Te mau haamaitairaa na roto i te tai‘oraa i te Buka a Moromona
Tei ia tatou noa te tai‘oraa i te Buka a Moromona e i te haapiiraa i ta’na mau parau tumu e i te faaohiparaa i te reira i roto i to tatou oraraa.
E tia‘i au i te mau ava‘e ato‘a ia mahuti mai teie ve‘a maitai-roa oia te Liahona. E haapua’i te mau parau poro‘i a te Peresideniraa Matamua e vai i roto i te ve‘a ia‘u. Tei roto i te Liahona no te ava‘e Atete te titauraa a te peresideni Hinckley ia tai‘o e aore râ, ia tai‘o faahou i te Buka a Moromona na mua‘e i te hopea o te matahiti.
No te aha te peresideni Hinckley e ti‘aturi ai e, e riro te tai‘oraa i te Buka a Moromona ei haamaitairaa no tatou tata‘itahi ? Teie ta’na parau :
« Mai te parau mau ra to’na huru, aita to’na e tau, no to te ao ato‘a nei te reira. O te buka ana‘e te vai ra i roto te hoê fafauraa, e na roto i te mana o te ra‘i e ite papû ai te taata tai‘o i to’na ra parau mau.
« E au to’na haamataraa i te hoê temeio ; e ia faati‘ahia a‘e ra to’na haamataraa i te hoê taata o tei ore â i faaroo i te reira, e mea fifi roa ia’na ia ti‘aturi. Te vai nei teie nei buka, o te nehenehe ia tape‘ape‘ahia e ia tai‘ohia. Aore roa e taata e nehenehe e faahuru ê i te reira…
« Aita’tu e faufaa papa‘ihia tei faahoho‘a papû i te mea e, ia ora te mau tane [e te mau vahine] e te mau nunaa na roto i te măta‘u i to ratou Atua e ia haapa‘o i Ta’na mau faaueraa, e ruperupe e e tupu ratou i te rahi area râ, ia faaru‘e ratou Ia’na e i Ta’na parau, e roohia ratou i te topatari e e arata‘ihia i roto i te paruparu e te pohe, maoti râ, ia tape‘ahia e te parau-ti‘a » (« Hoê iteraa papû mau e te putapû », Liahona, Atete 2005, 4-5).
No te aha e mea faufaa no tatou te tai‘oraa i te Buka a Moromona i teie nei mahana ? No te mea ua taa papû i te feia papa‘i o te Buka a Moromona e, ua papa‘i ratou no te feia e te mau u‘i no a muri a‘e, eiaha râ no te feia o to ratou iho u‘i. Ua papa‘i o Moroni i to tatou u‘i e : « Inaha, te parau nei au mai te mea [ra e], tei ô nei outou » (Moromona 8:35). Ua papa‘i te peropheta Nephi e :
« No reira, i parau ai te Fatu ra o te Atua ia‘u ra, e vaiihohia, e e haapa‘ohia te mau mea ta‘u e papa‘i, e e tuuhia ho‘i i roto i te rima o to‘u ra huaai i tera u‘i i tera u‘i, ia ti‘a te parau i parauhia ia Iosepha, e e ore roa to’na huaai e pau a vai ai te fenua nei » (2 Nephi 25:21).
Ua riro te Buka a Moromona mai te hoê reo faaara i teie nei u‘i. A hi‘o nâ e mea nahea to’na faaiteraa i te huru o te mau mea e tupu i te fenua i teie nei mahana :
« Eiaha te hoê e parau e, Eita ïa [teie nei mau parau] e tupu, e tupu mau ïa, na te Fatu ho‘i i parau mai i te reira ; e no raro ho‘i i te repo e tae mai ai i te rima o te Fatu, aore te taata e tape‘a noa’tu, e tupu mai ïa i te mahana e parauhia’i e, ua ore te temeio i te ravehia: e e tupu ïa, mai te mea ua riro te hoê i te parau mai mai te pohe mai.
