Mataupu 16

Ua Na o se Vaega Amata

A o alu atu i le meli i Misuri ia fuafuaga mo Siona ma le malumalu, sa oso ese mai Emily Paterika e iva-tausaga-le matua mai lona moega ma faanatinati atu i fafo i ona ofumoe. I tuafale o lona fale, e le mamao mai le mea e faatu ai le malumalu i Initipene, sa ia vaaia ai se tasi o faaputuga vaomago tele a lona aiga ua pupusa ae ai le afi. Sa oo ae le afi i ao o le lagi i le po, o lona malamalama samasama ua lafoia ai ata uumi o i latou o e sa tutu i talaane, ma le fememeai a o matamata i le sasao o le afi.

O afi faafuasei o ni mea ua masani ai laina tuaoi, ae o le afi lea e le o se mea faafuasei. Sa i ai ni vaega toalaiti faatupu faalavelave sa faatamaiaina meatotino a le Au Paia i le gasologa atoa o le taumafanafana o le 1833, ma le faamoemoe e tutuliese ai ni tagata fou e o mai i le Itumalo o Siakisone. Sa leai se tasi na faamanualia, ae sa peiseai ua faatupulaia le inaina o le au faatupu faalavelave i osofaiga taitasi.

Sa lei malamalama ia Emily i mafuaaga uma sa mananao ai tagata o le Itumalo o Siakisone e o ese le Au Paia. Sa ia iloaina le eseese o lona aiga ma uo mai tuaoi i le tele o itu. O tagata Misuri sa ia faalogo ai i magaala sa ese le ala sa tautatala ai, ma sa ese foi ituaiga ofu sa ofuina e fafine. O nisi o i latou sa savavali e aunoa ma ni seevae i le taumafanafana ma sa faia tagamea i ni foe lautetele nai lo laupapa tamea sa masani ai Emily i Ohaio.

O ni nai eseesega iti ia, ae sa i ai foi feeseeseaiga tetele sa itiiti se iloa o Emily i ai. Sa lei mananao tagata o Initipene i le talai atu o le Au Paia i tagata Initia ma lo latou le faamanaonia o le faia o pologa. I setete i matu, lea sa nonofo ai le toatele o tagata o le ekalesia, o le faia o ni pologa sa le tusa ai ma le tulafono. Ae i Misuri, o le faapologaina o tagata uli sa faatagaina, ma sa matua puipuia e i latou ua loa ona faamautu iina.

O le mea moni faapea e masani i le Au Paia ona fai lava a latou mea sa lei fesoasoani e faaitiitia ai masalosaloga. A o faatupulaia i latou sa taunuu i Siona, sa latou galulue faatasi e fausia ma faatotoga o latou fale, atiae faatoaga, ma tausi ni fanau. Sa latou naunau e faataatia le faavae o se aai paia lea o le a tumau e oo i le Meleniuma.

O le fale totino o le au Paterika, sa tu i le ogatotonu o Initipene, sa avea o se faasitepu agai i le faia o le taulaga e avea ma Siona. O se fale faatauvaa e lua fogafale sa lei pei o le manaia o le fale tuai o Emily sa i ai i Ohaio, ae sa avea o se faailoga ua i ai le Au Paia i Initipene e nonofo mau.

Ina ua alia’e mai le mumu saesae o le faaputuga vaomago, sa avea ai foi i latou ma taulaiga.¹

---

I le i ai o vesiga ua tulai mai i le va o le Au Paia ma o latou tuaoi i le Itumalo o Siakisone, sa tonu ai ia Viliamu Phelps e faaaoga ia itulau o le nusipepa a le ekalesia i le lotoifale e faatoafilemu ai le atuatuvale. I le lomiga ia Iulai 1833 o le The Evening and the Morning Star, sa ia faasalalauina ai se tusi i tagata malaga mai o le ekalesia, na ia fautuaina ai i latou e totogi a latou aitalafu a o lei o mai i Siona ina ia taumamao ai mai le avea o se avega i le nuu.

