Te mau taipe o te Mesia – te mana o te faateitei ia tatou
E hopoi mai te haapa‘oraa i te mau parau tumu niu o te evanelia i te mana, te puai, te itoito e te ti‘amâraa i roto i te oraraa o te Feia Mo‘a ato‘a i te mau Mahana Hopea nei.
E to‘u mau taea‘e e to‘u mau tuahine, e to‘u mau hoa here: I roto i ta‘u tau raveraa ohipa ei pairati manureva, e haere mai te tahi mau ratere e mata‘ita‘i i te piha pairatiraa o te manureva Boeing 747. E ui mai ratou no ni‘a i te mau pitopito e rave rahi, te mau tauihaa, te mau rave‘a e te mau faanahoraa, e nahea teie mau materia aravihi ia tauturu i teie manureva rahi e te nehenehe ia rere.
Mai te mau paireti ato‘a, e oaoa vau no te mea, e maere ratou i te huru rau o teie manureva e e uiui ratou e, auê ïa taata maramarama e te ite no te pairatiraa i teie manureva ! I teie faito o ta‘u a‘oraa, e nehenehe ta‘u vahine e ta‘u mau tamarii e to ratou mau mata anaana e tape‘a ia‘u ma te parau e, « E ere te mau pairati i te mau taata haehaa ! »
I te mau ratere i roto i te piha pairatiraa, e faaite au ia ratou e, na te hoê hoho‘a tei papa‘ihia no te manureva, rave rahi mau rave‘a e te mau faanahoraa tauturu, e te mau matini puai i hopoi mai i te au maitai e te parururaa i te mau ratere.
No te faaohie i ta‘u tatararaa ua parau atu ïa vau ia ratou e, te mea noa ta outou e titau, o te puai hope ïa no te tura‘iraa, te puai no te haama‘ueraa e te teitei tano no te manureva e na te mau ture o te natura e faarere i te 747 e i te mau ratere i te mau fenua e i ni‘a a‘e i te mau pape, i ni‘a a‘e i te mau mou‘a e i te mau vero ataata e tae atu ai i te tipaeraa.
Aita i maoro a‘e nei, ua feruri pinepine au e, na roto i te riroraa tatou ei melo no Te Ekalesia a Iesu Mesia i te Feia Mo‘a i te Mau Mahana Hopea Nei, e hiti ato‘a mai te reira huru uiraa i roto ia tatou. Eaha te mau tumu, te mau parau tumu niu o to tatou meloraa i roto i te basileia o te Atua i te fenua nei ? I muri mai i te mau mea i parauhia e i ravehia, eaha te mea e afa‘i ia tatou i te taime rahi mau o te hinaaro i te tipaeraa mure ore o ta tatou e hinaaro ?
E pûpû te Ekalesia, e ta’na mau faanahonahoraa e te mau tabula ohipa, e rave rahi mau ohiparaa faufaa no te mau opuaraa o ta’na mau melo i te tautururaa i te mau utuafare e i te taata iho ia tavini i te Atua e i te tahi e te tahi. Area râ, i te tahi mau taime, e piri roa’tu teie mau ohiparaa i te uputa o to tatou aau e te varua i te hohonuraa o te mau parau haapiiraa tumu e te mau parau tumu o te evanelia. E tautururaa te mau rave‘a, te mau talena ohipa, te mau ture no te faatereraa e te mau hoho‘a no te faanahonahoraa no to tatou haereraa i mua i te pae varua i te fenua nei eiaha râ tatou ia aramoina e mau tumu teie no te tauiraa.
Te taa-ê-raa, eita roa te mafatu o te evanelia – te parau haapiiraa e te mau parau tumu – e taui. E hopoi mai te haapa‘oraa i te mau parau tumu niu o te evanelia i te mana, te puai, te itoito e te ti‘amâraa i roto i te oraraa o te Feia Mo‘a ato‘a.
Te faaroo o te hoê ïa parau tumu no te mana. E hinaaro tatou i teie tumu puai i roto i to tatou oraraa. E ohipa te Atua na roto i te mana tera râ, e faaohipahia teie mana ei pahonoraa i to tatou faaroo. « Faaroo e aita e ohipa e mea pohe ïa » (Iakobo 2:20). E ohipa te Atua ia au i te faaroo o Ta’na mau tamarii.
