Te hoê reo iti ha‘iha‘i e te hoê aau ‘aereere
Na te hoê reo iti ha‘iha‘i e te aau aereere e faaite papû i te temeio o te faaho‘i-faahou-raa mai.
I te matahiti 1995, ua anihia vau ia horo‘a i te hoê paraparauraa i roto i te hoê haapiipiiraa no te ihi i Roto Miti no ni‘a i te maa a te tamarii. E iva ahuru ma ono feia ite no na fenua e 24 o tei haere mai. A hi‘ohi‘o ai au i te amuiraa, ua faahiahia vau i te feia o te mau fenua o tei amui mai, e itehia to ratou ĕraa na ni‘a i to ratou ahu, to ratou iri, te reo e te tahi mau huru taa ê.
E toru e aore râ, e maha ava‘e i muri mai, ua haere atu vau i te hoê amuiraa tĭtĭ i te pae hiti‘a o te râ no te Hau Amui no Marite. Te parahi ra vau i mua no te faaineine no te putuputuraa na te feia faatere no te autahu‘araa, ua tomo maira te hoê taata no Afirika e parahi atura i te hiti o te e‘a haereraa. E au e ua ite au ia’na, aita râ vau e haamana‘o faahou ra e, i hea. Ui atura vau i te peresideni tĭtĭ o vai teie taata. Pahono maira te peresideni e, « E ere oia i te melo no te Ekalesia. E ratere teie taata, e e orometua haapii no Afirika mai e e haapii oia i roto i te hoê fare haapiiraa roo-rahi o to ratou oire. Tau ava‘e i ma‘iri, ua haere nâ oia i te hoê haapiipiiraa na te ihi i Roto Miti. Ua rave oia i te hoê buka iti na te Ekalesia, o tei arata‘i ia’na i te tai‘o i te mau mea’toa no ni‘a i te Ekalesia. E te haere mai nei oia i te mau putuputuraa’toa » . Ma te ataata, parau maira te peresideni tĭtĭ e, « Eita vau e maere ahiri e nehenehe oia e haere atoa i te mau pureraa a te Sotaiete Tauturu. »
I muri mai i te putuputuraa a te feia faatere no te autahu‘araa, ua farerei au i teie orometua ratere. Ua faaite mai oia i to’na popou no teie puna apî o te oaoa i iteahia e a’na. Ua parau mai oia e, tei Afirika noa ra to’na utuafare, e te haapiihia ra e te mau misionare e e tae mai ratou i Marite nei i roto noa e maha hebedoma, e e bapetizo-amui-hia ratou.
I muri mai i te putuputuraa o te Mahana Maa a te feia paari, ua haere vitiviti roa mai teie taata e farerei ia‘u ma te tupa‘ipa‘i i to’na ouma e parau maira, « Te ‘aereere rahi nei to‘u aau. Mai te mea ra e, ua faaru‘e to‘u mafatu i to‘u tino. Aita vau i ite e nehenehe anei au e tia’i i teie na hebedoma e maha ia bapetizo-amui-hia matou. » Tamărû atura vau ia’na e parau atura ia tia’i i ta’na vahine e i ta’na mau tamarii, ia bapetizo-amui-hia ratou.
A horo tapuni ai Elia no te imi i to’na ora i teie arii vahine ino no Iezebela, ua arata‘i atura te Fatu ia’na i ni‘a i te hoê mou‘a no te faaite ia’na i te hoê iteraa. A ti‘a’i Elia i ni‘a i te mou‘a i mua i te Fatu, « O te mata’i rahi ihora e te etaeta… aita râ Iehova i roto i taua mata’i ra; e mure a’era te mata’i, o te aueue fenua ihora; aita râ Iehova i roto i taua aueueraa fenua ra: e oti a’era te aueueraa fenua, e auahi; aita râ Iehova i roto i roto i taua auahi râ: e oti a’era te auahi, e reo iti haihai maira, tei reira Iehova » (1 Te Mau Arii 19:11-12).
