Te Liahona a te Fatu
Ua riro te mau peropheta e te mau aposetolo o te mau tau ato‘a ei avei‘a no ô mai i te Fatu. E mea ohie te arata‘iraa tei horo‘ahia na roto mai ia ratou.
E te mau taea‘e e te mau tuahine, a parahi noa’i au i ô nei, ua farii au i te hoê hiaai rahi i te faaite ia outou i to‘u here e no te haapapû ia outou paato‘a na o te faaroo mai nei i te ta‘i o to‘u nei reo no te here o to outou Metua i te Ao ra. I te i‘oa o te mau taea‘e, te faatae atu nei au i to‘u aau mehara no to outou hinaaroraa i te haere mai i teie mahana ia faaamuhia e te parau maitai a te Atua.
E mea au na‘u ia hahaere na te mau mou‘a, e ia haere au i roto i te mau vahi atea o te fenua e faaohipa pinepine au i te hoê avei‘a, i te hoê hoho‘a fenua e i te mau tapa‘o no te arata‘i ia‘u i to‘u tipaeraa. Ua riro teie mau mauihaa ei tauturu, ei mau mea faahiahia ia topa vau i ni‘a i te mau maaraa puromu.
Ua î ato‘a te oraraa i te mau maaraa puromu e te mau e‘a na‘ina‘i. Rave rahi mau e‘a ia pee, e rave rahi mau reo e pii haere « i ô nei » e aore râ, « i ô atu ».1 Rave rau mau huru ve‘a e faaapiapi nei i to tatou oraraa, te hinaaro nei rave rahi ia topa tatou i ni‘a i te hoê e‘a aano e haerehia e rave rahi mau taata.
A feruri noa’i eaha te reo e faaroo e aore râ, eaha te e‘a mau i roto i teie rahiraa, aita anei outou i ui ia outou iho, mai ta Iosepha Semita i rave: « Eaha ra ïa te rave ? O vai i roto i teie mau [reo e mau puromu] tei tano e aore râ, ua hape anei ratou paato‘a ? Mai te mea ua tano te hoê, o te hea ïa, e nahea vau e ite ai i te reira ? »2 Te faaite nei au ia outou e, te tapa‘o e te arata‘i tamau noa nei Iesu Mesia i te e‘a, te faataa nei i te mau tuhaa o to tatou tere. E e‘a tĭtĭ‘aifaro e te piriha‘o To’na o te arata‘i ti‘a i te « maramarama e i te ora e te mure ore ».3 Te hinaaro nei au e faaite ia outou te hoê hi‘oraa no roto i te mau papa‘iraa mo‘a.
I to te Fatu parauraa, ua faaru‘e Lehi e ta’na mau tamarii i Ierusalema e haamata’tu ai i te hoê tere tuiroo i te hoê fenua tei faataahia. I muri mai i to ratou puhaparaa no te hoê tau i roto i te hoê afaa piri i te anavai pape, ua parau te Fatu ia Lehi i te hoê ru‘i e e taime tano teie ia tere faahou i roto i te medebara. No te rahi o te mana‘o i roto i to’na feruriraa, ti‘a a‘era i ni‘a i te po‘ipo‘i e haere atura i te uputa o to’na ti‘ahapa inaha i to’na maere rahi te vai nei te hoê pôro i mua ia’na i ni‘a i te fenua o tei tuuhia i reira e te rima o te Atua. E avei‘a, e Liahona i roto i to ratou reo, e e piti na auri iti no te arata‘i ia ratou i to ratou tere, ia nehenehe ratou ia tere e ia faufaahia e ia parahi ma te pe‘ape‘a-ore i te mau peho ruperupe. E ere râ te reira noa. E papa‘iraa to roto ato‘a i teie avei‘a e mea ohie ia tai‘o e e taui i tera taime e tera taime, e ia haamaramarama i teie utuafare i te mau e‘a o te Fatu.4
I roto i to ratou tere, ua tauturu teie Liahona e aore râ, teie avei‘a i te utuafare o Lehi ia maitai-roa e ua tapae mau i te vahi i faataahia no ratou. E mea faufaa râ ia ite i te hi‘oraa a Nephi e e mea na roto noa i te faaroo, te itoito e i to ratou haapa‘o i te avei‘a e tere ai te reira. No teie tao‘a faahiahia o tei arata‘i ia ratou na roto i te medebara, ua parau Nephi : « E no reira e ite ai tatou na roto i te mau rave‘a iti e faatupu ai te Fatu i te mau mea rarahi ».5
Aita te faaotiraa a Nephi i mo‘e ia Alama e 500 matahiti i muri mai, ua faahaamana‘o oia i ta’na iho tamaiti i te faufaa rahi no te Liahona. Ua haapii oia ia Helamana e, ua faaineine te Fatu i teie avei‘a no te faaite i to ratou mau metua i te e‘a e haerehia e ratou a tere ai ratou na roto i te medebara e no te mea, e ravehia taua mau semeio ra na roto i te mau rave‘a iti i faatau ai ratou e i ore ai e faaohipa i to ratou faaroo e te itoito. E i te pae hopea, ua faaorehia taua ohipa umere rahi ra, e ua haamaorohia to ratou tere e aore râ, ua haere ti‘a-noa’tu i maoro ai ratou i roto i te medebara, e no ta ratou mau hara i pohe ai ratou i te po‘ia e te po‘ihâ.6