« E i riro ïa i te tae mai i te mahana e ti‘aoro atu ai te toto o te feia mo‘a i te Fatu, no te mau amuiraa mo‘emo‘e e te mau ohipa pouri.
« E e riro ho‘i ïa i te tae mai i te mahana a hunahia’i te mana o te Atua, a viivii ai te mau ekalesia, a teitei ai ho‘i ratou i te te‘ote‘o o to ratou aau ; oia mau, e i te mahana e feii ai te mau arata‘i i to roto i te mau ekalesia, e te mau orometua i to roto i to ratou mau ekalesia, no te te‘ote‘o o to ratou aau ;e tae noa’tu i te feii i te feia e ere no ta ratou ekalesia.
« O te mahana ïa, e faaroohia’i te parau no te auahi, te vero, e te mau au auahi i te mau fenua ĕê ;
« E e faaroo ato‘a hia’i te tama‘i, e te parau no te tama‘i, e te aueue fenua i te mau vahi e rave rahi ;
« E o te mahana ïa e riro ai te mau mea viivii rarahi i ni‘a i te fenua ; o te taparahi taata, te haru, te haavare, te faahema, te faaturi, e te mau huru ino ato‘a ; e i reira, e rave rahi te parau mai e, a rave i teie, a rave ho‘i i tera, aore ïa e peapea, e faati‘a ho‘i te Fatu i te reira, e te mahana faahopea ra. Auê râ te taata mai te reira te huru, te vaira ratou mai te au avaava, e mai te mea ruuruuhia i te ino ra » (Moromona 8:26-31).
Ua haapapû faahou te peresideni Ezra Taft Benson e, e faufaa taa ê to te Buka a Moromona no to tatou anotau a parau ai oia e : « Ua papa‘ihia te Buka a Moromona no tatou i teie nei mahana. O te Atua te fatu no te buka. E aamu ïa no te hoê nunaa o tei hi‘a, e tei haaputuhia e te mau taata tei faaûrûhia no te haamaitai ia tatou i teie nei mahana. Aita roa taua mau taata ra i farii i te buka – na tatou te reira. O Moromona, te peropheta tahito, no’na ho‘i te i‘oa i topahia’i te buka, ua haapoto oia i te mau aamu no te mau tenetere e rave rahi. No to’na ite i te hopea mai te matamua mai, ua parau te Atua ia’na eaha te tuu atu i roto i ta’na haapotoraa o ta tatou e hinaaro no to tatou anotau » (i roto i te Conference Report, Eperera 1975, 94 ; e aore ra Ensign, Me 1975, 63).
E mea pinepine tatou i te tai‘o i teie nei buka mai te hoê aamu no te hoê nunaa tei hi‘a, ma te ore e haamana‘o e, ua papa‘ihia te reira e te mau peropheta tei faaûrûhia no te hoê tumu, oia ho‘i, no te tauturu ia tatou ia haere atu i te Mesia ra. Aita te feia papa‘i no te Buka a Moromona i opua ia riro teie buka ei buka aamu. Oia mau, ua parau o Iakoba e ua faaue to’na taea‘e o Nephi ia’na e « eiaha oia ia papa‘i, maori râ ei vahi iti i te papaa parau, no teie nei feia » (Iakoba 1:2).
I te mau taime ato‘a e tai‘o ai tatou i te buka e ani paha tatou ia tatou iho e : « Eaha te mau taata papa‘i i ma‘iti ai i teie nei mau aamu taa ê aore râ te mau ohipa i tupu no te tuu atu i roto i te buka ? Eaha to ratou faufaa no tatou i teie nei mahana ? »
Te mau haapiiraa ta tatou e haapii mai na roto mai i te Buka a Moromona o te tumu ïa e te hopearaa o te tama‘i e eaha te mau tumu e faati‘ahia’i te reira. Te faaitehia ra te mau ino e te mau ati no te mau amuiraa peu huna, tei faatupuhia ia noaa mai te mana e te faatere i ni‘a i te nunaa. Te faaitehia ra e te vai mau nei Satane e te faaite mai nei i te tahi o ta’na mau raveraa ta’na e faaohipa. Te faaara nei te buka ia tatou i te faaohipa maitairaa i te faufaa. Te faaite mai nei te buka no ni‘a i te mau mea papû e te faufaa no te evanelia e te vairaa mau e te hanahana o Iesu Mesia e Ta’na tusia taraehara no te taata ato‘a. Te faaite nei te buka no ni‘a i te haaputuputuraa no te utuafare o Iseraela i te mau mahana hopea nei. Te faaite mai nei te buka i te tumu e te mau ture no te ohipa misionare. Te faaara nei oia no ni‘a i te teoteo, te tau‘a-ore-raa, te faataimeraa, te fifi no te mau peu tumu hape, te aau haavare e te viivii.
