Vahe 12
Ko ha Founga Kakato ʻo e Moʻuí
Naʻe tohi ʻe ʻEletā Sipenisā W. Kimipolo ʻi heʻene tohinoá ʻi he ʻaho 8 ʻo Sānuali 1970, “ʻOku ou hohaʻa lahi ki hoku kiá. ʻOku hangē ʻoku hōloa māmālie pē hoku leʻó.”
ʻI he taʻu ʻe hongofulu tupu talu mei hono toʻo ʻe he kau toketaá ʻa e konga hono kiá ‘okú ne fakaongo mai e leʻó koeʻuhí ko e kanisaá, ko e meʻa pē naʻe ongo mei hono leʻó ko ha fanafana pē. Ka naʻe ʻikai malava ke holoki ʻe he faingataʻá ni ʻene ngāue ʻi he Siasí. Talu hono fokotuʻu ʻo e Siteiki Seni Pauló ʻi he 1966, mo hono toe fokotuʻu ʻe ʻEletā Kimipolo ha ngaahi siteiki ʻi ʻĀsenitina mo ʻUlukuai, fakatapui ʻa Kolomupia ki he ngāue fakafaifekaú, mo tokoni ki he Kāingalotu ʻi ʻEkuatoá. Naʻá ne toe faʻu foki ha tohi ‘iloa, Ko e Mana ʻo e Fakamolemolé, pea kamata ke hoko ko e sea ʻo e kōmiti patiseti mo e kōmiti fakafaifekau ʻa e Siasí.
Ka ʻi he hōloa siʻono leʻó, naʻá ne talanoa mo ha toketā, ʻi heʻene hohaʻa naʻa kuo toe foki mai ʻa e kanisaá. Naʻe ‘ilo ʻe he toketaá ha foʻi ʻila kulokula ʻi he tafaʻaki fakatoʻohema ʻo e loto kia ʻo ʻEletā Kimipoló peá ne tafaʻi ha kiʻi konga ʻe ua ke sivi. Naʻe toe faingataʻa ange heni siʻi leʻo ʻo e ʻaposetoló, pea fiemaʻu ai ke fakaleʻolahi ʻene leá ʻaki ha kiʻi maika naʻe tui takai ʻi hono kiá.
Naʻe foki ʻa ʻEletā Kimipolo ki he falemahakí ʻi he ʻaho 12 ʻo Sānualí ke maʻu ʻa e siví. Hili hono ʻilo e ola ʻo e siví mo talatalaifale mo ha kau mataotao kehe, naʻe tui ʻa e toketaá kuo toe foki mai ʻa e kanisaá, pea naʻe siʻi ha ʻamanaki ʻe toe lava ke fai ha meʻa ki he leʻo ʻo ʻEletā Kimipoló.
ʻI hono fakakaukauʻi ko ia ʻe ʻEletā Kimipolo ʻa e meʻa ke fakahoko ai ha faitoʻó, naʻá ne fifili pe naʻa ʻoku totonu ke holomui ā mei he Kōlomu ʻo e Kau ʻAposetolo ʻe Toko Hongofulu Mā Uá kae hū mai ha tangata te ne malava lahi angé.
ʻI he ʻaho hono hokó, naʻe talaange leva ʻe ʻEletā Kimipolo kia N. ʻElitoni Tena ʻa e meʻa naʻe talaange ʻe he toketaá, pea fokotuʻu ange ʻe Palesiteni Tena ke fai ʻe he kau taki māʻolungá ha ʻaukai makehe maʻana. ʻI he ʻosi ha ʻaho ʻe ua mei ai, naʻe fakatahataha mai ʻa e kau taki māʻolungá ʻi he temipalé, pea fakahoko ʻe Hāloti B. Lī ha lotu ongo moʻoni. Ko e taimi naʻe ʻosi aí, naʻe tangutu leva ʻa ʻEletā Kimipolo ʻi lotomālie ʻi he lokí, pea tākai ʻe Kōtoni B. Hingikelī hono ʻulú ʻaki ʻa e lolo. Naʻe tuʻu takai leva ʻa e kau ʻaposetolo kehé ʻi ha siakale ʻo takatakaiʻi ʻa ʻEletā Kimipolo, pea fakamaʻu ʻe Palesiteni Tena ʻa e tākaí mo tāpuakiʻi ia.
ʻI he lolotonga ʻo e tāpuakí, naʻe ongoʻi ʻe ʻEletā Kimipolo ʻene ofi ki heʻene Tamai Hēvaní mo e kau mēmipa ʻo ʻene kōlomú. Naʻe hangē naʻe mahuʻi atu ʻa e kavenga mamafa naʻá ne fuesiá, pea naʻá ne ʻiloʻi kapau naʻe finangalo ʻa e ʻOtuá ke hoko atu ʻene ngāué, te Ne ʻomi ha founga ke fakahoko ai ia, pe ʻe ʻi ai hano leʻo pe ʻikai. Hili ʻa e faingāué, naʻe fāʻofua ʻa ʻEletā Lī kia ʻEletā Kimipolo. Ko e toenga ʻo e kau ʻaposetolo naʻe ʻi he siakalé naʻa nau pehē naʻa nau ongoʻi monūʻia ke kau ʻi ha aʻusia fakalaumālie mālohi mo uouangataha pehē.
ʻI he pongipongi Sāpaté, hili ia ha ʻaho ʻe tolu mei he faingāué, naʻe telefoni fakatuʻupakē atu ʻa e kaungāʻapi ʻo ʻEletā Kimipoló kiate ia. Naʻá ne fanongo kuo pekia ʻa Palesiteni Makei, pea naʻá ne fie ʻilo pe ʻoku moʻoni.
Naʻe tali ange ʻe ʻEletā Kimipolo, “ʻOku teʻeki ai ke u fanongo ai.” Naʻá ne kamata leva ke telefoni takai holo, pea ʻikai fuoloa, kuó ne ʻilo tā naʻe siʻi hiki atu ʻa e palōfitá ʻi he konga kimuʻa ʻo e pongipongi pē ko iá.
Naʻe fakatovave atu leva ʻa ʻEletā Kimipolo ki he ʻUluʻi ʻŌfisi ʻo e Siasí. Naʻe lolotonga fakataha ʻa Siosefa Filitingi Sāmita, ko e ‘aposetolo pulé, mo Hāloti B. Lī mo e fāmili Makeí. Naʻe maʻu ʻe ʻEletā Kimipolo ʻa Siosefa ʻEnitasoni mo ʻAfa Heikoka, ko e ongo sekelitali ʻa e Kau Palesitenisī ʻUluakí mo e Toko Hongofulu Mā Uá, pea nau fakaʻaongaʻi ha ngaahi houa ke telefoni ki he kau taki māʻolungá ke fakahā ange ʻa e ongoongó.