E ui pinepinehia vau e te feia e ere i ta tatou faaroo e, no te aha ta tatou Ekalesia i tupu vitiviti roa’i i roto i teie na pae e piti, te meloraa e te mau ohipa faaoaoaraa, area vetahi mau ekalesia ra, te topa’tura ïa i na pae e piti nei. E mea ohie roa te pahonoraa i teie uiraa, o te hoê reo iti ha‘iha‘i e te hoê aau ‘aereere. I roto i teie ao ohipa, ahoaho, e te maniania, e ere ïa mai te mata‘i, e ere mai te auahi, e ere mai te aueueraa fenua o te hoê râ reo iti ha‘iha‘i, e reo iti e haro‘aro‘ahia, o te faatupu i te aau ‘aereere. E reo o te faaahu i roto i te aau e, o teie te evanelia mau a Iesu Mesia i faaho‘i- faahou-hia mai, e te îraa o ta’na mau haapiiraa, te autahu‘araa, e te mau fafauraa o tei mo‘e na i roto i te mau tenetere o te poiri e te taa-ore-raa. Oia mau, o te reo iti ha‘iha‘i e te aau ‘aereere o te haapapû i te semeio o te faaho‘i-faahou-raa mai.
Na te hoê reo iti ha‘iha‘i e te hoê aau ‘aereere e faaanaanatae nei e rave rahi milioni melo ia pee i te hi‘oraa o te oraraa o Iesu i te parau, i te ohipa, e i te taviniraa. Na te hoê reo iti ha‘iha‘i e te hoê aau ‘aereere e faaanaanatae nei i te feia o tei faatuhaahia ia tavini ei mau misionare no te maororaa 18 ava‘e e aore râ, hau atu. E vaiiho ratou i te hiti to ratou oraraa au maitai no te haere i roto i te ao e tavini ia vetahi ê ma te aufau i ta ratou iho mau haamau‘araa o te nehenehe e parauhia e, e faatusiaraa faufaa, no te tavini pinepine i te mau tuhaa atea o te ao nei i reira te pape hopu ve‘ave‘a e te mau ro‘i au maitai e vai ai i roto i te haamana‘oraa.
Na te hoê reo iti ha‘iha‘i e te aau ‘aereere e horo‘a i te mau tane e i te mau vahine e rave rahi, te hiaai i te vaiiho i ta ratou mau ohipa imiraa moni, e vaiiho i ta ratou mau haapiiraa (i te tahi taime e vaiiho i ta ratou mau tu‘aroraa e i ta ratou mau moni pute) e aore râ, ia faanuu i to ratou faaipoiporaa, no te tavini i te Fatu – na roto i to ratou iho pute – no te poro i te faaho‘i-faahou-raa mai o te evanelia. Na teie reo iti ha‘iha‘i e te aau ‘aereere e faatupu nei i te hinaaro e te itoito i ta tatou feia apî ia vai mâ noa, ia vai parau-ti‘a noa i te mau parau tumu, e tae noa’tu i te hoo o te mau mea e haamaamaahia e i faaru‘e-hia. Na teie reo iti ha‘iha‘i e te aau ‘aereere e faatupu nei i te popou i te haapa‘oraa i te mau faaue a te Atua e ia amo i te mau teimaha o te feia o tei ‘ere i teie mau mea. Oia mau, te vaira te mana i roto i teie reo iti ha‘iha‘i e i te aau ‘aereere.
E rave‘a ta Alama no te ui i te mau huru varua o to tatou aau. Teie ta’na uiraa, « Ua fanau-varua-hia anei outou i ta te Atua ra ? » e « Ua roaa anei ia outou to’na hoho‘a i to outou mata na ? Ua itea anei ia outou taua faahuru-ê-raa rahi ra i roto i to outou aau na ? » (Alama 5:14; haapapûraa i faahauhia’tu). Oia ho‘i, ua ‘aereere anei to outou aau i te hoê iteraa papû no Iesu Mesia ?
