Talafaasolopito o le Ekalesia
Mataupu 5: Leai Se Mana i le Lalolagi

Mataupu 5

Leai se Mana i le Lalolagi

Alii o loo galue i lalo o se taavale tuai taugata

I le 1960 atoa, na tauivi ai Henry Burkhardt e taofiofi le Ekalesia mai le matalatala mai le Ripapilika Temokalasi o Siamani. Sa faasaina e le GDR ia faifeautalai uma mai fafo mai le auauna atu i totonu o ona tuaoi, o lea sa tauave ai e le Au Paia i Siamani i Sasae le tiutetauave atoa mo le talaiga i lo latou atunuu. Ae peitai, talu ai sa faasasaina faifeautalai mai le o atu mai lea faitotoa i lea faitotoa, sa faatapulaaina ai mea e mafai ona au atu i ai. Ia Oketopa, sa faasa ai e le malo ia faifeautalai faamisiona mai le auauna atu i aai sa lei i ai lava ni aulotu toatele a le Ekalesia. Na faamutaina ai foi le toetoe lava o gaoioiga uma a le Aualofa, MIA, ma le Peraimeri, i le finau mai e faapea ua na o le malo lava sa nafa ma le sauniaina o gaoioiga faafiafia mo ona tagatanuu.

Sa ta’u atu e se tasi sui o le malo i le Au Paia e lei fiafia le malo ia i latou mo lenei mafuaaga. “Ua ia te outou mea uma tou te manaomia i le Ekalesia.”

E lei umi, ae avea le Ekalesia i le GDR ma se ataata o le mea sa i ai muamua. Nai lo le tumau ai i lalo o nei tulaga, e toatele le Au Paia i Siamani Sasae na sosola ese mai le atunuu e saili le saolotoga sili atu faalelotu ma avanoa faaletamaoaiga i Siamani i Sisifo. Ma sa le na’o le Au Paiai na i ai i lea tulaga. E toatele tagata na tuua le GDR, e masani ona sopoia le tuaoi i le va o Perelini i Sasae ma Sisifo.

O lenei soloaiga toatele o tagata malaga ese sa o se maasiasi lea i le malo o Siamani Sasae ma ona paaga Soviet. O le toatele o tagata, e aofia ai Henry, sa talitonu sa le toe mamao ae tapunia uma e le malo avanoa e o atu ai i Perelini i Sisifo. Faatasi ai ma le laumua o le misiona i le itu i sisifo o le aai, sa popole Henry ona o se laasaga matautia faapena o le a tavavaeese ai le Au Paia Siamani i Sasae mai le vaega o totoe o le Ekalesia.

I le aso 18 o Tesema, na sau ai Alavini R. Dyer, le peresitene o le Misiona a Europa ma se Fesoasoani i le Korama a Aposetolo e Toasefululua, i le GDR e talanoa ma Henry ma isi taitai o le Ekalesia i le lotoifale e uiga i le soifua manuia o le Au Paia i lalo o la latou tausiga.

Sa tuuina atu e taitai Siamani i Sasae se ata le manuia. Sa tuu e le malo ni tapulaa ogaoga i le auina mai o tusi na lolomiina talu ai nei po o isi anomea na lolomiina. O nei tapu na matua faigata ai lava i le Au Paia ona maua mekasini fou a le Ekalesia, tusi lesona, po o tusipese e aunoa ma le aumai faanana mai Sisifo. Sa fai ifo le auai i paranesi. Sa mafai lava ona faaaoga falelotu, ae o nisi sa le toe mafai ona lipea. Ma o lenei ua taofia fonotaga a le autalavou, o polokalama na lagolagoina e le setete na tosoina ese ai le toatele o tagata talavou mai le lotu. Sa faamalamalama mai e Henry e faapea, o nisi taimi e faia faalilolilo ai e paranesi ia gaoioiga a le autalavou, ae sa ioe tagata uma sa i le fonotaga o le faia o lena mea sa lamatia ai.

O le taua o le tupe a Siamani Sasae sa pau foi, ma sa le lava polokalama uelefea a le malo. E toatele le Au Paia sa matitiva tele e gafatia meaai ma suauu, o lea sa latou faaaogaina ai tupe mai le teugatupe o le uelefea a le Ekalesia a le faatau ai malala ma pateta pe ola e aunoa ma ia mea.

Ina ua maea le fonotaga, sa talanoa faalilolilo Peresitene Dyer ma Henry e faailoa atu le popole e uiga i le tulaga o le galuega faafaifeautalai i le GDR. Sa le faapea na o le malo o Siamani i Sasae sa matua faasaina po o fea ma pe faapefea ona auauna atu faifeautalai. Sa faamoemoe le malo o alii malolosi uma ia faigaluega ma le manuia, ma o le galuega faafaifeautalai faamisiona e mafai ona vaaia o se mea leaga i le tamaoaiga o Siamani i Sasae. O le mea moni, o le toatele o faifeautalai sa faalagolago i le lagolago tautupe mai paranesi i le lotoifale pe mai le Au Paia i Siamani i Sisifo sa o se faafitauli foi. Ia Peresitene Dyer, sa foliga mai e pei ua matele i se auaunaga totogi. Mo nei mafuaaga, sa ia fai atu ai ia Henry e faamalolo faifeautalai faamisiona uma o loo auauna i le GDR.

I le taimi muamua, sa musu Henry e usitaia i lenei talosaga. Sa le’i toe faasoaina atu e faifeautalai le talalelei mai lea faitotoa i lea faitotoa, o lea sa lei faatupuina ai e le Ekalesia se faafitauli mo le malo. Ma o nisi paranesi o le Ekalesia sa faalagolago pea i faifeautalai mo le taitaiga faaleperisitua. Afai e faamaloloina faifeautalai, e ono taapeape ia paranesi. Ae na faaaloalogia e Henry ia Peresitene Dyer ma mulimuli i le fautuaga, e ui lava i ona popolega.

I ni nai masina mulimuli ane, sa feiloai ai le Au Paia Talavou i Sisifo ma Siamani Sasae i Perelini i Sisifo mo se konafesi a le MIA. Sa iloa e tagata uma e ono tapunia le tuaoi i soo se taimi, ma sa latou lagonaina le atuatuvale. Ae na faafia ona faailoa atu e le Au Paia talavou se autu masani a o latou tuuina atu a latou molimau: Latou te lei iloa le mea o loo i le lumanai, ae e tusa lava pe latou te le toe maua le avanoa e toe faapotopoto faatasi ai, sa latou iloa o le a moni lava le talalelei i itu uma e lua o le vaeluaga faaupufai.

