Te tere i te hoê vahi teitei a‘e
Te farii nei tatou i te hoê ma‘itiraa. E nehenehe ta tatou e ti‘aturi noa i ni‘a iho i to tatou iho puai e aore râ e nehenehe ta tatou e tere atu i te vahi teitei a‘e e ia haere atu i te Fatu.
I te 26 no titema 2004, ua tupu te hoê aueueraa fenua puai mau i te tahatai o Idonesia ma te faatupu i te hoê miti faaî o tei haapohe hau atu i te 200, 000 taata. E ati ri‘ari‘a mau te reira. I roto noa hoê mahana, ua taui roa te oraraa o te milioni o te mau taata.
Tera râ, te vai ra hoê pŭpŭ taata, e noa’tu ua haamouhia to ratou oire iti, aita roa ratou i fifi a‘e.
Te tumu ?
Ua ite ratou e tae mai te hoê miti faaî.
E ora te nunaa Moken i roto i te mau oire iti o te tahatai no te fenua Tailane e Burma (Myanmar). E nunaa taata rava‘i teie, to ratou ora, no roto ïa i te moana. I te mau hanere e penei a‘e paha e tauasini matahiti, ua tuatapapa to ratou mau tupuna i te huru o te moana e ua horo‘a i to ratou ite mai te metua tane e tae atu i te tamaiti.
Te hoê mea ihoa râ, o ta ratou i haapii maitai oia ia : eaha te rave i te paheeraa o te miti. Ia au i ta ratou mau peu tumu, ia tupu ana‘e te reira, e tae mai i muri mai te « Laboon » – te hoê are o te ai i te taata.
I to ratou iteraa i te mau tapa‘o măta‘uhia, ua tuo atu te feia paari no taua oire iti i te taato‘araa ia horo i ni‘a i te hoê vahi teitei.
Aita te taato‘araa i haapa‘o i te reira.
Ua parau te hoê taata rava‘i paari, « Aita roa hoê a‘e tamarii i ti‘aturi ia‘u ». E parau mau, ua pii atu ta’na iho tamahine e taata haavare oia. Aita râ te taata rava‘i paari i faaea i te faaara e tae noa’tu i te taime ua faaru‘e te taato‘araa i te oire iti no te ta‘uma atu i te hoê vahi teitei.1
Ua fana‘o te nunaa Moken no te mea te vaira te hoê taata ti‘aturi rahi, o tei faaara ia ratou i te mea e tupu mai. Ua fana‘o te mau huiraatira no te mea ua haapa‘o ratou i te faaararaa. Ahani aita, ua pohe paha ïa ratou.
Ua papa‘i te peropheta o Nephi no ni‘a i te mau ati rahi o to’na anotau, te haamou-raa-hia o Ierusalema. Ua parau oia e, « E mai te tahi ui i pau i rotopu i te ati Iuda ra no ta ratou ohipa ino ra, oia ato‘a ratou ato‘a i pau i tera ui i tera ui, mai tei au i ta ratou ohipa ino ra ; e ore roa te tahi i pau, maori râ tei faaite-atea-hia na e te mau peropheta a te Fatu ra ».2
Mai te tau mai o Adamu, ua aparau te Fatu i to’na mau peropheta, e noa’tu e mea taa ê ta’na parau poro‘i o tei faaauhia i te mau hinaaro tumu o te mau tau tata‘itahi, te vaira râ te hoê tumu parau papû maitai o te ore roa e taui : E faaru‘e i te parau ino e haere i te hoê vahi teitei.