Ua faaite te peropheta Iosepha Semita e: « E haapii au ia ratou i te mau parau tumu ti‘a, e na ratou iho ratou e faatere » (faahitihia e John Taylor, i roto i « The Organization of the Church », Millennial Star, 15 no novema 1851, 339). Ia‘u nei, e mea nehenehe roa teie haapiiraa e e mea afaro maitai. A tutava’i tatou ia maramarama, ia haaputapû e ia haapa‘o i te mau parau tumu ti‘a mau o te evanelia, e hau atu to tatou faarava‘iraa i te pae varua. No roto mai te parau tumu no te faarava‘iraa i te pae varua, i te hoê parau haapiiraa faufaa roa a te Ekalesia, o ta te Atua i horo‘a ia tatou – te ti‘amâraa. Te ti‘aturi nei au e, te ti‘amâraa no te ma‘itiraa o te hoê ïa o te mau horo‘a rahi a‘e a te Atua i Ta’na mau tamarii, i muri mai i te horo‘a no te ora.
Ia tai‘o e ia feruri hohonu vau i te parau no te ti‘amâraa no te ma‘iti e i to’na mau hopea mure ore, e parau vau e, e mau tamarii varua mau tatou na te Atua, e no reira e mea ti‘a ia haapa‘o. E faahaamana‘o ato‘a teie iteraa ia‘u e, ei melo no te Ekalesia a Iesu Mesia i te Feia Mo‘a i te Mau Mahana Hopea Nei, e tuhaa tatou no teie utuafare fetii rahi o te Feia Mo‘a o te ao nei.
E horo‘a te faanahonahoraa o te Ekalesia i te hoê faaauraa rahi e tano ia au i te faito, i te hoho‘a e i te mau hinaaro o ta tatou mau pŭpŭ. O te niu te reira o te tabula a te paroita e to’na faanahonahoraa tumu e te tahi noa mau putuputuraa. Te vai atora ho‘i te mau paroita aano e to’na faanahoraa no te tavini te tahi e te tahi. Ua faatumuhia te reira i ni‘a i te mau tabula ohipa faauruhia a te Ekalesia no te tauturu i te mau melo ia « haere mai i te Mesia ia maitai roa outou ia’na » (Moroni 10:32).
Hoê a huru teie mau faanahonahoraa e rave rahi no ni‘a i te mau ohipa a te Atua no te mea hoê a huru te parau haapiiraa o te evanelia a Iesu Mesia tei faaho‘i-faahou-hia mai i roto i te mau ti‘ahapa ato‘a. Te faaite papû atu nei au ei Aposetolo na te Fatu ra o Iesu Mesia e, te ora nei Oia, e e parau mau teie evanelia, e e horo‘a te reira i te mau pahonoraa i te mau titauraa’toa a te taata e a te pŭpŭ amui o te mau tamarii a te Atua i te fenua nei i teie mahana.
I teie tau mahanahana nei, ua haere maua ta‘u vahine e farerei i te mau melo o te Ekalesia i te mau fenua no Europa. I te reira mau vahi, ua faati‘ahia na te Ekalesia e rave rahi matahiti, mai te matahiti 1837 mai â. E faufaa ai‘a rahi ta te mau melo faaroo i Europa. I teie nei ua hau i te 400.000 melo i Europa. Ia hi‘o ana‘ehia, te rahiraa o te taato‘araa o te mau u‘i o te feia i tere mai Europa mai i te fenua Amerika i te 19 e te 20raa o te tenetere, e nehenehe e tai‘o e rave rahi taime i teie numera.
No te aha e rave rahi mau melo faaroo i faaru‘e ai i to ratou mau fenua ai‘a i taua mau mahana matamua ra o te Ekalesia ? Rave rahi mau tumu e nehenehe e parauhia: no te faatearaa i te mau hamani-inoraa, no te tauturu i te paturaa i te Ekalesia i te fenua Amerika, no te haamaitai i te mau tumu no te tereraa faufaa, no te hiaai ia piri atu i te hoê hiero e e rave rahi atu â.