Ma o le a latou tumau mausali i lo latou faatuatua.

O le salalau atu o faigamalo pule malosi i Europa tutotonu ma sasae, ma i isi vaega o le lalolagi na matua faapopoleina ai Peresitene MaKei. Mo le silia ma le sefulu tausaga i le taimi nei, sa ia vaavaai atu ai i ia malo o maua le pule, faalauiloa le le talitonu, ma faavaivaia talitonuga faalelotu i nofoaga e pei o Siamani i sasae ma Siekisolovakia, lea sa i ai se taimi na olaola ai le Ekalesia.

Peitai, o le tuuto faatauanau o le Au Paia na ia maua ai le faamoemoe. Sa oo le Iunaite Setete ma Europa i sisifo i le manuia o le tamaoaiga, ma sa popole nisi tagata ona ua amata ona popole tele tagata i le tamaoaiga ma tulaga nai lo le Atua. E lei manatu Peresitene MaKei na moni lenei mea i tagata o le Ekalesia. A o ia feiloai ma le Au Paia i le salafa o le lalolagi, sa ia faamemelo i lo latou le manatu faapito. “Ou te le masalo lava sa i ai se isi taimi na sili atu ai le faaleagaga o tagata o le Ekalesia—sili atu le naunau e tuuina atu ma auauna atu,” na ia tau atu ai i se failipoti ia Ianuari 1961.

Sa faapitoa ona ootia o ia i le agalelei o le Au Paia i le totogiina o sefuluai ma taulaga. I augatupulaga ua mavae, o le faatupeina o le galuega a le Alii sa masani ona avea o se luitau mo le Ekalesia. O saofaga a le Au Paia, faatasi ai ma se faalagolago i auaunaga volenitia ma tupe maua mai tului o pisinisi eseese, na mafai ai e le Ekalesia ona faaauau pea ona faatupeina le tele o ana taumafaiga, e aofia ai aoaoga, uelefea, faifeautalai, ma polokalama o le fausiaina o fale.

E ui ina sa faapitoa le taugata o le polokalama o le fausaina o fale, ae sa talitonu Peresitene MaKei o le tupe faaalu sa taua tele i le tuputupuae o le Ekalesia. “O le faamoemoega o nei fale,” na ia tautino atu ai, “e le ausia pe a fausia puipui, faatulaga ma le saogalemu le taualuga, ma faauma ai le olo, ma le faia o le tatalo o le faapaiaga. Ua fausia mo le faagaeetiaina o le agaga.”

O falelotu fou i le salafa o le lalolagi sa avea o ni nofoaga taua e faapotopoto i ai lea e mafai ai e le Au Paia ona tapuai i le Atua ma faaaumea e le tasi le isi. I Denton, Texas, o se aai laitiiti i le Iunaite Setete i saute, e toaluasefulufa tagata o le Ekalesia na amata ona feiloai i le 1959 i le fale o Ioane ma Makerita Porter. Ina ua toatele le numera o le vaega ma lē gafatia ai e le fale o Porter, sa latou feiloai i se fale avanoa e lua fogafale e tutulu le taualuga. E oo mai i le 1961, ua avea le vaega ma se paranesi ua lava tagata toaaga o le ekalesia e talosaga ai i le Komiti o Fale a le Ekalesia mo se faatagaga e fausia ai se falelotu.

I lena taimi, o tagata o le Ekalesia sa nonofo i misiona sa faamoemoe e foai atu le 30 pasene o le tau o falelotu fou. I siteki, e 50 sa faamoemoe i ai. Ina ia uunaia le Au Paia i Denton e saofaga i le falesa, sa faafetaui e le peresitene o le siteki o Ervin Atkerson le $1,000 muamua na foai atu i le tupe lea i lana lava tupe. Faatasi ai ma le faamaoniga mai le Ekalesia, sa faatau ai e Ioane Porter se fanua e tolu-eka, faatau atu le tasi eka i se faleaiga, ae foai atu le isi lua eka mo le fale.

O aulotu sa fausia falelotu i le amataga o le vaitau o le 1960 sa i ai ni nai ata o fale na faamaonia e le Ekalesia e filifili mai ai. O nisi o ata sa faatagaina mo falelotu e fausia i le aluga o taimi, i ni vaega se lua pe tolu, e faalagolago i le telē ma le tuputupu ae o le uarota po o le paranesi. O le vaega muamua o se fale e aofia ai ni potuaoga ma se potu telē e tele faamoemoega e faia ai, lea e mafai ona faaaoga o se falesa. O le vaega lona lua e faaopoopo ai se falesa tele ma le potu o le Peraimeri, ae o le vaega lona tolu e aofia ai se fale faafiafia, umukuka, ma nisi potu. O le televave o le tuputupu ae o la latou paranesi, sa filifili ai le Au Paia i Denton e fausia se falelotu e faavae i se ata na tuufaatasia ai vaega muamua e lua. A o pulea e se supavaisa o le fauga o galuega a le Ekalesia le galuega faatino, sa tuuina atu e le Au Paia a Denton le tele o galuega.

O se tasi o tagata o le paranesi, o Riley Swanson, o se fai kapineta o lē sa faia ni galuega laupapa matagofie mo le falesa. O Riley o se tagata liliu mai i le lotoifale o lē sa lafoaia le ulaula ina ia auai i le Ekalesia. Ina ua amata le fauga, sa amata ona faigaluega o ia i po ina ia mafai ona ia faaaluina ona [taimi] o le ao e galue ai i le falesa o se volenitia faamisiona.

Faatasi ai ma falelotu ua fausia i le salafa o le lalolagi, sa fuafua ai foi le Ekalesia e fau se fale tele o ofisa i le Aai o Sate Leki e tuuina atu ai ni nofoaga e faigaluega ai taitai aoao o le Ekalesia ma tagata faigaluega a le Ekalesia. Ma sa faagasolo fuafuaga mo se nofoaga autu fou mo tagata asiasi mai i le Lotoa o le Malumalu, o se nofoaga e teu ai talafaamaumau o gafa i totonu o mauga e latalata i le Aai o Sate Leki, ma se malumalu fou i Oakland, Kalefonia.

