“Mana e Sili Atu, Malamalama e Sili Atu,” Au Paia: O Le Tala o le Ekalesia a Iesu Keriso i Aso e Gata Ai, Voluma 3, Lototele, Faatamalii, ma le Tutoatasi, 1893–1955 (2022)
Mataupu 38: Mana e Sili Atu, Malamalama e Sili Atu
Mataupu 38
Mana e Sili Atu, Malamalama e Sili Atu
I se tasi aso i le ogatotonu o le 1954, na agai atu ai Jeanne Charrier i le auala e tau atu i le nuu mauga o Privas, Farani. Talu mai lava le papatisoga o Jeanne i le tolu tausaga ua mavae, sa ia faia ai ni malaga faisoo i le fale o Eugenie Vivier. O se fafine ua oti lana tane, ua leva ona siitia ese lana fanau, sa suesue Madame Vivier e uiga i le Ekalesia mo le toeitiiti atoa le sefulu tausaga e aunoa ma le tuuto atu i le papatisoga, ae sa le o se faafitauli ia Jeanne le asiasi ia te ia. O le taimi ma le fafine ua oti lana tane sa o se mea e sili atu ona fiafia ai nai lo o se tiute.
Ina ua taunuu Jeanne i le fale o Madame Vivier, sa vavala mai i foliga o le fafine se ataata faafeiloai. Sa ia taitai atu Jeanne i totonu ma nofo i tafatafa o se faamalama o loo matala.1
E pei ona masani ai, na sau Jeanne i le fale ma se lesona. O lona mafaufau faasikola ma le fiafia i manatu na taitai atu ai o ia e suesue loloto i le talalelei.2 I ni nai masina ua mavae, sa ia tusia ai se tusiga mo L‘Étoile e uiga i le autu o le MIA i lena tausaga, Mataupu Faavae ma Feagaiga 88:86: “Ia outou mau i le saolotoga ua faasaolotoina ai outou; aua tou te lafoai outou lava i le agasala, ae ia faamamā o outou lima, seia afio mai le Alii.”3
“O le usitaia o tulafono,” na tusia ai e Jeanne, “tatou te maua ai le mana sili atu, le malamalama sili atu.” Sa ia sii maia le Feagaiga Fou ma ni nai tagata mafaufau anamua ma ona po nei e faaautu ai lona manatu. “O le saoloto o le lulu ese lea o le agasala, valea, ma le sese,” sa ia faaauau ai, “ma mau i le saolotoga o le talalelei a Iesu Keriso.”4
Faatasi ai ma le auauna atu o se peresitene o le MIA i lana paranesi laitiiti i Valence, sa aoao atu ai e Jeanne lesona o le Aoga Sa ma le Aualofa. Sa ia tauaveina ona tiutetauave o se faiaoga ma le manatu mamafa i ai. Sa i ai sana molimau mumu o le talalelei toefuataiina ma sa moomoo e faasoa atu.5
Ae paga lea, o nisi o uo a Jeanne ma e leai se tasi o lona aiga na mananao e faalogo i se mea e uiga i le Ekalesia. Sa nofo pea Jeanne i le fale, ae o lana mafutaga ma lona aiga sa matua leaga lava talu mai lona papatisoga. Sa seasea talanoa atu ona matua ia te ia, ma ina ua la faia, o le faailoa atu lea o lo la le fiafia pe tuuaia o ia i le faafitia o le tofi Porotesano o lo latou aiga.6
O le taimi lea, o le toatele o ana uo ma polofesa i le iunivesite, na lei amanaiaina tapuaiga uma. Afai e taumafai o ia e tau atu ia i latou e uiga ia Iosefa Samita, sa latou tauemu i le manatu e mafai e soo se tagata ona vaai i se faaaliga vaaia.7