Ia haapa‘o ana‘e te taata i te mau parau a te mau peropheta, e haamaitai te Fatu ia ratou. Ia ore râ ratou e haapa‘o i Ta’na parau, e tupu mai ïa te hepohepo e te mauiui. Te haapii pinepine nei te Buka a Moromona i teie haapiiraaa faufaa roa. I roto i to’na mau api, te tai‘o nei tatou no ni‘a i te mau huiraatira tahito no te mau Hau Amui no Marite o tei haamaitaihia e te Fatu e o tei manuia, no to ratou haapa‘o maitai. Tera râ, e rave rahi mau taime, e riro teie manuiaraa ei ati e ua « faaetaeta i to ratou aau e… e haamo‘e i te Fatu ra i to ratou Atua ».3
Te vai nei te hoê mea no ni‘a i te manuiraa o te faaite mai i te huru o te mana‘o taata i roto i te tahi mau taata. I roto i te buka a Helamana, te ite nei tatou i te hoê pŭpŭ taata o te Ati Nephi o tei farii i te hoê ereraa e te hoê haamouraa rahi roa. Te tai‘o nei tatou e, « E Ua tupu te reira no te teoteo o to ratou aau i ta ratou tao‘a rahi, e no ta ratou haafaoraa i tei veve, o ratou aore i horo‘a i te maa i tei poia, o ratou aore i faaahu i tei tahaa, e no ta ratou motoraa i to ratou mau taea‘e haehaa i te papari‘a, no to ratou tâhitohitoraa i tei mo‘a ra, [e] no ta ratou hunaraa i te Varua tohu e te parau heheu ».4
Eita ratou e ro‘ihia i teie mau peapea « ahiri aore ratou i rave na i te parau-ino e te mea faufau ra ».5 Ahani pai ua haapa‘o ratou i te mau parau a te mau peropheta o to ratou anotau e ua haere atu i te vahi teitei, e mea taa ê roa ïa to ratou mau oraraa.
Te utu‘a o te natura o te fariihia e te mau taata o te faatea-ê-atu i te e‘a o te Fatu, e ua vaiihohia ïa ratou i to ratou iho puai.6 I roto i te taime o to tatou manuiraa rahi, e riro paha tatou i te mana‘o e nava‘i noa to tatou puai, e ite ihoa te feia e ti‘aturi noa i ni‘a iho ana‘e i te puai o te taata i te paruparu e te faufaa ore o te reira.7
Teie te hoê hi‘oraa, i te haamataraa, ua haapa‘o o Solomona i te parau a te Fatu e ua pee i Ta’na ture. E no te mea ua na reira oia, ua manuia e ua haamaitaihia oia, eiaha noa i te paari, i te mau tao‘a ato‘a râ e te hanahana. Ua fafau te Fatu ia’na e mai te mea e tamau noa oia i te haapa‘o maitai, e haamau Oia i « [ta’na] ra terono i [ta’na] ra basileia i nia ia Iseraela e a muri noa’tu ».8
Tera râ, noa’tu i muri mai i teie mau farereiraa, i muri a‘e ato‘a i te fariiraa i te mau haamaitairaa hau atu i te tahi atu taata ua fariu ê atu o Solomona i te Fatu. No te reira tumu, ua faaue te Fatu ia faaerehia oia i te basileia e ia horo‘a hia atu i to’na tavini.9
Te i‘oa o taua tavini ra o Ieroboama ïa. E taata itoito o Ieroboama no roto mai i te opu o Epharaima e o ta Solomona i horo‘a atu te mana i ni‘a i te tahi tuhaa o ta’na mau rave ohipa.10
I te hoê mahana, a ratere ai o Ieroboama, ua ti‘a mai ra te hoê peropheta e ua tohu oia e iriti oia i te basileia mai roto mai ia Solomona, e e horo‘a oia e hoê ahuru o na ahuru ma piti opu no Iselaera ia Ieroboama.
Na roto mai i ta’na peropheta, ua fafau te Fatu ia Ieroboama e, mai te mea e rave oia i te mau mea maitai, « ei piha‘i-ato‘a-iho vau ia oe, e na‘u e patu i te fare mau no oe, mai ta‘u i rave i Davida ra, e horo‘a ho‘i ia Iseraela ia oe ».11
Ua ma‘iti te Fatu ia Ieroboama e ua fafau atu ia’na te mau haamaitairaa faahiahia mai te mea e haapa‘o oia i te mau faaueraa e, e haere oia i te vahi teitei. I muri a‘e i te poheraa o Solomona, ua tupu te mau parau a te peropheta, ua faataa ê ahuru o na ahuru ma piti opu no Iselaera ia ratou e ua pee atu ia Ieroboama.