I teie nei e hopoi‘a na tatou ia tai‘o i te Buka a Moromona e ia haapii mai i te mau parau tumu e vai ra i roto e ia faaohipa i te reira i roto i to tatou oraraa.
Ua omuahia te Buka a Moromona e te hoê aamu faahiahia no ni‘a i te faufaa rahi o te mau utuafare e mau ra e e faaohipa ra i te mau papa‘iraa mo‘a. Ua faaarahia o Lehi, te hoê peropheta-metua tane, e te vai ra te mau taata e imi ra i te haapohe ia’na no te mau parau ta’na i faaite hua atu no ni‘a i to ratou mau ino. Ua faauehia oia ia rave i to’na utuafare e ia haere ê atu.
« Faarue ihora oia i to’na fare e to’na fenua ai‘a, e ta’na auro, e ta’na ario, e ta’na mau tao‘a ho‘i, e haere atura oia i roto i te medebara ; e aore e mea ta’na i hopo‘i atu, maori râ o to’na fetii, e ta’na maa, e to’na mau tiahapa » (1 Nephi 2:4).
I muri a‘e i te hoê atearaa no to ratou tere, ua farii o Lehi i te hoê orama i roto i te reira te Fatu parauraa’tu e eita e ti‘a ia ratou ia haere atea atu â i roto i te medebara ma te ore e ho‘i i Ierusalema e tii i te papaa parau o to ratou mau metua tei nene’ihia i ni‘a i te mau api veo. Te vai ato‘a ra i roto i teie nei mau papaa parau te mau parau a te mau peropheta e te mau faaueraa a te Fatu. Ua horo‘ahia te faaueraa i na tamaiti e maha a Lehi ia ho‘i atu i muri no te tii i te papaa parau.
I to ratou taeraa i Ierusalema, ua huti kelero ratou ia itea e o vai te haere i te fare o Labana no te tii i te mau api veo. Ua topa atura te kelero i ni‘a ia Lamana. E ua haere atura oia ia Labana ra, « e inaha, ua riri roa‘era o Labana, tiavaru ê atura ia’na i to’na ra aro ; e aore oia i faati‘a ia noaa te mau papaa parau ia’na. No reira, i parau atu ai oia ia’na : Inaha, e taata eiâ oe, e taparahi au ia oe » (1 Nephi 3:13). Ua horo ê atura o Lamana ma te ore e rave i te mau api veo.
Te hoê mea ta‘u i tape‘a mai na roto mai i teie nei tamataraa matamua oia ho‘i, e au ra e, aita te mau tuaana i faaohipa i te rave‘a tano. Te haapii mai nei te reira ia tatou i te hoê haapiiraa faufaa rahi o ta tatou e nehenehe e faaohipa i roto i ta tatou tai‘oraa i te mau papa‘iraa mo‘a. A faaite ana‘e tatou i to tatou hinaaro mau ia tai‘o i te Buka a Moromona ma te faaohipa i te hoê rave‘a papû.
