Te Buka a Moromona : Te tahi faahou ite no Iesu Mesia – Te mau mea papû e te faufaa ho‘i
Ua riro te Buka a Moromona ei tao‘a faufaa hopea-ore no te paari e no te faaururaa, no te a‘o e no te faatiti‘aifaro.
Ua parau Iosepha Semita e, « Ua parau vau i te mau taea‘e e, o te Buka a Moromona te buka ti‘a-roa‘e i te mau buka atoa i ni‘a i te fenua nei, e o te ofa‘i tape’a fana ïa o ta tatou haapa‘oraa, e e haafatata’tu te hoê taata i te Atua na roto i te tape‘a-maite-raa i to te reira mau ture, i te tahi noa’tu buka » (Omuaraa o te Buka a Moromona, a hi‘o atoa i te History of the Church, 4:461).
Ua mahuti te nene‘iraa matamua o te Buka a Moromona: Te Tahi faahou Ite no Iesu Mesia na roto mai i te piha nene‘iraa i Palmyra, New York, i te ava‘e Mati no te matahiti 1830. No rae‘a-noa-hia maira to Iosepha Semita matahiti i te 24 – e tamaiti ite ore oia i te haapiiraa, e tamaiti atoa no te aihere. I te matahiti na mua noa mai, ua pau ia’na e 65 mahana i te iritiraa i te mau papa‘a parau. Fatata te afaraa no te reira taime, i muri a’e ïa i to’na fariiraa i te autahu‘araa. E hitu ava‘e te maoro no te nene‘iraa.
I to‘u tai‘o-matamua-raa i te Buka a Moromona mai te tahi api tae atu i te tahi api, ua tai‘o vau i te tohuraa ra e, mai te mea e, e « ui atu vau i te Atua, i te Metua Mure Ore ra, i te i‘oa o Iesu Mesia e, e [parau mau anei te mau parau o ta‘u i tai‘o]; e mai te mea [e ui au] ma te aau hinaaro mau, ma te mana‘o papû, e ma te faaroo i te Mesia, e [faaite] mai oia i te parau mau [ia‘u], na roto i te mana o te Varua Maitai » (Moroni 10:4). Ua tamata vau i te pe‘e i teie mau haamaramaramaraa, mai ta‘u i ta‘a i te reira.
Ua titau paha vau i te hoê fâraa hanahana ia tae oioi mai ia‘u mai te hoê iteraa puai roa, aita râ te reira i tupu. Tera râ, ua ite au i te au, e ua haamata vau i te ti‘aturi.
I roto i te irava i muri mai, tei reira te tahi fafauraa rahi: « E na roto i te mana o te Varua Maitai e ite ai outou i te parau mau i te mau mea atoa ra » (Moroni 10:5; haapapûraa i faahauhia’tu). Aita vau i ite e mea nahea te Varua Maitai ia ohipa, noa’tu e, ua tatara mai te Buka a Moromona i te reira e rave rahi taime, e e rave rahi mau huru raveraa.
Ua tai‘o vau e ua haapii mai au e « Te parau atura te mau melahi na roto i te mana o te Varua Maitai; no reira e parau ai ratou i te parau a te Mesia. » Ua parau-atoa-hia mai e, « A popou na outou i te mau parau a te Mesia; [ma te fafauraa e] e faaite te parau a te Mesia ia outou i te mau mea ta outou e haapa‘o » (2 Nephi 32:3).
E ua faaite-maitai-hia mai e « aita i ti‘a ia outou ia ite i te reira… no te mea aore ïa outou i titau, aore hoi i patoto » (2 Nephi 32:4).
Ua tai‘o atoa vau e, « Ua tae ana‘e outou i taua e‘a ra, e farii hoi i te Varua Maitai, na te reira e faaite ia outou i te mau mea atoa ta outou e rave » (2 Nephi 32:5). Ua na reira hoi au i to‘u haamau-raa-hia ei melo no te Ekalesia na roto i te « tu‘uraa no te horo‘araa a te Varua Maitai » (Hiro‘a Faaroo 1:4).
Mai te mea ua titau vau i roto i to‘u vai tamarii-hara-ore-raa i te tahi mau ite taaê no te pae varua, aita roa ïa i tupu. Ia ma’iri te mau matahiti, a faaroo ai au i te mau a‘oraa e te mau haapiiraa e a tai‘o ai au i te Buka a Moromona, i reira to‘u haamataraa i te maramarama.