Naʻe fakamamahi ki he Siasí ʻa e siʻi pekia ʻa Palesiteni Makeí. Naʻe ʻiloa siʻene ʻofa ki he Kāingalotu ʻi he funga māmaní. Kuó ne tataki ʻa e Siasí ʻi ha meimei taʻu ʻe hongofulu mā hiva, pea ko ha vahe tolu ʻe ua ʻo hono kāingalotu ʻe toko tolu milioná naʻe papitaiso kinautolu ʻi he lolotonga ʻo ʻene palesitení. ʻI he taimi naʻá ne fetongi ai ʻa Siaosi ʻAlipate Sāmita ʻi ʻEpeleli 1951, naʻe ʻi ai ha siteiki ʻe 184 ʻi he Siasí. Ko e taimí ni ʻi he 1970, kuo ʻi ai ha siteiki ʻe 500, kau ai ha siteiki ʻe hongofulu mā fā ʻi ʻAositelēlia mo Nuʻu Sila, siteiki ʻe hongofulu mā tolu ʻi ʻIulope, pea mo e ʻuluaki siteiki ʻi ʻĀsenitina, Palāsila, Kuatemala, Mekisikou, Tonga, ʻUlukuai, mo Haʻamoa Hihifo.
Ko e meimei peseti ʻe 90 ʻo e ngaahi siteiki foʻou ʻi he taimi ʻo Makeí naʻe fokotuʻu kinautolu ʻi he ʻIunaiteti Siteití mo Kānata, ʻa ia naʻe māʻolunga ai ʻa e tupu ʻa e Siasí. ʻI ʻAmelika Tokelaú, naʻe tokoniʻi ʻa e ongoongo ʻo e Siasí mei he Kāingalotu ʻiloa hangē ko J. Uiliate Meliotí, naʻá ne langa ha ngaahi hōtele lalahi, pea mo Siaosi W. Lomenī, naʻe hoko ko e pule lahi ʻo e Kautaha Kā ʻAmeliká (American Motors Corporation) pea mo e kōvana ʻo e siteiti ʻo Misikení.
Naʻe fakatapui ʻe Palesiteni Makei ha temipale ʻe nima ʻi ha fonua ʻe fā pea mo tokangaʻi hono liliu ʻo e ngaahi ouau fakatemipalé ki ha ngaahi lea fakafonua ʻe hongofulu mā ua. Ko e meʻa tatau pē, ko e konifelenisi lahí naʻe maʻungofua lahi ange ʻi hano fakamafola ʻe ha ngaahi kautaha televīsone ʻe uangeau mo ha ngaahi kautaha letiō lahi ʻaupito ʻi ʻAmelika Tokelau, ʻAmelika Lotoloto mo ʻAmelika Tonga. ʻI he hoko ʻa Palesiteni Makei ko e taki ʻo e ngāue fakafaifekaú, mo e Polokalama Ako ʻa e Siasī, naʻá ne fakalahi ʻa e ngāue ʻa e Siasí ʻi he ongo tafaʻaki ko ʻení. Pea ko ʻene fakahoko ʻa e polokalama fakafekauʻakí, ʻa ia naʻá ne lau ko e polokalama mahuʻinga taha heʻene hoko ko e palesiteni ʻo e Siasí, naʻe maʻungofua ange ai ʻa e ngaahi moʻoni faingofua ʻo e fakafoki mai ʻo e ongoongoleleí ki ha kakai fie fanongo fakaemāmani lahi.
Naʻe lauiafe ʻa e kakai naʻa nau ōmai ki he meʻafakaʻeiki ʻo Palesiteni Makeí ke fakahaaʻi ʻenau fakaʻapaʻapá. ʻOsi ha taimi nounou mei ai, kuo fakataha ʻa e Kōlomu ʻo e Kau ʻAposetolo ʻe Toko Hongofulu mā Uá ke fokotuʻu ʻa Siosefa Filitingi Sāmita ko e palesiteni foʻou ʻo e Siasí. ʻI hono taʻu hivangofulu mā tolú, naʻe hoko ai ʻa Palesiteni Sāmita ko e tangata motuʻa taha ke ne taki ʻa e Siasí. Naʻá ne hū mai ki he ʻōfisí mo ha taʻu ʻe onongofulu ʻo e taukei ko ha ʻaposetolo, pea naʻe fakaʻapaʻapaʻi ʻe he Kāingalotú ʻene ʻilo lahi ki he hisitōlia ʻo e Siasí pea mo e folofolá. Ko e foha ia ʻo Palesiteni Siosefa F. Sāmita, pea ko e mokopuna tangata foki ia ʻo Hailame Sāmita, ko e tokoua ʻo e palōfita ko Siosefá.
Naʻe ui ʻe Palesiteni Sāmita ʻa Hāloti B. Lī mo N. ʻElitoni Tena ko hono ongo tokoni ʻi he Kau Palesitenisī ʻUluakí. Koeʻuhi naʻe taʻofi ʻe he ngaahi fatongia foʻou ʻo Palesiteni Lií ia mei haʻane hoko ko e palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá, naʻe vaheʻi leva ʻa ʻEletā Kimipolo ko e palesiteni ʻo e kōlomú ʻo fakafofongaʻi ia.
Naʻe tuku ki tafaʻaki ʻe ʻEletā Kimipolo ʻa e hohaʻa ki heʻene moʻuí mo e faleʻi ʻa ha kaungāmeʻa toketā , ke feinga ki ha faitoʻo kanisā ʻi Kalefōnia, ʻi he hili ʻa e pekia ʻa Palesiteni Makeí, kae fili ia ke tokanga pē ki hono ngaahi fatongia fakaeʻaposetoló. Naʻá ne taʻepauʻia ʻi he founga lelei taha ke faitoʻo ai ʻa e fokoutuá ni, pea koeʻuhí naʻe fakalakalaka lahi ange ʻene leá talu mei he faingāué, naʻe ʻikai toe loto ia ke fai ha tafa ke tuʻu fakatuʻutāmaki ki hono leʻó.
Ko e taimi naʻe vaheʻi ai ia ʻe Palesiteni Lī ʻi hono uiuiʻi foʻoú, naʻá ne lea fekauʻaki mo e palopalema fakaemoʻui lelei ʻa ʻEletā Kimipoló, ʻo fai ha ngaahi lea ʻo e fakanonga mo e ʻamanaki lelei.
Naʻá ne pehē, “ʻOku mau tāpuakiʻi makehe ho leʻó, mo tautapa ki he ʻEikí ke ne fakatonua hoʻo malava ke fetuʻutaki ʻaki ho leʻó pea pehē ki hoʻo tohi ʻo e ngaahi fakahinohinó, ke ke ala nofo ʻi māmani, kehe pē ke fakafiefia ʻa e moʻuí kiate koe, pea ʻoua ke folofola ʻa e ʻEikí, kuo feʻunga.”
Taimi nounou pē ʻa e tūʻuta ʻa Maeta Holitei ʻi Kalefōniá, naʻá ne ʻalu ki ha falekoloa lahi mo Vena Peleki, ko ʻene faʻē ohí, ʻi he Polokalama Tokoni Fakaako ʻa e Fānau Ako ʻInitiá. Naʻe teʻeki tuʻo taha ke ʻalu ʻa Maeta ia ki ha falekoloa lahi, ko ia naʻá ne tokanga ʻaupito ki he afe kotoa pē naʻe afe ai ʻa Vena ʻi he kaá.
Naʻe fakatau ʻe Maeta ʻi he falekoloá ha ngaahi vala naʻá ne fiemaʻú, pea ʻi he hoko ʻa e taimi ke foki aí, naʻe ʻikai fakapapauʻi ʻe Vena ia ʻa e hala foki ki ʻapí. Naʻá ne talaange kia Maeta, “ʻOku ʻikai ke u lava ʻe au ʻo manatuʻi ʻa e feituʻu ʻoku tonu ke u ʻalu aí.”