Ae peitai, o Madame Vivier, na maua ai e Jeanne se agaga e faaaumea. O se tasi o mafuaaga na faaumiumi ai le papatisoga o le tamaitai matua, o le tetee o lona aiga. Ae o ia, e pei o Jeanne, sa fiafia e suesue i tusitusiga paia. Sa avea foi Madame Vivier ma se faataitaiga o le auala e mafai ai e se tagata ona ola i se olaga faamalieina, ma faigofie. Sa lei tele ni ana oa faalelalolagi e ese mai lona tamai fale, o ni laau aina suamalie, ma ni nai moa, ae o taimi uma lava e asiasi mai ai Jeanne, sa to mai ai e Madame Vivier ni fuamoa fou mai ana taga ma uunaia ia Jeanne e talia`.8
Na iloa e Jeanne, e pei o Madame Vivier, atonu e tatau ona ia aoao ia faamalieina i se olaga e sili atu ona nofo toatasi. Sa toalaiti ni alii talavou i Farani o Au Paia o Aso e Gata Ai, ma sa filifili Jeanne o le a le faaipoipo o ia i fafo atu o le Ekalesia. Sa lei naunau foi o ia e faaipoipo i se tagata o le Ekalesia na te le alofa i ai pe sa le alofa foi ia te ia. E tusa lava pe tatau ona nofo toatasi o ia, sa tonu ia te ia, sa aoga lava le talalelei toefuataiina. O upumoni sa ia aoaoina—o le ata o le faaolataga, o le toefuataiga o le perisitua, ma le moni o se perofeta soifua—na faatumulia ai lona agaga i le olioli.9
Ina ua uma lana lesona o le talalelei ma faamanatu atu ia Madame Vivier e faitau le Tusi a Mamona, sa faamuta e Jeanne la la asiasiga e ala i le aumaia o le papatisoga—o se mea sa ia talanoa i ai i le tele o taimi ma lana uo. Peitai, o le taimi lea, sa lei faaeteete ai Madame Vivier i le mataupu, ma sa malie o ia e papatiso.
Sa faatumulia le loto o Jeanne i se faananati o le fiafia. Ina ua mavae le toeitiiti sefulu tausaga o suesuega, sa saunia lenei tamaitai faamaoni e auai i le Ekalesia.10
E lei leva ona maua le tofiga e fesoasoani e fetuunai le faatinoga o le faaeega paia, ae faapotopoto e Gordon B. Hinckley se vaega o tagata tomai faapitoa e gaosi se ata gaoioi mo malumalu i Europa. Ae e oo atu i le tautotogo o le 1955, ua leva lava ona maea le ata, ma o le faapaiaga o le Malumalu o Suisi sa na o ni nai masina le mamao ese.11
I le nofouta ai i le natura paia o le faaeega paia, sa faatagaina ai e Peresitene MaKei ia Gordon e pue le ata i le potu tele o potopotoga o le Malumalu o Sate Leki—o le potu lava lea e tasi, i le silia ma le onosefulu tausaga na muamua atu, na faapaia ai e Uilifoti Uitilafu le fale.12
E ui lava o tagata faigaluega o le malumalu sa masani ona faatinoina le faaeega paia o loo ofuina ni suti papae ma ofu soloatoa, ae sa maua e Gordon le faatagaga e pue ai le sauniga ma tagata na faatinoina i ofu ese. Sa faatautau e le komiti se pupuni tele i tua atu lanu efuefu i totonu o le potu mo potopotoga ma faatutu ni moli e faamalamalama ai le tulaga, lea na laupae ai i maa fai le eleele i le lotolotoi o laau tetele ia faaoso atu i faamalama o le malumalu i ni polokaka. Ina ia fesoasoani e faaalia le foafoaga o le lalolagi, na maua ai e Gordon le faatagaga mai le Kamupani o le Walt Disney e tuu i ai se kilipi puupuu mai le ata tifaga o le Fantasia i le gaosiga.13