Sa maua foi e Peresitene MaKei le faamoemoe i le autalavou o le Ekalesia ma lo latou mananao e faasoa atu le talalelei. I le 1959, sa ia valaaulia ai tagata uma o le Ekalesia ia saili, aoao atu, ma faaaumea tagata fou ma tagata faaolioli e ono liliu mai. Talu mai lena taimi, ua faatelevaveina ai le galuega faafaifeautalai, aemaise lava i Peretania Tele, lea na aumaia moni ai lava e le malumalu fou se “vaitau fou” o le Ekalesia. O papatisoga liliu mai i le Misiona a Peretania na amata ona matua faateleina, aemaise lava i tupulaga talavou, ma taitai atu ai le Ekalesia e fatuina le Misiona a Peretania i Matu ma le Siteki o Manaseta ia Mati 1960. I le tasi le tausaga mulimuli ane, na toe foi atu ai Peresitene MaKei i Egelani e faatulaga le Siteki a Lonetona ma faapaia se falesa fou matagofie e lata i Hyde Park i le totonugalemu o Lonetona.

A o i ai i Peretania Tele, sa toe ta’ua ai e Peresitene MaKei lana valaaulia mo tagata uma ina ia auai i le galuega faafaifeautalai. “Afai o le a tauaveina e tagata uma o le ekalesia lena tiutetauave,” na ia faamanatu atu ai i faifeautalai i le Misiona a Peretania i Matu, “e leai se mana i le lalolagi e mafai ona taofia lenei Ekalesia mai le tuputupu ae.”

I ni nai masina talu ona foi mai Peresitene MaKei mai Peretania Tele, sa maua ai e le Au Peresitene Sili se faamanatu mai ia LaMar Williams e uiga i le tele o tusi sa ia mauaina mai tagata i Nigeria. “Afai e tatau ona folafola atu le talalelei i lenei aofaiga tele o tagata, o e e mautinoa lava o fanau a le Atua,” na tusia ai e LaMar, “e foliga mai ia te au o se taimi talafeagai lenei e suesue ai se amataga o le galuega.”

Ua uma ona silafia e Peresitene MaKei le fiafia o le au Nigeria i le talalelei toefuataiina. O le tausaga na muamua atu, sa ia talosagaina ai Glen Fisher, o se peresitene o le misiona na toe foi mai mai Aferika i Saute, e asiasi i Nigeria. Sa faia e Glen se lipoti lelei o le saunia o le atunuu mo le galuega faafaifeautalai, ma tuuina atu ai ia Peresitene MaKei le tele o mea e mafaufau i ai seia oo atu i le taimi na taunuu mai ai le faamanatu a LaMar.

I le aso 1 Iulai, 1961, sa saunoa ai Peresitene MaKei i le mataupu i se fonotaga a le Au Peresitene Sili ma le Korama a Aposetolo e Toasefululua. O le iloaina o le tapu faaleperisitua a le Ekalesia o le a tuuina atu ai ni luitau ogaoga mo le galuega faafaifeautalai i Nigeria, sa ia faatusaina ai le tulaga i le faafitauli sa feagai ma aposetolo anamua ina ua aliae mai ni fesili e uiga i le tuuina atu o le talalelei i Nuuese. Sa lei galulue na aposetolo seia uma ona maua e Peteru se faaaliga mai le Atua.

Sa sailia e Peresitene MaKei le taitaiga mai le Alii e uiga i le tapulaa o le perisitua, ae na te lei mauaina se tali manino. Mo le taimi nei, sa lei faamoemoe o ia e tatala se misiona i Nigeria seia oo ina ia iloa foi le finagalo o le Alii.

Ae, sa ia talitonu e sa’o LaMar. Sa manaomia e le Ekalesia nisi faamatalaga, ma sa ia talosagaina le auina atu o sui o le Ekalesia i Nigeria e vaavaai i le faatuatua o le au Nigeria. Ina ua uma ona talanoaina le mataupu, sa tuuina atu e aposetolo la latou lagolago i le fautuaga a le perofeta.

Pe tusa o le taimi lea, sa i ai se faiga masani a Suzie Towse e sefuluono tausaga le matua. O aso uma lava, pe a uma lana galuega o nusipepa pe a tuua le aoga, e alu o ia i le fale ma fai atu i lona tama mo se faatagaga e auai ai i Le Ekalesia a Iesu Keriso o le Au Paia o Aso e Gata Ai. Sa fiafia o ia i le Ekalesia mo le tusa ma se tausaga. Sa valaaulia o ia e se uo i se gaoioiga a le autalavou i le paranesi i le lotoifale i Beverley, Egelani, ma na oo ina vave ona fiafia Suzie i le talalelei toefuataiina. Ae sa manatu ona matua Katoliko ma le Metotisi o lona manao e auai i le Ekalesia saa mo na o se taimi puupuu, ma sa la mumusu e malilie i lona papatisoga.

Ae, sa naunau lava Suzie e avea ma se Tagata o le Au Paia o Aso e Gata Ai. O ia o se tasi o le faitau afe o tagata o Atumotu o Peretania o e na tosina atu i le Ekalesia i lena taimi. E pei o Suzie, o le toatele o i latou na aoao e uiga i le Ekalesia e ala i se polokalama fou o tagata e faasino atu o le misiona, lea na uunaia ai le Au Paia e valaaulia uo ma aiga i sauniga a le Ekalesia ma tuu atu ai i latou e fesootai ma faifeautalai. O le mea moni, i le taimi na faailoa atu ai e le uo a Suzie o ia i le Ekalesia, e silia ma le 85 pasene o papatisoga talu ai nei i le Misiona a Peretania na maua mai tagata na faasino atu.

Talu mai le aoao e uiga i le Ekalesia, sa feagai Suzie ma se tetee tele. Ina ua uma ona ia mauaina se kopi o le Tusi a Mamona, sa ia aveina atu i lana faifeau Katoliko e aumai lana faatagaga e faitau i ai. Sa masani lava o ia o se malii agalelei, ae ina ua ia faaali atu ia te ia le tusi, sa suia atoa ona uiga. Sa ia fai mai o le Tusi a Mamona e mai le tiapolo ma tuuaia o ia i le faaleagaina o lona fale i mea inosia. Ona ia se’i ese lea o le tusi mai lona lima ma togi atu i le magalafu. Na misi e le tusi le afi, ma sa mafai e Suzie ona toe aumai a o lei faamalosia o ia e le faifeau i fafo o le faitotoa i luma.

“Ia, e leai se toe foi i tua i le taimi nei,” na ia fai atu ai mulimuli ane.