I roto i ta’na a‘oraa i roto i te Ensign e te Liahona, ua horo‘a mai te peresideni Hinckley i te « hoê titauraa i te mau melo o te Ekalesia i roto i te ao taato‘a e i to tatou mau hoa i te mau vahi ato‘a ia tai‘o aore râ ia tai‘o faahou i te Buka a Moromona ». E i muri mai ua horo‘a mai oia ia tatou i te hoê rave‘a no te faaotiraa i taua titauraa ra : « Mai te peu e tai‘o outou hoê tuhaa iti hau i te hoê aore ra hoê pene e te afa i te mahana hoê, e nehenehe oe e faaoti i te buka hou te hopea o teie matahiti » (Liahona, Atete 2005, 6). Ua hope te ava‘e atete e setepa. Ia au i te talena a te peresideni Hinckley, o te buka a Alama ïa ta tatou e tai‘o i teie taime – i roto i te area o te pene 4 e tae atu i te pene 12. Tei mua anei outou i teie talena, aore râ tei muri ?
I te taime aore ai te tamataraa matamua i manuïa, ua hinaaro te mau tuaana o Nephi e faaea e ia ho‘i atu i to ratou ra metua tane i te medebara ra. Ua faaitoito râ o Nephi ia ratou ia tamata faahou e ua horo‘a’tu i te tahi atu rave‘a ê atu â ia roaa mai te mau papaa parau : « E tena na, ia itoito tatou i te haapa‘o i te mau faaue a te Fatu ; e teie nei, ia haere tatou i raro i te fenua ai‘a o to tatou metua, inaha ho‘i, i faarue oia i te auro, e te ario, e te mau huru tao‘a ato‘a i reira. No te mau faaue a te Fatu, i na reira‘i oia…
« E ua haere atura matou i roto ia Labana, e ua titau ihora matou ia’na ia horo‘a mai na matou i te mau papaa parau… e ia na reira oia e horo‘a ïa matou i ta matou auro, e ta matou ario, e ta matou ato‘a mau tao‘a na’na » (1 Nephi 3:16, 24).
Te haapii mai nei te hi‘oraa o Nephi ia tatou e e mea faufaa roa‘e te mau haamaitairaa o te mau papa‘iraa mo‘a i te mau tao‘a e te tahi atu mau mea o te ao nei. E nehenehe te imiraa i te mau mea o te ao nei e horo‘a mai i te oaoa no te tahi taime poto noa e ere râ te oaoa e te popou hope ore. Ia imi ana‘e tatou i te mau mea o te varua, e mea mure ore te utua maitai e e horo‘a mai te reira i te mauruururaa o ta tatou e imi nei na roto i te mau ohipa e tupu nei i roto i teie oraraa tahuti.
Ua faaitoito te peresideni Hinckley ia tatou ia tai‘o i te Buka a Moromona no te faateitei ia tatou i ni‘a‘e i te mau mea o te ao nei, e no te farii i te oaoa i roto i te mau mea a te Fatu. Ua parau oia e « Ma te feaa ore, te fafau nei au ia outou e, mai te peu e haapa‘o tata‘itahi outou i teie faanahoraa ohie, ma te hi‘o ore eaha te rahiraa taime o ta oe i rave no te tai‘o i te Buka a Moromona, e tae mai i roto i to outou mau oraraa e i roto i to outou mau utuafare hoê faito hau no te Varua o te Faaora, hoê faaotiraa puai no te haere ma te haapa‘o i ta’na mau Faaueraa, e hoê Iteraa papû puai no te parau mau e te ora nei te Tamaiti a te Atua » (Liahona, Atete 2005, 6). E mea hau atu teie nei mau haamaitairaa i te mau faufaa materia.
I to Nephi e to’na mau tuaana tamataraa i te taui i ta ratou mau tao‘a e te mau papaa parau, ua eiâ o Labana i ta ratou mau tao‘a e ua tamata i te taparahi ia ratou. No to ratou mana‘o paruparu i mua i te tahi â tamataraa tei ore i manuïa, ua hinaaro faahou â o Lamana e o Lemuela i te faarue i teie tutavaraa no to raua mana‘o e, e ohipa teie o te ore roa e manuïa. Ua tapea râ o Nephi i ta’na faaotiraa ia haapa‘o i te faaue a te Fatu. Ua a‘o oia i to’na mau taea‘e ma te parau atu e : « Mai haere faahou tatou i nia, i Ierusalema ra, e ia itoito ho‘i tatou i te haapa‘oraa i te mau faaue a te Fatu ra ; inaha ho‘i, ua hau to’na mana i to te ao ato‘a nei, e eaha i ore ai to’na mana i hau ai i to Labana, e na taata no’na e pae ahuru, e to’na mau ahururaa ho‘i i te tauasini ? » (1 Nephi 4:1).