I muri a‘e i to’na fariiraa i teie maitai, ua haapa‘o anei te arii apî i te parau a te Fatu ?
Aita oia i na reira. Ua hamani oia i te mau pu‘atoro piru e ua faaitoito oia i to’na nunaa ia haamori i te reira. Ua haamau oia i ta’na iho « autahu‘araa » ma te ma‘iti i te mau taata o ta’na e hinaaro, e ua faataa ia ratou ei « mau tahu‘a i te mau fare ato‘a i te vahi teitei ».12 Ei haapotoraa, noa’tu te mau haamaitairaa rahi ta’na i farii no ô mai i te Fatu ra, ua riro oia te Arii ino roa‘e i te mau Arii o tei faatere na mua atu ia’na.13 I roto i te mau u‘i i muri mai, ua riro o Ieroboama ei faahoho‘araa no te mau arii iino o Iseraela.
No teie mau ino, ua fariu ê atu te Fatu ia Ieroboama. Ei hopearaa no te ino o te Arii, ua faaoti te Fatu ia haamou-hope-roa-hia te Arii e te taato‘araa o to’na utuafare. Ua tupu mau roa teie tohuraa mai te reira. Ua tinai-roa-hia te huaai o Ieroboama i ni‘a i te fenua.14
Ua riro o Solomona e o Ieroboama ei mau hoho‘a no te hoê tau ohuraa o te faahoho‘a-pinepine-hia i roto i te Buka a Moromona. Ia vai parau ti‘a ana‘e te nunaa, e haamanuia te Fatu ia ratou. E mea pinepine, e faahaere te manuiraa i te te‘ote‘o e te te‘otei te hara. E arata‘i te hara i te ino e e etaeta te mau aau i ni‘a i te mau mea a te Varua. I te pae hopea e arata‘i atu te hopearaa o te e‘a i te mauiui e te oto.
E rave-pinepine-hia teie huru faanahonahoraa eiaha ana‘e i roto i te oraraa o te taata tata‘itahi, i roto ato‘a râ i te mau oire, te mau nunaa, e i roto ato‘a i te ao nei. E tupu mau ihoa te mau hopea o te haapa‘o-ore-raa i te Fatu e i Ta’na mau peropheta e apeehia te reira e te mauiui e te tatarahapa rahi. I teie anotau, ua faara te Fatu e e arata‘i ti‘atu te ino i te « o‘e, e te ma’i rahi, te aueue fenua, e te patiri no te ra‘i » e tae noa’tu i te taime « e ite ai te mau taata o te fenua nei i te mainaina u‘ana e te riri e te rima tairi o te Atua Mana Hope ».15
E mea faufaa ia ite maoti râ, rave rahi mau taata maitata‘i e roohia nei i te mau ati a te taata e a te natura. Ua hamani-ino-hia te Feia Mo‘a matamua o teie tau tuuraa evanelia e ua ti‘avaruhia i rapae i to ratou mau fare. Ua pohe vetahi. Area râ, no te mea paha ua faa‘oroma‘i rahi ratou, ua faarahi ratou i te puai no roto ei faaineineraa ti‘a no te ohipa o ta ratou e fatata nei i te rave.
Hoê â huru i to tatou nei anotau. No te mea aita tatou e nehenehe ia ape i te mau ati, e mea ti‘a ia tatou ia haapii mai na roto i te reira.
A faaite ai te mau papa‘iraa mo‘a te hopea o te haapa‘o ore, te faaite ato‘a ra ratou i te mau mea e tupu ia faaroo ratou i te Fatu e ia pee i ta’na mau a‘oraa.
I to te oire ino o Ninive faarooraa i te reo faaara o te peropheta Iona, ua pii u‘ana atu ratou i te Fatu, ua tatarahapa, e ua faaorahia ratou i te pohe.16
No te mea ua ino roa te nunaa i te tau o Enoha ua faaue te Fatu ia Enoha ia hamama i to’na vaha e ia faaara i te nunaa ia faaru‘e i ta ratou parau ino e ia tavini i te Fatu to ratou Atua.