Pehē ange ʻa Maeta, “Sai, lele hē,” ʻo fakahinohino ʻa Vena ʻi he hala totonú. Peá ne taki leva ʻa Vena ʻo foki ki honau ʻapí, ʻi he afe kotoa pē.
Naʻe ʻohovale ʻa Vena. Peá ne ʻeke ange, “ʻOkú ke ʻilo fēfē ʻa e hala ki ʻapí?”
Naʻe pehē ange ʻa Maeta, “ʻOku ou fakatokanga meʻa maʻu pē.” Ko e ako maʻuloto ʻo e ngaahi fakaʻilonga ʻi he fonuá ko ha anga ia naʻá ne maʻu ʻi heʻene fakateketeka ʻa e fanga sipí ʻi heʻene kei siʻí ʻi he feituʻu nofoʻanga ʻo e kau Navahó. Kapau naʻe ʻikai ke ne tokanga ki he ngaahi fakaʻilonga ʻi he fonuá, naʻe ʻikai ke ne mei lava ʻo foki ki ʻapi.
Naʻe kamata ako ʻa Maeta ʻi he ako māʻolunga ʻo e feituʻú hili pē ʻa e aʻusia ko ʻení. Ko hono ngaahi ʻuluaki ʻaho ʻi aí naʻe fakailifia. Naʻe lahi ange ʻaupito ʻa e ʻapiakó ia ʻi ha toe ʻapiako naʻe hū ki ai, kimuʻa. Ko hono holo feʻefiʻefihí naʻe tuʻu fakaʻotu ai ha ngaahi tukuʻanga meʻa. Ko e meimei fānau ako kotoa pē ko e kau pālangi, pea fakatatau mo ʻene ʻiló, ko ia pē ʻa e taha ako mei he polokalama tokoní ʻoku ʻi aí. Naʻe ʻikai ke ne ongoʻi ha laulanu mei hono toʻú, ka naʻe ʻi ai ha fānau ako ʻi he polokalamá naʻa nau pehē ʻi he ngaahi ʻapiako kehé. Naʻe talitali lelei ia ʻe hono kaungāakó, pea vave ʻene fakamahení.
Pea hangē ko e toʻu tupu kehe ʻi hono uōtí, naʻe kau ʻa Maeta ʻi he semineli hengihengí. Naʻe ʻā mo hono tokoua ohi ko Lusí ʻi he pongipongi ʻo e ngaahi ʻaho ʻo e uiké ʻi he taimi nimá koeʻuhí ke na lava ʻo aʻu taimi tonu ki he falelotú, ki he kalasí. ʻI hono ʻuluaki ʻaho ʻi he seminelí, naʻe tatali ʻa Maeta ʻi hono seá, ʻo ʻikai ke ne ʻiloʻi pe ʻoku ʻi ai moʻoni ha ʻuhinga ʻo ʻene ʻi aí, kae ʻoua kuo kamata ʻa e kalasí. Peá ne toki fakakaukauʻi. Naʻá ne fakakaukau, “ʻOi, ʻoku mau ako fekauʻaki mo e Siasí.”
Naʻe ʻikai ke fuʻu manako ʻa Maeta ia ʻi he seminelí. Naʻá ne ʻohovale pea mo puputuʻu ʻi he taimi naʻá ne ʻilo ai ʻe fakamaaka ia ʻi he kalasí. Peá ne fakakaukau, “ʻE lava fēfē nai ke fakamaaka koe ʻi hoʻo tuí?” ʻE fakamaaka nai ia ʻe he ʻOtuá? Ka, naʻe tātātaha ke na liʻaki mo Lusi ha kalasi.
ʻI he ʻuluaki taʻu ʻo Maeta ʻi he ako māʻolungá, naʻá ne kau ʻi he kuaea ʻa e akó. ʻI he taʻu hono hokó, naʻá ne vaʻinga pasiketipolo ai, ʻa ia naʻá ne ako ʻi he lolotonga ʻo ʻene ako nofo-maʻu ʻi ʻAlesoná. Naʻá ne fuʻu sai ʻaupito ʻi he sipotí pea hoko ko e taha vaʻinga maluʻi ʻi heʻene timí. Naʻá ne manako ke ne tātā mo lelelele mo e foʻi pulúi ʻo fakahū mei he tafaʻaki ʻo e laine maté. Ka naʻá ne toe lelei foki ʻi he paasi ʻo e foʻi pulú ki he kau vaʻinga kehé. ʻI he ʻosi ʻa e faʻahitaʻu vaʻingá, naʻe fili ia ʻe hono kaungāvaʻingá mo e kau faiako vaʻingá ko e tokotaha vaʻinga lelei tahá ia.
Naʻe fokotuʻu ʻe he polokalama tokoní ke foki mai ʻa e fānau akó ʻi he taʻu takitaha ke nofo mo honau fāmili totonú ʻi he faʻahitaʻu māfaná. Naʻe ʻikai saiʻia ʻa Maeta ia ke foki ki ʻapi pe nofo ʻi ha taimi mo ʻene faʻē palopalema ko ʻEveliní. Ka naʻe tui ʻa Vena naʻe mahuʻinga ke kei fetuʻutaki ʻa Maeta mo hono tupuʻangá mo ne fakalotolahiʻi ke tohi ki ʻapi ʻi he māhina kotoa. Ko e taimi kotoa pē naʻe hoko ai ʻa e taimi māfaná, naʻe fononga pasi ʻa Maeta ki ʻAlesona.
ʻI he faʻahitaʻu failau ʻo e 1970, ʻi he fakaʻosi ʻe Maeta hono taʻu hono ua ʻi he ako māʻolungá, naʻé ne fanongo kuo vela ʻa e fale ʻo ʻene faʻeé. Naʻe ʻikai lavea ha taha, pea naʻe ʻikai toe tokanga ʻa Maeta ki hono fāmilí. Ka, naʻe tokoni ʻa Vena kia Maeta ʻo fakatau ha ngaahi meʻa ke fetongi ʻa e ngaahi meʻa naʻe mole mei hono fanga kiʻi tuongaʻané mo e tokouá ʻi he velá.
Ko e ʻaho naʻe mavahe ai ʻa Maeta ki ʻAlesoná, naʻe tuku ia ʻe Vena ki he tauʻanga pasí mo ha ngaahi puha pepa, naʻe fonu meʻakai, vala, mo e ngaahi sipi kafu. Naʻá ne pehē, “Ko e meʻa ʻeni maʻa ho fāmilí. Ko e meʻa ʻeni mei hotau uōtí.”
Ko e taimi naʻe sio ai ʻa Maeta ki hono fakaheka ʻo e ngaahi puhá ki he tukuʻanga meʻa ʻi he pasí, naʻe ongo moʻoni kiate ia. Ko e taimi naʻá ne fuofua tūʻuta ai ki Kalefōniá, naʻá ne huʻuhuʻu ʻi he angaʻofa ʻa e kakai ʻUliʻulí, mo fifili naʻa ko ʻenau tali pē ia ke ne fai ʻenau ngaahi ngāue fakaʻapí. Ka kuo aʻu ʻo ne ʻiloʻi naʻa nau tokanga kiate ia. Naʻe ʻikai ke ne ʻilo ʻa e lahi ʻo e ʻofa hono fāmili ohí ʻiate iá kae tālunga ʻene sio ki he ngaahi puhá.
