Te aroha mau o te fatu
Te haapapû atu nei au e, no te taato‘araa te aroha mau o te Fatu, e ua ineine te Faaora o Iseraela i te ninii mai i taua mau horo‘a ra i ni‘a ia tatou.
A ono ava‘e i ma‘iri a‘e nei, ua ti‘a mai au i teie nei vahi no te taime matamua ei melo apî no te Pŭpŭ no te Tino Ahuru Ma Piti Aposetolo. No teie na taime e piti, te ite nei au i te teiaha o teie piiraa no te tavini e no te haapii ma te maramarama e no te faaite papû na roto i te mana. Te ani nei au i te tauturu a te Varua Maitai a a‘o ai au ia outou.
I teie avatea, te hinaaro nei au e faaite e e aparau no ni‘a i te hoê faahoruhoruraa pae varua o ta‘u i ite hou vau a ti‘a’tu ai i teie vahi i roto i te putuputuraa o te po‘ipo‘i Sabati o te amuiraa rahi i te ava‘e Atopa i ma‘iri a‘e nei. No oti noa maira te iteraa papû puai o Elder Dieter F. Uchtdorf ei ite no te Faaora. I reira, ua ti‘a paato‘a tatou no te himene i te hoê himene tei faaitehia’tu na e te peresideni Gordon B. Hinckley. Te himene o taua po‘ipo‘i ra oia ïa « E te Faaora o Iseraela » (Te mau Himene, no. 6).
Ua ma‘itihia te mau himene no te mau putuputuraa rau o te amuiraa, e rave rahi hebedoma na mua roa – e hou roa’toa to‘u piiraa apî i roto i te ohipa. Ahiri e ua anihia ia‘u ia ma‘iti i te hoê himene no ropu no taua putuputuraa taa ê o te amuiraa – te hoê himene o te riro ei faateiteiraa e ei tamărûraa i te varua no‘u e no te amuiraa hou ta‘u a‘oraa i roto i teie pû amuiraa – e ma‘iti ïa vau i ta‘u himene au roa oia ho‘i, « E te Faaora o Iseraela. » Ua tahe to‘u roimata a ti‘a’tu ai au no te himene e o outou i teie himene faauruhia no te faaho‘i- faahou-raa mai.
Piri atu i te hopea o te himeneraa, puta mai nei teie irava o te Buka a Moromona : … « Inaha râ, e faaite atu vau, o Nephi, ia outou e, tei ni‘a iho to te Fatu aroha mau ia ratou atoa i maitihia e Ana ra, no to ratou faaroo, ia haapuai ia ratou i te mana o te ora » (1 Nephi 1:20).
Ua faatutonuhia to‘u feruriraa i ni‘a i te paratarafa a Nephi, « te aroha mau o te Fatu », e i te reira iho taime mau, ua farii au i te hoê aroha mau. Ua faatae mai te hoê Faaora here i te hoê poro‘i no te tamahanahana e no te haapapû ia‘u na roto i teie himene tei ma‘itihia tau hebedoma na mua roa. E mana‘o paha vetahi e, e mana‘o taata noa teie area râ, te faaite papû atu nei au e, e parau mau roa to te Fatu aroha e eita te reira i te hoê mea o te tupu noa mai te ra. E mea pinepine tatou i te tauturuhia i roto i te tuuraa taime a te Fatu no To’na aroha mau ia taa e ia ite i te reira.
Eaha te aroha mau o te Fatu ?