Ia haapa‘o ana‘e tatou i teie titauraa ma te faaroo i te Fatu e noaa ïa te hopea e hinaarohia. A haere ai o Nephi no te tii i te mau papaa parau, ma te arata‘ihia e te Varua, ua tuuhia o Labana i roto i to’na rima. Na roto i to’na faaroo e te haapa‘o, ua noaa te mau haamaitairaa o te mau papa‘iraa mo‘a no’na iho e no to’na utuafare. I teie nei, ua nehenehe ia Nephi e i to’na mau taea‘e ia ho‘i i to ratou metua i te medebara ra, e ia haere faahou â i to ratou tere.
Mai te mea e haapa‘o tatou ma te faaroo i te titauraa a te peresideni Hinckley, e roaa ia tatou te fafauraa a to tatou peropheta no te mau haamaitairaa o ta tatou e farii na roto mai i to tatou tai‘oraa i te Buka a Moromona. E ite ïa tatou, mai ia Nephi e to’na utuafare e « e mea hinaaro-rahi-hia, e te faufaa rahi ho‘i te mau papa‘iraa mo‘a no matou » (1 Nephi 5:21). E nehenehe ato‘a ia tatou e farii i te haamaitairaa ta Moroni i fafau a tapiri ai oia i ta’na mau papa‘iraa i te Buka a Moromona.
« Oia mau, e haere mai i te Mesia, ia maitai roa outou ia’na, e tapea ia outou iho eiaha e rave noa’tu i te mea paieti ore ra, e ia faarue outou i te mau mea paieti ore ra, e ia aroha atu i te Atua ma to outou aau ato‘a, e te mana‘o ato‘a, e te puai ato‘a, e i reira e nava‘i ai to’na aroha ia riro outou ei taata maitai roa i te Mesia ra: ia maitai roa outou i te Mesia na roto i to te Atua ra aroha, eita’tu outou e ti‘a ia huna i te mana o te Atua ra » (Moroni 10:32).
Teie te matahiti e faahanahana ai tatou i te 200raa no te fanauraa o te peropheta Iosepha Semita. Ua faaite te Buka a Moromona i te haaputaraa no ni‘a i te misioni a te peropheta Iosepha e te Faaho‘i-faahou-raa mai o te Ekalesia a Iesu Mesia. I roto i te amuiraa rahi i te ava‘e Eperera ra, ua parau te peresideni Hinckley no ni‘a i te Buka a Moromona e : « E tao‘a e nehenehe e fafa, e nehenehe e tai‘o, e nehenehe e hi‘ohia… e te mana‘o nei au e, e imi mai te ao keritetiano e e manava mai, e e farii i te reira ei iteraa aereere. E faaiteraa i te hoê atu tautururaa rahi tei tae mai mai te hoê heheuraa i te peropheta [Iosepha] » (« Te mau mea rarahi ta te Atua i heheu mai », Liahona, Me 2005, 82).
Te pure nei au ia tai‘o tatou tata‘itahi i te Buka a Moromona i te hopea o teie matahiti ei pahonoraa i te titauraa a to tatou peropheta, Gordon B. Hinckley, no te faahanahana i te peropheta o te Faaho‘i-faahou-raa mai, o Iosepha Semita. E rave tatou i te hoê faanahoraa o ta tatou e pee na roto i te faaroo no te tamata e no te faî ia tatou, ia riro ei faufaa mure ore, oia te parau a te Atua e itehia i roto i te Buka a Moromona, o ta‘u ïa pure haehaa na roto i te i‘oa o Iesu Mesia, amene.