O tagata uma na aafia i le ata tifaga o le malumalu, mai le au faatino ma le auvaa i le faatonu ma Gordon lava ia, sa galulue i ai e faaopoopo atu i a latou galuega talai masani, ma alu ai ma po ma faaiuga o vaiaso. E oo atu i le faaiuga o Me 1955, ua tuufaatasia e Gordon ma le au gaosi le uluai tipiga o le ata, ae sa lei faamalieina Gordon i le mea sa ia vaaia. O le gasologa lelei o le ata sa foliga mai e faigata ma galuā, ma sa manaomia nisi o faatinoga ma teuga.14
Sa ia aapa atu ia Winnifred Bowers, o le faiteuga sa galue i le ata, ia maua mai se fautuaga i le faaleleia o le gaosiga. Sa ia fautuaina atu ni auala e sologa lelei ai suiga ma fautuaina le faia o ni suiga laiti i ofu. Ma sa ia mautinoa o le faatonu, o Harold Hansen, e mafai ona fesoasoani i tagata faatino e fetuunai a latou faatinoga ina ua uma ona matamata ai i le ata. “Ae faatasi ai ma nei mea uma, Uso Hinckley,” na taua ai e Winnifred, “Ou te manatu ua sili atu mea ua e faatulagaina nai lo le mea na e manatu na e faia.”15
Sa galulue Gordon ma lana vaega mo le tele o vaiaso e faaleleia le ata. I le aso 23 o Iuni, sa latou faaali atu ai i le au pulega aoao, ma sa fiafia Peresitene MaKei i la latou galuega. “Ua e faia se galuega lelei,” na ia fai atu ai ia Gordon ma lana vaega. “Ou te manatu o le auala lenei e tatau ona alu ai mea uma.”16
Ae e lei maea la latou galuega. Talu ai e lei i ai i le Ekalesia ni masini e manaomia e pue ai ata i isi gagana, sa tonu ai ia Gordon ma lana vaega e toe faatulaga le ata i le faaSiamani, Farani, Tenimaka, Take, Nouei, ma Suetena. O le mea e lelei ai, ua uma ona faia faaliliuga, ae o le faamaeaina o isi lomiga e ono o le ata o le a alu ai ni masina, e oo lava mo se faatonu ua leva i le galuega.17
Sa lei tele se taimi o Gordon. O Peresitene MaKei ma le Au Paia uma o loo faatalitali mo le mauaina o o latou faamanuiaga o le malumalu i Suitiselani sa faalagolago ia te ia. Sa le mafai ona malolo o ia seia maea ata uma ma taunuu saogalemu i Europa.18
I le taimi lea i le GDR, sa taina ai e Helga Meyer ni viiga i se tamai okeni i lona potu malolo e faafeiloai ai aiga ma uo i le Aoga Sa. Ua iva tausaga talu ona ia tuua Perelini e nonofo ma lona toalua, o Kurt, i le tamai nuu o Cammin. E ui lava i luitau o le nonofo ai i le GDR, sa faia e le au Meyers se fale mafanafana mo le la fanau laiti e toatolu. Sa tatala pea lo latou faitotoa i soo se tasi e fia asiasi i ai.19
