Te tusia o te hoê ïa oaoa e te hoê haamaitairaa
Te pure nei au ia riro tatou paato‘a ei mau Feia Mo‘a tei hiaai i te faatusia e ia farii i te mau haamaitairaa taa ê a te Fatu.
E te mau taea‘e e te mau tuahine iaorana i teie avatea. Ua haapii te peropheta Iosepha Semita e, « te hoê haapa‘oraa o te ore e titau i te faatusiaraa i te mau mea’toa, aita roa ïa i rava‘i i te puai no te faatupu i te faaroo i roto i te oraraa e i te faaoraraa » (Lectures on Faith [1985], 69). Ia tuatapapa ana‘e tatou i te aamu o te mau papa‘iraa mo‘a, e parau tatou e, o te aamu ïa o te tusia.
E ite tatou i te mau iteraa nehenehe o te mau papa‘iraa mo‘a no te feia o tei faatusia i to ratou oraraa no te tape‘araa mai i to ratou faaroo e i to ratou iteraa papû. Hoê hi‘oraa i roto i te aamu no Alama e no Amuleka i to raua faaue-raa-hia ia haapa‘o na roto i te mauiui te feia no Amoniha i te huri-raa-hia i roto i te auahi e pohe atura area râ, ua tape‘a i to ratou faaroo (a hi‘o Alama 14:7-13).
E feruri ato‘a tatou no Iesu Mesia o tei farii i te haere mai i raro i te fenua nei mai mua mai i te aro o To’na ra Metua e ia faatupu i te tusia no te faaoraraa i te ao nei na roto i te mauiui hau atu o tei ore i faaoroma‘ihia na e te hoê noa’tu taata.
I roto i teie tau tuu-raa evanelia hopea, rave rahi mau pionie tei pohe e tei horo‘a i te tusia hopea no te tape‘araa i to ratou faaroo.
I teie mahana, aita tatou i titauhia ia horo‘a i te hoê tusia rahi na roto i te horo‘araa i to tatou iho ora, e ite râ tatou rave rahi Feia Mo‘a o tei faatusia na roto i te mauiui, no te tape‘araa i to ratou faaroo e i to ratou iteraa papû. E mea fifi-roa’tu râ paha ia horo‘a i te mau tusia na‘ina‘i a‘e o to tatou oraraa nei. Mai te faaturaraa i te Mahana Sabati, te tai‘oraa i te mau papa‘iraa mo‘a i te mau mahana ato‘a e aore râ, i te aufauraa i te tuhaa ahuru. Eita râ teie mau tusia e riro ei mea ohie maoti râ, ia opua e ia faaoti tatou i te faatusia i te mau mea e hinaarohia no te haapa‘oraa i teie mau faaueraa.
A rave ai tatou i teie mau tusia iti, e haamauruuruhia tatou i te tahi atu mau haamaitairaa no ô mai i te Fatu. Ua parau te Arii Beniamina, « E amutarahu â outou ia’na e e amutarahu ho‘i outou i teie nei, e a muri noa’tu » (Mosia 2:24). E, mai ta’na i na reira i to’na iho mau taata, te faaitoito mai nei te Arii Beniamina ia tatou ia farii e rave rahi atu â mau haamaitairaa a tamau noa’i tatou i te haapa‘o i te parau a te Fatu.
Te mana‘o nei au i te haamaitairaa matamua roa e fariihia no te faatusiaraa o te oaoa ïa o ta tatou e farii ia aufau tatou i te hoo. Penei a‘e, te mana‘o rahi e riro te tusia ei haamaitairaa e riro maite atura ei haamaitairaa. Ia roaa ia tatou taua huru mana‘o ra e ia ite tatou i te oaoa, ua farii a‘e na ïa tatou i te hoê haamaitairaa.
Aita i maoro a‘e nei, ua ite au i teie huru haamaitairaa i rotopu i te Feia Mo‘a no Korea o tei faahanahana a‘e nei i te 50raa o te matahiti o te haamau-raa-hia te Ekalesia i te fenua Korea e i te 200raa o te matahiti o te fanauraa o Iosepha Semita. E faati‘a poto noa’tu vau i ta ratou mau tusia e i te oaoa e i te mau haamaitairaa o ta ratou i farii.
No te faahanahana i te evanelia o tei horo‘a i te ti‘aturi e i te itoito i te nunaa no Korea o tei mauiui na i te Tama‘i o te fenua Korea, ua haamata te mau melo i te faaineine no teie nei faahanahanaraa hau atu hoê matahiti te maoro. Rave rahi mau melo no Korea – te Paraimere, te Feia Apî Tamaroa, Tamahine, te Feia Apî Paari, te mau tuahine no te Sotaiete Tauturu e te tahi atu â – tei haaputuputu no te faaineine i teie faahanahanaraa. Ua haapiipii ratou e rave rahi mau ori tumu mai te ori o te mau tiare, te ori haamenemene, te ori arearea, e te ori a te feia faaapu. Ua ha‘uti ratou i te mau pahu ; ua ha‘uti i te tae kwon do, te teataraa taata ora, te ori popaa, e te himene ; ua ha‘uti i te tahi mau faaanaanataeraa ; e ua himene te pŭpŭ himene.
