Fausiaina o se Malumalu i Iapani

O le Au Paia Iapani o loo tutu mo se ata ao lei ulu atu i le vaalele mo le malaga muamua i le malumalu i Hawaii.

O le valoaga a Cowley mo se malumalu i Iapani na tele ni tausaga na alu e faataunuuina ai. I lena vaitaimi, o le malumalu aupito latalata o Laie Hawaii, e sili atu ma le 3,840 maila (6,180 km) le mamao. O le taugata o femalagaiga—e oo i le tasi ma le afa o le averesi o tupemaua i totogi i le tausaga atoa i lena vaitaimi—o lona uiga ua nao ni nai tagata e gafatia le malaga.

I le 1963, sa naunau ai lava Dwayne N. Andersen, o le peresitene o le Misiona a Matu Sasae Mamao, ia tatau ona faamanuiaina le Au Paia Iapani mai le faatupulaia faaleagaga lea e sau mai tapuaiga i le malumalu. Na amataina e peresitene Andersen se taumafaiga e aoao le Au Paia i le taua o le auai i le malumalu ma ia fesoasoani e faaitiitia le tau o le malaga i le malumalu. O lesona i paranesi uma sa taulai atu i aoaoga faavae o le malumalu ma faamanuiaga folafolaina mo i latou o e saili e auai i ona sauniga.

O le toatele o le Au Paia Iapani na foaiina atu o latou taimi ma taleni ma faaaoga a latou lava upegafesootai faaletagata lava ia e fesoasoani ai i le galuega faatino. O Kenji Yamanaka sa taua tele i le taumafaiga e fuafua, faatupe, ma faataunuu se malaga i le malumalu. O Yamanaka, o lana matata o le faafetauaiga o penina, sa faaaogaina ana fesootaiga faalegaluega e suesue ai ma feutanai mo se malaga togipau; ma tuuina atu i tagata o le Ekalesia ia penina e gaosi ai faamau o fusiua, ula, ma isi teuga feilafi; ma sa fesoasoani e taitai le pueina o se aufaipese a le Ekalesia i le lotoifale. O tupe na maua mai le faatauina atu o asoa ma teuga e fai i penina ma le puega [o le aufaipese] na tuuina atu i le tupe mo le malaga i le malumalu.

Ia Iulai 1965, e 166 le Au Paia Iapani na malaga atu i le vaalele togipau mai Tokyo i Laie, Hawaii. Na avea i latou ma tagata muamua mai le toatele e faia se malaga faaletausaga i Hawaii e auai i sauniga o le malumalu. Ina ua taunuu le Au Paia i Hawaii, na avea i latou ma tagata muamua e faalogo i le faaliliuga fou o sauniga i le Faaiapani. O Tatsui Sato, o le na faaliliuina ia sauniga, na faatautaia nei sauniga muamua. O le tapuai i le malumalu na avea ma vaega autu o soifuaga o le Au Paia Iapani o e na maoae le ositaulaga ina ia o i le malaga.

I le aso 9 Aokuso, 1975, i le taimi na fofogaina ai e Spencer W Kimball, le Peresitene o le Ekalesia i se konafesi faaleeria i Tokyo o le a fausia se malumalu i Iapani, o le toatele o le Au Paia na piilima o latou lima ma fetagisi i le fiafia. O le ofisa o le misiona i Tokyo na filifilia o le tulaga mo le malumalu fou. I le asō, e tolu malumalu—i Tokyo, Fukuoka, ma Sapporo—o loo tautuainale Au Paia i Iapani.