Te mana o te buka ra Ia Poro Haere i Ta‘u Nei evanelia

Elder Richard G. Scott

No te Pŭpŭ no te Tino Ahuru Ma Piti Aposetolo

Te faaitoito atu nei au ia outou ia imi e nahea teie buka faahiahia i te tautururaa i ta outou mau tautooraa misionare.

Te oaoa nei au ia aparau ia outou i te hoê faarahiraa oaoa no te faaohie i ta tatou pororaa i to tatou mau taea‘e here e i to tatou mau hoa te parau poro‘i hanahana o te faaho‘i-faahou-raa mai o te Ekalesia a Iesu Mesia. Ua faaorahia te feruriraa e te aau o ta tatou mau misionare ia nehenehe ratou ia haapii i ta ratou parau poro‘i e ia faaite i te iteraa papû no te Fatu o Iesu Mesia e no Ta’na peropheta o Iosepha Semita ma te ta‘oti‘a ore i te hoê tau‘araa parau i papa‘ihia. Ua faarahihia na mua roa no te faaohiparaa a te misionare rave tamau, e ua haapapû teie materia haapii e, e mea maitai te reira no te mau metua o te hinaaro i te tauturu i te mau tamarii ia faaineine no te hoê misioni. Te faaohipa nei te feia apî tane e vahine oia’toa te mau tane e vahine faaipoipo o te haamata nei i te faaineine hou te tomoraa’tu i roto i te pû haapiipiiraa misionare. Ua haapapû mai vetahi o te mau taata faatere e mea maitai atoa no te faaineineraa i te mau taea‘e o te Autahu‘araa a Aarona no te misioni. E mauhaa faahiahia roa teie i te tautururaa i te mau tautooraa a te autahu‘araa e te mau pŭpŭ tauturu no te tura‘iraa i te mau melo apî ia riro ei mea puai i roto i te iteraa papû e i te haapa‘o. E paraparau vau no teie buka arata‘i apî, Ia Poro Haere i Ta‘u Nei evanelia, e i te mau mauhaa tapiri oia te Buka Iti Arata‘i Ohipa Misionare o te Mahana.

Te hinaaro nei au i te faaite ia outou e no te aha vau i anaanatae ai i teie buka Ia Poro Haere i Ta‘u Nei evanelia ? Ua faatumu-mau-hia te reira i ni‘a i te tutavaraa a to tatou mau misionare i ore â i itehia‘e nei. Ua ui haere au e rave rahi mau matahiti i te mau pŭpŭ misionare « eaha mau te fâ o ta outou misioni. » E mea taa ê ta te tahi pahonoraa i ta te tahi. Aita a te rahiraa e fâ papû no te faanahonahoraa i ta ratou mau tautooraa. Ua faahi‘o te api matamua o teie buka arata‘i i te mau misionare i ta ratou mau opuaraa mau: « Ia titau manihini ia vetahi ê ia haere mai i te Mesia na roto i te tautururaa ia ratou ia farii i te evanelia tei faaho‘i-faahou-hia-mai na roto i te faaroo i roto ia Iesu Mesia e i Ta’na Taraehara, i te tatarahaparaa, i te bapetizoraa, i te fariiraa i te horo‘a a te Varua Maitai, e i te tape‘araa e tae atu i te hopea. » Ua faaite te mau parau o teie buka nahea ia rave i te reira ia arata‘ihia e te Varua.

E mea tano te mau materia haapii a te mau misionare matamua no to ratou tau tera râ, ua taui rahi roa te ao nei. Te mau faufaa o tei faatupu i te niu o te sotaiete, ua ‘arohia ïa e Satane e to’na mau teuteu. Ua tupu râ te hoê hinaaro rû no te haamaitai atu â i te pororaa i te îraa o te parau mau o ta te Atua i tuu faahou i ni‘a i te fenua nei. Oia te iteraa i te opuaraa no te oaoa e e mea nahea te faaho‘i-faahou-raa mai i te fenua nei na roto i Ta’na peropheta rahi, o Iosepha Semita. Oia’toa te Ekalesia a Iesu Mesia e te mana o te autahu‘araa no te ohipa i roto i To’na i‘oa ua faaho‘ihia mai ïa i te fenua nei i roto i to’na îraa.

Ua haapii te peresideni Hinckley e: « No na matahiti e rave rahi, ua vai na te haapiiraa tumu a te misionare. Ua itehia te mau maitai no te reira… Area râ, e titau teie nei haapiiraa ia tamau aauhia te mau aparauraa, e ere ïa i ta te Varua e i ta te ti‘aturiraa o te taata iho….