Pea naʻe ʻikai ke ne ʻilo ʻa e lahi ʻo ʻene ʻofa ʻiate kinautolú.
Kimui ange ʻi he taʻu pē ko iá, naʻe feinga ʻa e tokotaha taʻu hongofulu mā ono ko Kasuhiko Iamasitá ke hola mei he vela ʻo e laʻaá ʻi ʻOsaka ʻi Siapaní. Naʻá ne fononga laulau houa mo hono tokoua lahi hake ko Masahitó ki ha Fakaʻaliali Lahi 70, ko ha fakaʻaliʻali ʻa māmani naʻe ʻi ai ha ngaahi meʻa fakavaleloto mo ha ngaahi palepale mei he ngaahi fonua mo ha ngaahi kautaha ʻi he kolopé. Ko hono taumuʻá ko e, “Fakalakalaka mo e Melino ʻa e Faʻahinga ʻo e Tangatá,” pea ko e tapa kotoa pē naʻe vakai ki ai ʻa e kau ʻaʻahí, naʻe lava ke nau sio ki he fakaofo ʻo e fakaakeake ʻa Siapani mei he taʻau ʻo e Tau Lahi ʻa Māmani Hono ll.
Naʻe ʻosi ʻaʻahi fakataha ʻa Kasuhiko mo Masahito ki ha ngaahi fakaʻaliʻali ʻe niʻihi. ʻI he Palepale ʻa e ʻIunaiteti Siteití, naʻá na sio ai ki ha taha ʻo e ngaahi fakaʻaliʻali manakoa tahá: ko ha foʻi maka ʻo e māhiná naʻe ʻomai mei he tūʻuta fakahisitōlia ʻi he māhiná, ʻi he taʻu kimuʻá.
Ka ʻi he ʻaho ní naʻe mavaeua ʻa e ongo tautehiná, ʻo kumi ʻe Masahito ia ʻa e ngaahi fakaʻaliʻali fakaʻenisiniá kae mavahe atu ʻa Kasuhiko ia ʻi he feituʻu ʻo e fakaʻaliʻalí mo ʻene meʻa-faitaá. Naʻe fie ʻalu ʻa Kasuhiko ia ki he loto Palepale ʻa Siapaní ke sio pe ko e hā ʻa e faʻahinga fakaʻaliʻali naʻe tuku atu ʻe hono fonuá ki māmaní. Ko e taimi naʻá ne aʻu ai ki he palepalé, kuo fuʻu lōloa ʻa e laine ia ʻi tuʻá mei he hūʻangá. Naʻe talaange ʻe ha taha ngāue ko e tatalí ʻe ala houa ʻe ua pe lahi ange.
Naʻe ʻikai ke tuʻu fuoloa ʻa Kasuhiko ʻi he laʻaá, kae hoko atu ia, ʻo lue ʻi ha meimei miniti ʻe nima pe hongofulu kimuʻa peá ne toki fakatokangaʻi ha palepale naʻe hangē ha fale hinehina fakaʻofoʻofá. Naʻe fungavaka ua mo ha taua māʻolunga mo ha ʻīmisi koula ʻo ha tangata ʻokú ne puhi ha talupite. Naʻe ʻikai ke ʻilo ʻe Kasuhiko ia pe ko e hā ʻa e palepalé, ka naʻe ʻikai ke ʻi ai ha laine ai, pea he ʻikai leva ke ne toe tatali ke hū ki loto.
Naʻá ne fakalaka atu ʻi ha ngoue hangē ha ngoue faka-Siapaní, ʻo hū ki ha tataliʻanga naʻe tānaki ki ai ʻe ha tokotaha takimamata ia mo ha niʻihi kehe ki ha kulupu takimamata. Naʻe ʻikai fuoloa kuo ʻilo ʻe Kasuhiko, ko e palepalé, naʻe tukuange mai ai ha fakamatala ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻe ʻosi fakaʻaliʻali ʻe he Siasí ha ngaahi meʻa manakoa ʻi ha ngaahi fakaʻaliʻali fakaemāmani lahi kehe, ka ko e fuofua taimi ʻeni naʻe ʻomi ai ha palepale ki ha fonua naʻe ʻikai ko e tefitoʻi tui fakalotú ʻa e tui faka-Kalisitiané. Naʻe ʻi he ʻuluaki fungavaká ha tatau māpele fute ʻe hongofulu mā ua, ʻo e Christus, ko ha maka fakamanatu naʻe ʻai ʻe he tangata tā tongitongi Tenimaʻake ko Pēteli Tōvalatiseni (Bertel Thorvaldsen). Naʻe ʻi ai foki mo ha fakaʻaliʻali tā ʻo e ngaahi ngāue fakaʻaho ʻa e kau mēmipa ʻo e Siasí ʻi Siapaní.
Naʻe siasi faka-Puta ʻa e fāmili ʻo Kasuhikó, pea naʻe ʻikai ke ne ʻilo ha meʻa fekauʻaki mo Sīsū Kalaisi pe ko ha Tamai Hēvani. Ka ʻi he hili ʻo ʻene hiki mo e kau fakaafe kehé ki he fungavaka hono ua ʻo e palepalé, naʻa nau hū ʻi ha ngaahi loki naʻe akoʻi ai kinautolu ki he ngāue ʻa e Fakamoʻuí mo Hono fatongia ʻi he Fakatupu ʻo māmaní. Naʻa nau ako ki he palani ʻo e fiefia ʻa e ʻOtuá mo e Fakafoki mai ʻo e Ongoongolelei ʻo Kalaisí ʻi he talavou ko Siosefa Sāmitá.
Naʻe fakaʻosi ʻa e ʻaʻahí ki ha kiʻi loki heleʻuhila mo ha foʻi filimi faka-Siapani nounou ʻo e Fekumi ki he Fiefiá, ko ha filimi nounou naʻe ʻuluaki huluʻi ʻe he Siasí ʻi he Fakaʻaliʻali ʻa Māmani ʻi Niu ʻIoke ʻi he 1964. ʻI he kole ʻa e taki fakamisiona ko ʻEti mo Sieko ʻOkasakí, naʻe huluʻi fakalotofonua ai ʻa e filimi faka-Siapaní mo ha kau Siapani ʻiloa ʻoku nau fakatātaaʻi, ko hanau niʻihi naʻe ʻilo ʻe Kasuhiko. Ka ko e ngaahi fehuʻi naʻe ʻohake ʻi he foʻi filimí—Kuó ne haʻú mei fē? Ko e hā ʻokú ne ʻi heni aí? Ko ʻene ʻalú ki fē?—naʻe foʻou ia ki ai. Kuo teʻeki ke ne teitei fakakaukauʻi kinautolu. Pea naʻe ʻikai ke ne fakapapauʻi pe naʻe tui ki he ngaahi tali naʻe ʻoange ki ai ʻi he palepalé.
ʻI he hū atu Kasuhiko mei he loki heleʻuhilá, naʻá ne fakatokangaʻi ha tangata naʻe tuʻu ʻi he holó.
“ʻOkú ke tui ki ai?” Ko e fehuʻi ia ʻa Kasuhikó, ʻo ʻuhinga ki he filimí.
Talaange ʻe he tangatá ʻo ʻikai toe momou, “ʻIo, ʻoku ou tui ki ai.”
“ʻOkú ke fakapapauʻi?”