I le tusiaina o lea ma isi faaupuga o fautuaga, sa ia faamoemoe o le a faitau foi e tagatanuu o le Itumalo o Siakisone le pepa ma vaai atu ai i le Au Paia o ni tagatanuu e tausi tulafono, o o latou talitonuga e le afua ai se taufaamata’u ia i latou po o le tamaoaiga o le lotoifale.²

Sa ta’ua ai foi e Viliamu ia uiga faaalia o tagata o le ekalesia agai i tagata uli. E ui ina sa ia manatu alofa faatasi ma i latou o e sa mananao e faasaoloto ia tagata pologa, ae sa manao ia Viliamu i lana aufaitau ia iloa o le a usitaia e le Au Paia tulafono a Misuri e faasa ai aia tatau a tagata uli saoloto. Sa toaitiiti ni nai tagata uli o le Au Paia i le ekalesia, ma sa ia fautuaina faapea afai latou te filifili e sii mai i Siona, ia latou faaeteete ma ia faatuatua i le Atua.

“Pau lava le mea ia leai ni a tatou tulafono faapitoa i le ekalesia mo tagata lanu,” sa ia tusia faa’alo’alo ai, “ia taiala le faautauta.”³

---

Sa matua ita tele Samuelu Lucas, o se faamasino o le itumalo ma se taitai o le au fitafita i le Itumalo o Siakisione, ina ua ia faitauina le tusi i le The Evening and the Morning Star. Sa mafaufau Samuelu, ua valaaulia e Viliamu tagata uli saoloto e avea ma Mamona ma o mai i Misuri. O faamatalaga a Viliamu e faalotovaivaia ai le Au Paia uli mai le nofomau i Misuri, sa leai se mea na faia e faatoafilemu ai ona atuatuvalega.⁴

I le i ai o tagata faatupu faalavelave ua faavevesia le Au Paia i Initipene ma pitonuu lata ane, sa lei faigata ai ia Samuelu ona maua isi e lagolagoina o ia. E silia ma le tausaga, sa faapotopoto ai e taitai o le taulaga o latou tuaoi e faasagatau i le Au Paia. Sa tufatufa e nisi ia faaupuga i lautusi ma taloina fonotaga a le taulaga, e uunaia ai tagata e tutuliese tagata fou mai le eria.⁵

I le amataga, o le toatele o tagata i le lotoifale sa manatu o le Au Paia o ni tagata talalotu e le gaoia, o e faafoliga ua maua ni faaaliga, faamalolo e ala i le faaee o lima, ma faia isi vavega. Peitai, a o faatuputupulaia pea tagata e o mai ma nofomau i le itumalo, ma fai mai ua tuu atu e le Atua ia i latou ia Initipene o se laueleele folafolaina, ua vaai atu ai Samuelu ma isi taitai o le taulaga ia i latou ma a latou faaaliga o ni faamata’u i a latou meatotino ma lo latou malosiaga faaupufai.

Ma o lea la ua pupusa mai i le tusi a Viliamu se tasi o o latou atuatuvalega aupito tele. E na o le lua tausaga talu ai, e feololo ni tagata pologa i se isi setete sa fouvale ma fasiotia le silia ma le limasefulu tamaloloa ma fafine papae i lalo ifo o le lua aso. Sa popole i latou na i ai pologa i Misuri ma isi setete i saute i se mea faapea e tupu i o latou nuu. Sa fefefe nisi tagata afai e valaaulia e le Au Paia ia tagata uli saoloto i le Itumalo o Siakisone, o lo latou i ai e ono afua ai ona latou mananao i le saolotoga ma fouvale ai.⁶

Talu ai sa i ai tulafono e puipuia ai le Au Paia i lo latou saolotoga o tapuaiga ma tala e fai atu, o lea sa malamalama ai Samuelu ma isi sa latou le mafaia ona aveesea lea faamatau e ala i ni auala faaletulafono. Ae o le a le avea i latou ma taulaga muamua e faaaogaina vesiga e tutuliese ai tagata e le manaomia mai ia i latou. O le galulue faatasi ai, o le a mafai ai ona latou faateaeseina le Au Paia mai le itumalo ma sao mai ai.

E lei pine ae fono taitai o le taulaga ina ia faatino se gaoioiga faasaga i tagata e fou mai. Sa tusia e Samuelu ma isi a latou faitioga e faasaga i le Au Paia ma tuuina atu se faamatalaga i tagata o Initipene.

