“O le Amataga o se Ekalesia Faavaomalo”

I le aso 20 Aperila, 1967, na faapotopoto ai le Au Paia i Osaka i la latou falelotu fou ua maea. Sa i ai iina Hugh B. Brown, o se sui o le Au Peresitene Sili o le Ekalesia, e faapaia le falelotu. I le aluga o le sauniga, na tau atu ai e Brown i le aofia na ia vaaifaalemafaufau i se aso o le a valaauina ai se Pulega Aoao, o se Aposetolo mai Iapani.

I le taeao o le aso 3 o Aperila 1975, na faataunuuina ai se vaega o le faaaliga a Brown. Sa talosagaina ai Adney Y. Komatsu, o se tasi o le toatele o le Au Paia i Hawaii e tupuga mai Iapani, ia feiloai ma le Peresitene o le Ekalesiao Spencer W. Kimball. Na saunoa atu Kimball ia te ia e auauna atu o se Fesoasoani i le Korama a Aposetolo e Toasefululua ma se Pulega Aoao i le Ekalesia. Na taua mulimuli ane e Komatsu, na muamua lona matuai faateia o lea na le mafai ai ona tautala. Ina ua mavae sina taimi, na ia tali atu e faapea, afai na finagalo mai le Alii mo lana auaunaga, ia o le a galue o ia. Ina ua maea ona talia e Elder Komatsu, sa faalagolago Kimball i tua o lona nofoa ma saunoa atu ma le magafagafa, “O oe o le tagata muamua e le o se tagata paepae ua valaauina o se Pulega Aoao,” ma faaopoopo atu, “O le amataga lenei o se Ekalesia faava o malo.”

Talu mai le valaauina o Komatsu, ua faatupulaia le numera o alii ma tamaitai faatuatua mai fafo atu o Amerika i Matu ua auauna atu ma le faamaoni i matafaioi taua i le Ekalesia. E faatasi ai ma i latou na valaauina ia ni isi mai Iapani, e aofia ai Yoshihiko Kikuchi (Korama Muamua a Fitugafulu, faamaloloina ma le mamalu; o le Pulega Aoao muamua na soifua i Iapani), Chieko Okazaki (sa fesoasoani muamua, i le Au Peresitene Aoao o le Aualofa ; o se tamaitai Asia muamua na valaauina o se Ofisa Aoao), Kazuhiko Yamashita (Korama Muamua a Fitugafulu), ma Koichi Aoyagi (Korama Lona Lua a Fitugafulu, faamaloloina ma le mamalu).