E lei umi ae avea o ia ma se tagata e auai masani i fonotaga a le Paranesi a Beverley. I le mavae ai o le tapuai mo le tele o tausaga i se falesa teuteu a le Katoliko, sa iloa ai e Suzie e ese lava i le taimi muamua le tapuai ai ma ni nai tagata i se potu o le faletalimalo e le ufiina le fola laupapa ma ni nofoa laupapa malo. Ae ina ua uma ona auai i lana sauniga faamanatuga muamua, sa ia lagonaina se faamautinoaga mafanafana o upu sa ia faalogo i ai iina e moni. Sa tuuina atu e le Agaga se molimau loloto ia te ia e tatau ona ia toe foi mai.

Sa ia lagonaina se agaga talitutusa i fonotaga a le MIA, lea sa sili atu ona faatumulia. O nisi o le autalavou, e pei o Suzie, sa faasino atu i le Ekalesia e ni uo. O isi o alii talavou o e na mauaina le Ekalesia e ala i le taaalo pesipolo faatasi ma faifeautalai. Mo le tele o tausaga, sa faaaoga ai e faifeautalai ni taaloga e feiloai ai i tagata talavou ma faailoa atu i latou ma o latou matua i le Ekalesia. Talu ai nei lava, na faapitoa ai le lauiloa o le peisipolo i misiona a Peretania, ma o le toatele o alii talavou na auai i le Ekalesia ina ia mafai ona latou taaalo i ’au e taitaia e faifeautalai. Talu ai o taitai misiona i lena taimi sa masani ona faailoaina ma tauia faifeautalai o e na sili a latou papatisoga nai lo isi, o nisi faifeautalai na taulai atu a latou taumafaiga i tagata talavou, o e sa masani ona sili atu le naunau e papatiso nai lo tagata matutua.

E ui ina sa masani ona maua e nei talavou liliu mai nisi o lesona o le talalelei a o lei faia o latou papatisoga, ae sa masani ona sili atu lo latou naunau e avea ma se vaega o se au taaalo nai lo le auai i le Lotu. I le tele lava o tulaga, o o latou papatisoga e lei taitaiina mai ai isi tagata o aiga e auai i le Ekalesia, o lea o le Paranesi a Beverley ma le tele o isi paranesi i Atumotu o Peretania sa i ai le anoanoai o talavou o e sa avea ma tagata o le Ekalesia i le na o le igoa.

E ui i lea, i lea vaiaso ma lea vaiaso, sa auai Suzie i sauniga Lotu ma talanoa i ona matua e uiga i le papatisoga. I se tasi aso, ina ua taunuu mai i le fale mai lana galuega tufa nusipepa, sa ia maua ai lona tama o aliali mai ona vae i fafo mai lalo o se taavale sa ia lipeaina. “Tama,” sa ia fai atu ai, “e mafai ona ou papatiso?”

“Ioe, e mafai, tamaitai,” na ia fai atu ai, o loo i lalo lava o le taavale. “Afai e taua tele lena mea ia te oe, e mafai ona e faia.”

Na faateia lava Suzie. “E moni lava lau tala, Tama?” sa ia fesili ai. “E te manao e toe fai mai lau tala lena?”

Ioe, na ia toe fai atu ai. Afai e manao i ai o ia, e mafai ona ia papatiso.

“Faafetai lava,” na tagi o ia. “Faafetai lava.” Sa vave ona ia tietie atu i lana uila vilivae i le fale mautotogi a faifeautalai ma avatu ia i laua le tala fiafia. E leai se tasi o i laua na faateia i le suia e lona tama o lona mafaufau.

“Aisea lua te le o ofo ai?” na ia fesili ai. “Sa ou ofo.”

“Sa ma iloa o le a ia faia,” sa la faamatala atu ai. “Sa ma anapopogi mo oe.”

I itula o le taeao po o le aso 13 o Aokuso, 1961, sa faatulaga ai e le Ripapelika Temokarasi o Siamani ni pa faataamilo e li’o ai Perelini i Sisifo. Na agai atu tanetau i tulaga i nofoaga e sopoia ai tuaoi, ma sa faapipii e fitafita ni fana taavili i faamalama o fale lata ane. I le Pa o Brandenburg, o se maafaamanatu faasolopito i le ogatotonu o le aai, sa faapotopoto ai le toatele o tagata i le feita ma le fenumiai. O le aso na sosoo ai, sa eliina ai e le aufaigaluega ia auala i luma o le maafaamanatu ma amata ona fauina poloka sima uumi ma faapa ai i uaea tua o se laina o leoleo faaauupegaina.

I le mavae ai o ni masina o tala feaveai,na i’u ina tapunia e le malo o Siamani Sasae le tuaoi i le va o Perelini i Sasae ma Sisifo.

O le vave o le faatuina o le pa na le mautonu ai Henry Burkhardt. Ona sa fefe o ia, o le tapunia o tuaoi e motusia ai fesootaiga ma Sisifo. Sa le mafai ona ia faia se telefoni, auina atu se uaealesi, pe lafo atu se tusi i le ofisa o le misiona. Afai e taumafai o ia e sopoia le tuaoi, e pei ona saoloto o ia e fai i le aso na muamua atu, o le a taofia o ia e leoleo—atonu foi e fasiotia o ia.

“E mafai faapefea ona faaauau le galuega?” sa ia mafaufau ai. E ui lava o itu ma paranesi i le GDR ua uma ona galulue i lalo o taitai o le lotoifale, ma o faifeautalai o le au paia na tele lava ina suitulaga i faifeautalai faamisiona, ae sa faalagolago i taimi uma Henry i se fesootaiga itiiti ma le laumua o le Misiona a Perelini i Perelini i Sisifo. O le a le mea o le a tupu i le taimi nei lea ua fatuina e le pa se papupuni moni lava i lo latou va?

Na maua e Henry lana tali i le faaiuga o Aokuso. A o faasaina e le GDR ona tagatanuu mai le malaga i fafo atu o le atunuu, sa faatagaina tagata o Siamani Sisifo e i ai ni pemita faapitoa e malaga ai i totonu o ona tuaoi. I le aso 27 o Aokuso, sa feiloai ai le peresitene o le Misiona a Perelini o Percy K. Fetzer ma se tasi o ona fesoasoani, o David Owens, ma Henry ma isi Au Paia i Perelini i Sasae. A o lei ulufale atu i le atunuu, sa aveese uma i fafo e ni alii e toalua mai le la taavale ma taga o o la ofu soo se mea e le manaomia. Sa la vaaia se laina o leoleo ma fitafita i le nofoaga e siaki ai, ma taofia ai le faitau afe o tagata. O le taimi lava na vaeluaina ai e fitafita le potopotoga o tagata, sa malaga atu loa i luma Peresitene Fetzer, ma tietie atu i se lavelave o mea faalavefau seia oo ina ia taunuu atu i le faitotoa e ulu atu ai i le aai.

