Te mau mea rarahi ta te Atua i heheu mai
Te haere nei tatou i mua, na roto i te niu paari o te piiraa hanahana o te peropheta Iosepha, e i te heheuraa a te Atua na roto ia’na ra.
E au mau taea‘e e au mau tuahine, mai tei faahaamana‘ohia’tu ia tatou, i te ava‘e Ditema i muri nei, e faahanahana tatou i te 200raa o te oro‘a fanauraa o te peropheta Iosepha Semita. Na mua a‘e râ i te reira, e rave rahi te mau ohipa e faatupuhia no te faahanahanaraa i te reira ohipa faufaa rahi.
E nene‘ihia te tahi mau buka, e faaterehia te tahi mau rururaa tau‘araa parau, te tahi mau ha‘utiraa aamu, te tahi hoho‘a teata apî, e rave rahi atu â mau ohipa.
No te omuaraa i te reira, ua tupu te mana‘o i roto ia‘u, ei 15raa o te peresideni mai te tau o ta’na ohipa rahi, ia pûpû i to‘u iteraa papû no ni‘a i to’na piiraa hanahana.
Te tape‘a nei au i roto i to‘u rima i te hoê buka iti na’ina’i faufaa roa. Ua nene‘ihia te reira i Liverpool, Peretane, na Orson Pratt i te matahiti 1853, 152 matahiti i teie nei. E faati‘araa teie na Lucy Mack i te aamu o te oraraa o ta’na tamaiti.
Te faati‘ahia ra i reira te tahi mau parau no ni‘a i te farereiraa rau a Iosepha i te melahi Moroni e i te tupuraa mai te Buka a Moromona.
Te faaite ra te buka e, i to’na faarooraa i te parau no ni‘a i to Iosepha farereiraa i te melahi, ua hinaaro to’na taea‘e o Alvin ia haaputuputu te utuafare e ia faaroo ia’na ia faaite mai i « te mau ohipa rarahi ta te Atua i heheu mai ia outou » (Biographical Sketches of Joseph Smith the Prophet and His Progenitors of Many Generations [1853], 84).
Te rave nei au i te reira parau ei tumu parau no ta‘u a‘oraa – te mau ohipa rarahi ta te Atua i heheu mai na roto ia Iosepha te peropheta. E faaite atu vau e toofanu o te mau haapiiraa e rave rahi e te mau ohipa tei faataa ê ia tatou i te tahi atu mau ekalesia, e o tei horo‘ahia mai i te peropheta apî roa na roto i te heheuraa. Ua matau outou i te reira, tera râ, e mea faufaa ia faahiti faahou e ia feruri maite i te reira.
Te matamua, oia ïa, te fâraa mai o te Atua iho e Ta’na Tamaiti Here, te Fatu ti‘afaahou o Iesu Mesia. I to‘u feruriraa, teie orama rahi o te atuaraa, o te ohipa rahi a‘e ïa tei tupu mai te tau a fanauhia ai, a ora ai, a pohe ai, e a ti‘afaahou ai to tatou Fatu i te afaraa o te tau ra.
Aita ta tatou e papa‘iraa no te tahi atu ohipa mai teie te huru.
I roto i te mau tenetere e rave rahi, ua putuputu te taata e ua mârô no ni‘a i te huru o te Atuaraa. Ua haaputuputu o Constantine i te mau feia maramarama no tera vahi e tera vahi i Nicaea i te matahiti 325. I muri mai e piti ava‘e te roa i te tuatapaparaa, ua faaoti ratou i te hoê parau faataaraa, tei riro, no te mau u‘i e rave rahi, ei parau haapiiraa i rotopu i te mau Keritetiano, no ni‘a i te Atuaraa.
Te ani nei au ia outou ia tai‘o i taua faataaraa parau ra, e ia faaau i te reira i ni‘a i te parau a te tamaiti ra o Iosepha. Ua parau oia e, ua ti‘a maira te Atua i mua ia’na, e ua paraparau maira ia’na. Ua ti‘a ia Iosepha ia hi‘o Ia’na e ia faaroo Ia’na. E hoho‘a To’na mai to te taata te huru, e tino i‘o. I pihaiiho Ia’na, te Fatu ti‘afaahou ïa, e tino taa ê, o Ta’na i faaite mai e, e Tamaiti Here Na’na, e ua paraparau atoa’tu o Iosepha Ia’na.