Ua hamani-ino-mau-hia Nephi e to’na mau taea‘e e ua fa‘aara atu ia ratou e, ua parau mai te hoê melahi ia raua, « aore râ to orua e faaroo i ti‘a’i ia orua ia faaroo i ta’na parau » (1 Nephi 17:45). I to‘u iteraa e, e nehenehe te Varua Maitai e paraparau mai na roto i to tatou feruriraa, te maramarama nei au e, o te tumu ïa te mau parau a te Mesia e faatupu ai i te feruriraa maitai, e mau parau anei no roto mai i te Faufaa Apî e aore râ, no roto mai anei i te Buka a Moromona e aore râ, no roto mai anei i te tahi atu mau papa‘iraa mo‘a. I muri mai, ua iteahia ia‘u e, te vaira te mau pahonoraa a te mau papa‘iraa mo‘a no te mau mea o ta‘u i hinaaro i te ite.
Ua tai‘o vau e, « O teie te mau parau ra, e ua ti‘a hoi ia outou ia fa‘aau i te reira ia outou e i te taata atoa hoi » (2 Nephi 11:8; haapapûraa apitihia’tu; a hi‘o atoa 1 Nephi 19:23-24; 2 Nephi 6:5; 11:2). Ua maramarama vau e, ua fa‘aauhia te mau papa‘iraa mo‘a ia‘u iho nei, e ua au atoa hoi no te mau taata atoa.
Ia tai‘o vau i te hoê irava e rave rahi taime ia ta‘a ia‘u te auraa, e mana‘o vau e, te taata i papa‘i i teie irava, e iteraa hohonu e te paari to’na no to‘u oraraa e no te mea o ta‘u i ite.
Mai teie te huru, ua tai‘o vau e, ua rave te peropheta Lehi i te hotu o te maa o te tumu raau o te ora e parau ihora, « I hinaaro ai au ia amu atoa ta‘u feti‘i ra i to te reira; ua ite hoi au e, e maitai a‘e to te reira i to te mau hotu ĕê atoa ra » (1 Nephi 8:12). Ua tai‘o vau i te reira e rave rahi taime. Aita to te reira e auraa ia‘u.
Ua parau atoa te peropheta Nephi e, ua papa‘i oia « i te mau mea o to‘u varua… ei haapiiraa e ei fafauraa na to‘u mau tamarii » (2 Nephi 4:15). Ua tai‘o na vau i te reira na mua‘e, e aita atoa to te reira e auraa ia‘u. I muri mai râ, ia tamariihia maua, ua maramarama vau e, toopiti raua o Lehi e o Nephi, ua oto atoa no ta ratou mau tamarii mai ta tatou e oto no ta tatou mau tamarii e mau mo‘otua.
Ua itea ia‘u teie mau papa‘iraa mo‘a te mau mea papû e te faufaa. Te maere nei au e mea nahea to Iosepha Semita fariiraa i teie mau ite. Inaha, aita vau e ti‘aturi nei e ua roa‘a ia’na te mau ite hohonu. Aita i titauhia ia roa‘a te reira ia’na. Ua ani-noa-hia ia’na ia iriti i te mau mea i papa‘ihia i ni‘a i te mau papa‘a parau.
E iteahia teie mau ite papû e te faufaa i te mau vahi atoa i roto i te Buka a Moromona. E faaite te reira i te hohonu o te paari e te mau ite rau tei ore i riro ei huru no te hoê taata 23 matahiti.
Ua haapii mai au e, e nehenehe ta te hoê taata, i te hoê noa’tu vahi, e tai‘o i te Buka a Moromona e ia farii i te faaururaa.
E roa‘a te tahi mau ite i muri a’e i te tai‘oraa e piti a‘e taime, e toru a‘e taime, e mai te mea ra e, ua « fa‘aauhia » i te mau mea o ta‘u e ite i te mau mahana atoa o to‘u oraraa.
E faaite faahou atu vau i te tahi atu ite papû e te faufaa o tei ore i fariihia i roto i te tai‘oraa matamua o te Buka a Moromona. I te 18raa o to‘u matahiti, ua faaŏ-hia vau i roto i te nuu fa‘ehau. No te mea aita vau i mana‘o i te reira na mua‘e, ua pe’ape’a vau i te mea aita vau i ite e mea tano anei ia‘u ia haere i te tama‘i. I muri mai, ua iteahia ia‘u te pahonoraa i roto i te Buka a Moromona.
« Ua ‘aro [te Ati Nephi] eiaha no te faatereraa, e te mana; te ‘aro ra râ ratou no to ratou mau utuafare e to ratou ti‘amâ, e ta ratou mau vahine e ta ratou mau tamarii, e to ratou mau mea’to‘a; oia ïa, no to ratou peu haamoriraa, e to ratou ekalesia.