O le pepa o faamatalaga na tautino atu ai le faamoemoega o taitai o le taulaga e tutuliese le Au Paia mai le Itumalo o Siakisone i soo se auala e tatau ai. Sa latou atofaina le aso 20 Iulai mo se fonotaga i le falefaamasino e fai ai le tonu i le mea e fai i le Au Paia. Sa sainia e le fiaselau o tagata o le Itumalo o Siakisone o latou igoa i le faamatalaga.⁷

---

Ina ua ia iloa le vevesi, sa taumafai malosi ia Viliamu Phelps e faaleleia soo se faatiga na afua i lana tala i le nusipepa. Ua tautino mai e le Tusi a Mamona e faapea ua valaaulia e Keriso tagata uma e o mai ia te Ia, “o tagata uli, papae, pologa ma saoloto,” ae sa sili ona popole ia Viliamu e uiga i le itumalo atoa ua liliu faasagatau i le Au Paia.⁸

I le gaoioi faanatinati ai, sa ia lolomiina se itulau e tasi e faaleaogaina ai le mea na ia tusia e uiga i pologa. “Matou te tetee i le i ai o tagata saoloto lanu e faatagaina i le setete,” na ia tautu atu ai, “ma e matou te fai atu e leai se tasi o le a faatagaina i le ekalesia.”⁹ O lea lautusi na le’i sagatonu ai le tulaga o le ekalesia i le papatisoina o tagata uli, ae sa ia faamoemoe o le a puipuia ai vesiga i le lumanai.¹⁰

I le aso 20 Iulai, sa o ai Viliamu, Eteuati, ma isi taitai o le ekalesia i le falefaamasino o le Itumalo o Siakisone e fono ma taitai o le itumalo. Sa ese lava le tulaga o le tau i le ogatotonu o Iulai, ma e fiaselau tagata na tuua o latou fale, faatoaga, ma pisinisi ae o i le fonotaga ma sauniuni e faatino se osofaiga o le Au Paia.

I le faia ai o le faaiuga e avatu i taitai o le ekalesia se lapataiga mulimuli a o lei aga atu i vesiga, o lea na avea ai Samuelu Lucas ma isi tamaloloa e toasefululua ma sui o le pitonuu e faatonuina ai Viliamu e taofi le lolomiina o le The Evening and the Morning Star ma ia tuua loa lava e le Au Paia le itumalo.¹¹

I le avea ai ma epikopo i Siona, sa iloa e Eteuati le tele naua o mea o le a maumau a le Au Paia pe afai latou te gauai atu i le faatonuga. O le tapunia o le falelomitusi o le a faatuai ai le lolomiga o le Tusi o Poloaiga, lea toeitiiti maea. Ma o le tuua o le itumalo o lona uiga e le gata ina maumau meatotino taua ae o lona uiga foi o le a lafoai o latou tofi i le nuu folafolaina.¹²

Sa talosagaina e Eteuati le tolu masina e mafaufau ai i le talosaga ma sailia le fautuaga a Iosefa i Katelani. Ae sa mumusu ia taitai o le Itumalo o Siakisone e talia le talosaga. Sa talosaga Eteuati mo ni aso se sefulu sei feutagai ai ma isi Au Paia i Misuri. Sa tuu atu e taitai o le Nuu ia te ia le sefululima minute.¹³

O le le manao ai e fai faamalosi se faaiuga, o lea na faamuta ai e le Au Paia ia feutagaiga. Ina ua tuua e sui o le Itumalo o Siakisone, sa liliu atu se tasi tagata ia Eteuati ma fai atu ia te ia o le a amata loa lava le galuega o le faatamaiaga.¹⁴

---

I talaatu o le magaala mai le falefaamasino, sa i ai Sally Phelps i le fale i le fogafale i lalo o le ofisa lomitusi o le ekalesia, sa vaai lana pepe faatoa fanau mai sa ma’i. Sa latalata ane le isi toafa o lana fanau. Sa vave ona alu Viliamu e auai i le fonotaga i le falefaamasino. E lei foi mai lava o ia, ma sa faatalitali ma le popole ia Sally mo se tala mai i le fono.

Sa mamafa le patatu mai i luma o le faitotoa, ma sa faateia ai o ia ma tamaiti. O fafo, sa sunu’i mai ai e tamaloloa se ogalaau tele i le faitotoa, a o taumafai e talepe i lalo. Sa li’oina e le anoanoai o tamaloloa, o fafine, ma tamaiti le ofisa lomitusi, o nisi tamaloloa sa patipatia a o isi sa na ona matamata gugu.¹⁵

O le taimi na matala ai le faitotoa, sa faanatinati mai i totonu tamaloloa faaauupegaina i le fale ma toso ese atu Sally ma tamaiti i le auala.¹⁶ Sa latou tauaia meaafale a le aiga ma isi mea i fafo o le faitotoa ma taei faamalama. Sa fea’ei nisi o le au osofai i luga o le fogafale aluga o le ofisa lomitusi ma feato laau lomitusi ma vaitusi i luga o le fola ae sa amata e isi tamaloloa ona talepe i lalo le fale.¹⁷

