Tatsui Sato: Faaliliutusi mo le Olaga Atoa

O Tatsui ma Chiyo Sato faatasi ma Warren Richard Nelson, o se faifeau o le Au Paia o Aso e Gata Ai sa tofiaina e latalata i Nagoya, i le sauniga o le papatisoga mo le au Sato i le aso, 7 Iulai, 1946.

O le Taua Lona II a le Lalolagi o lona uiga sa toatele le autalavou a le Au Paia o Aso e Gata Ai na le mafai ona auauna atu i ni misiona. O nisi na sailia ni avanoa e faasoa atu ai le talalelei i le taimi o le auaunaga faamiliteri. Sa toatele tagata faatuatua liliu mai o le Ekalesia i Iapani sa aoaoina i le talalelei e nei fitafita.

I se taimi puupuu ina ua maea le taua, o Au Paia o Aso e Gata Ai sa i le militeri a le Iunaite setete—na aofia ai se lutena talavou na suafa ia Boyd K. Packer—na naunau e faasoa atu le talalelei ia Tatsui Sato, o se alii Kerisiano sa nofo i Narumi. Sa faitau muamua Sato e uiga i le Au Paia o Aso e Gata Ai ma manatuaina ni ata matagofie o le Malumalu o Sate Leki ma mauga i tua atu na lilofia i le kiona. O Sato, e lelei lana tautala Faaperetania, na auauna o se faaliliutusi mo fitafita a o latou aoao atu le talalelei i lona aiga ma uo. I le aso 7 o Iulai, 1946, o Sato ma lona faletua o, Chiyo, na i ai itagata muamua e toatolu o le lotoifale na liliu mai na papatisoina ina ua maea le taua.

E lei leva ona uma lona papatisoga, ae amata ona auauna atu Sato o se faaliliutusi a le misiona I le faasolo atu i nai isi tausaga na sosoo ai, sa faaliliuina ai e Sato ni tamaitusi ma isi anomea na lolomiina e le Ekalesia e aofia ai le [tusi a] Elder James E. Talmage Jesus the Christ. I le 1949 na asiasi atu ai Elder Matthew Cowley o le Korama a Aposetolo e Toasefululua i le aiga o Sato, ma faauuina Tatsui o se toeaina, ma vaetofia o ia o se faamatalaupu ma se faaliliutusi mo tagata Iapani “mo le [lona] soifuaga atoa.” Mulimuli ane na faaliliuina ai e Sato le Tusi a Mamona, Mataupu Faavae ma Feagaiga, Penina Tau Tele, ma sauniga o le malumalu.