Te ti‘aturi nei au e, i roto i taua area taime poto no taua orama faahiahia ra, ua hau atu te mau mea ta Iosepha i haapii no ni‘a i te Atuaraa, i ta te taatoaraa o te mau aivanaa e te mau orometua i mutaa iho ra.
I roto i teie heheuraa hanahana, ua faaite-faahou-hia mai, ma te feaa ore, te vai-mau-raa o te Ti‘a-faahou-raa o te Fatu o Iesu Mesia.
Ua riro teie iteraa no ni‘a i te Atuaraa, tei hunahia i to te ao nei e rave rahi tenetere te maoro, ei ohipa matamua e te rahi ta te Atua i heheu mai i Ta’na ra tavini ma‘itihia.
E tei ni‘a i te vai-mau-raa e i te parau mau o teie nei orama te patu-raa-hia te ti‘araa mau o te Ekalesia a Iesu Mesia i te Feia Mo‘a i te mau Mahana Hopea nei.
I teie nei te faaite atu nei au i te tahi atu â ohipa faufaa roa ta te Atua i heheu mai.
Te farii nei te ao Keritetiano i te Bibilia ei parau na te Atua. Te rahiraa o te taata aore i ite mea nahea to’na taeraa mai ia tatou nei ra.
No oti noa a‘e nei ia‘u i te tai‘o i te hoê buka nene‘i-apî-hia tei papa‘ihia e te hoê aivanaa tu‘iroo. Na roto i te haamaramaramaraa ta’na i horo‘a mai, e mea papû maitai e, e ere i te mea afaro roa te faanaho-raa-hia teie mau buka e rave rahi o te Bibilia. I roto i te tahi mau tuhaa, e taime roa roa i muri a‘e i te ohipa i tupu, i reira te papa‘iraa i vauvauhia mai ai. Na roto i te reira, e riro te hoê taata i te uiui e, « E parau mau anei te Bibilia ? E parau anei te reira na te Atua ? »
Te parau nei tatou e, e parau mau te reira, ia ti‘a te iriti-raa-hia. Tei roto te rima o te Fatu i te hamaniraa o te bibilia. Tera râ, e ere oia ana‘e i teie nei. Te vai ra te tahi atu ite no te mau parau mau papû e te faufaa i roto.
Te faaite ra te papa‘iraa mo‘a e, « Tei te vaha o na ite toopiti e tootoru ra e riro ai te mau parau atoa na ei parau mau » (2 Korinetia 13:1).
Ua heheuhia mai te Buka a Moromona na roto i te horo‘a e te mana o te Atua. Te parau mai nei te reira mai te reo o te tahi i te piiraa mai mai te repo ra i te faaite-papû-raa i te Tamaiti a te Atua ra. Te parau mai nei te reira i To’na fanauraa, i Ta’na ohiparaa, i To’na Faatatauro-raa-hia e te Ti‘a-faahou-raa, e i To’na fâraa mai i te feia parau-ti‘a ra i Bountiful, i ni‘a i te fenua Amerika.
E ohipa te reira e nehenehe e fafa, e nehenehe e tape‘ape‘a, e nehenehe e tai‘o, e nehenehe e tamatamata. I ropu i to’na na tapo‘i te vai ra te hoê fafauraa no ni‘a i to’na ti‘araa hanahana. E rave rahi mirioni tei tamata i te reira fafauraa, e ua itehia ia ratou e, e mau papa‘iraa mau e te mo‘a ho‘i te reira.
Ua parau te mau taata e ere i ta tatou haapa‘oraa e, o te hoê teie o na piti ahuru buka i nene‘ihia i Amerika tei faatupu i te putapû rahi i roto i te feia tei tai‘o i te reira mau buka.
Te Bibilia, o te parau tutuu ïa o te Ao Tahito ra, area te Buka a Moromona ra, e parau tutuu ïa no te Ao Apî. Te faaite apipiti nei raua ia Iesu ei Tamaiti na te Metua ra.