« E te rave ra ratou i te mea i mana‘ohia e ratou, o tei au i te Atua ra ; i parau mai hoi te Fatu, i na ô mai ia ratou e i to ratou hui metua atoa, e: Aore outou i hape na, e aore outou i rave i te hape piti ra, eiaha outou e faati‘a ia taprahihia outou e te rima o to outou mau enemi.
« E teie nei, ua parau maira te Fatu ia ratou e, A paruru outou i to outou mau utuafare e tae roa’tu i te haamani‘i-raa toto; no reira i ‘aro atu ai te Ati Nephi i te Ati Lamana ia paruru ia ratou iho, e to ratou mau utuafare, e to ratou mau feti‘i, e to ratou hau, e to ratou ti‘amâ, e to ratou haapa‘oraa » (Alama 43:45-47).
Na roto i to‘u iteraa i te reira, ua tavini au ma te mana‘o tae e te tura.
Te tahi atoa hi‘oraa: I te hoe taime ua titauhia ia matou ia rave i te hoê faaotiraa faufaa. I te oreraa ta matou mau pure i pahonohia, haere atura vau e farerei ia Elder Harold B. Lee. Ua parau oia ia matou ia faatupu i taua opuaraa ra. No to’na hi’oraa e, te vai fea‘a noa ra vau, ua parau maira oia ia‘u, « To oe fifi, no te mea ïa, i te haamataraa ra, te hinaaro nei oe ia ite i te hopearaa. » I reira to’na tai‘oraa mai i te hoê irava no roto i te Buka a Moromona, « Eiaha outou e mărô i te mea aore i hi‘ohia e outou, e ore hoi outou e tae i te ite e ia oti te tamataraa i to outou faaroo » (Etera 12:6).
Parau faahou maira oia, « E mea ti‘a ia outou ia haapii ia haere maa vahi iti i roto i te pouri, i reira te maramarama e tae mai ai, e a haere ai na mua ia outou. » Ua riro mau teie nei iteraa ei tauiraa i te oraraa na roto i te tahi irava i roto i te Buka a Moromona.
Aita anei outou i te hoê taime i ite mai ia Nephi tei parau e, « Ua arata‘ihia vau e te Varua, e aore au i i te na i te mau mea ta‘u e rave ra » ? (1 Nephi 4:6). Aita anei outou i ite a’e nei i te paruparu i te tahi mau taime ?
Ua paruparu Moroni e ua măta‘u e « ua haavahavaha mai i ta matou parau [no to matou paruparu].
« … E ua parau maira te Fatu [ia’na] na ô maira: Te vahanaha ra te ma‘ama‘a, e oto râ ratou; e au to‘u aroha i to tei haehaa, e ore ai ratou e haapa‘o ai i to outou paruparu;
« E ia tae mai te taata ia‘u nei, e faaite atu ai au ia ratou i to ratou paruparu. Te horo‘a noa ra vau i te paruparu i te taata, ia tupu to ratou haehaa; e e au maitai to‘u aroha i te mau taata atoa i faahaehaa ia ratou iho i mua ia‘u ra; ia faahaehaa hoi ratou ia ratou iho i mua ia‘u, e ia faaroo ia‘u, ei reira e fariro vau i te mau mea paruparu ei mea etaeta no ratou » (Etera 12:25-27; te haapapûraa apitihia’tu).
E mea tere oioi roa te oraraa. Ia paruparu outou, ia tarapape te aau, ia ati e aore râ, ia măta‘u, a iriti i te Buka a Moromona e a tai’o. Eiaha e vaiiho i te taime ia tere rahi hou a tai‘o ai i te hoê irava, te hoê mana‘o e aore râ, te hoê pene.
I roto i to‘u hi‘oraa, eita te hoê iteraa papû e tae ta‘ue noa mai i ni‘a ia tatou. E tupu râ te reira i te rahi, mai ta Alama i parau, no roto mai i te hoê huero o te faaroo. « E haapuai te reira i to outou faaroo: ei reira outou e parau ai e, e huero maitai ïa; inaha hoi, te oru nei, e te oteo nei, e te tupu nei hoi » (Alama 32:30). Mai te mea e faa‘amu outou i te reira, e tupu ïa; e mai te mea eita outou e faa‘amu i te reira, e mărô ïa (a hi‘o Alama 32:37-41).
Eiaha e haaparuparu mai te mea ua tai‘o outou e ua tai‘o-faahou e aita hoi i farii i te hoê iteraa puai. O te riro outou mai te pĭpĭ i parauhia i roto i te Buka a Moromona o tei î i te mana o te Atua i te hanahana rahi « e aita râ ratou i ite i te reira » (3 Nephi 9:20).