Naʻe ʻalu ʻa Kasuhiko mei he palepalé mo hoko atu ʻene vakai ki he fakaʻaliʻalí, ka naʻe ʻikai ke ne mamaʻo kuó ne fakatokangaʻi naʻe ngalo ʻene meʻa-faitaá. Naʻe fakatovave atu leva ki he fakaʻaliʻalí ʻa ia naʻe maʻu ai ʻe ha tokotaha ngāue ʻa e meʻafaitā naʻe molé.
Ke fakahaaʻi ʻene houngaʻiá, naʻe fakatau ai ʻe Kasuhiko ha tatau faka-Siapani ʻo e Tohi ʻa Molomoná pea tuku hono hingoá mo e tuʻasilá ʻi he tokotaha ngāué, neongo naʻe ʻikai ke ne fuʻu tokanga ke ʻilo lahi ange moʻoni ki he Siasí.
ʻOsi ha māhina ʻe tolu mei ai, kuo tuʻu atu ha ongo faifekau ki hono ʻapí mavahe mei Tōkioó. Naʻe ʻikai ʻamanaki ia te na aʻu ange moʻoni, ka naʻe fiefia ke sio kiate kinaua—mo fie fanongo ki he meʻa te na fakamatalá.
ʻI Sepitema ʻo e 1970, naʻe tuʻu ai ʻa e palesiteni lahi ʻo e Fineʻofá, a Pele Sipāfooti, ʻi he Tāpanekale Sōlekí ʻi muʻa ʻi ha kakai fefine ʻe lauiafe ʻo e Ngaahi ʻAho Kimui Ní, ʻi he konifelenisi fakataʻu ʻa e Fineʻofá. Naʻe faʻa hoko ʻa e meʻá ni ko ha taimi ʻo e fiefia, ʻi he fakatahataha mai ʻa e houʻeiki fafiné mei he funga ʻo e māmaní ke vahevahe ʻenau ngaahi aʻusiá mo maʻu ha fakahinohino mei honau kau takí. Ka, ko e konifelenisi ko ʻení naʻe mafatukituki ange ʻi he ngaahi konifelenisi kehé.
Naʻe pehē ʻe Palesiteni Sipāfooti, “‘Oku tau moʻui ‘i ha kuonga ‘oku fakahoʻata ʻaki ʻa e palopalema ki he palopalema.” ʻI he ʻIunaiteti Siteití, naʻe huluʻi ʻa e ngaahi ʻata ʻo e taú mo e taʻe-manonga fakatokolahí ʻi he ngaahi televīsoné ʻi he ʻaho kotoa. Naʻe lahi ʻa e fekainaki ʻi he laulanú, pea naʻe fakaʻohovale ki he puleʻangá ʻa e fakapoongi ʻo e kau ngāue fakapolitikale māʻolungá mo e kau taki ki he totonu ‘a e kakaí. Naʻe kei fakafepakiʻi ai pē ʻe he toʻu kei talavoú ʻa e Tau ʻi Vietinemí. Naʻe hangē naʻe mahuʻi atu ʻa e melinó mo e nongá.
Ko e Fineʻofá naʻe ʻi ha taimi ʻo e liliu ʻi he fakaangaanga ʻa e houalotú ki he fakafekauʻakí ‘i he Siasí. ʻI he kuohilí, naʻe kumi ʻe he kau mēmipa ʻo e Fineʻofá ʻenau paʻanga pē ʻanautolu mo fokotuʻu ha patiseti naʻe toki fakangofua ‘i he taimi ko iá ʻe he kau taki lakanga fakataulaʻeikí. Ka, kimuí ni maí, naʻe fakahā ʻe he Kau Palesitenisī ʻUluakí ʻe fakapaʻanga ʻa e Fineʻofá ʻe he ngaahi patiseti fakauōtí mo fakasiteikí.
ʻI he founga foʻoú, ʻe vahe ʻe he kau taki lakanga fakataulaʻeiki fakafeituʻú ki he houalotu takitaha ʻi he uōtí ha paʻanga pau ke fakaʻaongaʻi ʻi he taʻu kotoa pē. ‘E hoko atu ‘a e ngaahi houalotu Fineʻofá takitaha ke puleʻi ʻa e founga ʻenau fakaʻaongaʻi ʻa ʻenau paʻangá kae ʻikai toe mafasia ʻi he fatongia ke kumi paʻanga maʻa ʻenau houalotú. Ka koeʻuhí kuo fakangatangata ʻeni ʻa e Fineʻofá ʻaki ha paʻanga pau, naʻe mole ai ha niʻihi ʻo ʻenau tauʻatāina fakapaʻanga naʻa nau maʻu ʻi he ngaahi taʻu kimuʻá. Naʻe ngata foki heni ʻa e ngaahi pasā ʻa e Fineʻofá, ngaahi polokalama kumi paʻanga fakaʻeiʻeiki naʻe fakaʻaliʻali ai ʻe he kakai fefiné mo fakatau ʻa e ngaahi ngāue fakameaʻá.
Naʻe ʻi ai mo ha ngaahi liliu kehe naʻá ne uesia hono tokangaʻí. Ko ha konga ʻo e ngaahi ngāue tokoni ʻa e Fineʻofá, naʻe tokangaʻi ai ʻe he Fineʻofá ʻa e Polokalama Kumi Nofoʻanga ki he Fānau Ako ʻInitiá, tafaʻaki ohi mo tauhi fakalao ʻa e Siasí pea mo ha polokalama fakaakeake ki he toʻu tupu palopalemá. Ka ko e ngaahi polokalama ko ʻení naʻe meimei ke fakangatangata hano konga lahi ki he fakahihifo ʻo e ʻIunaiteti Siteití, pea ko e fakaʻamu ke fakalahi ʻa e polokalama tokoni fakasōsialé ki he kāingalotu kotoa ʻi he māmaní ʻo e Siasí naʻe ʻi he malumalu ia ʻo ha faʻunga fakafekauʻaki pē taha, naʻe fiemaʻu leva ke toe fokotuʻutuʻu.
ʻI he 1969, naʻe fokotuʻu ai ʻe he kau taki ʻo e Siasí ʻa e Ngaahi Vaʻa Tokoni Fakasōsiale Fakatahatahá (United Social Services), ʻo ne fakatahaʻi kotoa mai ai ʻa e ngaahi ngāue ko ʻení ki he malumalu ʻo e tuʻunga fakatakimuʻa ʻo e kau ʻōfisa lakanga fakataulaʻeikí. Naʻe kei hoko atu pē ʻa Palesiteni Sipāfooti ko e ʻetivaisa, ka naʻe ʻikai ke ne toe puleʻi ʻa e polokalamá.
ʻI he fakaangaanga ko ia ʻa e Fineʻofá ki he ngaahi liliú, naʻe anga fakafaingofua pē ʻa Palesiteni Sipāfooti mo hono ongo tokoní ki he ngaahi palopalema ʻe ala hoko, naʻa nau sio ki aí. Ko e taimi naʻa nau ʻilo ai kuo fakafatongia ʻa e Kōmiti Fakafekauʻaki Kakai Lalahí ʻaki hono faʻu ʻo e ngaahi lēsoni ʻa e Fineʻofá, naʻe lea hake leva ʻa e kau palesitenisií. Ko hono ikuʻangá, naʻe faʻu pē ʻe he Fineʻofá ʻenau lēsoni pē ʻanautolu kae tānaki atu mo vakaiʻi ʻe he kōmití.
