Ua Taunuu Faifeautalai i Iapani

I le taeao o le aso 12 o Aokuso 1901, na ofi atu ai le Empress of India i le uafu o Yokohama o loo avatu ai le vaega muamua o faifeautalai a le Au Paia o Aso e Gata Ai e asiasi i Iapani. Na lauiloa o le “Toafa a Iapani,” o Heber J. Grant (sa avea ma sui o le Korama Aposetolo e Toasefululua i lena taimi), o Louis A. Kelsch, Horace S Ensign, ma Alma O. Taylor sa lei saunia mo papupuni o le a latou feagai. Sa leai se tasi o le toafa na tautala i le gagana pe na iloa ni mea se tele e uiga i tagata o Iapani. Na vave ona latou fetaiai ma lipoti faalelelei i nusipepa i le lotoifale ma sa faaesea e isi misionare Kerisiano mai Sisifo.

O eseesega i aga i fanua sa o se papupuni sili lea sa i ai i le alualu i luma o le galuega faafaifeautalai i Iapani. O le Faakerisiano sa vaaia o se vaega o ni manatu na faaulufale mai mai Sisifo. Sa masani lava ona manatulia o ni auala e maua ai le tele o tupe ma le tamaoaiga nai lo o se polokalama faalelotu ua atoatoa ona atinaeina. O tagata muamua na papatisoina na faatupuina ni faigata mo faifeautalai, o e sa mumusu ia papatiso i latou o e sa sailiili i le Ekalesia. Sa tuai le alualu i luma o le galuega i Iapani ao valaaulia e faifeautalai i latou sa faaalia le fiafia i le Ekalesia i ni taimi faaumiumi o sailiiliga e sue ai lo latou faamaoni.

I le 1905, na avea ai Alma O. Taylor, i le 22 o ona tausaga, ma peresitene o le Misiona a Iapani. Sa manaomia e Taylor o le sa talavou ma sa lei faaipoipoina, ona faafaigaluega se teufale e vaaia le fale o le misiona ma ia kukaina meaai mo faifeautalai. Ina ua maea le faatalanoaina o ni nai tagata, sa faafaigaluega ai loa e Taylor ia Tsune Ishida Nachie, o se teufale e 49 tausaga le matua, sa i ai le potomasani, o se kerisiano, o se tagata sa matuai fiafia i aoaoga faavae a le A -Paia o Aso e Gata Ai, o se mea moni na te lei faailoa atu ia Taylor. Na sili teisi ma le masina talu ona amata faigaluega o ia i le fale o le misiona, ae talosaga loa Nachie ia papatisoina ia. O le faaeteete ai i ona faamoemoega, na fai atu ai faifeautalai ia Nachie e faatali seia latou aoaoina atili o ia i aoaoga faavae o le talalelei. Ae ui i lea, sa maumaua’i Nachie e papatiso. Na ia uia ni laasaga e faamaonia ai lona manao moni e auai i le Ekalesia, e oo lava i le tuumuli ese mai lana ekalesia muamua.

I le aso Setema 26, 1905, na papatiso ai Nachie ma avea ai ma se tasi o tagata sili ona naunautai ma atamai o le Ekalesia i Iapani. Sa masani ona ia aoaoina vasega o le Aoga Sa, fesoasoani i le faaliliuga o le Tusi a Mamona, ma avea o se tina lona lua i faifeautalai talavou e galulue i le atunuu. Ina ua maea le tele o tausaga o auaunaga i le Ekalesia, na faailoa atu e Nachie se naunautaiga e asiasi atu i le malumalu ma auai i saunina iina.

I le 1922, na talosagaina ai e faifeautalai sa galulue i le Misiona a Iapani na ni foai mai faifeautalai na galulue muamua o e na iloaina Nachie. Faatasi ai ma tupe na aoina, na litaea ai Nachie i Hawaii, o lea i le aso 5 o Iuni, 1923, na avea ai o ia ma tagatanuu muamua Iapani na liliu mai na ulu i le malumalu i Laie ma auai i sauniga o le malumalu. I tausaga faaiu o lona soifua, sa avea ai Nachie ma mea faigaluega i le talaiga o le talalelei i tagata Iapani na nonofo i Hawaii.

E ui lava i papupuni o le gagana ma le aganuu, sa faaauau pea ona aoao atu e faifeautalai le talalelei i Iapani. Mai le 1901 i le 1924, e toatele faifeautalai mai Amerika i Matu, o le tele lava mai i Iuta ma Idaho, na valaauina i Iapani. Ae peitai, e ui lava i taumafaiga a faifeautalai, na faifai malie lava le alualu i luma o le galuega. E oo atu i le 1924, ua na o le 176 tagatanuu Iapani na auai le Ekalesia. O nisi, e pei o Nachie, sa o ni tagata liliu mai tuuto faamaoni; o le toatele lava na fiafia mo na o se taimi puupuu i fegalegaleaiga i le Ekalesia.