A o tutu ai ma lana fanau ua faapupuu i ona autafa, sa matauina e Sally a o taei e tamaloloa le faamalama o le fogafale a luga o le ofisa lomitusi ma tauai i fafo pepa ma laau lomitusi. Ona latou atoina lea i fafo o le faamalama ma nutililii ai i le palapala le masini lomitusi.¹⁸

I le gaosa, sa manu a’e ai ni nai tamaloloa mai le ofisa lomitusi ma o latou lima ua tutumu i itulau e lei tuufaatasia mai le Tusi o Poloaiga. “Le tusi lea o faaaliga a le au meaaola Mamona,” sa faataio mai ai se tasi o i latou i le motu o tagata a o ia tauaia itulau i le auala.¹⁹

---

Sa faapupuu faatasi i autafa o se pa lata ane, ia Mary Elizabeth Rollins e sefululima tausaga le matua, ma lona uso e sefulutolu tausaga o Caroline, sa matauina a o faasalalau solo e tamaloloa ia itulau o le Tusi o Poloaiga.

Sa vaai muamua ia Mary i nisi o itulau. O ia ma Caroline o tei o Sini Gilbert, o le sa faafoeina le faleoloa o le Au Paia i Initipene. I se tasi afiafi, i le fale o le uso o lo la tama, na faalogo ai Mary a o faitauina e taitai o le ekalesia ma talanoaina ia faaaliga sa i ai i itulau fou faatoa lolomi. A o talanoa ia tamaloloa, sa oo mai le Agaga i luga o le fonotaga, ma sa tautatala nisi i gagana a o faaliliuina e Mary a latou upu. Ua ia lagonaina nei se migao loloto mo faaaliga, ma o lona vaai atu o taatitia mai i le aualatele sa le fiafia ai o ia.

Sa liliu atu o ia ia Caroline, ma sa fai atu Mary ua manao o ia e alu e aumai ia itulau manu latou te lei faaleagaina. Sa amata ona vete ese mai e tamaloloa le taualuga o le ofisa lomitusi. E le o toe mamao ona latou talepe eseina mai lea o ona puipui, ma leai ai se mea e totoe ae na o otaota.

Sa manao Caroline e faasao ia itulau, ae sa fefe o ia i tagata leaga. “O le a latou fasiotia i ta’ua,” o lana tala lea.

Sa malamalama ia Mary i le tulaga matautia, ae sa ia fai atu ia Caroline ua naunau lava o ia e aumai ia itulau. Ma le le manao e tuua lona uso, o lea sa ioe ai Caroline e fesoasoani.

Sa faatalitali le au uso sei u mai tua o tamaloloa, ona la tulioso ese mai lea i lo la lafitaga ma luluu mai ni itulau i le tele sa mafai e o la lima ona uu. A o faliu i la’ua e toe foi i le pa, sa iloa atu i la’ua e nisi o tamaloloa ma faatonuina i la’ua e taofi. Sa opomau e lenei au uso ia itulau ma taufetuli i le saoasaoa sa la mafaia i se togasana lata ane a o tulitatao atu i la’ua e ni tamaloloa se toalua.

E ono futu le maualuluga o sana, ma sa lei iloa e Mary ma Caroline po o fea le mea la sa la o i ai. Sa faapalalasi i la’ua i lalo, ma sa la nanaina itulau i lalo ifo o o la’ua tino ma sa faalogologo ma le tau le manava a o patapatatu atu tamaloloa e toalua agai i luma ma tua i le togasana. Sa mafai ona faalogoina e le au uso i la’ua ua latalata atili atu, ae ina ua mavae sina taimi, sa fiu ia tamaloloa e saili ma o lea sa la tuua ai le togasana.²⁰

---

Sa asu vai ia Emily Paterika ma lona uso matua o Harriet mai le vaipuna ina ua la vaaia le vaega leaga pe tusa o le limasefulu tamaloloa faaauupegaina ua latalata atu i lo latou fale. Sa lalafi i la’ua i autafa o le vaipuna, ma matamata atu ma le fefefe a o sioina e tamaloloa le fale, tuliese mai lo la tama i fafo, ma faasavali ese o ia.²¹

Sa taitai atu e tagata leaga ia Eteuati i le nofoaga faitele, i le mea sa i ai le motu o tagata pe sili atu ma le luaselau tagata o si’oina ia Charles Allen, o se tasi o le Au Paia sa pueina. O Russell Hicks, o le sa taitaia le fonotaga a le taulaga i lena taeao, sa alu atu ia Eteuati ma faatonuina o ia e tuua le itumalo pe o le a feagai ma ni taunuuga.