Te ite noa ra Europa i te hopearaa o teie exodo. Area râ, te puai i tae mai na roto i te mau u‘i faaroo o te mau melo o te Ekalesia te riro ra ïa ei mea papû. E ite tatou i te feia apî tane e vahine e i te mau tane e vahine faaipoipo e tavini nei i roto i te mau misioni, no te Fatu, e ite tatou i te mau faaipoiporaa i te hiero ; e ite tatou i te ti‘aturiraa e te itoito o te mau melo no te poro i te evanelia i faaho‘i-faahou-hia mai. I rotopu i te feia no Europa e te tahi atu mau tuhaa o te ao nei, te vai nei te area i te pae varua no te mau haapiiraa tano a te Mesia. E mea ti, e e nehenehe ia faîhia i te parau poro‘i no te evanelia tei faaho‘i-faahou-hia mai, ia haapa‘o e ia poro to tatou mau melo maitai i te evanelia ma te itoito e te faaroo rahi.
No te tupuraa o te Ekalesia i Europa, te vaira i teie nei, te mau fenua ua iti-rii-mai i te ahuru ma pae matahiti to te Ekalesia faatupu-raa-hia. Ua paraparau vau i te hoê peresideni misioni e tavini ra i to’na fenua ai‘a i Rusia e hitu noa matahiti to’na faafariu-raa-hia mai. Ua faaite oia ia‘u e, « I to‘u bapetizo-raa-hia i te reira iho ava‘e ua piihia vau ei peresideni amaa ». Ua mana‘o anei oia e ua ninahia oia ? E ! Ua tamata anei oia i te rave faaoti i te taato‘araa o te mau tabula ohipa a te Ekalesia ? Aita ! E mea nahea to’na tupuraa i roto i teie nei amuiraa iti i teie taime poto noa ? Teie ta’na parau, « Ua ite au ma to‘u aau ato‘a e, e parau mau teie Ekalesia. Ua faaî te parau haapiiraa o te evanelia i to‘u feruriraa e i to‘u aau. A tomo ai matou i roto i te Ekalesia, ua faariro matou ia matou ei tuhaa no teie utuafare. Ua ite matou i te mahanahana, te ti‘aturi e te here. E mea iti roa matou ua tamata râ matou i te pee i te Faaora ».
Ua paturu ratou ia ratou iho, ua haa ratou ma te puai e ua ite ratou e e parau mau te Ekalesia. E ere te faanahonahoraa tei ume mai ia’na, o te maramarama râ o te evanelia e na teie maramarama i haapuai i teie mau melo maitai.
I te rahiraa o te mau fenua, tei te haamataraa noa te Ekalesia, e e ere ato‘a ho‘i te faanahoraa i te papû matai i te tahi mau taime. Area râ, e roaa i te mau melo te iteraa papû no te parau-mau i roto i to ratou aau. Mai te mea e noho teie mau melo i roto i to ratou fenua no te patu i te Ekalesia, noa’tu te fifi i te pae no te faufaa e no te tamataraa, e mauruuru te mau u‘i no muri nei i te itoito o teie mau pionie. Te haapa‘o nei ratou i te titauraa manihini a te Peresideniraa Matamua tei horo‘ahia i te matahiti 1999 :
« I to tatou nei mau mahana, ua horo‘a mai te Fatu i te mau haamaitairaa o te evanelia e au tae noa’tu i te mau hiero e rave rahi i roto i te mau tuhaa e rave rahi o te ao nei. No reira, ua mana‘o matou i te horo‘a’tu i te hoê a‘oraa i te mau melo no te Ekalesia ia faaea noa i roto i to ratou iho mau fenua e eiaha e tere mai i te mau Hau Amui no Marite no te faaea…
« Ia faaea te mau melo o te ao nei i roto i to ratou iho mau fenua, no te patu i te Ekalesia i roto i to ratou fenua ai‘a, e tae mai te mau haamaitairaa rarahi ia ratou tata‘itahi e i te Ekalesia iho » (Rata a te Peresideniraa Matamua, 1 no titema 1999).
E horo‘a ato‘a râ vau i te hoê parau faaararaa i te feia e noho ra i roto i te mau paroita e i te mau tĭtĭ aano ? E haapa‘o maitai tatou, eiaha tatou e faatumu i to tatou iteraa papû i ni‘a i te mau faito sotiare o te Ekalesia e aore râ, i te mau faaoaoaraa, te mau ohiparaa e i te mau faanahonahoraa o ta tatou mau paroita e a te mau tĭtĭ. E mea faufaa teie mau mea ato‘a – aita râ e rava‘i. Aita ato‘a te auhoaraa e rava‘i.