E faaite au ia outou e toru mea i roto i te rahiraa o te mau mea tei faaaereere i to‘u aau ? A tahi, ua ‘aereere to‘u aau i te iteraa e, o Iesu Mesia to‘u Faaora e ua rava‘i To’na here no‘u i mamae ai Oia i te mauiui mana‘o-ore-hia e tae noa’tu i te pohe. Ua ‘aereere to‘u aau i roto i te ano rahi o to‘u feruriraa hohonu i mana‘o ai au e, e nehenehe au e tamâhia, e e faaorahia na roto i te toto o Iesu Mesia. Ua ‘aereere to‘u aau ia hi‘o vau i te hoo i aufauhia – te mamae o Ta’na i farii no te faaora ia‘u ia ore au e mauiui i ta‘u mau hara e i ta‘u mau ofatiraa i te ture.
A piti, ua ‘aereere to‘u aau i te iteraa e, ua haere te hoê tamaiti apî 14 matahiti i roto i te hoê uru raau e na roto i te hoê pure ohie e te haehaa, ua iritihia te ra‘i, e ua fâ mai te Atua e te Mesia, e ua pou mai te mau melahi. E inaha, ua faaho‘ihia mai te îraa o te evanelia a Iesu Mesia e te mau autahu‘araa, te mau fafauraa, e te ateate o te parau haapiiraa. Ua ‘aereere to‘u aau ia feruri au i teie tamaiti apî i te faaoroma‘iraa no te hopoi mai i te îraa o te evanelia tei faaho‘ihia mai. A pou mai ai te mau melahi, ua ohipa atoa te mau melahi a Satane. Ua haamata te mau hamani-ino-raa e mai te mau peropheta i tahito ra, ua mou te ora o Iosepha na roto i to’na haapohe- raa-hia. I roto i to’na mau tamataraa e to’na mau hamani-ino-raa, ua tape‘a mau papû teie peropheta apî.
Na roto i te peropheta Iosepha Semita, ua maramarama faahou atu â vau i te taraehara a te Mesia. Na roto i te peropheta Iosepha, ua papû atura vau i te auraa no te Aua o Getesemane – te hoê vahi no te mamae rahi a rave faaoti ai te Mesia i to tatou oto eiaha noa no ta tatou mau hara no to tatou atoa râ mau mauiui, mau huma, mau tamataraa e mau ati. Ua maramarama vau i te auraa e te natura mure ore o Ta’na tusia rahi e te hopea. Ua maramarama vau i teie nei i te here o to tatou Faaora hi‘oraa-maitai i roto i Ta’ na faaoraraa hopea. Na roto ia Iosepha Semita, ua rahi to‘u here e to‘u popou i te Faaora, e e auraa mau atura to ta‘u haamoriraa. I roto i te mau himene atoa o ta tatou buka himene, ua papa‘i W. W. Phelps, i teie mau parau mataro-mau-hia e, « Auê te taata i parau ia Iehova ! » (« Auê te Taata », Himene no. 16). E ‘aereere to‘u aau ia himene au i teie himene.
Oia mau, ia himene tatou i teie himene anaanatae e te oaoa, « Auê te taata i parau ia Iehova », e himene ïa tatou no te Faaora na roto i te faatura, te aehuehu, e te popou i teie mau parau: « E mea maere To’na poheraa no tatou atoa ! E mea maere, Maere ia‘u nei ! » (« Te Maere Nei Au », Te mau Himene, no. 111). E ‘aereere to‘u aau no te maramarama o ta te peropheta Iosepha i hopoi mai i roto i to‘u oraraa no ni‘a i te faufaa o te Taraehara o to‘u Faaora.
