O vai na te Atua ?
Te hinaaro nei te Fatu ia ite e ti‘aturi râ Oia ia vai.
I teie ahiahi, te hinaaro nei au i te faahoro i ta‘u mau parau i ni‘a i te hoê himene anaanatae piiraa i roto i te taviniraa: « O vai na te Atua ? O vai ? / Teie nei faaite mai » (Te mau Himene, no. 260).
I roto i teie tau tuuraa no te îraa o te mau tau atoa, a faaineine ai tatou no te ‘aro i te mau puai o te ino no te ho‘i ‘oi‘oiraa mai o te Mesia i te fenua nei, e mea faufaa ia ite e o vai ra to te pae o te Fatu. Te hinaaro nei te Fatu ia ite e ti‘aturi râ Oia ia vai.
E mana‘o outou e, e nehenehe e ti‘aturi i ni‘a i te mau autahu‘araa tata‘itahi no te ti‘araa i ni‘a i te reni o te taviniraa i roto i te nuu a te Fatu. I roto i te Ekalesia i teie mahana, ua rae‘ahia 3 milioni autahu‘araa, ia vahi-ti‘a-hia te Autahu‘araa a Aarona e te Autahu‘araa a Melehizedeka.
Tera râ, e rave rahi o teie mau tane, te mea apî ihoa râ te ma‘iri nei, e aita e parau faaiteraa no te ma‘iriraa, APFM.
I te hoê mahana ua parahi haehaa noa teie mau tane a tuu ai te feia mana i to ratou mau rima i ni‘a i to ratou mau upoo no te horo‘araa ia ratou te autahu‘araa. I taua mahana ra, ua rave ratou i te fafauraa e te Fatu, no te haapa‘o e no te tavini.
Ia maramarama i te faufaa rahi o teie mau fafauraa, e mea ti‘a ia ui tatou ia tatou iho e, « Eaha te autahu‘araa ? » Ua ite te mau diakono itoito atoa i te pahonoraa no teie uiraa: E mana te autahu‘araa no te ohipa i roto i te i‘oa o te Atua.
Eaha ïa te auraa ia outou e te mau diakono, e te mau haapii e te mau tahu‘a ? A tahi, te auraa oia ho‘i, ua faati‘ahia outou ia opere, ia faaineine e ia haamaitai i te oro‘a. E mea faufaa anei ? Oia mau !
O vai tei faanaho i te oro‘a matamua o ta tatou i haro‘aro‘a na ? Te pahonoraa oia ïa, te Fatu o Iesu Mesia. I taua pô ra, hou Oia a mamae ai i roto i te Aua i Getesemane, ua faaineine, ua haamaitai,e ua opere te Mesia i te oro‘a i Ta’na mau pĭpĭ. Ia rave ana‘e tatou i teie oro‘a mo‘a te ti‘a nei ïa tatou i te ti‘araa o te Faaora iho. E ohipa taa ê mau !
Ua tuu o Ioane Bapetizo i to’na na rima i ni‘a i te upoo o Iosepha Semita e Olive Kaudere, e ua horo‘a oia ia raua i te Autahu‘araa a Aarona, e ua parau oia e: « Te horo‘a’tu nei au i te Autahu‘araa a Aarona, o tei mau i te mau taviri no te utuuturaa o te mau melahi, e no te evanelia no te tatarahapa, e no te bapetizo na roto i te utuhiraa no te haamatararaa i te hara » (PH&PF 13:1). E hopoi‘a faufaa roa teie no te mau tane o to outou matahiti. Na roto i teie hopoi‘a, tei te pae mau tatou o te Fatu.
Eaha ïa i to te Autahu‘araa a Melehizedeka ? Te tai‘o nei tatou i roto i te tuhaa 84 o Te Parau Haapiiraa e te Mau Parau Fafau: « E i teie autahu‘araa rahi a‘e ïa o te haapa‘o i te evanelia e o te mau ho‘i i te taviri no te mau parau ‘aro no te basileia, oia ïa te taviri no te ite i te Atua » (irava 19). Tei teie autahu‘araa te mana no te faatere e no te arata‘i, no te haamaitai e no te faaora, no te haapii e no te taati. E faauta mau te mau ohiparaa tavini a teie autahu‘araa i te mau taea‘e itoito i te pae o te Fatu.
O Nephi te tamaiti a Helamana, te hoê hi‘oraa rahi roa no te mana taati o te autahu‘araa. Na roto i to’na itoito i te pororaa i te parau na te Atua, ua horo‘a te Atua ia’na te mana no te taatiraa oia ïa, «… O ta oe e haamau i te ao nei, e haamau-atoa-hia ïa i te ra‘i ra, e ta oe e tuu i te ao nei e tuu-atoa-hia ïa i te ra‘i ra » (Helamana 10:7). Ua riro Nephi ei raatira mana mau i roto i te nuu a te Fatu no te mau tau tuuraa evanelia atoa.