I roto noa i na matahiti hoê ahuru i ma‘iri iho nei, e 51 mirioni buka tei operehia. E roaa te reira i teie nei i roto i na 106 rahiraa reo.
Teie buka mo‘a, tei ti‘a mai mai te hoê heheuraa na te Manahope, o te tahi atoa ïa parau tutuu no ni‘a i te hanahana o to tatou Fatu.
Te feruri nei au e, te ao Keritetiano taatoa o te toro mai i te rima no te farii ia’na, e no te faariro ia’na ei faaiteraa ora. O te tahi â teie horo‘araa rahi e te faufaa tei horo‘ahia mai na roto i te heheuraa i te peropheta ra.
Te tahi ra, o te autahu‘araa ïa tei faaho‘ihia mai. Te autahu‘araa o te mana ïa no te raveraa i te ohipa i roto i te i‘oa o te Atua. Taua mana ra, o te ofai tape‘a fana ïa o te mau huru haapa‘oraa atoa. Aita i maoro a‘e nei, ua tai‘o â vau i te tahi buka. Te parau ra te reira no te Taivaraa te Ekalesia i tahito ra. Mai te mea e, ua mo‘e te mana o taua Ekalesia ra, mea nahea ïa te mono- faahou-raa-hia mai ?
Ua ti‘a mai te mana o te autahu‘araa mai te vahi no reira mai oia, oia ho‘i, no ni‘a mai i te ra‘i ra. Ua horo‘ahia mai te reira i raro a‘e i te rima o te feia tei mau na i te reira i te tau a ora ai te Faaora i te fenua nei.
A tahi, te vai ra o Ioane Bapetizo, oia tei horo‘a mai i te autahu‘araa a Aarona, e aore ra, te autahu‘araa iti. Apeehia mai te reira i te tere o Petero, Iakobo e o Ioane, Aposetolo na te Fatu o Iesu Mesia, ratou tei horo‘a mai i te Autahu‘araa a Melehizedeka i ni‘a ia Iosepha raua o Oive Kaudere, te autahu‘araa tei fariihia e teie mau Aposetolo i raro a‘e i te rima o te Fatu Iho a ora ai Oia, e o tei parau mai e : « E e horo‘a’tu ho‘i au i te mau taviri o te hasileia o te ao ra ia oe: e ta oe e haamau i raro nei, e haamau-atoa-hia ïa i te ao: e ta oe e tuu i raro nei, e tuu-atoa-hia ïa i te ao » (Mataio 16:19).
E mea nehenehe mau te faaho‘i-raa-hia mai te evanelia, e na roto i te reira, i faati‘ahia ai te Ekalesia i te matahiti 1830, 175 matahiti i teie hepetoma. Ua horo‘ahia mai te i‘oa mau o te Ekalesia na roto i te heheuraa. Na vai taua Ekalesia ra ? Na Iosepha Semita anei ? Na Olive Kaudere anei ? E ere, o te Ekalesia ïa a Iesu Mesia i te Feia Mo‘a i te mau Mahana Hopea nei.
Teie â te tahi atu heheuraa rahi e te faahiahia tei horo‘ahia mai i te peropheta, oia te faanahonahoraa no te ora mure o te utuafare.
Na te Manahope i faati‘a i te utuafare. O te autaatiraa hau roa a‘e te reira i te mo‘a i te mau autaatiraa atoa. O te ohipa hau roa a‘e te reira i te paari i te mau ohipa atoa. O te faanahonahoraa tumu te reira o te sotaiete.
Na roto i te heheuraa a te Atua i Ta’na peropheta, ua tae mai te haapiiraa e te mana e ti‘a ai i te mau utuafare ia taati-amui-hia eiaha no teie noa oraraa, no te oraraa râ e a muri noa’tu.