Naʻe fakatokangaʻi ʻe Palesiteni Sipāfooti ʻa e fiemaʻu ke fakaangaanga ki ai ʻa e Fineʻofá ʻi he mafola ko ia ʻa e ongoongolelei kuo fakafoki maí ʻi he kolopé. Ko e makasini ʻa e Siasí ʻi he taimi ko ʻení, maʻá e kau laukonga fakavahaʻa-puleʻangá, naʻe liliu ki ha lea fakafonua ʻe hongofulu mā fitu. Ka ko e Makasini ʻa e Fineʻofá naʻe kei pulusi pē ʻi he lea faka-Pilitāniá mo e lea faka-Sipeiní.
Naʻe toki fokotuʻu heni ʻe he kau takí ha ngaahi liliu ki he paaki ʻo e ngaahi tohi ʻa e Siasí, ke tokoni ke aʻu ki ha kau laukonga lahi ange ʻe lavá ʻa e ngaahi pōpoaki kuo fakafekauʻakí. ʻI Sune ʻo e 1970, naʻa nau fanongonongo ai ko e lahi taha ʻo e ʻū makasini fakamuimui tahá, kau ai ʻa e Instructor, ko e New Era, mo e Makasini ʻa e Fineʻofá, ʻe mālōlō. Ko e ʻū makasini fuoloa mai ʻi he lea faka-Pilitāniá ʻi he ngaahi misioná, hangē ko e Millennial Star ʻi Pilitāniá mo e Cumorahʻs Southern Messenger ʻi ʻAfilika Tongá, ʻe ngata mo ia foki. ʻE fetongi kinautolu ʻaki hano pulusi ha makasini foʻou ʻe tolu, ʻo takitaha fakapatonu ki he kulupu fakatoʻu pau: ko e Ensign ki he kakai lalahí, ko e New Era ki he toʻu tupú, mo e Friend ki he fānaú.
Naʻe ʻilo ʻe Palesiteni Sipāfooti, ʻi heʻene tuʻu ʻi he Tāpanekalé mei he kakai naʻá ne fanongo ki aí, ko ha tokolahi ʻo e houʻeiki fafiné naʻa nau fāinga mo e ngaahi liliu kimui ní, hangē pē ko iá. Naʻe ʻosi maʻu ʻe heʻene kau palesitenisií ha ngaahi tohi mei he kakai fefine naʻe mamahi ʻi he ongoongo fekauʻaki mo e fakangata ʻo e makasiní. Pea naʻe lava ke mahino kia Palesiteni Sipāfooti ʻa ʻenau mamahí. Ko e taimi naʻe ʻuluaki fokotuʻu ai ʻa e foʻi fakakaukaú, naʻá ne fakafepakiʻi, heʻene ongoʻi naʻe fakahoko ʻe he makasiní ha taumuʻa mahuʻinga ʻi he Siasí pea ʻi he moʻui ʻa e houʻeiki fafiné. Ko e hā ʻe lava ke ne lea ʻaki ʻi he taimí ni ke fakahoko ha fakalelei mo ha fakafiemālié?
Naʻá ne toʻo ha fakamatala mei he Tohi ʻa Molomoná, ko ʻene taumuʻá: “Naʻa mau nofo ʻi he fiefia.” Naʻe ʻikai fakasiʻisiʻi ʻe he kakai ʻo Nīfaí ʻenau ngāué, ʻi heʻenau fehangahangai ai mo e taimi faingataʻá, . Naʻa nau tauhi ʻa e ngaahi fekau ʻa e ʻOtuá ki he lelei taha naʻa nau lavá. Pea naʻa nau kamata ke femoʻuekina, ʻo tauhi ʻa e ngaahi tākanga mo e fanga monumanu pea tūtuuʻi mo utu ʻa e ngoué.
ʻE lava mo e Fineʻofá ke pehē. Naʻe ʻikai ke fulihi ʻe he ngaahi liliu fakahoualotú ʻa e ngaahi meʻa naʻe fakaiku ki he fiefiá: ʻa e angatonú, tokoni ʻofá, vahevahe ʻo e talēnití, mo e ngāue mo e kakaí.
Naʻe fakamoʻoni ʻa Palesiteni Sipāfooti, “ʻOku ʻomai ʻe he Fineʻofá ha ngaahi faingamālie taʻe-fakangatangata, ke tanumaki ʻa e ngaahi ʻelemēniti mahuʻinga ʻo ha moʻui fiefia.”
ʻI Fēpueli ʻo e 1971, hili ia ha taʻu ʻe ono ʻo e ului ʻa Talaiasi Kuleí, naʻá ne nofo ʻi Sōleki Siti. ʻI heʻene hoko ko ha mēmipa ʻo e Siasí, naʻe fakafeohi ki ai ha Kāingalotu tokolahi ʻo nau fakamaheni ki ai mo tokoni ke fakaangaanga ki heʻene tui fakalotu foʻoú. Naʻá ne ʻosi fetaulaki foki mo ha kau mēmipa tokosiʻi ʻo e Siasí ʻa ia naʻa nau ngaohikoviʻi ia he ko e ʻUliʻuli. Ka naʻe pīkitai ki he ngaahi lea mahuʻinga naʻá ne ongona ʻi he pō kimuʻa pea papitaisó: “Ko e ongoongolelei ʻeni kuo fakafoki maí, pea ʻoku ʻamanaki ke ke kau ki ai.”
Naʻe ngāue ʻa Talaiasi ko ha taha faiongoongo ki he KSL-TV, ko ha kautaha faiongoongo ʻi he feituʻú. Kimuʻa peá ne maʻu ʻa e ngāué, naʻe ʻikai ke ne teitei fakakaukau ʻe ngāue ʻi he faiongoongó. Ka e fāifai pea fetaulaki mo ʻAsi Metiseni, ko e palesiteni ʻo e kautaha fetuʻutaki ʻa e Siasí naʻá ne tokangaʻi ʻa e KSL. ʻI he ʻilo ʻe Talaiasi naʻe anga fakakaumeʻa ʻa ʻAsi mo lea hangatonú, naʻá ne tali leva ʻa e ngāué. Naʻe hangē ia kuo tofa ange ʻe he ʻOtuá ha hala kiate iá.
Hili hono fakangāueʻi ʻo Talaiasí, naʻá ne feinga mataʻitohi leva ʻi he faiongoongó ʻi he ʻUnivēsiti ʻo ʻIutaá. Naʻá ne toe ngāue mālohi foki ʻi hono uooti ʻi Sōleki Sití mo hoko ko e taki ʻo e Lautohi Faka-Sāpaté. Naʻe fou ʻia ʻAsi haʻane fetaulaki mo Manulou Felēmingi, ko ha taha ʻo e Kāingalotu ʻUliʻuli ʻi he Ngaahi ʻAho Kimui Ní, naʻe ngāue ʻi he Hōtele ʻIutaá. Ko e uaifi ʻo Manuloú ko Falanisesi, ko ha toʻu tangata ʻaki ia hono fā ʻi he Siasí, mo e mokopuna ua ʻo Seini Mēningi Sēmisi. Naʻe fakaafeʻi [ʻa Talaiasi] ʻe he fāmili Felēmingí ke nau maʻu meʻatokoni efiafi, mo fakamatalaʻi mahino ʻenau ngaahi aʻusia ʻi he Siasí, pea fakafeʻiloaki ia ki ha kau mēmipa kehe ʻo e Kāingalotu ʻUliʻuli ʻi he Ngaahi ʻAho Kimui Ni ʻo Sōleki Sití.