Mai te ava‘e Atopa mai â to‘u feruri tamau-noa-raa i teie paratarafa « te aroha mau o te Fatu. » Na roto i ta‘u iho ma‘imiraa, tai‘oraa, hi‘ohi‘oraa, feruri hohonuraa e te pureraa, te ti‘aturi nei au e, ua roaa ia‘u te hoê iteraa e, te aroha mau o te Fatu e mau haamaitairaa, e mau puai, e mau parururaa, e mau haapapûraa, e mau arata‘iraa, e mau aroha, e mau tamahanahanaraa, e mau patururaa, e mau horo‘a pae varua te reira no te taata iho o te fariihia e tatou mai ô mai e no te mea e na roto i te Fatu ia Iesu Mesia. Oia mau, e horo‘a te Fatu « i To ‘na ra mau aroha i te huru o te mau tamarii a te taata nei » (PH&PF 46:15).
A feruri na tatou e mea nahea to te Faaora haapiiraa i Ta’na mau Aposetolo ma te vaiiho otare-ore noa ia ratou. Ua tono mai Oia i te « hoê Faaa‘o » (Ioane 14:16), oia te Varua Maitai area râ, ua parau te Faaora e, e ho‘i mai â Oia ia ratou ra (hi‘o Ioane 14:18). E horo‘a’tu vau i te tahi mau rave‘a e nehenehe ai te Faaora e haere mai ia tatou tata‘itahi na roto i To’na mau aroha rahi. Mai teie te huru, a faaruru ai tatou i te mau tamataraa o te oraraa, te horo‘a o te faaroo e te hoê haapapûraa mau te fariihia e tatou, o na hi‘oraa ïa e piti no te aroha mau o te Fatu. Te tatarahapa e te faaoreraa hara e te hau i roto i te feruriraa o te mau hi‘oraa ïa no te aroha mau o te Fatu. E te tape‘a e te faaoti papûraa o te tura‘i ia tatou ia haere i mua ma te oaoa na roto i te mau ta‘otiaraa o te pae tino e o te pae varua o te mau hi‘oraa ïa no te aroha mau o te Fatu.
I roto i te hoê amuiraa tĭtĭ i tupu iho nei, ua itehia te aroha mau o te Fatu i roto i te iteraa papû o te hoê vahine apî e e metua vahine ho‘i no na tamarii e maha i pohe te tane i te fenua Iraq i te ava‘e Titema 2003. Ua faati‘a teie tuahine faaroo e mea nahea, i muri mai i te faaite-raa-hia mai te pohe o ta’na tane, e to’na fariiraa i te tareta no Noela a ta’na tane. I roto i te parau faaite ta‘ue o teie ‘ati pe‘ape‘a tei taui i te oraraa, ua farii teie tuahine maitai i te hoê haapapûraa e, e nehenehe te utuafare e ora-amui e a muri noa’tu. Na roto i te parau faati‘a o ta‘u i farii, e tai‘o atu vau i te hoê tuhaa no teie tareta no Noela.
« Na te utuafare numelo hoê roa i te ao nei ! Ia oaoa amui outou e a haamana‘o i te auraa mau no Noela ! Ua faatupu te Fatu i te rave‘a ia ora amui tatou no amuri a‘e. Noa’tu e ua taa ê tatou, e ora râ tatou ei utuafare hoê.
« Ia haamaitai mai e ia paruru mai te Atua ia outou paato‘a e a faariro i teie Noela ei tao‘a horo‘a no te here na tatou Ia’na ! ! !
« Farii mai i te taato‘araa no to‘u here, Papa e ta oe tane here ! »
E mea papû roa e, ua faahiti teie tane i to ratou taa ê-raa no to’na piiraa ia tavini i roto i te nuu a hapono mai ai oia i to’na tapa‘o aroha no Noela. Area i teie tuahine ra, e reo ïa no raro mai i te repo no to’na hoa mure-ore e e metua tane ho‘i tei reva’tu, ua tae mai râ te hoê titauraa no te haapapûraa e te iteraa i te pae varua. Mai ta‘u i faahiti a‘e nei, eita te aroha mau o te Fatu e tupu noa mai mai tera. Na te faaroo, te haapa‘o e te haehaa e titau i te aroha mau i roto i to tatou oraraa, na te tuuraa taime râ a te Fatu tatou e ite ai e e faaherehere ai i teie mau haamaitairaa faufaa.