O le toatele o tuaoi o Helga sa auai ma le naunautai i sauniga a le aoga Sa. A maea se viiga amata ma se tatalo, e ave ese e Kurt le au matutua mo se lesona a o usuina e Helga ni viiga ma faasoa atu tala o le Tusi Paia i le toatele o tamaiti naunautai.20
Ae o nei faatasiga tetele sa lei leva ona faasolo toalaiti. Ina ua faalogo se faifeau Luteru e uiga i le aoga Sa a le au Meyers, sa ia faasaina ana aulotu mai le auai ai. O lenei ua na o sina vaega toalaiti o Au Paia o Aso e Gata Ai e nonofo ai i totonu ma talaane o Cammin na o mai i taeao o Aso Sa—o se vasega laitiiti atu nai lo le mea na auai ai Helga o se teineitiiti i le Aoga Sa a le Paranesi o Tilsit. Ae sa mafai lava ona faalagolago Helga ia Elise Kuhn, o se fafine ua oti lana tane mai se nuu lata ane, e faia le savaliga umi i le fale o Meyer, e tusa lava pe timu pe kiona. O le aiga o Edith Tietz, o le uo lelei a Helga lea na auai i le Ekalesia i ni nai tausaga na muamua atu, sa auai foi ma le faamaoni.21
I le vasega, e masani lava ona aoao sao atu Helga ma Kurt mai tusitusiga paia, talu ai e itiiti isi a latou anomea o lesona e utuvai mai ai.22 Mo vaega e tautatala faaPeretania o le lalolagi, o le mekasini a le Ekalesia mo Aoga Sa, o le Instructor, na tuuina mai ai le tele o punaoa mo faiaoga, mai tusiga i le faaaogaina o laupapa ie e lelei i faafanua, siata, ma ata. O se tasi o lomiga talu ai nei na aofia ai le toe gaosiga atoa o nisi o atavali aupito fou o le Tusi a Mamona a Arnold Friberg, Ua Tuuina Atu e Apinati Lana Savali i le Tupu o Noa ma Alema o loo Papatiso i le Vai o Mamona.23
O anomea o lesona o le gagana Siamani, i se faatusatusaga, sa puupuu lava se sapalai ina ua mavae le taua, ma o le tausiga atoatoa i le GDR na toetoe lava a le mafai ona latou mauaina.24 Mo le Au Paia i Siamani i Sasae, na foliga mai nei ua sili atu le mamao o le laumua o le Ekalesia nai lo se isi lava taimi.25 Sa moomoo pea Helga e malaga atu i le Iunaite Setete, e pei ona faia e le uso o lona tina o Lusche ma isi e pele ia i latou talu mai le faaiuga o le taua. Ae sa ia iloa le matautia o le a i ai mo se aiga atoa e taumafai e tuua le GDR. Ma e ese mai le tulaga matautia, o le a ia le alu lava e aunoa ma ona matua. O le soifua maloloina o lona tina, lea sa faaletonu i taimi uma, sa sili atu ona leaga i le mavae ai o tausaga o faatalitali e aunoa ma le faamanuiaina, mo le tuagane o Helga o Henry e toe foi mai mai le taua.26
I taimi faigata i o latou olaga atoa, na maua ai e Helga ma lona aiga le malosi ma le mafanafana i le Ekalesia. A maea le Aoga Sa, latou te pueina ai ma nai au paia i Cammin le nofoaafi mo le sauniga faamanatuga faatasi ma le Paranesi a Neubrandenburg, e silia teisi ma le sefulu maila le mamao. O nisi taimi e o mai ai tagata ese i le fonotaga, ma sa popole Helga o i latou o ni sipai o e na o mai e faalogologo ia latou lauga ma molimau.