Naʻe kau ʻi he kakai naʻe feʻiloaki mo Talaiasí ʻa Lusila Pengiheti, ko e ʻulumotuʻa ʻofeina ia ʻo e kakaí. Naʻá ne hangē ko Falanisesi Felēmingí, ko ha hako ia ʻo ha kau paionia ʻUliʻuli ʻi he Ngaahi ʻAho Kimui Ní pea naʻá ne tupu hake ʻi he Siasí. Naʻe toe feiloaki ai foki mo ʻIusini ʻOa, naʻe kau ki he Siasí ʻi he 1968 pea mali mo ha fefine naʻe fetaulaki mo ia ʻi ʻIutā, ko Leita Telikoti. Kuo fakahoko ʻeni ʻe ʻIusini mo Leita ʻa e kaimeʻakai ʻo e faʻahitaʻu māfaná ke tokoni ʻo fakafeohiʻi ʻa e ngaahi kaungāmeʻa ʻUliʻuli ʻi he feituʻú.
Naʻe tanganeʻia moʻoni ʻa Talaiasi ʻia Lūfini Pilitifooti, ko ha tangata ʻUliʻuli naʻe hiki mai ki ʻIutā ʻi he 1944 ko ha taha ngāue ki he vaʻa fakakautau ʻa ʻAmeliká. Naʻe kau ʻa Lūfini mo hono uaifi ko Helenaá ki he Siasí ʻi he 1953 pea ohi hake ʻena fānaú ʻi he tuí. Naʻe tanganeʻia ʻa Talaiasi ʻi he tuʻu maʻu, poto pulipulia, mo e ʻulungaanga lelei ʻo Lūfiní. ʻI he fakalau ʻa e taʻú, naʻe hoko ʻa Lūfini ko ha kaungāmeʻa mamae ʻo ʻEletā Tōmasi S. Monisoni mo e kau taki kehe ʻo e Siasí. Naʻá ne faʻa lea ʻi he ngaahi uōtí, siteikí mo ha misiona fekauʻaki mo e kau mēmipa ʻUliʻuli ʻi he Siasí.
ʻI ha ʻaho ʻe taha, naʻe maʻu ai ʻe Talaiasi ha telefoni meia Hepa Uolosī, ko e ʻulu ki he fetuʻutaki mo e kakaí ʻi BYU. Naʻá ne ʻilo ʻoku ngāue ʻa Talaiasi ʻi he KSL peá ne faʻa kole tokoni ki ai ʻi he taimi naʻe fehangahangai ai ʻa BYU mo e vālau fekauʻaki mo e laulanú.
Kimuí ni mai, naʻe siofi fakaʻāuliliki ʻe he kakaí ʻa e ʻunivēsití, ʻi he fakangatangata ʻa e Siasí ʻi he lakanga fakataulaʻeikí, pea naʻe faʻa fakahoko ʻi he taimi ʻe niʻihi ʻe he kau fakahāhāloto fakapolitikalé ha ngaahi laka fakahāhā mo ʻikai kau ʻi he ngaahi meʻa fakasipoti ʻa BYU. Naʻe toe lahi ange ʻa e taʻemanongá ʻi ʻOkatopa ʻo e 1969, ʻi ha kole ʻe ha kau vaʻinga ʻakapulu ʻUliʻuli ʻe toko hongofulu mā fā ʻi he ʻUnivēsiti ʻo Uaiomingí ke nau tui fakaʻilonga ʻuliʻuli ʻi honau nimá, ʻi he lolotonga ʻenau vaʻinga mo BYU. Naʻe tuli kinautolu ʻe heʻenau faiakó mei he timí, ʻo maʻu ai ʻa e tokanga ʻa e mītiá pea kamata ai ha ngaahi fakahāhāloto.
Ko ʻeni kuo uki ʻe he kau fakaʻaiʻai ʻi Uaiomingí ha toe laka fakahāhāloto, ka ʻi he taimi ko ʻení ʻi ha vaʻinga pasiketipolo mo BYU. Ko e taimi naʻe ʻilo ai ʻe he palesiteni ʻo BYU, ʻĒnesi L. Uilikinisoni ʻa e palaní, naʻá ne tuku atu ha tohi taukapoʻi ʻo e ʻunivēsití mo fekau ʻa Hepa ke talanoa mo e kau fokotuʻutuʻú. Ka naʻe fie talanoa ʻa e kau fakaʻaiʻaí ia mo ha mēmipa ʻUliʻuli ʻo e Siasí, ko e ʻuhinga ia naʻe tā ai ʻa Hepá ke kole pe ʻe lava ʻa Talaiasi ʻo puna vakapuna mai ki Uaiomingi.
“Fakakū?” Ko e fehuʻi ia ʻa Talaiasí.
Pehē ange ʻa Hepa, “ʻOi, ʻi he miniti ʻe tolungofulu ka hokó.”
Naʻe fakavavevave ʻa Talaiasi ki he malaʻe vakapuná ʻo maʻu atu. Ko e taimi naʻe aʻu atu ai ki he ʻunivēsití, naʻe ʻave fakavave ia ki ha fale fakatahaʻanga fonu. Naʻa nau tangutu ʻi honau nofoʻangá, fehangahangai mo e kau taki ʻo e kau fakaʻaiʻaí. Naʻe malimali pē ʻa Talaiasi, ka ʻi heʻene tali ʻenau ngaahi fehuʻí, naʻe lava ke ne tala ʻoku ʻi ai hanau niʻihi naʻe ʻikai ke nau fiefia ʻi heʻene taukapoʻi ʻa e Siasí. Ka, naʻá ne fakapapauʻi ʻe faitotonu kiate ia mo ʻene tuí.
Lolotonga ha fakataha ʻe taha ʻi he fakaʻosinga ʻo e uike ko iá, naʻe tukuakiʻi ai ʻe ha taha ʻa Talaiasi ʻokú ne fakangalivaleʻi hono matakalí ʻi heʻene kau ki he Siasí. Tali ange ʻe Talaiasi, “Naʻe fanauʻi au ko e ʻUliʻuli. ʻOku ou kei ʻUliʻuli pē. Te u mate ko e ʻUliʻuli. ʻOku ou laukau ʻaki hoku tukufakaholo ko e ʻUliʻulí. Pea te u ʻekeʻi ʻa e ngaahi taumuʻa totonu ʻo e ʻUliʻulí ʻaki ʻa e mālohi kotoa ʻoku ou maʻú.”
Pea kiʻi longo leva. Peá ne tānaki fiefia ange, “Ko e Māmonga foki au. Kuo tali ʻe he siasi Māmongá kiate au ʻa e meʻa kuo ʻikai ke u maʻu ʻi ha toe feituʻú. ʻOku ʻikai ha fepaki ia ʻo e lanu hoku kilí mo ʻeku tui fakalotú.”
Neongo ʻa e siʻi feinga ʻa Talaiasi mo Hepá, ka naʻe fakahāhāloto ʻa e fānau ako Uaiomingí kimuʻa pea ʻi he lolotonga ʻo e vaʻingá. ʻI he vakai ʻa Talaiasi kiate kinautolú, naʻá ne ongoʻi fakaʻofaʻia ʻi heʻenau holi ke tuʻunga tatau fakamatakalí, ka naʻe ʻikai ke ne fakakaukau naʻe mahino kakato kiate kinautolu ʻa e Siasí pe ko hono ngaahi akonakí.