« E ta‘u tamaiti e, » te parau ra Alama, « eiaha tatou e faatau noa no te ohie o te e‘a ra ; ua na reira ho‘i to tatou mau metua ; ua tuuhia mai ho‘i te rave‘a ia ratou, e ia hi‘o ana‘e, e ora‘i ratou ; ua na reira-ato‘a-hia ho‘i ia tatou nei. Ua papû te e‘a, e ia hi‘o tatou, e ora ïa tatou e a muri noa’tu. E teie nei, e ta‘u tamaiti, ia haapa‘o oe i taua mau mea mo‘a nei, oia ïa, e hi‘o i te Atua ».7
Ua faaineine te Fatu i teie mahana i te arata‘iraa e i te e‘a no te mau taata e no te mau utuafare, mai Ta’na ato‘a i rave no Lehi. E Liahona teie amuiraa rahi no teie nei anotau, e taime e e vahi no te fariiraa i te arata‘iraa e te e‘a faauruhia no te haafaufaa e no te tauturu ia tatou ia pee i te e‘a o te Atua na roto i te mau tuhaa ruperupe o te tahuti nei. A farii e ua amui tatou no te faaroo i te a‘o a to tatou mau peropheta e te mau aposetolo o tei pure e o tei faaineine maitai ia ite i te mea o ta te Fatu e hinaaro ia ratou ia parau. Ua pure tatou no ratou e no tatou ato‘a ia haapiihia tatou e te Faa‘o i te mana‘o e i te feruriraa o te Atua. E mea papû e aita’tu e taime e e vahi maitai-atu-â e nehenehe ai te Fatu e arata‘i i To’na feia i teie nei amuiraa.
E avei‘a te mau haapiiraa o teie nei amuiraa na te Fatu. I teie mau mahana i mua, e haere outou mai ta Lehi i rave, i te uputa o to outou fare e e ite atu i te hoê Liahona, te hoê Ensign, e aore râ, i te tahi mau ve‘a a te Ekalesia i roto i ta outou mau afata rata e ia ite i te tereraa o teie nei amuiraa. Mai te Liahona i tahito ra, e riro teie papa‘iraa apî i te ohie ia tai‘o e e horo‘a ia outou e i to outou mau utuafare te ite i te mau puromu e i te mau e‘a o te Fatu.
Mai ta Nephi e ta Alama i faahaamana‘o ia tatou, e faaineine te Fatu i te e‘a no to tatou tere ia au i te faaroo, te itoito e i te haapa‘o o ta tatou e horo‘a i taua e‘a ra. Eita Oia e heheu mai i te mau e‘a apî mai te mea aita o tatou e faaroo no te pee Ia’na e i te mau e‘a o Ta’na i faaite mai ra. E roaa te faufaa i te feia o te pee ma te itoito i te a‘o faauruhia, ia au i « te huru o to ratou oraraa e o ta ratou parau » e tae noa’tu e ua tae faahou mai teie mau papa‘iraa apî no te tauturu ia ratou ia haere i mua i roto i to ratou tere i te fenua tei parauhia.
E to‘u mau taea‘e e mau tuahine, ua riro te mau peropheta e te mau aposetolo o te mau tau ato‘a ei avei‘a no ô mai i te Fatu. E mea ohie te arata‘iraa tei horo‘ahia na roto mai ia ratou ; e mea papû ta ratou haapiiraa. E au To’na e‘a mai To’na zugo te mărû. Eiaha râ e vare i te ohie o te e‘a, ma te mana‘o e ohipa iti noa e aore râ, aita e faufaa, e haapa‘o râ i te mau mea mo‘a e ia hi‘o Ia’na ia riro mai Ia’na ra te huru e ia ora i roto Ia’na – e amuri noa’tu.
Te ti‘a nei au i teie mahana no te faaite e e tupu te mau fafauraa ato‘a a te Metua ; e ua tono mai Oia i Ta’na Fanau Tahi i te fenua nei no te faaite e no te arata‘i i te haere‘a ; e ua fâ mai te Metua e te Tamaiti ia Iosepha Semita i te po‘ipo‘i o te hoê mahana nehenehe, ateate, i te haamataraa o te tau mahanahana o te matahiti 1820, ma te faaho‘i mai i te taato‘araa o te mau titauraa no te haamanuïa i te mau mahana o te taata tahuti nei ; e na te hoê peropheta i teie mahana, o te peresideni Gordon B. Hinckley e faaite i te e‘a i te feia o te imi ra e o te haapa‘o e tae noa’tu i te hopea. E ia faaohipa tatou i to tatou faaroo e ia haapa‘o i te mau arata‘iraa e i te mau tohu a te mau Liahona o te mau mahana hopea nei, te pure nei au na roto i te i‘oa o Iesu Mesia, amene.