Ua papû maitai ia tatou e, te ora nei tatou i roto i te hoê tau no te peapea, no te ati e no te tama‘i. Te imi nei tatou e te tahi atu â feia i te rave‘a no « te parururaa e no te hoê vahi haapuraa i te vero, e i te riri ia niniihia’tu te reira ma te ano‘i-ore i ni‘a i te ao paato‘a nei » (PH&PF 115:6). Nahea e iteahia’i ia tatou te reira vahi ? Ua haapii mai te peropheta a te Atua, oia te peresideni Hinckley: « Tei roto to tatou parururaa i te mau peu maitai o to tatou oraraa ? Tei roto to tatou puai i to tatou parau-ti‘a » (« Ia tae i te taime e farerei faahou ai tatou », Liahona, Tenuare 2002, 105).
A haamana‘o na tatou e mea nahea to Iesu Mesia haapiiraa i Ta’na mau Aposetolo, i te omuaraa o Ta’na misioni i roto i te tahuti, ma te ateate e ma te parau-ti‘a-raa’tu ia ratou: A pee mai ia‘u, e faariro vau ia orua ei ravaai taata » (Mataio 4:19). O teie ato‘a te haamataraa o te misioni a te Ahuru Ma Piti Aposetolo, te mana‘o nei au e, aita ratou i ineine maitai i ta ratou ohipa, mai ia‘u ato‘a nei i te pii-raa-hia i roto i teie ohipa mo‘a. Ua haapii te Faaora iho ia tatou i te hoê haapiiraa no ni‘a i te parau haapiiraa tumu e i te mau mea matameha‘i o te oraraa. No te taata iho, e mea ti‘a ia tatou na mua roa « ia pee Ia’na », e a na reira‘i tatou, e haamaitai mai te Faaora ia tatou hau atu i to tatou paari ia riro tatou mai Ta’na i hinaaro.
No te peeraa i te Mesia, e faariro tatou ia tatou iho mai Ia’na ra. E haapii tatou i To’na huru. Ei mau tamarii varua na to tatou Metua i te Ao ra, e ite to tatou no te faatomo i te mau taipe o te Mesia i roto i to tatou oraraa e i to tatou huru. Te ani manihini mai nei te Fatu ia tatou ia haapii i Ta’na evanelia na roto i te haapa‘oraa i Ta’na mau haapiiraa. No te pee Ia’na, e faaohipa ïa tatou i te mau parau tumu tano e i muri mai, e ite tatou i te mau haamaitairaa i apitihia. E mea ohie roa teie faanahoraa. Ua tatara te mau peropheta i tahito ra e i to teie anotau i te reira i roto e toru parau: « Haapa‘o te mau faaueraa » – aita i hau atu, aita i iti mai.
E ere te faahoturaa i te mau taipe o te Mesia i roto i to oraraa i te ohipa ohie, ia faaatea ihoa râ tatou i te mau mana‘o rarahi e i te mau mea ite- ore-hia, e ia haamata i te haapa‘o i te mau mea o te oraraa mau. E tamatahia tatou na roto i te faaohiparaa i te mea o ta tatou e haapii nei. E tae mai te faaiteraa o to tatou paari ia itehia te taipe o te Mesia i roto i to tatou oraraa – ei mau tane e aore râ, ei mau vahine, ei mau metua tane e aore râ, ei metua vahine, ei tamaiti e aore râ, ei tamahine, i roto i to tatou auhoaraa, i roto i ta tatou ohipa, i roto i ta tatou mau imiraa faufaa, e i roto i ta tatou faaoaoaraa. E ite tatou i to tatou tupuraa i te rahi, mai ta te feia e haaati nei ia tatou e ite ato‘a, a faarahi màrû noa ai tatou i to tatou puai « ia rave i te ohipa mo‘a noa i mua [Ia’na] » (PH&PF 43:9).