“Afai e tatau ona ou puapuagatia mo la’u lotu,” na fai atu ai Eteuati, “e leai se mea e ese ai nai lo le mea na faia foi e isi na muamua ia te au.”²² Sa ia ta’u atu ia Hicks e leai sana mea sese ua fai ma o le a ia le tuua le taulaga.²³

“Valaau i lou Iesu!” sa alaga mai ai se leo.²⁴ Sa tulei e tagata leaga ia Eteuati ma Charles i lalo, ma sa amata e Hicks ona saeia lavalava o le epikopo. Sa teena pea e Eteuati, ma sa faatonuina e se tasi sa i ai i le vaega ia Hicks e tuu ai pea e fai le ofutino ma le ofuvae o le epikopo.

I le lolo atu i ai, sa toso ese ai e Hicks le pulou o Eteuati, ofutele, ma le taoofu ma tuuina atu o ia i le vaega leaga. Sa laa mai i luma ni tamaloloa se toalua ma ufitia ulu o pagota e oo i vae i le ta ma fulumanu. Sa vevela le ta, ma sa atiina ese o la’ua pa’u e pei o se asita.²⁵

I se mea e lata ane, sa aoina ai e se tagata liliu mai e igoa ia Viena Jaques ia itulau na salalau mai le Tusi o Poloaiga i le aualatele. Sa faapaiaina e Viena sana teugatupe tele e fesoasoani e fausia ai Siona, a o lea ua malepe mea uma.

A o ia opomauina itulau talalautasi, sa alu atu se tagata mai le vaega leaga ia te ia ma fai atu, “Ua na o le amataga lenei o mea o le a e puapuagatia ai.” Sa tusi atu lona lima i le tautevateva atu o Eteuati. “O lou epikopo le la, ua faata ma faafulumanuina.”²⁶

Sa ea ae i luga Viena ma vaaia ai Eteuati o tau etuetu ese atu. Sa na o ona foliga ma alofilima e lei ufitia i le ta. “Ia faamanuina le Atua!” na ia alaga atu ai. “O le a ia maua se palealii o le mamalu mo le ta ma fulumanu.”²⁷

---

Sa leai se fale e toe foi i ai Sally Phelps i lena afiafi. Sa ia maua se malutaga i se falemanu ua le faaaogaina i talaane o se togasana. Faatasi ai ma le fesoasoani mai lana fanau, sa ia aoina ni vaomago e faia ai ni moega.

A o latou galulue ma le fanau, sa oo mai ni tagata se toalua mai le togasana. I sina malamalama taupulapula, sa iloa atu ai e Sally ia Caroline ma Mary Rollins. Sa opoopo mai e le auuso i o la’ua lima se faaputuga o pepa. Sa fesili ia Sally po o le a le mea sa ia i la’ua, ma sa la faaali atu ia te ia ia itulau sa la aoina mai le Tusi o Poloaiga.

Sa ave e Sally ia itulau mai le au uso ma nana lilo i lalo o lona moega vaomago.²⁸ Sa vave ona oo mai le po, ma sa na leiloa po o le a le mea o le a tupu taeao ia Siona.

Faamatalaga

1. Young, “What I Remember,” 6–7; “To His Excellency, Daniel Dunklin,” The Evening and the Morning Star, Dec. 1833, [2]. Autu: Jackson County Violence

2. “The Elders Stationed in Zion to the Churches Abroad,” The Evening and the Morning Star, July 1833, [6]–[7].

3. “Free People of Color,” The Evening and the Morning Star, July 1833, [5]. Autu: Slavery and Abolition

4. “To His Excellency, Daniel Dunklin,” The Evening and the Morning Star, Dec. 1833, [2]–[3].

