Ua au to‘u varua i te parau mo‘a
Aita’tu e mea faufaa o ta tatou e rave no to tatou mau utuafare maori râ, te haapuairaa ia ratou na roto i te mau papa‘iraa mo‘a.
Ua ani mai to tatou peropheta here ia tatou ia tai‘o i te Buka a Moromona hou te hopea no teie nei matahiti. A farii ai au i teie titauraa, te ite nei au i te mau mea apî e te anaanatae i roto i teie buka noa’tu e ua tai‘o noa na vau i te reira e rave rahi mau taime na mua’tu. I roto i te 2 Nephi 4:15 te na ô ra e, « No te mea ua au to‘u varua i te parau mo‘a i papa‘ihia ra, e te feruri nei to‘u aau i te reira, e te papa‘i nei ho‘i i te reira ei haapiiraa e ei faufaa na to‘u mau tamarii ».
Te haapii mai nei teie irava ia tatou nahea ia tai‘o i te Buka a Moromona. Te faaite ra te reira e toru mau mana‘o faufaa.
A tahi, « Ua au to‘u varua ». E mea au na‘u teie pereoda ! Ua mana‘o vau i te hiaairaa e i te poiharaa i te ite a tai‘o ai au i te mau papa‘iraa mo‘a area te auraa ra, e mea ê ïa. Te ite nei au e, te mea o ta‘u e ooti no roto i te mau papa‘iraa mo‘a o te mea ïa ta‘u i faaineine. Ia tai‘o vau i te reira, te hopoi maira ïa vau i te hoê taata apî e te mata apî i roto i teie iteraa. Teihea roa vau i roto i to‘u oraraa, te mau iteraa taa ê o ta‘u e farii nei, e to‘u huru tei faahoruhoru i te mea o tei roaa ia‘u. Ua here au i te mau papa‘iraa mo‘a. Te poihere nei au i te parau mau te roaa ia‘u a tai‘o ai au. E î to‘u aau i te oaoa ia farii au i te mau faaitoitoraa, te arata‘iraa, te tamahanaharaa, te puai e te mau pahonoraa i to‘u mau hinaaro. E maramarama faahou atu â te oraraa, e mahuti te mau uputa, e e haapapû faahou mai te reira ia‘u i te here e te tau‘araa o to‘u Metua i te Ao ra i te mau taime a tai‘o ai au i te reira. Oia mau, ua riro te reira ei fana‘oraa na‘u. Mai ta te hoê tamai- ti iti i roto i te piha haapiiraa te Hihimahana i parau e, « Te popou nei au i te mau papa‘iraa mo‘a ! »
A piti, « Te feruri nei to‘u aau ». E mea here na‘u ia ta‘ita‘i i te mau papa‘iraa mo‘a i roto i to‘u aau ! E vai te varua o te mea o ta‘u i tai‘o i roto i te aau no te hopoi mai i te hau e te tamahanahanaraa. E horo‘a mai te ite o tei roaa ia‘u i te arata‘iraa. Te ti‘aturi nei au i te faatupuraa e roaa na roto i te haapa‘o.
I te tahi mau taime, e faieie roa vau ia tere i roto i te mau papa‘iraa mo‘a. I te tahi mau taime, e haapotopoto noa vau i te tai‘oraa. Tera râ, aita e hi‘oraa i hea e aore râ, i nahea to‘u tai‘oraa i te mau papa‘iraa mo‘a, e nehenehe râ vau e hopoi i te reira i roto i to‘u aau. Ia tai‘o ana‘e au i te po‘ipo‘i, e vai mai te mana o te Varua i roto ia‘u i te reira mahana taato‘a. Ia tai‘o vau i te avatea, no te mea ïa e, te titau ra vau i te mau pahonoraa e i te mau arata‘iraa i ni‘a i ta‘u mau opuaraa e i ta‘u mau ohipa. Ia tai‘o vau i te pô, e vai tamau noa te mau parau poro‘i maru e te faaitoitoraa no ô mai i te Fatu i roto i to‘u feruriraa ia ta‘oto vau. Rave rahi taime e ara mai au i te ru‘i e te mau mana‘o e aore râ, te mau mana‘ona‘oraa tei roaa mai na roto i te mau parau o ta‘u i tai‘o na hou vau a ta‘oto atu ai. E nehenehe to‘u feruriraa e ori-haere i te mahana area to‘u aau ra, te ama ra ïa i te mau parau a te Fatu e itehia i roto i te mau papa‘iraa mo‘a e « te feruri nei i te reira ».
Na roto i te tai‘oraa, ua haapii mai au e, « ia mana‘o [te hoê taata] i roto i to’na ra aau, o oia iho ïa » (Maseli 23:7). Ia feruri au i te mau papa‘iraa mo‘a, e tupu mai te hoê mea i ni‘a ia‘u. E hinaaro roa vau i te ora fatata’tu i to‘u Metua i te Ao ra. E hinaaro vau i te tavini Ia’na. E hinaaro vau i te haapa‘o i te mau parau tumu o ta‘u i haapii mai i roto i te mau papa‘iraa mo‘a, e ia na reira vau, « e papa‘i to‘u nei aau i te reira ei haapiiraa e ei faufaa na ta‘u mau tamarii ».
Aita vau e papa‘i i te mau papa‘iraa mo‘a mai ta Nephi, ia tai‘o râ vau i te mau papa‘iraa mo‘a e ia haapa‘o i te mau parau tumu i apohia mai, e riro ïa te reira ei mau papa‘iraa no to‘u oraraa. E faatere ratou i ta‘u mau ohipa e e papa‘ihia no ta‘u mau tamarii ia ite e ia pee. E nehenehe au e patu i te hoê faufaa ai‘a, te hoê peu tumu no te oraraa parau-ti‘a niuhia i ni‘a i te mau parau tumu o ta‘u i haapii mai no roto i te mau papa‘iraa mo‘a.