Te faaite nei te mau papa‘iraa mo‘a i te tahi mau taipe o te Mesia o te ti‘a ia tatou ia faananea i roto i to tatou oraraa. Oia ho‘i, te ite, te haehaa, te aroha e te here, te haapa‘o e te haapa‘o-maitai, te faaroo e te ti‘aturi. Teie mau huru to te taata, e ere ïa no roto mai i te huru o te faanahonahoraa o ta tatou Ekalesia, to tatou huru oraraa i te pae faaravairaa faufaa, te huru o to tatou utuafare, te hiroa tumu, te nunaa, e aore râ, te reo. Te mau taipe o te Mesia, e mau horo‘araa te reira no ô mai i te Atua ra. Eita te reira e roaa i te faananea mai te mea e, aita Oia e tauturu mai. Te hoê tauturu o ta tatou paato‘a e titau nei, ua horo‘a tamoni-ore-hia mai ïa na roto i te Taraehara a Iesu Mesia. Na roto i te faaroo ia Iesu Mesia e i Ta’na Taraehara te auraa ra te ti‘aturiraa ïa Ia’na – ma te ti‘aturi i To’na mana mure ore, te ite, e te here. E tae mai te mau peu parau-ti‘a mai ta te Mesia i roto i to tatou oraraa ia faaohipa tatou i to tatou ti‘amâraa ma te parau-ti‘a. E arata‘i te faaroo ia Iesu Mesia i te ohipa. Ia roaa to tatou faaroo i roto i te Mesia, e ti‘aturi ïa tatou i te Fatu no te pee i Ta’na mau faaueraa – noa’tu e aita tatou i maramarama roa i te mau tumu no te reira. A imi ai tatou ia riro mai te Faaora te huru, titauhia tatou ia hi‘opo‘a tamau faahou i to tatou oraraa e ia turu‘i, na roto i te e‘a o te tatarahaparaa mau, i ni‘a i te mau haamaitairaa a Iesu Mesia e i te mau haamaitairaa o Ta’na Taraehara.
E ohipa mauiui te faatupuraa i te mau taipe o te Mesia. Titauhia tatou ia ineine no te farii i te arata‘iraa e i te faatiti‘aifaroraa a te Fatu e a Ta’na mau tavini. Ua pûpû mai teie amuiraa rahi na roto i te mau pehe e te parau, i te mana varua, te arata‘iraa e te mau haamaitairaa « mai ni‘a mai ra » (PH&PF 43:16). O te taime teie e tae mai ai te reo no te faaururaa e te heheuraa i te taata nei ma te hopoi mai i te hau i to tatou varua e i te haapii ia tatou nahea ia riro mai te Mesia te huru. E reo monamona teie mai te reo o te hoê hoa here e e faaî te reira i to tatou varua mai te mea e tatarahapa mau to tatou aau.
Na roto i te riroraa mai te Faaora te huru, e tupu tatou i roto i te paari ia « rahi to tatou ti‘aturi i te mana o te Varua Maitai ra » (Roma 15:13). E haapae ïa tatou « i te mau mea o teie nei ao, e e titau ho‘i i te mau mea no tei maitai a‘e ra » (PH&PF 25:10).
E faaho‘i te reira ia‘u i te parau o ta‘u i omua mai no ni‘a i te manureva. Ua parau atu vau ia faatutonu i ni‘a i te mau faanahoraa niu. E niu te mau taipe o te Mesia. Ua riro te reira ei mau parau tumu faufaa o te faatupu « i te mana o te faateitei ia tatou ». A faatupu ai tatou i te mau taipe o te Mesia i roto i to tatou oraraa, hoê taahiraa i ni‘a i te tahi, e « hopoihia [tatou] i ni‘a i te pererau o te aeto ra » (PH&PF 124:18). E riro to tatou puai i roto ia Iesu Mesia ei puai hope no te tura‘iraa ; to tatou ti‘aturiraa aueue-ore ei puai no te haama‘ueraa. Na te faaroo e te ti‘aturiraa e hopoi ia tatou i ni‘a a‘e i te mau pape no te mau faahemaraa, i ni‘a a‘e i te mau mou‘a no te mau ati e no te hopoi ia tatou ma te fifi ore i to tatou fare mure ore e i to tatou tipaeraa.
Te faaite papû nei au i teie nei mau mea na roto i te i‘oa o Iesu Mesia, amene.