5. Parley P. Pratt and others, “‘The Mormons’ So Called,” The Evening and the Morning Star, Extra, Feb. 1834, [1]. Autu: Opposition to the Early Church

6. “To His Excellency, Daniel Dunklin,” The Evening and the Morning Star, Dec. 1833, [2]–[3]; tagai foi Breen, The Land Shall Be Deluged in Blood; and Oates, Fires of Jubilee. Autu: Slavery and Abolition

7. “To His Excellency, Daniel Dunklin,” The Evening and the Morning Star, Dec. 1833, [2]–[3]; John Whitmer to Oliver Cowdery and Joseph Smith, July 29, 1833, i le JSP, D3:191–94. Autu: Vigilantism

8. Reeve, Religion of a Different Color, 116–19; 2 Nephi 26:33; Staker, Hearken, O Ye People, 182–84.

9. The Evening and the Morning Star, Extra, July 16, 1833, [1]; Joseph Smith History, 1838–56, volume A-1, 326.

10. Tagai “Race and the Priesthood,” Gospel Topics, topics.lds.org.

11. “To His Excellency, Daniel Dunklin,” The Evening and the Morning Star, Dec. 1833, [2]; tagai foi Whitmer, History, 42, i le JSP, H2:54–55.

12. Tagai Joseph Smith to Church Leaders in Jackson County, MO, June 25, 1833, i le JSP, D3:148.

13. “To His Excellency, Daniel Dunklin,” The Evening and the Morning Star, Dec. 1833, [2]; Whitmer, History, 42, i le JSP, H2:54–55.

14. [Edward Partridge], “A History, of the Persecution,” Times and Seasons, Dec. 1839, 1:18, i le JSP, H2:209. Autu: Jackson County Violence

15. “To His Excellency, Daniel Dunklin,” The Evening and the Morning Star, Dec. 1833, [2]; Robert Weston, Testimony, Independence, MO, 581, Reorganized Church of Jesus Christ of Latter Day Saints v. Church of Christ of Independence, MO, and others, typescript, Testimonies and Depositions, Church History Library.

16. “To His Excellency, Daniel Dunklin,” The Evening and the Morning Star, Dec. 1833, [2]; Edward Partridge and others, Memorial to the Legislature of Missouri, Dec. 10, 1838; Edward Partridge, Affidavit, May 15, 1839, copy, Edward Partridge, Papers, Church History Library.

17. Minute Book 2, Dec. 10, 1838, 164; John Patten, Affidavit, Oct. 28, 1839, i le Johnson, Mormon Redress Petitions, 517; “To His Excellency, Daniel Dunklin,” The Evening and the Morning Star, Dec. 1833, [2]; [Edward Partridge], “A History, of the Persecution,” Times and Seasons, Dec. 1839, 1:18, i le JSP, H2:209.

18. [Edward Partridge], “A History, of the Persecution,” Times and Seasons, Dec. 1839, 1:18, i le JSP, H2:209; Young, “What I Remember,” 8.

19. Young, “What I Remember,” 9. Autu: Book of Commandments

20. “Mary Elizabeth Rollins Lightner,” Utah Genealogical and Historical Magazine, 1926, 17:195–96.

21. Young, “What I Remember,” 7–8.

22. Edward Partridge, Affidavit, May 15, 1839, copy, Edward Partridge, Papers, Church History Library. O le uluai faapogai sa faapea “Afai e tatau ona ou puapuaga ona o la’u lotu, o le a le sili atu foi i le mea na faia e isi na faia muamua atu ia te au.”

23. Young, “What I Remember,” 7; Joseph Smith History, 1838–56, volume A-1, 327; “To His Excellency, Daniel Dunklin,” The Evening and the Morning Star, Dec. 1833, [2].

24. Joseph Smith History, 1838–56, volume A-1, 327–28; “To His Excellency, Daniel Dunklin,” The Evening and the Morning Star, Dec. 1833, [2].

25. Edward Partridge, Affidavit, May 15, 1839, copy, Edward Partridge, Papers, Church History Library; “Tar and Feathers,” Deseret Weekly, Dec. 23, 1893, 25–26; Young, “What I Remember,” 7–8, 10; Joseph Smith History, 1838–56, volume A-1, 327–28. Autu: Vigilantism

26. Mataupu Faavae ma Feagaiga 90:28–31 (Revelation Mar. 8, 1833, at josephsmithpapers.org); Vienna Jaques, Statement, Feb. 22, 1859, Church History Library.

27. Vienna Jaques, Statement, Feb. 22, 1859, Church History Library; Young, “What I Remember,” 8.

28. “Mary Elizabeth Rollins Lightner,” Utah Genealogical and Historical Magazine, 1926, 17:196; Young, “What I Remember,” 9.