I te tahi mau taime i ma‘iri, ua paraparau vau i te hoê taata faatere o te autahu‘araa o tei hinaaro i te tamau aau i te mau i‘oa o te feia apî 13 tae atu i te 21 matahiti. Na roto i te mau hoho‘a o teie feia apî, ua hamani oia i te mau tareta ohie e te mau i‘oa ia nehenehe oia ia tamau vitiviti. E ua haapii ‘oi‘oi roa teie taata faatere i te taato‘araa o te mau i‘oa.
I te hoê pô ua moemoeahia teie taata faatere no te hoê o teie feia apî tamaroa o ta’na i mataro na roto noa i te hoho‘a. I roto i teie orama, ua ite oia i teie tamaiti ahu uo‘uo e te tareta i‘oa misionare. To’na hoa te parahi ra i to’na ao‘ao, te haapii nei teie tamaiti i te hoê utuafare. E Buka a Moromona to roto i to’na rima e ia hi‘ohia’tu, e au e, te faaite nei oia i to’na iteraa papû no te parau mau o teie buka. Arahia mai nei teie taata faatere.
I roto i te hoê putuputuraa na te autahu‘araa, tapiri atura teie taata faatere i teie tamaiti o ta’na i ite i roto i te orama e ani atura ia aparau rii raua. I te taime o to raua farereiraa, ua pii teie taata fatere i te i‘oa o teie nei tamaiti e parau atura, « E ere au i te hoê taata ta‘otooto a. Aita â vau i moemoeahia‘e nei no te hoê melo o teie tĭtĭ, o oe ana‘e ra. E faati‘a’tu vau ia oe i ta‘u moemoea, e i muri mai, e tauturu vau ia oe ia taa i to’na auraa. »
Faati‘a’tu nei teie taata faatere o te autahu‘araa i teie moemoea e ui atura i teie tamaiti eaha to’na auraa. Ma te aehuehu, pahono maira teie tamaiti, « Ua ite te Atua e, o vaira vau. » Te toe o teie aparauraa i rotopu i teie na taata, e auraa rahi ïa e ua farii ia farerei raua i tera taime e tera taime i te mau ava‘e i muri mai.
Ua farii teie tamaiti i te aroha mau o te Fatu na roto i teie taata faatere o te autahu‘araa tei faauruhia. Te tapiti-faahou atu nei au, eita te aroha mau o te Fatu e tae mai mai tera noa. E mea na roto râ i te faaroo, te haapa‘o e ti‘a’i tatou ia farii i teie mau horo‘a faufaa, e e mea pinepine râ, na roto i te tuuraa taime a te Fatu tatou e ite ai i te reira.
Eiaha tatou e haafaufaa-ore e aore râ, e hi‘o ê i te mana no te aroha mau o te Fatu. Na te ohie, te au, e te aueue-ore o te aroha mau o te Fatu e faaohipa no te faaitoito e no te paruru ia tatou i roto i te mau taime fifi o teie oraraa e o te oraraa e tae mai. Ia ore ana‘e te mau parau e horo‘a mai i te tamahanahanaraa o ta tatou e titau e aore râ, e faaite i te oaoa o ta tatou i farii, e mai te mea e mea faufaa-ore te tamataraa i te tatara i te mea e ore e nehenehe e tatara, mai te mea eita te parau araro e te feruriraa e nehenehe e auraro i te ite maiteraa i te mau mea ti‘a-ore e te mau mea ino o te oraraa nei, ia ore te mau iteraa no te tahuti nei e te faaauraa e rava‘i no te faatupu i te hoê hopearaa, e mai te mea ho‘i e, o tatou rii ana‘e iho, oia mau, ua haamaitaihia tatou i te aroha mau o te Fatu e ua haapuaihia i te mana o te ora (A hi‘o 1 Nephi 1:20).