A faaitoito. E a feruri i teie nei irava: « Ia ravehia teie mau mea ma te paari e ma te nahonaho; aita hoi i hinaarohia ia horo te taata i te oioi e au ore i to’na ra puai. E tena na, ia itoito oia e au ai, ia roa‘a ïa ia’na te berabeio; e tena na, ia ravehia te mau mea atoa ma te au maitai e te tia’i » (Mosia 4:27).
Te vai nei te mau horo‘araa a te varua i roto i te Ekalesia i teie mahana mai tei faaitehia i roto i te Buka a Moromona – te mau muhumuhu, te mau aehuehu, te mau heheuraa, te mau moemoea, te mau orama, te mau farereiraa, te mau semeio. E ite papû outou e, e nehenehe te Fatu, ia tae i te taime mau, e faaite mai ai Ia’na iho ma te mana e te hanahna rahi. E tupu mau te mau semeio.
Ua parau Moromona: « Ua tae anei i te mahana e faaotihia’i te raveraa i te semeio ?
« E ua faaea atoa anei te mau melahi i te fâ mai i te tamarii a te taata nei ? E ua tape‘ahia anei e ana te mana o te Varua Maitai eiaha e tae ia ratou ? E na reira anei oia a vai ai te tau, a mau ai te fenua, a parahi ai hoi te hoê taata i ni‘a i te fenua ia faaorahia oia ?
« Inaha, teie ta‘u parau ia outou, Aita; no te faaroo hoi e ravehia’i te semeio » (Moroni 7:35-37).
A pure tamau noa – o outou iho e to outou utuafare. E pahonohia mai na roto i te mau rave‘a rau.
Na te tahi mau parau rii, e aore râ, te hoê pereoda i roto i te hoê irava, mai teie « E ere roa te parau-ino i te oaoa » (Alama 41:10), na te reia e faaite ia oe e, te vai nei te diabolo, e e mea nahea oia ia ohipa.
« Ua na reira hoi te diabolo i te rave i te ohipa, aita roa hoi oia i titau ia rave te hoê taata i te maitai, aita’tu ïa e hoê iti a‘e; aita atoa ta’na ra mau melahi; aita atoa tei auraro ia’na ra » (Moroni 7:17).
Ua haapii te mau u‘i o te mau peropheta i te mau parau haapiiraa o te evanelia mure ore no te paruru i « tei pe‘e atu i te Mesia ma te hau» (Moroni 7:3).
Ua ite Moromona i to tatou mau mahana. I papa‘i ai oia i teie fa‘aararaa: « Ia ore te Fatu ia tairi i to’na feia ma te mau pohe e rave rahi, ia ore oia ia haapohe ia ratou e ia haamăta‘u ia ratou i te o‘e e i te mau huru ati atoa ra, aore atoa ratou e haamana‘o ia’na » (Helamana 12:3).
I to te Fatu haereraa e farerei i te Ati Nephi, ua ui ratou o vai te i‘oa « [e ti‘a] ia ratou ia ma’iri i ni‘a i teie ekalesia; no te mea tei [roto] hoi te mârŏraa i te mau taata.
« … parau maira te Fatu ia ratou :.. , eaha taua feia nei e amuamu ai e e mârŏ ai hoi i taua mea ra ?
« Aita anei ratou i tai‘o i te parau i papa‘ihia ra, te na ô mai nei e, Ia rave outou i te i‘oa o te Mesia e tia’i, o to‘u ïa i‘oa? Ei taua i‘oa nei outou e parauhia’i i te mahana hopea ra » (3 Nephi 27:3-5).
Te tumu rahi o te Buka a Moromona o te faaite papûraa ïa ia Iesu Mesia. Hau atu i te 6.000 irava i roto i te Buka a Moromona, te afa rahi o te reira o te faahiti ra i To’na parau.
No reira, « Te paraparau nei tatou i te Mesia, e te oaoa nei tatou i te Mesia, e te a‘o nei tatou i te parau a te Mesia, e te tohu nei hoi tatou i te Mesia, e te papa‘i nei hoi tatou i ta tatou mau tohu, ia ite ta tatou mau tamarii i te tumu e hi‘ohia’tu e ratou no te matararaa i ta ratou mau hara » (2 Nephi 25:26).
Ua riro te Buka a Moromona ei tao‘a faufaa hopea-ore no te paari e no te faaururaa, no te a‘o e no te faatiti‘aifaro, « i faaauhia i te huru no te ti‘araa o tei paruparu e tei paruparu roa a‘e [i rotopu ia tatou] » PH&PF 89:3). Ua riro atoa hoi ei tao‘a maitai no te faa‘amu i te feia paari, mai te mea e faahaehaa ratou ia ratou iho (a hi‘o 2 Nephi 9:28-29).