Sa matua fiafia Henry ma le Au Paia e vaai i le peresitene o le misiona. Sa puupuu le asiasiga, ae sa faia foi e Peresitene Fetzer ma isi taitai o le Ekalesia ni asiasiga faapena i masina na sosoo ai. Sa latou galulue ma le faaeteete, ma le iloa o lo latou i ai i Perelini Sasae e mafai ona tuu ai i latou ma le Au Paia i se tulaga lamatia. O le mea e lelei ai, o tapu fou sa foliga mai sa lei luluina ai faaiuga a le Au Paia i Siamani i Sasae. Na faateleina le auai i sauniga faamanatuga, ma e toatele tagata na tuuina atu molimau mausali e moni le talalelei.

I se konafesi a taitai i le lotoifale, sa faailoa atu ai e Henry o tulaga o siomia ai sa le’i lelei mo le Au Paia i le GDR. “E le tatau ona puapuagatia le galuega a le Alii ona o se taunuuga o tuutuuga e tuuina mai e tagata,” na ia faamanatu atu ai i taitai. “O le a tele pe itiiti foi le faalagolago ia i tatou, ma le auala tatou te faatinoina ai o tatou valaauga, pe o le a faaauau pea ona agai i luma le galuega a le Atua ma le manuia i lenei atunuu.”

I ni nai vaiaso a o lumanai le konafesi aoao ia Oketopa 1961, sa valaaulia ai e Peresitene David O. McKay ia Elder Harold B. Lee i totonu o lona ofisa i le Aai o Sate Leki. Na fagua le perofeta i le ono tolusefulu i lena taeao ma se uunaiga manino e faapea, o le sauniga perisitua o loo loma e tatau ona folasia mai ai se polokalama fou ua mamanuina e tuufaatasia ai mataupu aoaoina a le Ekalesia.

Talu mai le faaiuga o le seneturi lona sefuluiva, o faalapotopotoga taitasi a le Ekalesia—Aoga Sa, Peraimeri, MIA a Alii Talavou ma Tamaitai Talavou, Aualofa, ma korama a le au perisitua—na tusia a latou lava lesona faalevaiaso, e tutoatasi lava le tasi ma le isi. Na amata i le amataga o le vaitau o le 1900, sa sailia ai e taitai o le Ekalesia ni auala e fesootai ai lesona ma gaoioiga faalevaiaso a faalapotopotoga ma korama a le Ekalesia e ala i le faamamafaina o aoaoga faavae taua ma le avesea o soo se lesona e fesopoai ma faafia ona fai. Ae o nei taumafaiga sa misimisi ma e le umi ona faia.

O Peresitene MaKei, o lē sa auai i nisi o uluai taumafaiga tuufaatasi, sa talitonu ua oo i le taimi e toe taumafai ai. E silia ma le tasi vaetolu o le Ekalesia ua avea ma tagata o le Ekalesia i le sefulu tausaga ua mavae, ma o mataupu aoaoina o i ai nei sa lei fetaui i taimi uma ma manaoga o le Au Paia fou. Sa faapitoa le popole o le perofeta e uiga i lesona na tuuina mai ai ni manatu sese pe ua mamao tele mai aoaoga faavae autu o le talalelei. Sa manao o ia i mataupu aoaoina laugatasia na faavaeina i mataupu faavae autu o le talalelei.

“Na pau lava le polokalama o loo aoga i o matou mafaufauga,” na ia folafola atu ai, “o le polokalama lea ua faamoemoe e laveai ai agaga.”

Sa suesue e Elder Lee le mataupu i se komiti laitiiti mo le silia ma le tausaga. Sa manao foi o ia e aoao atu i le Ekalesia ina ia tuu atili le faamamafa i aoaoga faavae faaola. Ma talu ai nei sa faapopoleina ai o ia i le iloaina o anomea mo aoaoga a le Ekalesia na lolomiina e le Ekalesia ma o’o atu i aulotu i le lotoifale a e le’i vaai i ai le au aposetolo. Sa manao o ia i le polokalama fou ia mautinoa ua lava le iloiloina o lesona ma tusitaulima ae lei taunuu atu i le Au Paia. O le lelei atu o le faamaopoopoga i faalapotopotoga a le Ekalesia, sa ia talitonu ai, o le a aveesea ai le fenumiai.

I le galulue faatasi ai, sa fautuaina ai e le komiti ia tusia mataupu aoaoina a le Ekalesia i lalo o se mataupu faavae fou o le faatulagaina. Nai lo le tusiaina e faalapotopotoga aoao taitasi o ana lava anomea o le lesona na o ia lava, o mataupu aoaoina o le a vaavaaia e komiti e tolu: o le tasi mo tamaiti, o le isi mo le autalavou, ma le isi mo tagata matutua.

O sui o faalapotopotoga eseese o le Ekalesia, o tamaitai ma alii, o le a fesoasoani e atiina ae se mataupu aoaoina e taulai atu i ni nai mataupu faavae autu, laveai. O le Korama a Aposetolo e Toasefululua o le a vaavaaia la latou galuega, ma o se Aufono Faamaopoopo a le Ekalesia Atoa e taitaia e aposetolo e toafa o le a vaaia gaoioiga a komiti e tolu.

E ala i le faatulagaina o mataupu aoaoina e tusa ai ma le vaitausaga, e mafai ai e komiti ona aloese mai le faia faalua e le tatau ai o lesona. Ma o le atiina ae o lesona faatasi ma le au pulega aoao na mafai ai ona manuia le mataupu aoaoina mai o latou aafiaga i le asiasi atu i tagata o le au paia i aulotu i le salafa o le lalolagi.

O le taimi lava na tusia ai e le komiti lana talosaga, sa iloiloina ma faamaonia e le Au Peresitene Sili ma le Korama a le Toasefululua, i le taimi tonu lava mo Elder Lee e faalauiloa atu ai le polokalama fou i le Au Paia i le sauniga perisitua o le konafesi aoao ia Oketopa.

“I le faaaogaina o sea ituaiga o polokalama,” na tautino mai ai Elder Lee, “e mafai ona tatou tulimatai atu ma le faamoemoe i le tuufaatasiga ma le faafaigofieina o mataupu aoaoina a le Ekalesia, lomiga a le Ekalesia, fale o le Ekalesia, sauniga a le Ekalesia, ma le tele o isi vaega taua o le galuega a le Alii.”

