Haamaitairaa
Te ora nei te Atua to tatou Metua Mure Ore… O Iesu te Mesia, te Taraehara o te taata nei. Ua faaho‘i faahou mai Raua i ta Raua ohipa i roto i teie tau tuuraa hopea na roto i te mauhaa ra te peropheta Iosepha.
Te opani nei tatou i teie amuiraa nehenehe roa. Ua riro mau te reira ei amuraa maa faauru i ni‘a i te iri amuraa a te Fatu. Ua nehenehe roa te mau himene, te mau pure e te mau a‘oraa. Ua haamaramaramahia e a faateiteihia tatou, ua faaetaetahia to tatou faaroo.
Ua ite-papû-hia te tupuraa o te Ekalesia i te rahi, i te mea e, ua hurihia ta matou mau parau i roto e 80 reo, e ua haapurorohia ta matou mau poro‘i i te mau melo na roto i te rave‘a pee‘utari na te ao ato‘a nei, e e faaroohia te reira e rave rahi mau taata, i roto e rave rahi mau fenua. O te tupuraa te reira o te mau parau ta Moroni i parau atu i te tamaiti peropheta ra i te pô no te 21 no setepa 1823.
E tamaiti apî noa â oia i taua taime ra, e tamaiti faaapu veve e te iti te ite haapiiraa. Aore a’na e tao‘a iti noa a‘e. Aore a’na na metua e tao‘a iti noa a‘e. Ua ora oia i roto i te hoê vahi faaapu, ma te ite-ore-hia i te tahi atu vahi. Noa’tu râ, na ô maira te melahi ia’na e, « e ve‘a oia i tonohia mai mai mua mai i te aro o te Atua… e e ohipa ta te Atua e horo‘a na [Iosepha] ia rave ; e haamaitaihia e e faainohia [to’na] i‘oa i rotopu i te mau nunaa ato‘a, te mau opû ato‘a, e te mau reo ato‘a ho‘i, oia ho‘i, e parauhia i rotopu i te mau taata ato‘a e, e taata maitai [oia], e aore râ e taata ino » (Iosepha Semita – Aamu 2:33).
Eaha te tumu no taua huru ohipa ra ? Ua tapitapi paha te mana‘o o Iosepha. Ua tupu paha te maere rahi i roto ia’na.
Area râ, ua tupu mau te reira. E e tupu â te mau mea rarahi atu â.
I te 23 no te ava‘e titema o teie matahiti 2005, te opua nei matou e faahanahana i to’na mahana fanauraa na roto i te hoê oro‘a haamana‘oraa rahi ia’na.
Te mana‘o nei au, mai te mea e, e nehenehe, e haere i te vahi i fanauhia ai oia no te rave faahou te ohipa ta Joseph F. Smith, te ono o te peresideni o te Ekalesia, i rave i te 23 no titema 1905, hoê tenetere i teie nei. I roto i taua tere ra, ua haamo‘a oia i te ofa‘i haamana‘oraa ei tapa‘o no te vahi fanauraa o te peropheta, ua hamani-ato‘a-hia te hoê fare haamana‘oraa na‘ina‘i i reira.
A ti‘a ai au i Veramona, tei ô nei ïa te peresideni Monson e te peresideni Faust, e te tahi atu mau hui mana faatere rahi i roto i te Pû Amuiraa nei. E î roa teie fare rahi, e e haapararehia te faanahonahoraa na te mau vahi e rave rahi na roto i te pee‘utari. E faaroohia te mau himene e te mau parau faahanahanaraa au maitai i South Royalton e i Roto Miti nei, no ni‘a i te peropheta rahi o teie nei tau tuuraa.
Te mau himene ta te pŭpŭ himene i himene i teie po‘ipo‘i ei tapa‘o faahanahanaraa i te peropheta, o te hoê ïa faaineineraa no te rururaa i te ava‘e titema. Te tia‘i maoro nei matou i te reira, ma te ti‘aturi e, e apiti mai outou paato‘a ia matou nei i taua taime ra.
Te vaiiho atu nei matou i to matou iteraa papû no ni‘a i te hanahana rahi o teie ohipa. Aue te nehenehe teie ohipa. Aue te pau to tatou oraraa mai te mea e, aita te reira. Te ora nei te Atua to tatou Metua Mure Ore. Ua here Oia ia tatou. Te ara nei Oia i ni‘a ia tatou. O Iesu te Mesia, te Taraehara o te taata nei. Ua faaho‘i faahou mai Raua i ta Raua ohipa i roto i teie tau tuuraa hopea na roto i te mauhaa ra te peropheta Iosepha. Te faaite papû nei au ma te hanahana i te reira, e te vaiiho atu nei au i to‘u here e ta‘u haamaitairaa ia outou na, e au mau taea‘e e au mau tuahine here no teie Ekalesia rahi. Ia haamaitai mai te Atua ia outou tata‘itahi.
E teie nei, no te opaniraa, te hinaaro nei au e haamauruuru i te feia tei rohi itoito no te faariro i teie amuiraa ei amuiraa nehenehe, outou e rave rahi tei haa i muri mai i te mau piha, no te faatupuraa i teie mau mea ato‘a. Ua rave ratou i te ohipa i te pô e te ao no te faatupu i teie mau mea – te mau uitie, te feia haapa‘o matini, te pŭpŭ taata paruru fifi, te feia rapaau ma’i, te mau mutoi arai purumu, te feia auvaha parau, te mau papa‘i parau tei hi‘opo‘a i ta matou mau a‘oraa e tei patapata i te reira e rave rahi taime.
Ia haamaitai mai te Atua ia outou paato‘a, ta‘u ïa pure haehaa roa. E faaitoito tatou i te haere ma te parau ti‘a i mua Ia’na, ta‘u ïa aniraa haehaa, e te vaiiho atu nei au i ta‘u haamaitairaa i ni‘a ia outou na roto i te i‘oa mo‘a o to tatou Taraehara, oia te Fatu o Iesu Mesia ra, amene.