo.
Kini mabasa: “Ang pagka-mortal mao ang panahon sa pagsulay aron sa paghatag og kahigayonan sa tawo sa paghinulsol ug pag-alagad sa Dios—Ang Pagkapukan nagdala sa temporal ug espirituhanon nga kamatayon sa tanan nga mga katawhan—Ang katubsanan moabot pinaagi sa paghinulsol—Ang Dios sa iyang kaugalingon mitubos alang sa mga sala sa kalibotan—Ang kaluoy alang niadto nga maghinulsol—Tanan ug uban pa ubos sa kaangayan sa Dios—Ang kaluoy modangat tungod sa Pag-ula—Kadto lamang tinuod nga mahinulsolon ang maluwas.”
Si Presidente Russell M. Nelson miingon, “Mosaad ko kaninyo nga kon mainampoon kamo nga magtuon sa Basahon ni Mormon kada adlaw, makahimo kamo og mas maayong mga desisyon—kada adlaw.” Siya usab nagsaad nga kon “inyong isub-sob ang inyong kaugalingon sa Basahon ni Mormon, mapanalipdan kamo batok sa mga daotan niining panahona.”
Sama sa akong gihisgotan, nakadayeg ko sa konsepto sa orihinal nga mabitbit nga device—usa ka libro. Pero, akong giila ang hilabihan kamahinungdanon sa internet sa kalibotan karon. Ang usa ka moderno nga mabitbit nga device makahatag og impormasyon nga kanhi mipuno sa usa ka dakong librarya. Mapasalamaton kita nga nagpuyo sa panahon nga sama niini. Ako labing mapasalamaton nga nagtugot kini sa sagradong mga basahon ug sa mga materyal sa Simbahan nga maanaa sa digital nga paagi. Ang internet usa ka gamhanang himan sa pagtuon sa ebanghelyo. Karon, daghang tawo ang nagpakigbahin sa mga kasulatan ngadto sa mga higala gamit ang teknolohiya. Ang Basahon ni Mormon nga app, pananglitan, usa ka talagsaong paagi nga ipailaila ngadto sa mga higala ang Basahon ni Mormon ug sayon ra ipakigbahin sa normal ug natural nga mga paagi bisan asa ka.
Samtang ang internet naghatag og daghang panalangin, walay swerte, sama sa sinulat nga mga pamphlet nga nagsaway sa Simbahan nga akong gihulagway ganiha, gigamit usab kini sa pagmugna og pagduhaduha ug sa pagbaliwala sa pagtuo diha sa bililhon nga mga baroganan sa ebanghelyo. Mahimo kining kabahin sa “mga daotan niining panahona” nga gihisgotan ni Presidente Nelson.
Ang kaaway ug kadtong mitabang niya, nahibalo o wala mahibalo, nagmugna diha sa internet og susama sa kahon nga puno sa sinulat nga materyal nga nagsaway sa Simbahan sama sa akong gihulagway ganiha, nagtinguha nga ipalayo kamo gikan sa kamatuoran sa Dios.
Ang mga isyu nga gihisgotan aron sa pagmugna og pagduhaduha sulod sa katuigan managsama gayod kaayo. Tinuod gayod kini kon inyong itandi ang among panahon niadtong mga 1960, sa dihang anaa pa ko sa mga 20 kapin ang pangedaron.
Ang mga kasulatan nagtudlo nato sa paggamit sa paghukom ug magmaalamon sa tanang butang. Ang internet mahimong gamiton sa positibo nga paagi o sa makadaot nga paagi.
Ang dugay na nga mga miyembro ug ang bag-o pa lang nga nagtuon sa ebanghelyo kinahanglang magbantay og maayo sa unsay ilang tan-awon. Dili motan-aw sa law-ay, dili matinuoron, o dili matarong nga materyal. Kon buhaton ninyo, ang mga algorithm modala ninyo ngadto sa dalan nga makaguba sa inyong pagtuo ug makadaot sa inyong mahangtorong pag-uswag. Mahimo kamo nga pagadumalaon sa positibong paagi o sa negatibong paagi. Tinguhaa ang pagkamatarong ug likayi ang negatibo nga mga butang nga kon masudlan lisod nang likayan ug ang makapaguol nga mga talan-awon [doomscrolling] sa internet. Pun-a ang inyong kinabuhi og positibo, matarong nga mga ideya; pagmalipayon; paglingaw-lingaw apan likayi ang mga kinabuang. Adunay kalainan. Ang ika-13 nga artikulo sa hugot nga pagtuo usa ka maanindot nga giya. Labaw sa tanan, isubsob ang inyong kaugalingon kanunay diha sa Basahon ni Mormon, nga makapaduol sa Espiritu nganha sa inyong kinabuhi ug makatabang ninyo sa pag-ila sa kamatuoran gikan sa sayop.
Ang akong tambag alang niadtong sa bisan unsang paagi mitipas gikan sa dalan sa pakigsaad nga mobalik sa pagbasa sa sagrado nga mga kasulatan, propetikanhon nga giya, pagtuman sa mga baroganan sa ebanghelyo diha sa panimalay, ug musika sa hugot nga pagtuo. Matag kalag bililhon ngadto sa Ginoo. Nagkinahanglan kami kaninyo! Ang Ginoo nagkinahanglan kaninyo, ug kamo nagkinahanglan Kaniya! Welcome kamo kanunay. Atol sa daghang katuigan sa akong pagserbisyo sa Simbahan, ako nakadayeg sa talagsaon nga mga tawo nga mibalik sa dalan sa pakigsaad ug dayon miserbisyo ug mipanalangin sa tanan nga ilang gimahal o niadtong ilang nahimamat.
Ang sagrado nga mga kasulatan ug ang buhing mga propeta mao ang dakong paagi nga ang mahigugmaon nga Langitnong Amahan mihimo nga ang Iyang plano sa kalipay maanaa sa Iyang tanang anak.
Ako mohatag sa akong segurado nga pagsaksi sa kabalaan ni Jesukristo ug sa katinuod sa Iyang Pag-ula, sa ngalan ni Jesukristo, amen.