Sa mautinoa e Elder Lee o le finagalo o Peresitene MaKei e amata ona fesootai mataupu aoaoina a le Ekalesia sa musuia. “Afai o le a na ona tatou taulai atu i le peresitene o lenei Ekalesia,” na ia molimau atu ai, “o le a tatou vaai ia te ia o agai atu e fai le mea o le a faia mo le faaolataga o le fanauga a tagata i le auala sili ona lelei e mafai ai.”

E lei leva ona uma le konafesi aoao, ae malaga loa LaMar Williams i se malaga mo Nigeria. I lana ato, sa teu ai e LaMar se mea pueata ma se masini pu’e leo ina ia mafai ona ia faasoa mulimuli ane i le Au Peresitene Sili ia foliga ma leo o tagata e feiloai i ai. O lana soa mo le malaga o se faifeautalai e luasefulu tausaga le matua e igoa ia Marvin Jones, o le sa malaga atu i le Misiona a Aferika i Saute.

O lo latou taunuuga o Port Harcourt, o se aai i le talafatai o Nigeria, lea sa faatalitali mai ai tagata—e toetoe lava o tagata uma sa fetusia’i ma LaMar. Ae, sa misi mai le lotolotoi o tagata ia Honesty John Ekong, o ana tusi na muai liliu atu ai le vaaiga a LaMar i Aferika.

A o ia faafeiloai atu i ana uo, sa faateia LaMar i le iloaina e lei iloa uma e le tasi le isi. Sa ia manatu sa latou galulue faatasi. Sa i ai faatasi ma le vaega se tagata e igoa ia Matthew Udo-Ete, o lē sa tusiaina atu ni tusi e sili ona tele ia LaMar. Sa ia aveina LaMar ma Marvin i lona tamai fale, lea sa potopoto ai ni tagata e faalogo ao la saunoa. Sa vevela tele le ea ma sa sili ona matutu nai lo se isi lava mea ua masani ai LaMar, ae mo le isi lua itula na sosoo ai, sa ia aoaoina ai tagata ma tali a latou fesili e uiga i le Ekalesia.

I lona Aso Sa muamua i Nigeria, sa lauga atu ai LaMar i se isi faapotopotoga toatele i le falesa o Mataio. Sa o mai tagata i le tele o maila e faalogologo ia te ia o saunoa. Sa ia aoao atu i latou e uiga i le aigaAtua, le Liliuese, ma le Toefuataiga o le talalelei e ala ia Iosefa Samita. Sa ia faamatalaina le tapu faaleperisitua ma fai atu ua sau o ia i Nigeria e saili pe o le a fiafia pea ana uo i le Ekalesia e tusa lava pe le mafai ona latou umia le perisitua.

Ina ua uma lana tautalaga, sa ia toe tuu atu le taimi ia Mataio e tapuni ai le sauniga. Na faafuasei lava, ona amata tautatala tagata o le potopotoga i se gagana sa le malamalama ai LaMar. Sa vaavaai atu LaMar ia Mataio mo se faaliliuga.

“E i ai tagata iinei e mananao e tuuina atu a latou molimau,” o le tala lea a Mataio.

Sa faateia LaMar. Sa ia manatu ua lelavava tagata ma atonu ua fiaaai. Nai lo lena, mo le isi tolu itula na sosoo ai, sa faasoa mai e tagata a latou molimau.

O se tasi o i latou sa i ai, o se toeaina matua e lauulu sinasina, se ofutino paepae, ma se ie lanu-rosa na faataamilo i ona vae. Sa leai ni ona seevae. “E onosefulu-lima o’u tausaga,” na ia fai mai ai, “ma ua ou ma’i. E sefuluono maila na ou savali mai ai iinei i lenei taeao.”

“Ou te lei vaai ia Peresitene MaKei, ma ou te lei vaai i le Atua,” sa ia faaauau ai. “Ae ua ou vaai ia te oe, ma o le a ou tuu atu oe lava ia e tali atu e toe foi atu ia Peresitene MaKei ma ta’u atu ia te ia matou te faamaoni.”

Sa na ona fesili atu o se tasi o tamaitai i le potopotoga ia LaMar, “Pe o le a e faatagaina lo matou alofa mo le Ekalesia ina ia le aoga?”

I le silia teisi ma se vaiaso mulimuli ane, i le taulaga o Uyo, na iu ai ina feiloai ai LaMar ma Honesty John Ekong. Sa ia iloa ai sa malaga atu lana uo i le silia ma le selau maila e feiloai ma ia i le malaevaalele ae na misi ia te ia. Sa faaali atu e Honesty John ia LaMar ia puipui o lona fale. Sa teuteuina i tusiga ma ata pue o pulega aoao mai mekasini a le Ekalesia.

Sa faagaeetia pea lava pea LaMar i le faatuatua o le au Nigeria. Sa ia aoaoina e tusa ma le lima afe tagata i le toeitiiti selau faapotopotoga sa mananao e auai i le Ekalesia. Ae sa le mafai ona ia vaaia se auala e agai ai i luma i Nigeria pe afai e faaauau pea ona faatulagaina tapulaa o le perisitua ma le malumalu. Sa manao o ia e tuuina atu i ana uo fou ni faamautinoaga e uiga i le lumanai o le galuega faafaifeautalai i lo latou atunuu, ae sa ia iloa e lei faatagaina o ia e faia lena mea.

“Latou te tausisi pea afai ou te faia la’u vaega pe a ou lipoti atu i le Au Peresitene Sili, o le a o’o mai le Ekalesia i Nigeria,” na ia tusia ai i lana tusitalaaga. “Latou te le iloa lo’u le taua i le iloiloga faaiu o sea faaiuga.”

Ae sa ia te ia le faamoemoe. “Faafetaia ai, o mea uma e mafaia i le fesoasoani mai a le Alii,” na ia tusi ai.

  1. Au Paia, voluma 3, mataupu 36; Albrecht, Nikol, and Nikol, “Book Burning,” 164; ElRay Christiansen to First Presidency and Quorum of the Twelve Apostles, Jan. 14, 1959, Missionary Department, Executive Secretary General Files, CHL; Fetzer, Mission President Journal, Oct. 13, 1960; Germany Hamburg Mission, Manuscript History and Historical Reports, Oct. 13, 1960; European Mission, Historical Reports, Dec. 31, 1960, 341, 343.