A toru, e ‘aereere to‘u aau ia tai‘o e ia feruri hohonu vau i te mau papa‘iraa o te Buka a Moromona, no te faahoperaa i te Bibilia e i te haapapûraa i te mo‘araa o Iesu Mesia ei Tamaiti na te Atua, te Ora e te Faaora o te ao nei. Na roto i teie hoa mo‘a o te Bibilia, ua rahi atu â to‘u maramarama i te mau parau haapiiraa a te Mesia, noa’tu e rave rahi mau uiraa e aita e pahonoraa i roto i te Bibilia ua tatarahia ïa i to‘u nei iteraa. Ua riro te Buka a Moromona ei faaiteraa papû e, e peropheta mau Iosepha na te Atua, e ua fâ mai te Mesia ia’na, e ua faaho‘ihia mai te evanelia i roto i to’na mâ e i to’na îraa.
E ‘aereere to‘u aau ia tai‘o vau i te mau semeio o te Buka a Moromona – te ohipa rahi i ravehia no te nana‘oraa i ni‘a i te mau api punu, te parururaa o te reira i roto i te mau tenetere e rave rahi e te feia i ma‘itihia e te Atua, e i te semeio no te iritiraa. Ua ti‘a mau te reira i te iritiraa maitai o te papa‘iraa mo‘a. No te here rahi o te Atua ia tatou, ua horo‘a mai Oia i teie buka na tatou ia ta‘ita‘i, na tatou ia tai‘o, na tatou ia haapii mai, e ei faufaa na tatou. Tei hau atu râ i te faufaa, ua rava‘i te here o te Atua no‘u i horo‘a mai ai Oia ia‘u e i te mau taata atoa o te imi maite i te heheuraa no te parau-mau o te Buka a Moromona – te hoê ite taa ê no te faaho‘i-faahou-raa mai e e peropheta mau o Iosepha Semita.
No ni‘a i teie iteraa mo‘a, ua haapapû te peropheta o te Buka a Moromona o Alama e:
« Aita anei outou i mana‘o e, ua ite au iho i taua mau mea nei ? Inaha, te faaite papû atu nei au ia outou na e, ua ite roa vau e, o te parau mau ana‘e ta‘u i parau iho nei ia outou na. E i to outou mana‘o ra, eaha vau i ite hua’i i te reira ?
« Te parau atu nei au ia outou na e, na roto i te Varua Maitai o te Atua i ite ai au i te reira. Inaha ho‘i, i haapae a‘e nei au i te maa, e i pure a‘e nei au i na mahana e rave rahi, ia itea taua mau mea nei ia‘u iho. E te ite maite nei au e, o te parau mau ïa; na te Fatu na te Atua iho ho‘i i faaite mai ia‘u i te reira i to’na ra Varua Maitai; o te Varua heheuraa parau teie tei roto ia‘u nei » (Alama 5:45-46).
Mai ia Alama i tahito ra, e ite tatou te mau melo e te mau melo imi, ma te papû e, e parau mau teie mau mea. E oaoa tatou ia ite. E hau atu râ i te hoê oaoaraa; e hopoi‘a te reira na tatou ia ite. E pau rahi râ tatou ia horo‘a-ê-hia’tu teie oaoa. Teie ta te Fatu i parau, « E patoto atu, e iritihia mai te opani ia outou » (Mataio 7:7). Teie ta Iakoba, peropheta no te Buka a Moromona i parau, « A haere mai ma te opuaraa papû o te aau » (Iakoba 6:5). Aita tatou e titauhia ia hirina’i i ni‘a i te ite e aore râ, i to tatou mana‘o i te tahuti nei. E tai‘o, e pure tatou, e mai ia Alama i tahito ra, e haapae tatou ei reira te hoê reo iti ha‘iha‘i ra e te hoê aau ‘aereere e tae mai ai. A ti‘aturi e e heheu mai te Atua ia oe iho, e e parau mau i teie mau mea. Na te feruriraa i teie mau mea i faatupu i to‘u aau i te ‘aereere. Na roto i te i‘oa o Iesu Mesia, amene.