« E mea ti‘a i te mau [misionare] ia riro ei raatira no ta ratou iho mau haapiiraa. E mea ti‘a râ… ia ratou ia haapii i te mau mana‘o e horo‘ahia mai e te varua na roto i ta ratou iho mau parau i raro a‘e râ i te arata‘iraa faauru a te Varua Maitai. »¹

Taua parau tumu ra, o te hoê ïa pou niu o Ia Poro Haere i Ta‘u Nei evanelia. I teie nei, ua papû i roto i te feruriraa e i te aau o te mau misionare i te ao atoa nei te parau poro‘i o te faaho‘i-faahou-raa mai o te evanelia a Iesu Mesia, te opuaraa no te ora, te mau faaueraa faufaa, e te mau ture e te mau oro‘a o te evanelia. E horo‘ahia teie mau haapiiraa i teie nei na roto i to ratou iho mau parau ia au i te arata‘iraa a te Varua. Ua itehia te maitairaa o teie nei faanahoraa no te mau misionare.

Te vai nei i roto Ia Poro Haere i Ta‘u Nei evanelia te mau pene o te horo‘a i te mau haamaramaramaraa faufaa ia taa e ia maramarama i te arata‘iraa a te Varua Maitai. Te vaira te mau papa‘iraa mo‘a no ni‘a i te faaiteraa e mea nahea ia haapii maitai e e mea nahea ia haamaitai atu â i te mau aravihi no te haapiiraa a te taata iho. Te tatara ra te hoê pene i te tumu te Buka a Moromona i riro ai ei ofa‘i tihi no ta tatou haapa‘oraa; e e mea nahea oia ia pahono i te mau uiraa hohonu a te varua; nahea te reira ia patu i te faaroo e ia tauturu ia vetahi ê ia haafatata’tu i te Atua. Te vaira te mau haamaramaramaraa hau atu no te faaiteraa e no te aha te Buka a Moromona i riro ai ei tao‘a e fafahia e te rima ia nehenehe te hoê taata ia faaohipa no te haapapûraa i te parau mau o ta tatou parau poro‘i. E haapiihia te hoê misionare e nahea ia imi i te mau taipe huru Mesia, mai te ti‘aturi, te aroha e te here. Te vaira te mau mana‘o tauturu faahiahia no te haapiiraa i te reo o te hoê misioni. Ua horo‘a-atoa-hia te mau mauihaa ohie, e te faufaa o te faanahoraa no te tauturu i te hoê misionare ia faaohipa i to’na taime ma te paari. Ua horo‘a’toa-hia te rave‘a no te faaite papû e no te faaineine i te mau taata no te haapii. Ua horo‘ahia mai te rave‘a arata‘i no te tauturu i te mau taata ia rave e ia tape‘a i te mau fafauraa o te arata‘i-roa’tu i te bapetizoraa, te haamauraa, e te tape‘araa mai i roto i te ekalesia. Te vaira i roto i teie buka arata‘i te mau mauihaa no te faatahoê i te mau tautooraa a te mau misionare rave tamau, e te feia faatere o te tĭtĭ, o te paroita e o te mau melo. Na roto i taua tauturu ra, e nehenehe ïa te mau melo apî e faaoti ma te paari i to ratou tere i roto i te mau utuafare o te Ekalesia. E haapapûraa rahi teie no te feia o teie bapetizohia e o tei haamauhia ia rave i ni‘a ia ratou iho te i‘oa o Iesu Mesia e ia fafau i te haapa‘o i Ta’na mau faaue e farii ïa i te fafauraa o Ta’na mau haamaitairaa i roto i te oraraa.

Te faaohiparaa i te mau parau faauruhia i roto i Ia Poro Haere i Ta‘u Nei evanelia, ua haamaitai atu â te mau misionare i to ratou ite no te haapii ma te mana‘o papû ma te titau i te haapapûraa a te Varua Maitai. Aita i maoro a‘e nei, ua ani au i na tauturu toopiti o te hoê peresideni misioni ia poro ia‘u i te oroma a Iosepha Semita. Ua opua vau i te tamata ia raua ia ite e nahea raua ia pahono. Na roto i te ateate mau o ta raua haapiiraa, te mâ o to raua mana‘o, te aravihi o te huru o ta raua haapiiraa, te huru o te horo‘araa i te parau poro‘i, e te puai o te faaururaa, aita roa i ti‘a faahou ia‘u i te tamata ia raua.