  2. Germany Hamburg Mission, Manuscript History and Historical Reports, Oct. 13, 1960, and Mar. 26, 1961; Albrecht, Nikol, and Nikol, “Book Burning,” 164–69; Burtis Robbins and Edith Robbins, North German Mission Report, Feb. 23, 1960, 2, First Presidency, Mission Correspondence, 1964–2010, CHL; Kuehne, Mormons as Citizens of a Communist State, 84–86, 97–98; Dennis, Rise and Fall of the German Democratic Republic, 90. Autu: Taua o Tualga Faapolikiki; Siamani

  3. Sheffer, Burned Bridge, 142–46; Germany Hamburg Mission, Manuscript History and Historical Reports, Dec. 31, 1958; tagai foi i le Kuehne, Henry Burkhardt,49.

  4. Germany Hamburg Mission, Manuscript History and Historical Reports, Dec. 18, 1960; European Mission, Historical Reports, Dec. 31, 1960, 340–42, 344; Kuehne, Mormons as Citizens of a Communist State, 98; Burtis Robbins and Edith Robbins, North German Mission Report, Feb. 23, 1960, 1, 5–6, First Presidency, Mission Correspondence, 1964–2010, CHL.

  5. Dennis, Rise and Fall of the German Democratic Republic, 88–89; European Mission, Historical Reports, Dec. 31, 1960, 343.

  6. Kuehne, Henry Burkhardt, 36–37; European Mission, Historical Reports, Sept. 30 and Dec. 31, 1960, 247–49, 344; Alvin R. Dyer to First Presidency, May 23, 1960; Oct. 25, 1960; Dec. 21, 1960, First Presidency, Mission Correspondence, 1946–69, CHL.

  7. Germany Hamburg Mission, Manuscript History and Historical Reports, Apr. 2, 1961.

  8. Dunbabin, Cold War, 19–21, 149–54, 264–66.

  9. McKay, Statements on Communism and the Constitution, 1–30; David O. McKay, i le One Hundred Eighteenth Annual Conference, 70; Henry A. Smith, “Pres. McKay Hits Atheism Rise in World,” Deseret News, Mar. 17, 1952, A1; “Church President Dedicates New Chapel in Detroit Stake,” Church News, May 2, 1959, 5; David O. McKay, in One Hundred Twentieth Annual Conference, 175; McKay, Diary, Nov. 12, 1957, and May 13, 1959; Au Paia, voluma 3, mataupu 33 ma le 35.

  10. McKay, Diary, Apr. 7, 1960, and Jan. 5, 1961; Patterson, Grand Expectations, 311–15; Eichengreen, European Economy, 3–47.

  11. McKay, Diary, Jan. 5, 1961; “Change Comes to Zion’s Empire,” Business Week, Nov. 23, 1957, 108–10, 112, 114, 116; Leonard J. Arrington, “Economic History of the Church,” and Richard C. Edgley and Wilford G. Edling, “Finances of the Church,” i le Ludlow, Encyclopedia of Mormonism, 2:435–41, 507–9. Autu: Mea Tautupe a le Ekalesia

  12. David O. McKay to Stephen L Richards, Jan. 30, 1954; David O. McKay, Address, Uruguayan Mission, Montevideo, Uruguay, Jan. 30, 1954, volume 138, David O. McKay Scrapbooks, CHL. Autu: Polokalama o le Fausaga o Fale; Tavita O. MaKei

  13. Hubbard, When the Saints Came Marching In, 3, 28–32, 35, 58–65; Jackson, Places of Worship, 237, 266, 270–73; Relief Society Annual Report, 1961, Denton Ward, Relief Society Minutes and Records, CHL; McKay, Diary, Feb. 24, 1961.

  14. McKay, Diary, Mar. 18, 1960; June 28, 1960; Aug. 17, 1960; Jan. 18 and 23, 1961; “Skyscraper Included in Program,” Deseret News and Salt Lake Telegram, Oct. 7, 1960, A1, A10; Henry A. Smith, “Pres. McKay Tells of Decision to Build New Oakland Temple,” Church News, Jan. 28, 1961, 3.

  15. McKay, Diary, Jan. 5, 1961; David O. McKay, i le One Hundred Twenty-Ninth Annual Conference, 122.

  16. “Missionary Activity Boosts Baptisms to New High in 1960,” Church News, Dec. 31, 1960, 10; McKay, Diary, Mar. 1 and 29, 1960; Sept. 8, 1960; Rasmussen, Mormonism and the Making of a British Zion, 150–52; Romney, Journal, Jan. 12, 19, and 21, 1960; Cuthbert, Latter-day Saints in Great Britain, 51–52, 197; Harold B. Lee, “A Stake Is Born,” Millennial Star, May 1960, 188–94. Autu: Tuputupuae o le Ekalesia; Egelani

  17. Henry A. Smith, “Pres. McKay Dedicates Hyde Park Chapel at London Session,” Church News, Mar. 4, 1961, 3, 15; “Text of the Dedicatory Prayer,” Millennial Star, Apr. 1961, 180–83; David O. McKay, Address, North British Mission, Mar. 1, 1961, 1, Percy K. Fetzer Papers, CHL.

  18. LaMar Williams, Memorandum, May 3, 1961, LaMar S. Williams Papers, CHL.

  19. Fisher, Report, Sept. 16, 1960, 2, 5–7, 12; McKay, Diary, June 30–July 1, 1961; Galuega 10–11; 15:7–9; Arrington, Adventures of a Church Historian, 180; tagai foi Hunter, Journal, Mar. 1, 1962. Autu: Faatapulaaga o le Perisitua ma le Malumalu

  20. McKay, Diary, July 1, 1961; Hunter, Journal, July 1, 1961; Allen, LaMar Williams Interview Notes [July 6, 1988], [3].

  21. Dunning, Oral History Interview, 10, 12; Dunning, “My Life and Legacy,” 1–4.

  22. British Mission, Manuscript History, part 1, Dec. 31, 1960, 6; part 2, June 30, 1961, 3; North British Mission, Manuscript History, Sept. 30, 1961, [1]; Dunning and Dunning, Email Interview [Sept. 12, 2021]; Franklin D. Richards, i le One Hundred Thirty-First Annual Conference, 83–87; “Mission Meet Focuses on Referral Plan,” Deseret News and Salt Lake Telegram, June 27, 1961, A1.