E haapii mai tatou mai roto mai i te Buka a Moromona no ni‘a i:
Te opuaraa no te ora e aore râ, « te rave‘a rahi no te oaoa » (Alama 42:8; a hi‘o atoa Alama 42:5, 8, 12, 30).
Te haapiiraa no ni‘a i te Mesia e i te Tara‘ehara (a hi‘o 2 Nephi 31:2-21; 32:1-6; 3 Nephi 11:31-40; 27:13-21).
Te tumu i titauhia ai te pohe (a hi‘o 2 Nephi 9:4-6; Mosia 16:8-9; Alama 12:25-27).
Te ora i muri mai i te pohe i roto i te ao varua (a hi‘o Alama 40:11-14).
Te mau ohipa a te diabolo (a hi‘o 2 Nephi 2:27; Alama 28:13; 3 Nephi 2:2).
Te tura o te autahu‘araa (a hi‘o Mosia 29:42; Alama 4:20; 5:3, 44; Alama 13:1-10).
Te mau pure no te Oro‘a mo’a (a hi‘o Moroni 4:3; 5:2).
Te e‘a mau no te haava i rotopu i te maitai e te ino (a hi‘o Moroni 7:16).
Te huru no te tape‘araa i te faaoreraa o ta outou mau hara (a hi‘o Mosia 4:26).
Te mau tohu fa‘aararaa maramarama e rave rahi, e te mau mea no ni‘a i te faaoraraa o te taata e i to tatou ora. E mau tuhaa ana‘e no te îraa o te evanelia (a hi‘o PH&PF 20:9).
Te haapapû nei te Buka a Moromona i te mau haapiiraa o te Faufaa Tahito. Te haapapû nei i te mau haapiiraa o te Faufaa Apî. Ua faaho‘i mai e « rave rahi mau mea papû e te faufaa hoi » (1 Nephi 13:28) tei mo‘e e aore râ tei iriti-ê-hia i te reira na buka (a hi‘o atoa 1 Nephi 13:20-42; 14:23). Oia mau, o te hoê ïa faaiteraa papû no Iesu Mesia.
I teie matahiti, te faahanahana nei tatou i te 175raa o te mahana fanauraa o te faanahonahoraa o te Ekalesia e te 200raa matahiti o te fanauraa o te Peropheta Iosepha Semita. I roto i te Ekalesia, rave rahi mau mea o te papa‘ihia’tu e o te parauhia’tu no te faahanahanaraa ia’na.
Mai tei matarohia, rave rahi mau mea tei parauhia e te papa‘ihia no te faaino ia’na. Ua vai tamau noa na te reira, i teie nei, e a muri noa’tu no te feia o te maimi i roto i te repo o na 200 matahiti, ma te ti‘aturi e iteahia mai te tahi mau mea o ta Iosepha i parau e aore râ, i rave no te faahaama ia’na.
Ua faaite mai te mau heheuraa ia tatou e « Ua ahuahia ratou atoa o te faati‘a mai i te poro avae i ta‘u feia i faatavaihia nei, te na reira mai nei te Fatu, e o te pi‘i mai e ua hara ratou e aita hoi ratou i rave i te hara i mua ia‘u nei, te na reira mai nei te Fatu, ua rave râ i te mea e ti‘a i roto i to‘u na mata, e o ta‘u i faaue atu ia ratou ra » (PH&PF 121:16). E fareirei ïa ratou i te mau faautu‘araa eta‘eta mau.
Aita tatou i titauhia ia paruru i te Peropheta Iosepha Semita. Na te Buka a Moromona: Te Tahi Faahou Ite no Iesu Mesia e paruru ia’na no tatou. Te feia o tei pato‘i ia Iosepha Semita ei peropheta e ei heheu parau, ia vaiihohia ïa ratou ia imi i te tahi mau tatararaa no te Buka a Moromona.
E no te tahi paruru piti puai: te Mau Parau Haapiiraa e te Mau Parau Fafau, e a toru: te Buka Poe Tao‘a Rahi. Nene‘i-amui-hia, ua riro ïa ratou ei faaite-aueue-ore e o Iesu te Mesia e ei ite e, e peropheta mau Iosepha Semita.
E te apiti nei au i te rahiraa milioni taata tei mau i taua iteraa papû ra, e te faaite atu nei au i te reira na roto i te i’oa o Iesu Mesia ra, amene.