O vai mâ ta te Fatu i ma‘iti no te farii i To’na aroha mau ?
Te parau maitihia i roto i te 1 Nephi:20, ua faaauhia ia maramarama i te mau horo‘a a te varua no te aroha o te Fatu. Ua faaite te ditionare e, ma‘iti o te hoê ïa i faataahia, tei ravehia mai na roto i te here hau a‘e e aore râ, tei iritihia mai. E faaau-atoa-hia i te feia tei herehia e tei ma‘itihia e te Atua (Oxford English Dictionary Online, piti o te nene‘iraa [1989], « Chosen »).
Te mau taata o te faaroo e aore râ, o te tai‘o i teie parau poro‘i ma te hape, e mea ti‘a ïa ia iriti ê i roto i to ratou iho oraraa te aroha mau o te Fatu, ma te parau e « eita vau e ma‘itihia e aore râ, o te ore-roa e ma‘itihia. » E hape tatou ia feruri e, ua faahereherehia teie mau haamaitairaa e teie mau horo‘a no te feia parau-ti‘a ana‘e e aore râ, o te tavini i roto i te mau piiraa faufaa o te Ekalesia. Te haapapû atu nei au e, no te taato‘araa te aroha mau o te Fatu, e ua ineine te Faaora o Iseraela i te ninii mai i taua mau horo‘a ra i ni‘a ia tatou.
Te riroraa e aore râ, o te maitihia’tu, e ere ïa i te hoê ti‘araa tei horo‘ahia no tatou. Area râ, na outou e na‘u iho e faaoti e e ma‘itihia nei tatou. A hi‘o na i te faaohiparaa o teie parau « ma‘iti » i roto i te mau irava o Te Mau Parau Haapiiraa e te Mau Parau Fafau :
« Inaha, e rave rahi te parauhia area râ, aita re‘a te maitihia ra. E eaha te tumu aita ratou e maitihia ra ?
« No te mea ua faatumuhia’tu to ratou mau aau i ni‘a i te mau mea no teie nei ao, e te titau nei ratou i te mau faaturaraa o te taata » (PH&PF 121:34-35 haapapûraa i apitihia‘tu).
Te ti‘aturi nei au i te opipiri-ore o teie mau irava. Aita roa a te Atua e tabula ma‘iti e ti‘a’i ia tatou ia mana‘ona‘o e, e tuuhia’tu to tatou i‘oa i ni‘a i te reira i te hoê mahana. Aita Oia i ta‘oti‘a « i tei maitihia ». Area râ, na to tatou aau e na to tatou mau hinaaro e na to tatou haapa‘o e faaoti e, e tai‘o-mau-hia’nei tatou ei feia ma‘itihia na te Atua.
Ua haapiihia Enoha e te Fatu no ni‘a i teie nei parau haapiiraa. A hi‘o i te faaohiparaa o teie parau ma‘iti i roto i teie mau irava: « A hi‘o i to mau taea‘e o ta‘u ïa i hamani i to‘u iho nei rima, e ua horo‘a vau ia ratou to ratou ite, i te mahana i hamani ai au ia ratou; e i roto i te O i Edene i horo‘a’tu ai au i te taata to’na ti‘amâraa.
« E ua parau atu vau i to mau taea‘e, e ua horo‘a atoa atu i te faaueraa ia aroha ratou ratou iho e ia ma‘iti ratou Ia‘u to ratou Metua » (Mose 7:32-33; haapapûraa tuuhia’tu).
Ua haapii tatou i roto i teie mau papa‘iraa mo‘a, te mau opuaraa faufaa no te horo‘a o te ti‘amâraa, oia ïa, ia here te tahi i te tahi e ia ma‘iti i te Atua. No reira, ua riro mai tatou ei feia na te Atua tei ma‘itihia e ua titau i To’na aroha mau a faaohipa‘i tatou i to tatou ti‘amâraa no te ma‘iti i te Atua.