  23. Dunning, “My Life and Legacy,” 2–3; Dunning, Email Interview [Sept. 23, 2021]; Dunning, Email Interview [July 21, 2021]; Transcript of Record of Members, 1961, Beverley Branch, Hull District, North British Mission, 49, in England (Country), part 50, Record of Members Collection, CHL. Autu: O Sauniga Faamanatuga

  24. Dunning, “My Life and Legacy,” 2; Dunning, Email Interview [Sept. 23, 2021]; Dunning and Dunning, Email Interview [Sept. 12, 2021]; Dunning, Oral History Interview, 2; Hawkins, Oral History Interview, [00:01:05]–[00:03:02]; Fletcher, Oral History Interview, 2–4.

  25. Spencer W. Kimball, Journal, Feb. 17, 1963; Troy Thornton and Rosaland Thornton to Joseph Bentley, Feb. 10, 1961, Missionary Department, Executive Secretary General Files, CHL; Rasmussen, Mormonism and the Making of a British Zion, 150–52; Cuthbert, Latter-day Saints in Great Britain, 52–53; Embry and Brambaugh, “Sports and Recreation in Missionary Work,” 53–84.

  26. Mark E. Petersen to First Presidency, Apr. 5, 1963, First Presidency, Mission Correspondence, 1946–69, CHL; Dunning, Oral History Interview, 2; Dunning, “My Life and Legacy,” 1–2; Rasmussen, Mormonism and the Making of a British Zion, 151; Embry and Brambaugh, “Sports and Recreation in Missionary Work,” 82–83; Cuthbert, Latter-day Saints in Great Britain, 52–53; Transcript of Record of Members, 1961, Beverley Branch, Hull District, North British Mission, 50–52, in England (Country), part 50, Record of Members Collection, CHL.

  27. Dunning, Oral History Interview, 10–11; Dunning, “My Life and Legacy,” 3–4. Autu: Anapogi

  28. Large, Berlin, 446–52; Taylor, Berlin Wall, 161–62, 177–78; Hilton, The Wall, 52–53, 83–85; Fetzer, Mission President Journal, Aug. 13–14, 1961; Christensen, Mission Journal, Aug. 13, 1961. Autu: Cold War

  29. Fetzer, Mission President Journal, Aug. 14, 1961; Kuehne, Henry Burkhardt, 48.

  30. European Mission, Historical Reports, Sept. 30, 1961, 580; Kuehne, Henry Burkhardt, 48; Kuehne, Mormons as Citizens of a Communist State, 98–100; Germany Hamburg Mission, Manuscript History and Historical Reports, Apr. 25, 1961; Scharffs, Mormonism in Germany, 196–201.

  31. Hilton, The Wall, 132–35; Fetzer, Mission President Journal, Aug. 27, 1961.

  32. Fetzer, Mission President Journal, Aug. 27, 1961; Oct. 8 and 19, 1961; Nov. 19, 1961; Owens, “Future Prophets, the Berlin Wall and Missionaries,” 5–6; Albrecht, Nikol, and Nikol, “Book Burning,” 169–71; Kuehne, Mormons as Citizens of a Communist State, 98.

  33. North German Mission, Auxiliary Training Minutes, Dec. 9, 1961; Kuehne, Henry Burkhardt, 50.

  34. Lee, Diary, Sept. 16, 1961; McKay, Diary, Sept. 15, 1961.

  35. Curriculum Department, Priesthood Correlation Executive Committee Minutes, June 21, 1962, 47; Bowman, “Progressive Roots of Mormon Correlation,” 15–34; Goodman, “Correlation,” 319–38.

  36. Goodman, “Correlation,” 324–25, 329–30; First Presidency to General Priesthood Committee, Mar. 24, 1960, Curriculum Department, Priesthood Correlation Executive Committee Minutes, CHL; Deseret News 1989–90 Church Almanac, 205; Romney, “History of the Correlation of L.D.S. Church Auxiliaries,” [F1]–[F2]; Curriculum Department, Priesthood Correlation Executive Committee Minutes, May 23, 1962, 35; tagai foi Harold B. Lee, i le One Hundred Thirty-First Semi-annual Conference, 79. Autu: Faafesootai

  37. Lee, Diary, Jan. 20, 1955; Feb. 14, 1957; circa May 18–19, 1960; Romney, Journal, Apr. 20, 1960; May 11 and 24, 1960; June 28, 1960; Oct. 17 and 20, 1960; Jan. 24, 1961; Mar. 15, 1961; Aug. 22, 1961; Priesthood Committee, Minutes, Apr. 20, 1960, 697; Harold B. Lee, in One Hundred Thirty-First Semi-annual Conference, 79; Harold B. Lee, in One Hundred Nineteenth Annual Conference, 47; Lee, Ye Are the Light of the World, 109. Autu: Harold B. Lee

  38. Council Minutes, Sept. 7, 1961, First Presidency, General Administration Files, 1923, 1932, 1937–67, CHL; Harold B. Lee, in One Hundred Thirty-First Semi-annual Conference, 77–82; Romney, Journal, Sept. 5, 7, and 14, 1961; Lee, Diary, circa Sept. 6–7, 1961 [Sept. 5, 1961].

  39. Williams, Journal, Oct. 16, 1961, [11]; McKay, Diary, Oct. 13, 1961; Williams and Williams, Oral History Interview, 5–6, 10, 18.

  40. Williams, Journal, Oct. [20] and 31, 1961, [13], [28]; Williams and Williams, Oral History Interview, 6.

  41. Williams and Williams, Oral History Interview, 6–10; Williams, Journal, Oct. 22, 1961, [22]–[23]; Jones, Diary, Oct. 18 and 20–22, 1961; LaMar Williams, “Report to the First Presidency regarding Missionary Work in Nigeria,” 1, First Presidency, Mission Correspondence, 1946–69, CHL; tagai foi Allen, “West Africa before the 1978 Priesthood Revelation,” 219–23.

  42. Williams and Williams, Oral History Interview, 9; Allen, “West Africa before the 1978 Priesthood Revelation,” 223; Jones, Diary, Oct. 22, 1961.

  43. Williams, Journal, Oct. 31, 1961, [28]; Williams and Williams, Oral History Interview, 13.

  44. LaMar Williams, “Report to the First Presidency regarding Missionary Work in Nigeria,” 1–2; First Presidency, Minutes, Dec. 18, 1961; LaMar Williams to David O. McKay, Nov. 14, 1961, First Presidency, Mission Correspondence, 1946–69, CHL; Williams, Journal, Oct. 29, 1961, [26]. Ua faasa’oina upusii mo faigofie ona faitauina; o le uluai punaoa o loo i ai “(ma e le mafai ona ou tauina atu ia i latou aua latou te iloa na auina mai au iinei)” ina ua mavae le “Latou te le iloaina.”