O “Vaitau Pogisa” o le Ekalesia i Iapani

I le 1924, na pasia ai e le Konekeresi a le I.S. le Tulafono o Femalagaiga o le 1924, lea na faasaina ai malaga mai Asia i le Iunaite Setete. Na faauigaina e le malo o Iapani lenei tulafono o se faatusa o le faatupulaia o uiga tetee ia Iapani i le Iunaite Setete. Na avea lagona tetee ia Amerika ma mea taatele i magaala ma i totonu o ekalesia a Iapani. O le auai i sauniga a le Au Paia o Aso e Gata Ai, na faaitiitia sei vagana ai na o tagata sili ona faamaoni o le au paia na omai i taimi uma.

O le lagonaina o le le lelei o tulaga faaagafesootai, faaupufai, mafaalelotu, na faia ai e Heber J. Grant, lea na avea nei ma Peresitene o le Ekalesia, le faaiuga matuitui e tapunia le Misiona a Iapani—lea sa ia tatalaina. I le aso 13 Iuni, 1924, na auina atu ai e Peresitene Grant se feaufaapoloaiga, ia Hilton A. Robertson, le peresitene o le misiona, ma faatonuina o ia e taofia faagaoioiga uma o le misiona ma faatulaga faifeautalai e toe foi i aiga. O le Faalapotopotoga mo le Faaalualuina i Luma o le Mutuale (FFLM), o se faalapotopotoga mo le tupulaga ma le au talavou matutua, na filifilia ua na o le pau lea o le faalapotopotoga a le Ekalesia o le a faaauau pe a o ese atu faifeautalai.

Ao lei o ese atu faifeautalai, na valaauina ma vaetofia Fujiya Nara o se toeaina pulefaamalumalu i le Ekalesia i Iapani. I le fonotaga muamua a le Au Paia ina ua mavae le toe foi o faifeautalai, na fautuaina ai e Nara le lolomiga o se nusileta, na faaigoainao le Shuro (O le Alofilima), ina ia logoina ai tagata uma o le ekalesia mea o tutupu i paranesi taitasi. I le lomiga muamua o le Shuro, na faailoa atu ai e Nara le tulaga loloto o le le mautonu na lagona e le Au Paia i le tapunia o le misiona. O lenei vaitau sa “o le vaitau o le pogisa atoa” o le tala lea a Nara, ae o le FFLM o le “ala lea i le malamalama i le pogisa ua i ai nei.” Na faaauau pea ona taitai e Nara le Au Paia i le measili na ia mafaia seia oo i le 1934, ina ua siitia o ia i Manchuria i lana galuega o auala o nofoaafi.

Ina ua siitia ese atu Nara, sa i ai se avanoa mo se tulaga faaleautaitai i Iapani. O Takeo Fujiwara, o se talavou liliu mai mai Sapporo sa auai i le BYU i se sikolasipi mai le iunivesite o peresitene Frankling S. Harris, na valaauina e Heber J. Grant ma vaetofia e avea ma toeaina pulefaamalumalu ma se faifeautalai faapitoa i Iapani. Sa galue malosi ma tuuto Fujiwara i lona valaauga.

Ina ua taunuu i Iapani, sa vave ona ia asiasi ma faatuina paranesi i Tokyo, Osaka, Kofu, ma Sapporo. Na ia faaaogaina ona aafiaga i le Ekalesia i Iuta e avea o se taiala mo le auala e tatau ona faagaoioi ai le Ekalesia, ma sa ia auina atu ni nai lipoti uumi o ana gaoioiga ia Alma O. Taylor i le Aai o Sate Leki. Ae paga lea, na maua Fujiwara i le gasegase o le mamapala i le faaiuga o le 1935. E ui lava na vave le faiifo o lona soifua maloloina, ae na tumau pea lona tuuto atu i lona valaauga. I le aso 27 o Ianuari, 1936, na maliu ai Takeo Fujiwara. Ao lata ina maliu o ia, sa ia fai i lona tama e tusi atu ia Taylor ma faailoa atu lona faanoanoa ona na le mafai ona ia galue malosi atu.

Ina ua mavae le maliu o Fujiwara, sa le tele se fesootaiga ma le Au Paia i Iapani. I le 1937, na valaauina ai Hilton A. Robertson e tatala le Misiona a Iapani ma le faauluuluga i Honolulu, Hawaii, e talai ai le talalelei i lse vaega tele o tagata Iapani o loo nonofo i le motu o Hawaii. Sa taumafai pea Hilton e faatumau fesootaiga ma le Au Paia i Iapani i le tele e mafai ai, ma ia Aperila 1939 sa ia faaaluina se masina i Iapani i le asiasia o paranesi. Ae peitai, ina ua amataina le Taua Lona II a le Lalolagi, na faapea ona oo ai tagata o le Ekalesia i Iapani ma Hawaii i itu faafeagai o le feeseeseaiga. Sa faapea ona motusia ai fesootaiga i le va o le Misiona a Iapani i Hawaii ma se vaega toaitiiti o le Au Paia i Iapani.