Ua vaiiho o Enoha i to’na măta‘u i te hiti e ua rave mai tei faauehia ia’na. Ua ratere oia na roto i te nunaa a poro ai oia ma te reo puai, ma te faaite hua atu i ta ratou mau ohipa ino. Te faaite mai nei te mau papa‘iraa mo‘a e « ua inoino te taato‘araa o te taata ia’na ». Ua paraparau ana‘e ihora ratou ia ratou iho no ni‘a i te hoê ohipa huru ê i roto i te fenua e te « hoê taata oviri » tei haere mai i rotopu ia ratou.17
Noa’tu e, e rave rahi o tei riri roa ia Enoha, ua ti‘aturi râ o tei ha‘ehaa i ta’na mau parau. Ua faaru‘e ratou i ta ratou mau hara e ua haere i te vahi teitei a‘e, e « ua haamaitaihia ratou i ni‘a i te mau mou‘a, e i ni‘a i te mau vahi teitei, e ruperupe ihora ».18 I roto i to ratou huru, aita te manuiaraa i arata‘i atu ia ratou i te te‘ote‘o, ua faahaere râ i te aroha e te parau-ti‘a. « E ma‘iri ihora te Fatu i te i‘oa o to’na ra feia, o Ziona, no te mea hoê â to ratou aau e hoê â to ratou mana‘o, e ua parahi ho‘i ratou ma te parau-ti‘a ; e aore e taata veve i rotopu ia ratou ».19
I muri a‘e i to’na Ti‘a-faahou-raa, ua haere mai te Fatu i Amerika. No ta’na faatereraa faahiahia, ua marû te aau o te nunaa. Ua faaru‘e i ta ratou mau hara, e ua haere i te vahi teitei a‘e. Ua faaherehere maite ratou i Ta’na mau parau e ua imi noa i te pee i To’na hi‘oraa.
Ua ora ratou ma te parau-ti‘a e aita e maroraa i rotopu ia ratou e ua rave ratou i te ohipa te tahi e te tahi na roto i te ti‘a. Ua opere maite ratou i ta ratou mau tao‘a i te tahi e te tahi e ua manuia rahi roa ratou.
No ni‘a i teie nunaa, ua parau hia e, « aita ho‘i e feia i roto i te mau taata i hamanihia e te rima o te Atua ra tei hau ia ratou i te oaoa ».20
I to tatou nei anotau, te farii nei tatou i teie huru ma‘itiraa. E nehenehe ta tatou e ma‘iti i te tau‘a ore i te mau peropheta a te Atua, e ia ti‘aturi noa i ni‘a i to tatou iho puai, e i te pae hopea, e farii i te mau hopearaa. Aore râ, e nehenehe ta tatou e tapiri atu i te Fatu, na roto i te paari, e ia farii i Ta’na mau haamaitairaa.
Ua tatara mai o Beniamina i na e‘a e piti e na hopearaa e piti. Ua parau oia e, e te feia e haamo‘e i te Fatu e « vaiihohia ratou i te hi‘o ri‘ari‘araa i ta ratou ihora mau hara, e te ohipa faufau, o te faaotemutemu ia ratou mai mua’tu i te aro o te Fatu i roto i te ati e te mauiui mure ore ra ».21
Tera râ, te feia e haere i te vahi teitei a‘e e tei haapa‘o i te mau faaueraa a te Atua, e « haamaitaihia ratou i te mau mea ato‘a, o te tino nei e o te varua ato‘a ho‘i ; e ia haapa‘o maitai ratou e tae noa’tu i te hopea ra, e fariihia ïa ratou i te ra‘i ra, ia parahi ratou e te Atua ato‘a i roto i te oaoa hope ore ra ».22
Nahea tatou e ite ai e te pee ra anei tatou i te Fatu aore râ aita. I to te Faaora oraraa i te fenua nei, ua anihia Ia’na ia faaite mai eaha te faaueraa rahi roa a‘e. Ma te feaa ore, ua pahono Oia : « Hinaaro oe i to Atua ra ia Iehova ma to aau ato‘a, e ma to varua ato‘a, e ma to mana‘o ato‘a. » O te ture matamua teie o te hau i te rahi.