Te haapii mai nei Te Parau Haapiiraa e te Mau Parau Fafau 93: 39-40 e: « Ua haere maira taua taata ino ra e ua afa‘i ê atu i te maramarama e te parau mau, na roto i te haapa‘o-ore, mai roto mai i te tamarii a te taata nei, e na roto ho‘i i te parau tutuu a to ratou ra mau metua.
« Ua faaue râ vau ia outou ia haapii atu i ta outou mau tamarii i roto i te maramarama e te parau mau ».
Na roto i te tai‘oraa i te mau papa‘iraa mo‘a, e haapapûhia mai au e, e ite au i te « maramarama e i te parau-mau » o te haamaitai ia‘u e i to‘u utuafare. Na roto i to‘u iteraa i te mea e rave, e amuihia mai ta‘u mau ohipa – ta‘u mau « peu tumu » – i te mea o ta‘u i ite. Eita ïa to‘u hi‘oraa e arata‘i ê atu i ta‘u mau tamarii e arata‘i râ ia ratou i te mau papa‘iraa mo‘a e i te parau-mau e itehia i reira.
Ua here au i te himene a te Paraimere o tei haapii mai e:
A imi, a feruri e a pure
O te mau mea ïa e ti‘a ia‘u ia rave.
E arata‘i te Varua, e faahohonu i roto,
Ia ite au e parau mau te mau papa‘iraa mo‘a.1
Ua ite au e mai te mea e pure au eiaha noa no te iteraa i te parau mau o te mau papa‘iraa mo‘a, ia roaa râ te Varua, e e rahi atu to‘u mauruuru, e maramarama rahi atu â vau. E ite au e te taahi ra vau i hea i roto i to‘u oraraa e te hinaaro ra to‘u Metua i te Ao ra ia‘u i hea. E maramarama vau i te mau parau tumu o te parau-mau, e e ite au nahea ia rave i te mau tauiraa i roto i to‘u oraraa. E haapapûhia mai au e, e tauturu e e haapuai te Fatu ia‘u ia rave faaoti i te ohipa. Ei reira ïa te mau papa‘iraa mo‘a e papa‘ihia’i no to‘u oraraa.
Ia tai‘o tatou i te mau papa‘iraa mo‘a, te faaroo ra ïa tatou i te reo o te Faaora. Eita Oia e faatea Ia’na i to tatou oraraa. E faaea mai Oia i roto i te mau irava o teie mau buka mo‘a. Ua ani mai to tatou peropheta ia haafatata’tu i te Faaora na roto i te tai‘oraa i te mau papa‘iraa mo‘a.
E ta tatou mau tamarii ? E haamaitaihia te tamarii mai te mea ua niu te mau metua i to ratou oraraa i ni‘a i te mau haapiiraa o te mau papa‘i-raa mo‘a ! Aita’tu e mea faufaa o ta tatou e rave no to tatou mau utuafare maori râ, te haapuairaa ia ratou na roto i te mau papa‘iraa mo‘a. E te mau metua, a haaputuputu i to outou mau utuafare no te tai‘o i te mau papa‘iraa mo‘a, a tuu i te reira i roto i ta outou mau talena utuafare. E te mau tamarii, a pahono vitiviti ma te oaoa ia piihia outou ia tai‘o i te papa‘iraa mo‘a.
Ua faatae mai te peresideni Gordon B. Hinckley i te hoê titauraa manihini, ua horo‘a’toa mai râ oia i te hoê fafauraa ia tatou mai te mea e ma‘iti tatou i te farii i te reira. Teie ta’na fafauraa « e tae mai te hoê faito hau atu no te Varua o te Fatu e te hoê faaotiraa rahi atu ia haapa‘o i Ta’na mau faaueraa, e te hoê iteraa papû puai e, te ora nei te Tamaiti a te Atua ».2
Te ora nei hoê o ta‘u mau tamahine i roto i te hoê tuhaa maitai roa o to’na oraraa e ua riro to’na mau haamaitairaa rahi ei mau titauraa rarahi (e toru ana tamarii), tei parau mau ia‘u e : « E Mama, te na reira nei au. Te tai‘o nei au i te Buka a Moromona. E te ti‘a‘i nei au i teie mau haamaitairaa i fafauhia mai. Te reira mau te mau mea o ta‘u e hinaaro nei i teie taime i roto i to‘u oraraa ».
Teie anei te mau haamaitairaa o ta outou e hinaaro nei i roto i to outou oraraa ? E tii tatou i te reira. Ei mau vahine, a fafau tatou i te pee i te peropheta. Ei mau utuafare, a titau tatou i ta tatou mau haamaitairaa. E te peresideni Hinckley e, te here nei matou ia oe, ua faaroo matou i to oe reo, e e pee matou i te reira.
Te faaite atu nei au i to‘u iteraa papû e, ua ite au e te ora nei te Metua i te Ao ra e te here nei Oia ia tatou. Ua ite au e o Iesu Mesia to tatou Faaora. Ua ite au e e parau mau te mau papa‘iraa mo‘a. E parau te reira na te Atua. Ua ite au e, o Gordon B. Hinckley to tatou peropheta i teie mahana. E mea popou na‘u teie iteraa. Na roto i te i‘oa o Iesu Mesia, amene.