E nehenehe atoa outou e hi‘opo‘a i teie haereraa i mua. A ani i te mau misionare ia horo‘a i te haapiiraa matamua i to outou utuafare i roto i to outou fare. E mea maitai atu â mai te mea e ani manihi outou i to outou mau hoa tapiri ia haere mai i to outou fare ia haapiihia e te mau misionare. Ma te arata‘ihia e te Varua, na roto i ta ratou iho mau parau, e faaite ratou ia outou e mea nahea to te Metua i te Ao ra faaohiparaa i te mau peropheta o te mau tau ia faaite i Ta’na opuaraa no te oaoa no Ta’na mau tamarii. A farii i to ratou iteraa papû a faaite ai ratou i te orama hanahana no te fâraa mai o te Atua te Metua e Ta’na Tamaiti Iesu Mesia ia Iosepha Semita. E hohora maitai mai ratou i te ohipa no te faaho‘i-faahou-raa mai o te îraa o te evanelia e te mana o te ohiparaa na roto i te i‘oa o te Atua i te fenua nei. E nehenehe atoa outou e apee i te mau misionare i roto i ta ratou haapiiraa no teie parau mau faauruhia ia vetahi ê. E anaanatae mai te feia o te faaroo i teie parau mau faahiahia no te taime matamua, mai te mea e tei reira atoa outou.

Ua tuu te Peresideni Matamua i te tautooraa rahi mau, tae noa’tu i te Pŭpŭ no te Tino Ahuru Ma Piti, te tahi mau Hui Mana Faatere Rahi e te pŭpŭ amui no te feia tei horo‘a i te taime, te mau melo ite o teie pŭpŭ, i te faatupuraa Ia Poro Haere i Ta‘u Nei evanelia e te mau mauihaa maitatai ana‘e. Te feia o tei rave i teie ohipa ua riro ïa ei mau ite no te faaururaa a te Fatu na roto i te Varua Maitai i te faatupuraa, te tabukaraa, e te faaotiraa o teie nei buka Ia Poro Haere i Ta‘u Nei evanelia.

I muri mai i te tamatamataraa i roto hoê 14 misioni, ua faatitiaifarohia Ia Poro Haere i Ta‘u Nei evanelia. Ua faaafarohia, e ua fariihia e te Peresideni Matamua e te Pŭpŭ no te Tino Ahuru Ma Piti. I te 15 no Atopa 2004, ua faatupuhia te hoê haapurororaa na roto i te rave‘a pee‘utari no te faaite i te mau peresideni misioni e te feia faatere o te mau misionare i teie buka Ia Poro Haere i Ta‘u Nei evanelia. Ua operehia na te mau misionare atoa te hoê buka reo Peretane. Noa’tu râ aita te rahiraa i ite i te reo Peretane, ua mana‘o râ ratou e, e tuhaa atoa ratou i roto i te faaapîraa o ta matou tautooraa misionare. Te mea faahiahia râ, te tahi mau misionare reo éê o te hinaaro nei i te haapii i te reo Peretane. I te haamataraa o teie matahiti nei, ua operehia’tu Ia Poro Haere i Ta‘u Nei evanelia na roto i te reo Tapone, Korea, Paniola e Potiti. Ia hope a‘e teie matahiti, te mana‘o nei matou e mahuti mai teie buka arata‘i i roto i te tahi â mau reo e parauhia e te mau misionare.

E ere ana‘e te mau misionare te fana‘o Ia Poro Haere i Ta‘u Nei evanelia:

Ua tai‘o te vahine a te hoê peresideni misioni e ua feruri hohonu i te mau parau o Ia Poro Haere i Ta‘u Nei evanelia, oia’toa te mau faahororaa. I reira, ua rave oia i te hoê ohipa o tei ma‘iri ia’na i te rave – ua ani oia i te hoê fetii ia tai‘o, ia feruri hohonu no ni‘a i te Buka a Moromona. Ua farii mai teie fetii i teie aniraa e ua haamaitai rahihia.
Ua faaohipa’toa te hoê utuafare Ia Poro Haere i Ta‘u Nei evanelia no te faaineine i ta raua mau tamarii ia rave i te hoê misioni. Ua faaite ratou e, « Ta maua tamarii 17 matahiti tei haamata i taua faaueraa ra. Mai tei titauhia, ua imi oia i te tuhaa poto-roa‘e o te buka. Ua haapii râ oia 20 minuti i te mau parau no roto mai i te aau, faaotihia e te mau papa‘iraa mo‘a e te iteraa papû. »
Ua faaite atoa te hoê o tei hinaaro i te poro i te evanelia: « Ua haamata vau i teie mahana i te tai‘o Ia Poro Haere i Ta‘u Nei evanelia… Ua putapû to‘u aau « i te varua o teie buka » e ua rahi a‘e to‘u iteraa papû e te ite a faaite mai ai te Varua i te parau mau o te mau paratarafa atoa. Aita vau e hinaaro ia tuu i teie buka i raro. »
Teie ta te hoê metua tane i papa‘i a faaineine ai oia i ta’na tamaiti no te misioni: « Ua faaite Ia Poro Haere i Ta‘u Nei evanelia i te hoê iteraa e te maramarama i te tumu no te ora, i ta‘u mau ohipa e ta‘u mau hopoi‘a ei melo no te Ekalesia, e ei metua tane e ei tane faaipoipo,… Ua horo‘a’toa mai i te mau mauhaa taa ê no te raveraa i teie mau hopoi‘a. Ua piihia ta’na tamaiti ia riro ei misionare rave tamau.

