“I Ai Iinei e Nofo”

I le faaiuga o le taua, sa lolotu faatasi ai e le aunoa se vaega toalaiti o le Au Paia, na aofia ai ma Fujiya Nara. Sa faataunuu e Nara le Aoga Sa i lona fale ma vaaia se Aoga Sa laiti i le maota o se tagata le lotu agalelei. I mea uma, sa faaauau pea ona faatasitasi Nara ma le toeitiiti 100 o tagata o e sa flagolagoina le Ekalesia: ae peitai, sa na o ni nai tagata, ua uma ona papatisoina.

I se tasi taeao, a o lei leva ona taunuu le pulega faafitafita i Tokyo, sa i ai se faasalalauga i le nusipepa sa tāina i ai le vaai a Nara. O le faasalalauga, sa tuu i ai e Edward Clissold, o se taitai o le fuavaa a le I.S. sa tautua i le pulega faafitafita ma o se tagata o le Ekalesia, sa sailia ai tagata uma o le Ekalesia i Iapani. Ma le fiafia tele o le a toe fesootai ma le Ekalesia, na valaaulia ai e Nara ia Clissold i ana sauniga o le Aoga Sa.

O Fujiya Nara ma isi i fafo o le Aoga Sa Tokyo, pe tusa o le 1946

I le 1947, na tofia ai Edward Clissold, ua litaea nei mai le fuavaa, o le peresitene o le misiona fou ua toe tatalaina. O lana galuega muamua o le sueina o se fanua tumau mo le ofisa o le misiona ma mo le au paia e fai ai sauniga. Faatasi ai ma ni nai faigata, sa iu ina maua e Clissold se fale tuai i le pitonuu o Azabu i Tokyo. O le fale sa faaleagaina i le taimi na pomuina ai Tokyo ma na manaomia le toe fauina. Ina ua maea le faatauina mai, o se meatotino muamua lea ua umiaina e le Ekalesia i Asia, sa amata galue loa Clissold i le toe faaleleia le fale ma ia saunia mo le faaaogaina o se ofisa o le misiona.

I le aso 17 o Iulai, 1949, na sūsū mai ai Matthew Cowley o le Korama a Aposetolo e Toasefululua i Tokyo e faapaia le fale fou o le misiona ua toe faaleleia. I le aluga o lana saunoaga, na tautino mai ai e Cowley e faapea, O Le Ekalesia a Iesu Keriso o le Au Paia o Aso e Gata Ai ua “i ai iinei e nofo; matou te le toe o ese lava.” Ona folafola atu lea e Cowley o le a tele isi maota e fausia e le Ekalesia—“e oo lava i malumalu”—i Iapani.