Sa faia e le Au Paia i Neubrandenburg le mea sili latou te mafaia e le amanaia ai ia ituaiga o taufaamata‘u ma faaauau ai pea onaaoao e le tasi le isi mai tusitusiga paia ma usuina pese o Siona.27
I le amataga o Setema 1955, pe tusa ma se vaiaso a o lumanai le faapaiaga o le Malumalu o Suisi, sa tuu ai ma le faaeteete e Gordon B. Hinckley ni atopau se lua i lima o tagata e faigaluega i le vaalele i le malaevaalele o le Aai o Sate Leki. O ato o loo i ai le ata o le malumalu ua maea i gagana uma e fitu. Sa lei manao o ia e tuuese le tolusefulu afe futu o le ata mai lana vaai, ae o atopau ua faigata tele ona aumai i totonu o le tamai fale o le vaalele o le a la aveina ma lona faletua, o Marjorie, i le vae muamua o la latou malaga i Suitiselani. O le mea sili ai, o lipine faaotio o loo avatu faatasi ai, sa teu eseese i ni ato laiti se lua, sa lava le laitiiti e mafai ai ona ia aveina.28
Sa popole Gordon i le puipuiga o le anotusi paia o le ata mai le taimi na ia auina atu ai i se fale-suesue i Kalefonia mo le faagasologa mulimuli. Sa ia talosagaina se uo mamae sa faigaluega i Hollywood e ave le ata i le falesuesue ma nofo ai iina ina ia mautinoa ai lona le faalauaiteleina a o faagaoioia. Na manaomia nei e Gordon ona vaai atu o saogalemu le ata i malaevaalele i Niu Ioka ma Lonetona a o lei momoliina atu e ia lava i le Malumalu o Suisi.29
O Viliamu Perschon, le peresitene fou o le Misiona a Suisi-Auseteria, na faafeiloaia le au Hinckley a o la laa ese mai le vaalele i Basel. Sa latou aumaia le ata tifaga, ma sa faatumu e Gordon se fomu faatumu o le tautinoga o le tiute, ma ta’ua ai anomea o ata tifaga o ana meatotino. Sa tilotilo atu se tagata faigaluega o le tiute i le fomu ma fai mai, “E le mafai ona ou faatagaina lenei mea i totonu. Matou te le faatagaina le ulufale mai o le ata i Suitiselani e aunoa ma se faamaoniga mai le aufono o ata tifaga a le malo.
“E tatau ona i ai se auala ou te aumaia ai i totonu,” o le tala lea a Gordon. “E mautinoa lava le tou faataga o ata e ulufale i totonu o Suitiselani?”
“Faatasi ai ma le kilia talafeagai, ioe,” na tali atu ai le tagata faigaluega. Ona ia faamalamalama atu lea e faapea, sa manaomia e le aufono o ata i Suisi ona iloilo ma faamaonia le ata a o lei toe tuuina atu ia Gordon. O le taimi lea, o le a auina atu e le tagata faigaluega i le ofisa o le tiute i Bern. Talu ai o le Aso Toonai, o le a le mafai e Gordon ona toe aumai le ata mai le ofisa o tiute seia oo ina tatalaina le ofisa i le taeao o le Aso Gafua.30
Sa mafaufau Gordon e taumafai e tauanau le tagata faigaluega ia tau lava o le faataga o ia na te ave atu le ata tifaga i Bern, ae sa popole o ia nei leaga atili le mataupu i se finauga. O lea na latou o ai ma Marjorie ma Peresitene Perschon i le fale o le misiona, ma le popole tele e uiga i le saogalemu o le ata tifaga o le malumalu. O le aso na sosoo ai, sa latou anapopogi ai ma tatalo ina ia le pau atu le ata i lima sese.31
I le taeao po o le Aso Gafua, sa piki ai e Gordon ma Peresitene Perschon ia ata i le ofisa o tiute ma ave sa‘o i le aufono o ata. O iina na taitai atu ai e se alii ia Gordon i totonu o se potu tumaoti. “O le a le autu o lenei ata?” na ia fesili ai.
“E leai se autu,” na tali atu ai Gordon. “Ua na o ni musika ma faatonuga e faaaoga i le malumalu iinei.” Sa ia ofo atu e tuu atu i le tamaloa e faalogologo i le leo. I le avea ai ma se faaeteetega, sa ia tuuina se lipine umi o musika o le okeni i le amataga o le ata e taofia ai soo se tagata e lei faatagaina mai le mauaina o ona anotusi paia.32
Sa faalogologo le tamaloa i le musika mo sina taimi. “Ia,” na iu lava ina ia fai mai, “o le a lena mea?”
“Ua na o se aoaoga i le lotu,” na toe fai atu ai Gordon. “O se musika a le ekalesia, musika e ta i le okeni.”
Ona oo ifo lea o se vaaiga o se malamalamaaga faaleuo i luga o le tamaloa. “Ua lelei,” o lana tala lea. E aunoa ma le fai atu e faalogo pe vaai atili i ai, sa ia aumai i fafo se faailoga tusi ma faamaonia le faatagaina o le ata.33