Naʻá ne fakakaukau kimui ange, “Kapau naʻa nau fie fakahāhāloto fakalūkufua ʻi he laulanú mo e taʻe-tuʻunga tataú ʻi ha feituʻu pē, kae ʻikai ko e ngaahi tefitoʻi moʻoni ʻo e tui faka-Māmongá, naʻá ku mei loto-fiemālie ke kau mo kinautolu.”
ʻI he ʻaho 19 Sānuali 1971, naʻe toʻo ai ʻe ʻAnitoni ʻOpina ko ha faiako taʻu fāngofulu mā ua mei Naisīlia, ha peni mo ha laʻi pepa lanu pulū ke fai ha tohi ki he palesiteni ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻá ne tohi, “Kuó u ʻosi lau ha ngaahi tohi ʻi he fekumi ki ha fakamoʻuí, pea kuo fāifai ʻo u maʻu ʻa e talí”
ʻI he lolotonga ʻo e ngaahi taʻu siʻi kuohilí, naʻe meimei ke nofo pē ʻa ʻAnitoni mo hono uaifi ko Fiteliá pea mo siʻena fānaú ʻi honau falé kae hoko takatakai ʻa e tau fakalotofonua ʻa Naisīliá. ʻI ha ʻaho ʻe taha, ʻi he foua ʻe ʻAnitoni ʻa e ngaahi houa lōloa ʻo e taʻepaú, naʻá ne fakaava ai ha makasini motuʻa ʻo sio ki ha faʻahinga meʻa naʻe ʻikai ke ne ʻamanaki ki ai: ko ha tā ʻo ha fale sima fakaʻofoʻofa māʻolunga, mo ha ngaahi taua lalahi.
Naʻá ne ʻosi sio tuʻo taha ʻi he falé kimuʻa—ʻi ha misi naʻá ne maʻu pea toki kamata ʻa e tau fakalotofonuá. Naʻe tataki ia ʻe he Fakamoʻuí, ʻi he misí, ki ha fale mātuʻaki fakaʻofoʻofa. Naʻe fonu kakai, pea naʻa nau teunga hina kotoa.
“Ko e hā ʻeni?” Ko e fehuʻi ia ʻa ʻAnitoní.
Tali ange ʻe he Fakamoʻuí, “Ko e kakai ʻeni ʻoku ō ki he temipalé.”
“Ko e hā ʻa e meʻa ʻoku nau faí?”
“ʻOku nau lotu. ʻOku nau lotu maʻu pē heni.”
Ko e taimi naʻe ʻā ai ʻa ʻAnitoní, naʻá ne fakaʻamu ke ne ʻilo lahi ange ki he ngaahi meʻa naʻá ne mamata ki aí. Naʻá ne toe fakamatala ʻa e misí kia Fitelia mo hono ngaahi kaungāmeʻá, mo ʻeke pe ko e hā haʻanau fakakaukau ki hono ʻuhingá. Naʻe ʻikai ha taha ʻe lava ʻo tokoni ki ai. Fāifai peá ne kole tokoni ki ha faifekau. Naʻe ʻikai ke lava mo e faifekaú ke fakaʻuhingaʻi ʻa e misí, ka naʻá ne talaange kia ʻAnitoni kapau ko e misí mei he ʻOtuá, ʻe tali ʻene ngaahi fehuʻí ʻi ha ʻaho.
Ko e taimi pē naʻe mamata ai ʻa ʻAnitoni ki he ʻīmisí ʻi he makasiní, naʻá ne ’ilo kuo maʻu ʻa ʻene talí. Naʻe ʻi ʻolunga ʻi he taá ha fakamatala ko e temipale ʻi Sōleki Sití.
Naʻe kamata ʻa e fakamatalá, “Ko e kau Māmongá—ʻoku ʻiloa fakaʻofisiale ko e kau mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní—ʻoku kehe.” Naʻá ne fakamatala ʻa e hisitōlia ʻo e Siasí mo fakamatalaʻi ha niʻihi ʻo hono tefitoʻi tokāteliné. Pehē ʻe he fakamatalá, “Ko ha founga kakato ia ʻo e moʻuí. Ko e kihiʻi mofisi fakalotu ko ia ʻokú ne tafunaki ha vela ʻo e faʻahinga ngāue ʻa e kakai peheé, ko ha tui ko e taha kotoa ʻi he māmaní ko ha foha pe ʻofefine ʻo e ʻOtuá.”
Naʻe ʻai ʻe he fakamatalá ke lele ʻa e fakakaukau ʻa ʻAnitoní. Naʻá ne nofo ofi pē ki hono ngaahi tokouá, peá ne tānaki fakataha leva kinautolu mo fakamatala ange fekauʻaki mo e taá pea mo ʻene misí.
Naʻe ʻeke ange ʻe hono tokoua ko Falanisisí, “ʻOkú ke fakapapauʻi nai ʻa e fale ko iá?”
Naʻe fakapapauʻi ʻeni ʻe ʻAnitoni.
Meʻapango, he naʻe teʻeki ai ke lava ʻo tohi ki he hetikuota ʻo e Siasí ʻi he taimi ko iá koeʻuhí ko e tapu ʻo e taimi taú. Pe naʻá ne ʻilo ha taha ʻo e ngaahi faiʻanga lotu teʻeki fakaʻofisiale ʻo e Kau Māʻoniʻoni ʻi he Ngaahi ʻAho Kimui Ní ʻi Naisīliá. Ko hanau tokolahi naʻe movete ʻi he lolotonga ʻo e taú, ʻo ʻikai ke nau toe fetuʻutaki pea pehē mo e Siasí. Ko ha kakai tui ʻe niʻihi, hangē ko ʻŌnesi Sione ʻĪkongó, naʻe ʻikai ha toe ongona mei ai. Ka kuo ʻosi ʻeni ʻa e taú, pea naʻe ʻikai ha meʻa te ne taʻofi ʻa ʻAnitoni mei he fetuʻutaki ki he Siasí.
ʻI he hoko atu ʻa e tohi ʻa ʻAnitoni ki he palesiteni ʻo e Siasí, naʻá ne fakahaaʻi ai ʻene fakaʻamu ke ʻi ai ha kiʻi kolo ʻo e Siasí ʻi hono koló. Naʻá ne tohi, “Ko e tui faka-Māmongá ʻoku makehe ia ʻi he ngaahi tui fakalotú”.
ʻOsi ha ngaahi uike siʻi mei ai, kuó ne maʻu ha tohi. ʻOku pehē, “ʻI he taimi lolotongá ʻoku ʻikai ke ʻi ai haʻamau kau fakafofonga fakaʻofisiale mei Sōleki Siti ʻi homou fonuá. Kapau ʻokú ke loto ki ai, te u fiefia ke fetohiʻaki mo koe ʻi he ngaahi meʻa ʻokú ke tokanga ki ai fekauʻaki mo e ngaahi akonaki fakalotu ʻa Sīsū Kalaisí.”
Naʻe fakamoʻoni hingoa ʻi he tohí ʻa Lamā Uiliami, ʻo e Potungāue Faifekaú.