Ua ti‘aturi to tatou Metua i te Ao ra ia tatou i vaiiho ai Oia i ni‘a ia tatou te hoê tuhaa o To’ na mana no te tauturu Ia’ na i roto i Ta’ na ohipa rahi a tere noa’ i e î a‘e te fenua.
A haapa‘o maitai e mea nahea tatou i te haapii-raa-hia no ni‘a ai te horo‘araa i te mana no te autahu‘araa. I te rae‘a-raa-hia to‘u matahiti e 12, ua tuu to‘u metua tane, Charles Oaks, to‘u episekopo, George Collard i to raua rima i ni‘a i to‘u upoo, e ua horo‘a mai i te Autahu‘araa a Aarona e ua faatoro‘a ia‘u ei diakono.
Rave rahi matahiti i muri mai, ua faaohipa atoa Elder Gordon B. Hinckley i teie arata‘iraa no te ra‘i mai no te faatoro‘a ia‘u ei Hitu Ahuru. I te taime o te mau faatoro‘araa’toa, e ite-faahou-hia teie ti‘aturiraa hanahana e te hoê faahou taviniraa apî i te pae o te Fatu.
Ia haaputuputu ana‘e te nuu, e tupu te tama‘i i ni‘a i te mau tahua aano. E mea taa ê râ teie tama‘i. E tupu teie tama‘i i te mau mahana atoa i roto i te oraraa o te taata nei ma te faaaro i te nuu a te Fatu i te nuu a Satane no te nounou, te pipiri e te hiaai i te mana.
Te ite tatou i te feia apî ponapona e 2.060 a Helamana, mau fa‘ehau apî ana‘e, tapono e te tapono i te titauraa i te puai i te pae tino no te faaô i roto i to ratou mau ana’iraa. Area râ, te vata nei te hoê vahi no te mau varua i roto i teie nei tamataraa.
Te ora nei ta maua mootua 11 matahiti o Andrew i roto i te hoê pereoo tura‘i no te toe‘a o to’na oraraa. E faatoro‘ahia oia i te toro‘a diakono i teie tau to‘eto‘e e e ô oia i roto i te nuu a te Fatu. Aita to’na huma melo i ta‘oti‘a ia’na i roto i teie tama‘i no te mea, e ere te mau haana tama‘i o ta’na i ma‘iti i te ‘omore e i te ‘o‘e no te faaohipa i ni‘a i te tahua ‘aroraa.
Area râ, ua ma‘iti oia i te mau mauihaa mure ore faufaa faahoho‘ahia i te haana tama‘i a te Atua oia te parau-mau, te parau-ti‘a, te faaroo, te pure e te parau na te Atua (hi‘o Ephesia 6:13-18). E faaohipa tatou i teie mau haana i roto i to tatou feruriraa, to tatou vaha e ta tatou mau ohipa rarahi. Ua riro te mana‘o parau-ti‘a, te parau e te ohipa ei haana tama‘i na te Fatu.
No reira, aita to Andrew e huma i roto i teie tama‘i. Ua haapii-maitai-hia oia e to’na na metua. Ua ineine oia no te faaô i roto i te ana’iraa o te mau taea‘e o te autahu‘araa.
E mea teitei roa te hoo. Te moni hoo râ, o te mau varua tata‘itahi ïa o te mau tamaiti e o te mau tamahine a te Atua, to ratou ora mure ore. E manuïa e aore râ, e pau teie mau varua mai te mea e niu ratou i te reira i ni‘a i te peu maitai e te mâ, te aroha e te taviniraa, te faaroo e te ti‘aturi.
E tomo atu o Andrew i roto i te pŭpŭ a te mau diakono o ta’na paroita. E haapiihia oia ia opere i te oro‘a e ia ohi-haere i te mau moni haapaeraa. E utuutu ratou ia’na no te mea o te râ te ohipa a te pŭpŭ – oia ho‘i, te utuuturaa te tahi i te tahi. Tera te faanahonahoraa mau o te nuu autahu‘araa a te Fatu.
Ua mareva te tuhaa rahi o to‘u oraraa i roto i te Nuu Faehau no te Hau Amui no Marite ei faahoro manureva. I teie mahana, Ua vai hoê noa teie te mau fa‘ehau o ta‘u pŭpŭ, ei pŭpŭ a 40 matahiti te maoro.
I roto i ta matou mau haapiipiiraa ei mau faahoro manureva tama‘i, hoê o te mau ture niu matamua roa, o te « haapa‘oraa ïa i to oe hoa ratere. Te haapa‘o-maite-raa e, tei muri noa â oia i to oe tua e aita e enemi e tere maira na muri ia’na. »
Mai te mea e, e a‘o maitai roa te parururaa i te mau hoa i roto i te hoê pŭpŭ tama‘i, e a‘oraa rahi ïa ia faaea amui noa tatou, e ia paruru i te mau melo o ta tatou pŭpŭ a ‘aro ai tatou no te faaea papû i te pae o te Fatu. E mea ti‘a ia tatou ia ohipa no te faaho‘i mai i tei haere ê.