Te feruri nei au e, mai te mea e, e nehenehe ta tatou e haapii papû i teie nei haapiiraa, e anaanatae te rahiraa mirioni tane e te vahine faaipoipo tei here ia ratou te tahi e te tahi, e tei here ho‘i i ta ratou mau tamarii, tera râ, tei roto noa to ratou faaipoiporaa i tera faanahoraa e, « e tae roa’tu i te tau e faataa ai te pohe ia orua. »
Te ino ore o te mau tamarii na’ina’i, o te tahi atu ïa heheuraa ta te Atua i horo‘a mai na roto i te peropheta Iosepha. Te peu i matarohia, o te bapetizoraa ïa i te mau tamarii no te faaore i ta te taata e parau ra e, te hara a Adamu e o Eva. Ia au i te haapiiraa o te faaho‘i-faahou-raa mai, e ravehia te bapetizoraa no te matararaa te hara a te hoê taata iho. E riro te reira ei fafauraa i rotopu i te Atua e te taata. E ravehia te reira i te matahiti o te ti‘aauraa, ia rava‘i te paari o te taata no te ite i te maitai e te ino. E ravehia te reira na roto i te utuhiraa, ei faahoho‘araa i te poheraa e te hunaraa o Iesu Mesia e i To’na ho‘iraa mai na roto i te ti‘a-faahou-raa.
E faaite faahou atu vau i te tahi parau mau i heheuhia mai.
Ua parauhia ia tatou e, e ore te Atua e haapa‘o i te huru o te taata, noa’tu râ i te reira, aita roa vau i ite i roto i te tahi ekalesia ê atu, te hoê faanahoraa no te feia i tera pae mai i te paruru no te pohe, ia farii ratou i te mau haamaitairaa atoa tei horo‘ahia i te feia ora. Teie ana‘e te Ekalesia e mau nei i te haapiiraa rahi no te faaoraraa i te feia i pohe.
Te te‘ote‘o nei te taata i te parauraa e, ua « faaorahia » ratou, e i roto â i te reira iho hutiraa aho, te parau atoa nei ratou e, aita, e eita e ti‘a i to ratou mau hui metua ia faaorahia.
Ua riro te Taraehara o Iesu ei maitai no te mau taata atoa, ei tusia rahi mono. Ua faataa oia i te faanahoraa na roto i te reira i riro ai Oia ei mono no te mau taata atoa nei. Teie faanahoraa o ta te taata tata‘itahi e nehenehe e rave ei maitai no te tahi taata ê atu, te faaohipahia nei ïa i roto i te mau oro‘a o te Fare o te Fatu. I ô nei, te tavini nei tatou ei maitai no te feia tei pohe ma te ite ore i te evanelia. Tei ia ratou te fariiraa e aore ra, te pato‘iraa i te oro‘a tei ravehia. Ua aifaito ratou i teie nei i te feia e ora nei i te fenua nei. Ua horo‘a-atoa-hia i te feia pohe te mau rave‘a tei horo‘ahia i te feia ora. Te parau faahou nei â vau e, aue te hanahana e te nehenehe o te faanahoraa ta te Manahope i horo‘a mai na roto i Ta’na heheuraa i To’na ra peropheta.
Ua heheuhia mai te natura mure ore o te taata nei. E mau tamaiti e e mau tamahine tatou na te Atua. Te Atua te Metua o to tatou varua. I ora na tatou hou a haere mai ai i ô nei. E huru taata to tatou. Ua fanauhia mai tatou i roto i teie nei oraraa i raro a‘e i te hoê faanahoraa hanahana. Tei ô nei tatou no te tamata i to tatou haapa‘o maitai, i roto i te ti‘amâraa ta te Atua i horo‘a mai ia tatou. Ia pohe tatou, e ora noa â tatou. E toru tuhaa o to tatou oraraa mure ore; a tahi, to tatou oraraa hou te oraraa tahuti nei; a piti, to tatou oraraa tahuti nei; e a toru, to tatou oraraa i muri a‘e i te tahuti nei. Na roto i te pohe e faaru‘e mai tatou i teie ao, e e tomo atu tatou, na roto i te paruru, i roto i te hoê basileia i ti‘amâhia ia tatou ia tomo. Teie â te hoê haapiiraa hoê roa e te faufaa rahi na teie Ekalesia tei horo‘ahia mai na roto i te heheuraa.