No te maniania rahi o te mau pahu a te feia apî, ua riri te feia tapiri e ua tape‘ahia teie ohipa. E mea fifi roa ia haapiipii no te hoê tau maoro, ua rave râ ratou na roto i te oaoa. Aita roa vau i ite noa‘e i te hoê taata i te amuamuraa no to ratou tutavaraa e faatusiaraa ia ti‘a i ni‘a i te hora 4 i te aahiata no te rave i te pereoo utaraa taata no te haere i te haapiipiiraa. Ua oaoa ratou e ua faaite i te aau mehara no te mau haamaitairaa a te Fatu e ua faaite i to ratou anaanatae.
Rave rahi ato‘a mau misionare no te ara mai, ua oti ta ratou tau misionare tei ho‘i faahou mai i te fenua Korea e ta ratou mau vahine e ta ratou mau tamarii no teie faahanahanaraa. Ua faatusia ratou i te haereraa mai i ta ratou misioni i te fenua Korea e râ ê te tau. I teie taime te tapiti nei ta ratou faatusiaraa i to ratou taime e ta ratou moni no te tere mai e to ratou mau utuafare e ia amui i roto i teie faahanahanaraa i teie tau mahanahana. Ua oaoa râ ratou e ua mauruuru ho‘i no te mau ohiparaa o ta ratou i amui atu i roto.
No te faaitoito i te Feia Mo‘a no te fenua Korea e te tahi atu feia, ua tono te Fatu i Ta’na peropheta, te peresideni Gordon B. Hinckley i te fenua Korea. Ua faatusia ato‘a te peresideni Hinckey ia’na no teie tere na roto i te faanahoraa 13 mahana te maoro no te tere na te ao nei, e ua haere mai i Korea no te farerei i te Feia Mo‘a o ta’na i here e rave rahi matahiti e no te hopoi mai i te here taa ê o te Fatu. Aita roa te hoê taata i mana‘o e e tusia teie. Area râ, ua tahe te roimata no te oaoa e no te aau mehara. O teie taua haamaitairaa ra o ta tatou e faahiti nei, e ere anei ?
E te mau taea‘e e te mau tuahine, eiaha e măta‘u i te faatusia. A mauruuru no te oaoa e no te mau haamaitairaa o te tusia.
I te tahi taime e vai te hoê area i ropu i te tusia e i te haamaitairaa. E tae mai te tusia ia au i ta tatou faanahoraa area te haamaitairaa, e tae mai te reira eiaha i ta tatou faanahoraa, i te faanahoraa râ a te Fatu. No te reira, ua tamahanahana mai te Fatu ia tatou na roto i te parauraa e « Inaha, eiaha e rohirohi i roto i te ohipa maitai, no te mea te haamau atu nei outou i te niu no te hoê ohipa rahi roa » (PH&PF 64:33).
E tae mai ihoâ te mau haamaitairaa ia tatou. A haamana‘o e, e riro te tusia ei haamaitairaa. A faatusia tatou i te mau mea iti ato‘a.
Ia tai‘o tatou i te Buka a Moromona a mâoro ai tatou i to tatou mau mata ta‘oto, a haamana‘o te pee nei tatou i te a‘o a to tatou peropheta e a farii atu ai i te oaoa e roaa no roto mai i taua ite ra. Rave rahi a tatou mau tarahu no te aufau ; ia aufau ana‘e râ tatou i te tuhaa ahuru, a tuu ia tatou ia farii i te oaoa no te horo‘araa i te hoê mea na te Fatu.
I reira te haamaitairaa rahi a‘e e niniihia mai ai i ni‘a ia tatou. E riro ïa mai te hoê faahitimahutaraa e te oaoa ia farii tatou i te hoê horo‘araa mana‘o-ore-hia.
Mai ta te peresideni Spencer W. Kimball i parau, « Ia horo‘a tatou, e ite tatou e, ‘e hopoi mai te tusia i te mau haamaitairaa o te ra‘i !’ [« Aue te taata i parau ia Iehova », Te mau Hiimene, no. 16]. E i te pae hopea, e ite tatou e, e ere-roa’tu ïa i te tusia » (« Becoming the Pure in Heart », Ensign, Mati 1985, 5). Te pure nei au ia riro tatou paato‘a ei mau Feia Mo‘a tei hiaai i te faatusia e ia farii i te mau haamaitairaa taa ê a te Fatu. E ti‘a‘i te Fatu ia tatou ia ore tatou ia fifi i te faaoroma‘iraa i te hoê noa’tu tusia. Na roto i te i‘oa o Iesu Mesia, amene.