Te faaea-papû-raa i te pae o te Fatu, e mea faufaa atu â ïa i teie mahana. Te faaite tamau mai nei to tatou peropheta e, o teie te mau mahana hopea. Ua ite tatou na roto i te mau tapa‘o o te mau tau e ua piri roa mai te hopea. Ua ite atoa Satane i te reira. E au e, aita to’na nuu e taoto nei.
I roto i te hoê haapiipiiraa na te feia faatere na te ao atoa nei, ua faahiti te peresideni Hinckley i te mau huru ino o teie nei ao e teie o ta’na i parau, « Aita vau i ite e mai te aha mau te ino o Sodoma e o Gomora.
« Ua haamouhia râ teie na oire e to raua nunaa iino. Te ite nei tatou i taua mau huru ra i teie mahana. Te tere nei te reira na roto i te ao nei. Te mana‘o nei au e, te oto nei to tatou Metua ia hi‘o mai Oia i raro i Ta’na mau tamaiti e mau tamahine faaroo-ore » (« A ti‘a ma te papû e te aueue ore », Haapiipiiraa na te feia faatere o te ao nei, 10 no tenuare 2004, 20).
Aita vau i ite e, eaha faahou atu â te faaararaa a to tatou mau peropheta ia tatou.
I roto i teie hoê a‘oraa o te hoê amuiraa i tupu iho nei, teie ta Elder Dallin H. Oaks i parau, « Te haaati nei te mau tapa‘o no te Ho‘i Pitiraa Mai ia tatou e au e, te rahi noa’tu ra… Noa’tu e, aita a tatou e rave‘a no te taui i te Tae Pitiraa Mai e aita ho‘i i ite i te hora ti‘a mau, e nehenehe râ tatou e faaineine vitiviti atu â ia tatou nei ma te faauru i te feia o te haaati nei ia tatou. E mea ti‘a ia faaineine tatou i te pae tino e i te pae varua no te mau ohipa i tohuhia no te Tae Pitiraa Mai » (« Faaineineraa no te tae-piti-raa mai », Liahona, me 2004, api 7-9).
Ua tae mai teie mau parau faaararaa hou roa te mata‘i rorofa‘i i ta‘iri ai i te mau fenua no Caraïbes e te miti pauma tei haapau i te mau fenua no Asia.
Te na ô maira ta tatou himene, « O vai na te Atua ? » i te haapiiraa ia tatou e, « Teie nei faaite mai. » Teie te taime ia tape‘a papû i to tatou faaroo e i ta tatou mau parau tumu, mai ta te Raatira Moroni i rave. Te hinaarohia mai nei tatou i teie nei, te mau diakono, te mau haapii, te mau tahu‘a, te mau episekopo, te mau peresibutero, te mau tahu‘a rahi e te mau patereareha. Teie te taime no te faaiteraa i to tatou mauruuru no te tusia taraehara a to tatou Fatu, o Iesu Mesia. Teie te taime ia faaite i to tatou faaroo na roto i te haapa‘oraa i te mau faaueraa niu mai te mau ture no te viivii-ore e te tuhaa ahuru, te Parau Paari e te haamo‘araa i te Mahana Sabati.
Teie te taime no te faaararaa i to tatou mau taata tupu na roto i te pororaa i te parau poro‘i o te evanelia ia ratou. Teie te taime no te faaiteraa i te ao nei i te hoê hi‘oraa no te tura, te hoê hoho‘a no te peu maitai e te mâ. Eiaha roa tatou e haaviivii i te mana o to tatou autahu‘araa na roto i te faahemaraa a te mau hoho‘a ha‘iriiri e te faufau.
Teie te taime no te hi‘opo‘a-faahouraa i ta tatou mau fafauraa o ta tatou i rave e te Fatu i roto i te pape no te bapetizoraa, te mau fafauraa o ta tatou i rave a farii ai tatou i te tapuraa e te fafauraa o te autahu‘araa, e te mau fafauraa o ta tatou i rave i roto i To’na mau hiero mo‘a.
Teie te taime no te faaiteraa e, tei te pae mau iho â tatou o te Fatu.
E te mau taea‘e, Na’na teie ohipa. Ua faaho‘ihia mai te evanelia a Iesu Mesia i roto i to’na îraa i teie mau mahana hopea nei na roto i te peropheta Iosepha Semita. O te Mesia te upoo o teie ekalesia, ma te arata‘ihia i mua e To’na peropheta ora, Gordon B. Hinckley. E ho‘i mai te Mesia i te fenua nei no te faatere e no te faatere arii, e e ti‘a’tu tatou tata‘itahi i te hoê mahana i mua Ia’na ia haavahia ia au i to tatou mau mana‘o, mau ohipa e te mau hinaaro o to tatou aau. O Oia to tatou Faaora e te faaite papû nei i te reira, na roto i To’na I‘oa mo‘a, amene.