E rave rahi te ohipa tei ravehia i roto i na ava‘e rii e hitu a faaitehia ai te Ia Poro Haere i Ta‘u Nei evanelia, tera râ, tei muri nei te mea maitai atu, ia matau maitai ana‘e tatou i te faaohipa i teie mauhaa misionare faahiahia.

Te faaitoito atu nei matou ia outou ia faaohipa i teie nei buka i roto i ta outou mau apooraa peresideniraa, tomite faatere a te autahu‘araa, apooraa paroita, ia papû e, te feia e rave i ni‘a iho ia ratou te fafauraa o te bapetizoraa e farii ïa i te mau haamaitairaa no te meloraa o te ekalesia i roto i to ratou oraraa. Ia faaohipahia te parau haereraa i mua apî no te taata iho o te faaineine nei no te bapetizo, e nehenehe ïa te tautooraa a te misionare e a te melo e tahoê puaihia. Te ti‘aturi papû nei au e, e faaoti ohie te mau melo faafariu apî ia faaea itoito noa a rave amui ai te mau melo e te mau misionare ma te faaohipa i te mau parau tumu i roto Ia Poro Haere i Ta‘u Nei evanelia.

E faatupu te parau poro‘i a te Peresideni Matamua i roto Ia Poro Haere i Ta‘u Nei evanelia i te hiaairaa rahi i te mau misionare penei a‘e e faaitoito te reira ia outou i roto i ta outou iho tautooraa misionare. Teie tei papa‘ihia: « Aita e ohipa hau atu i te faahepohia maori râ, teie ohipa misionare… Ua opuahia Ia Poro Haere i Ta‘u nei evanelia no te tauturu ia oe ia riro ei misionare faaineine-maitai-hia, ia hau atu i te paari i te pae varua e te hoê orometua haapii tei hau atu i te ite no te haaputapû i te aau…. Te ti‘aoro nei matou ia oe ia faarahi i ta oe fafauraa ia tauturu i to tatou Metua i te Ao ra i roto i Ta’na ohipa hanahana…. E haamauruuru e e haamaitai rahi mai te Fatu ia oe a tavini ai oe Ia’na ma te haehaa e ma te pure. »²

Te ite ra anei outou i te faufaa o teie faanahoraa ? E oaoa roa outou mai ia‘u nei ia maramarama ana‘e outou i roto i to outou oraraa e ia faaohipa i teie nei buka misionare. Eiaha mai te mau buka haapiiraa misionare rave tamau i te matamua, i teie nei, e nehenehe te mau taata, te feia faatere atoa e aore râ, te mau melo o te Ekalesia e hoo mai i ta ratou Ia Poro Haere i Ta‘u Nei evanelia.

Te maitai rahi râ o Ia Poro Haere i Ta‘u Nei evanelia e itehia ïa i roto i te oraraa o te mau misionare o tei faaoti i ta ratou taviniraa o te riro a raua‘e ei mau metua itoito, ei feia faatere puai e te aravihi na roto i te haereraa i mua o tei roaa ia ratou na roto i te ite e te faaohiparaa i te mau parau faauruhia o teie buka.

I tei i‘oa o te mau misionare i te ao atoa nei, te faaite hohonu nei matou i to matou aau mehara i te mau taata atoa o tei amui i roto i te faaineineraa, te nene‘iraa e te opereraa i Ia Poro Haere i Ta‘u Nei evanelia. Te faaite nei matou i to matou aau mehara i te mau peresideni misioni e te mau misionare atoa tei roaa te aravihi na roto i te faaohiparaa i te reira. I te pae hopea, te mauruuru rahi nei matou i te Fatu i Ta’na faaururaa. Te faaitoito atu nei au ia outou ia imi e nahea teie buka faahiahia i te tautururaa i ta outou mau tautooraa misionare ei mau metua te faaineine nei i te hoê tamarii no te hoê misioni, te hoê taata faatere o te tauturu nei i te mau feia faafariu apî, te hoê melo e poro nei i te evanelia e aore râ, te hoê taata o tei ineine no te tavini. Ia faauruhia e ia haamaitaihia outou ia na reira. Na roto i te i‘oa o Iesu Mesia, amene.