Teie te hoê irava mataro maitaihia e o te faaohipa pinepinehia, tei roto ïa i te buka a Mose 1:39. Te faataa maitai nei teie irava i te ohipa a te Metua Mure Ore ; « Inaha, o teie Ta‘u ohipa e To‘u hanahana ho‘i, ia faatupu i te tahuti ore e te ora mure ore o te taata nei » (haapapûraa i apitihia‘tu).
Te faataa maitai nei te hoê papa‘iraa mo‘a o te Parau Haapiiraa e te Mau Parau Fafau ma te ateate e te papû i ta tatou ohipa matamua roa ei mau tamaroa e ei mau tamahine na te Metua Mure Ore. E mea maere râ, aita te irava i muri nei i mataro-maitai-hia e aita’toa e faahiti pinepinehia nei. « Inaha, o teie ta oe ohipa, ia haapa‘o i ta‘u mau faaueraa, oia ïa, ma to oe itoito atoa, to oe mana‘o e ma to oe puai ho‘i » (PH&PF 11:20; haapapûraa tuuhia’tu).
No reira, te ohipa a te Metua oia ïa, te faatupuraa i te tahuti-ore e te ora mure-ore o Ta’na mau tamarii. E ta tatou ohipa râ, o te haapa‘oraa ïa i Ta’na mau faaueraa ma to tatou aau atoa, ma to tatou mana‘o e ma to tatou puai – ei reira ïa tatou e riro ai ei feia ma‘iti-mau-hia e, na roto i te Varua Maitai, e farii e e ite i te aroha mau o te Fatu i roto i to tatou oraraa.
E ite tatou i roto i te amuiraa o teie hebedoma i te hoê hi‘oraa no te aroha mau o te Fatu. Ua haamaitaihia tatou no te farii i te a‘o faauru a te feia faatere o te Ekalesia a te Faaora – mau a‘o no te taime mau no to tatou nei anotau e no to tatou mau huru e no to tatou mau tamataraa. Ua haapiihia, ua faateiteihia, ua patuhia, ua piihia tatou ia tatarahapa, e ia faaitoito. Ua faaitoito te varua o teie amuiraa i to tatou faaroo e ua faarahi i to tatou hiaai ia tatarahapa, ia haapa‘o, ia haamaitai atu â, e ia tavini. Mai ia outou, te hinaaro nei au i te apiti i te feia haamana‘o, te feia a‘o e i te faaururaa o te taata iho o tei haamaitai ia tatou i roto i teie nei amuiraa. E i roto maa taime iti e farii tatou tata‘itahi i te aroha mau o te Fatu a faaroo ai tatou i te mau parau opaniraa e te iteraa papû o te peresideni Gordon B. Hinckley. Oia mau, e « hamani maitai to Iehova i te taata atoa; e te vai ra to’na aroha faaherehere rahi i ni‘a i ta’na atoa ra mau ohipa » (Salamo 145:9).
Te oaoa nei au no te faaho‘i-faahou-raa mai te evanelia a Iesu Mesia na roto i te peropheta Iosepha Semita e no te ite o ta tatou i farii i teie mahana no te aroha mau o te Fatu. Ua titau e ua tauturu to tatou mau hiaai, mau faaroo e mau haapa‘o ia tatou ia farii i To’na aroha mau i roto i to tatou oraraa. Te faaite papû atu nei au e, o Iesu te Mesia, to tatou Ora e Faaora, e te vai nei To’na aroha mau no tatou paato‘a. E mata to tatou ia ite maitai e e mau tari‘a to tatou no te faaroo papû i te aroha o te Fatu a faaitoito e a paturu ai te reira ia tatou i teie mau mahana hopea nei. Ia faaîhia to tatou aau i te popou no To’na aroha mau. Na roto i te i‘oa o Iesu Mesia, amene.