Te horo‘a’tu nei au i teie nei haapotoraa poto roa o te horo‘araa faahiahia o te ite e te mana no ô mai i te Atua ra, i ni‘a i te upoo o To’na ra peropheta. Ahiri e taime, e faaite atu â ïa vau i te tahi atu. E ti‘a ia‘u ia paraparau no ni‘a i te hoê tumu parau hopea. O te parau ïa no te heheuraa i teie anotau. Teie te mea ta te peropheta i papa‘i i roto i te hiro‘a faaroo,
« Te ti‘aturi nei matou i te mau mea atoa i heheuhia mai e te Atua, te mau mea atoa o Ta’na e heheu mai nei i teie nei, e te ti‘aturi nei ho‘i matou e, e heheu mai â Oia e rave rahi atu â mau mea maitai e te faufaa rahi no To’na ra basileia » (Te mau Hiro‘a Faaroo 1:9).
Te hoê ekalesia e tupu i te rahi, te ekalesia e parare na te ao taatoa nei i teie nei tau fifi, e titau oia i te heheuraa tamau mai ni‘a mai i te terono teitei o te ra‘i ra no te arata‘i ia’na e no te faahaere ia’na i mua.
Na roto i te pure e te imiraa tuutuu ore i te hinaaro o te Fatu, te faaite papû nei tatou e, ua farii tatou i te arata‘iraa, ua horo‘ahia mai te heheuraa, e te haamaitai nei te Fatu i Ta’na Ekalesia i roto i to’na tere i faataahia.
Te haere nei tatou i mua, na roto i te niu paari o te piiraa hanahana o te peropheta Iosepha, e i te heheuraa a te Atua na roto ia’na ra. E ohipa rahi tei ravehia no te arata‘i mai ia tatou i teie nei mahana. Mea rahi â râ te ohipa e toe nei no te hopoi atu i teie nei evanelia faaho‘ihia mai i « te mau fenua atoa, e te mau opû atoa, e te mau reo atoa, e te mau nunaa atoa » (Apokalupo 14:6).
Te oaoa nei au no te mau rave‘a atoa tei faatahoê ia tatou i roto i to tatou haereraa i mua i roto i te faaroo. I te tahi taime, e mea teimaha te reira hopoi‘a, ua ite maitai outou i te reira. Tera râ, eiaha tatou e amuamu. E haere ana‘e râ tatou ma te faaroo, ma te rave tata‘itahi i ta tatou tuhaa.
I roto i teie matahiti faahanahanaraa, na roto i ta tatou iho mau faanahoraa, e faatura ana‘e tatou i te peropheta, na roto ho‘i ia’na i heheu mai ai te Atua i te mau mea e rave rahi.
Ua hiti mai te mahana i ni‘a i te oraraa o Iosepha i te hoê mahana to‘eto‘e i Vermont i te matahiti 1805. Ua hope te reira i te hoê avatea mahanahana no te matahiti 1844. I roto i na matahiti poto e 39 o to’na oraraa, ua tae mai, na roto ia’na, te hoê niniiraa faito ore no te ite, no te mau horo‘araa, e te haapiiraa. Aita hoê mea e ti‘a ia faaauhia i te reira. Ua riro te reira ei tumu no te iteraa papû no te rahiraa mirioni Feia Mo‘a i te mau Mahana Hopea nei i te ao atoa nei. E hanahana rahi to tatou i te ô-atoa-raa i roto i te reira.
I to‘u tamariiriiraa, mea au roa na‘u ia faaroo i te hoê taata reo maitai, ia himene i te mau parau a John Taylor:
Te hi‘o, te hi‘o, Iosepha te hi‘o !…
E mea au na‘u ia haamana‘o ia’na;
Tei ma‘itihia e te Atua e te hoa o te taata nei,
Ua faaho‘i faahou mai oia i te autahu‘araa;
Ua ti‘a ia’na ia hi‘o i muri e i mua, atoa…
E ua faaite mai i te faanahoraa o te ra‘i.
(« The Seer, Joseph, the Seer », Hymns [1948], no. 296)
E hi‘o mau oia. E heheu parau oia. E peropheta oia no te Atua ora tei paraparau mai no’na iho e no te mau u‘i a muri a‘e.
Te amui atoa’tu nei au i to‘u iteraa papû no te hanahana o to’na piiraa, no te viivii ore o to’na oraraa, e no te titiroraa oia i to’na iteraa papû i to’na pohe, na roto i te i‘oa mo‘a o to tatou Faaora, oia te Fatu o Iesu Mesia ra, amene.