Parau opaniraa
E mea papû maitai e, te haamaitai mai nei te Fatu ia tatou ei nunaa, e e mea ti‘a ia tatou ia faaitoito i te tauturu i To’na mau taata riirii i te mau vahi atoa.
E au mau taea‘e here e au mau tuahine here, mea nehenehe roa ta tatou amuiraa. Ua parahi mai te Varua o te Fatu i pihaiiho ia tatou. E rave rahi te mau parau mau tei haapiihia ia tatou. Ua faaetaetahia to tatou iteraa papû, ua faaoraorahia to tatou faaroo.
Na roto i te temeio – e e temeio mau – o te mau matini aravihi o teie tau, ua ti‘a i teie ohipa ia haapurorohia na te ao atoa nei. E iva ahuru ma pae i ni‘a i te hanere o te mau melo o te Ekalesia i te ao atoa nei o te nehenehe e amui mai ia tatou nei.
Ua riro te reira ei taime no te faaapîraa i to tatou faaroo i te mau parau mau mure ore tei tae mai ia tatou nei na roto i te peropheta Iosepha. Ua haamaitaihia tatou. Ua fana‘o tatou i te iteraa i teie mau parau mau faahiahia.
Tera râ, te hinaaro nei au e parau faahou i te parau ta‘u i parau i mutaa ra, eiaha to tatou riroraa ei melo i roto i teie Ekalesia, e te fariiraa i te mau haamaitairaa atoa na roto mai i te reira, ia riro ei tumu no te oaoaraa, no te te‘ote‘o, no te taahiraa ia vetahi ê, no te vahavaharaa ia vetahi ê. E taata tupu ana‘e te mau taata atoa no tatou. Ia uihia’tu Ia’na e, teihea te parau rahi i roto i te ture, ua parau atura te Fatu e : « Hinaaro oe i to Atua ia Iehova ma to aau atoa, e ma to varua atoa, e ma to mana‘o atoa… [E] e aroha’tu oe i to taata tupu, mai to aroha ia oe iho na » (Mataio 22:37, 39).
Taa ê noa’tu te û o to tatou iri, te hoho‘a o to tatou mata, te huru o ta tatou parau, e mau tamaiti e e mau tamahine ana‘e tatou na te Atua, e e mea ti‘a ia tatou ia haapa‘o te tahi i te tahi ma te here e te maitai.
Noa’tu eaha te vahi ta tatou e noho nei, e nehenehe ta tatou ia riro ei mau taata tupu hoa. E nehenehe ta tatou mau tamarii ia amui i te mau tamarii e ere i te melo, e ia vai aueue ore noa mai te mea e, ua haapii-maitai-hia ratou. E nehenehe ratou ia riro ei misionare i rotopu i to ratou mau hoa.
Te haapoupou nei matou i to tatou mau feia apî nehenehe o te aro nei i te ino o te ao nei, o te pato‘i nei i te mau ino e o te ora nei i te oraraa e auhia e te Fatu. Te pure tamau nei matou ia ora atoa to ratou mau metua ma te ti‘amâ i roto i te mau mea atoa.
Te parau faahou nei matou i te mau mea ta matou i parau atu na, a faariro i te haereraa i te fare o te Fatu ei peu matarohia. Aita e rave‘a maitai a‘e no te farii i te oraraa maitai maori râ te haereraa i te hiero. Na te reira e haavî i te mau ino o te hoho‘a faufau, te rave-ino-raa, e te toparaa i te pae varua.
Teie nei, ei Ekalesia, ua haapii tatou ia rave i te ohipa i pihai iho ia vetahi ê, no te tamărû i te oto e te mauiui o te feia tei topa i roto i te ati rahi. Na roto i ta tatou mau ohipa tauturu taata, ua haamaitaihia te oraraa o te mau taata e rave rahi tauatini e ere i ta tatou haapa‘oraa. I roto i te tsunami ri‘ari‘a tei tupu, e i roto i te tahi atu mau ati tei tupu na roto i te tama‘i, te ma‘i, e te po‘ia, ua rave tatou i te hoê ohipa umerehia e te maerehia i te tautururaa ia vetahi ê ma te feruri ore i te haamauruururaa.
I te ava‘e Fepuare no teie matahiti, ua pûpû mai te peresideni o te Tatauro Ura no Marite i te fetia Circle of Humanitarians i te Ekalesia nei, oia te faaturaraa teitei roa a‘e e horo‘ahia e te Tatauro Ura no Marite no te ohipa tautururaa taata. Ua horo‘ahia mai te reira ei haamauruururaa no te moni tei horo‘ahia no te patia e rave rahi tauatini tamarii i Afirita i te ma‘i rubeol.
Aita i maoro a‘e nei, ua faahanahana te Rotary International i te Ekalesia no te hoê tino moni faataahia no te arairaa i te ma‘i polio i roto i te mau fenua veve te vai noa ra â te reira ma‘i.
E rave rahi ora tei faaorahia, e e rave rahi mauiui e te oto tei apehia na roto i taua mau tautooraa ra.
Na roto i te mau rave‘a tei roaa mai na roto i te maitai o to tatou mau melo, te faaitoito nei tatou no te faati‘a i te feia tei roto i te ati.
E mea papû maitai e, te haamaitai mai nei te Fatu ia tatou ei nunaa, e e mea ti‘a ia tatou ia faaitoito i te tauturu i To’na mau taata riirii i te mau vahi atoa.
Teie nei, ia ho‘i tatou i to tatou mau utuafare, te ti‘aoro nei au i te mau haamaitairaa o te ra‘i ia tae mai i ni‘a iho ia outou. A haapa‘o maite i te mau faaueraa a te Fatu, i reira Oia e iriti ai i te mau haamaramarama o te ra‘i e a ninii mai ai i te mau haamaitairaa i ni‘a ia outou. Te vaiiho atu nei au i ta‘u haamaitairaa e to‘u here i ni‘a ia outou. Te horo‘a’tu nei au to‘u iteraa papû ia outou e, o Iesu te Mesia, te Faaora o te ao nei, na roto ana‘e i To’na io‘a e faaorahia’i tatou e te horo‘a’tu nei i to‘u iteraa papû e, ua paraparau ihoa te Atua e te Fatu o Iesu i te tamaroa Iosepha, e na te reira i haamata i te tau tuuraa hopea e te rahi.
Ia haamaitai mai te Atua ia outou, e au mau taea‘e e au mau tuahine here. Ia vai mai te hau i ni‘a ia outou mai teie nei e a muri noa’tu, ta‘u ïa pure haehaa na roto i te i‘oa mo‘a o Iesu Mesia ra, amene.