« Mai te reira ato‘a te piti, E aroha‘tu oe i to taata tupu, mai to aroha ia oe iho na.
« Te ture ato‘a e te mau peropheta, tei teie nei â pue ture e piti nei ».23
I roto i teie mau irava, te horo‘a mai nei te Fatu i te hoê rave‘a maramarama ia ite tatou e tei ni‘a anei tatou i te e‘a mau. Te feia e haere i te vahi teitei, e here ratou i te Fatu ma to ratou aau ato‘a. E ite tatou i roto i to ratou mau oraraa te faaiteraa o taua here râ. E imi ratou i to ratou atua na roto i te pure e ani atu ho‘i i To’na Varua. E faaha‘ehaa ratou ia ratou iho e iriti i to ratou mau aau i te mau haapiiraa a te mau peropheta. E faarahi ratou i to ratou mau piiraa e e imi ratou ia tavini atu eiaha râ ia tavinihia mai ratou. E ti‘a ratou ei mau ite no te Atua. E haapa‘o ratou i Ta’na mau faaueraa, e e tupu ratou ma te puai i roto i to ratou iteraa papû.
E here ato‘a ratou i te mau tamarii a te Metua i te Ao ra, e e faaite mai to ratou mau oraraa i taua here ra. E haapa‘o ratou i to ratou mau taea‘e e mau tuahine. E aupuru, e tavini, e paturu ratou i to ratou mau hoa faaipoipo e i ta ratou mau tamarii. E faateitei ratou i te feia e faati ra ia ratou na roto i te varua here e te au maitai. E horo‘a hua noa ratou i ta ratou mau mea ia vetahi ê. E oto ratou i piha‘iho i te feia e oto ra, e tamahanahana ho‘i ratou i te feia e hinaaro i te tamahanahanaraa.24
Teie tere i te vahi teitei, e e‘a ïa no te mau pĭpĭ a te Fatu, o Iesu Mesia. E tere ïa o te arata‘i atu, i te pae hopea, i te faateiteiraa i piha‘i iho i to tatou mau utuafare i mua i te aro o te Metua e o te Tamaiti. Mai te titauraa, e ti‘a roa ia tuuhia i roto i to tatou tere i te vahi teitei a‘e, te fare o te Fatu. A haere ai tatou i te Fatu ra e a tere ai i te vahi teitei a‘e, e hinaaro ïa tatou ia faaea maoro i roto i To’na mau hiero, no te mea e hoho‘a te hiero no te hoê vahi teitei a‘e, te hoê vahi mo‘a.
I te mau tau ato‘a, te farii nei tatou i te hoê ma‘itiraa. E nehenehe ta tatou e ti‘aturi noa i ni‘a iho i to tatou iho puai e aore râ e nehenehe ta tatou e tere atu i te vahi teitei a‘e e ia haere atu i te Fatu.
E hopearaa to te ma‘itiraa tata‘itahi.
E tapaeraa to te hopearaa tata‘itahi.
Te faaite nei au e, o Iesu te Mesia to tatou Faaora, te Tamaiti ora a te Atua ora. Ua matara te ra‘i e te heheu mai nei te hoê Metua i te Ao ra tei î i te here i Ta’na mau parau i te taata nei. Na roto i te peropheta, o Iosepha Semita, ua faaho‘ihia hia mai te evanelia i ni‘a i te fenua nei. I to tatou anotau nei, te ora nei te hoê peropheta, e hi‘o, e heheu parau e te heheu mai nei i te parau a te Atua i te taata nei. Te tuea nei to’na reo i to te mau reo o te mau peropheta ato‘a o te mau tau ato‘a i mahemo a‘e nei.
Ua parau oia e « Te titau manihini nei au ia outou tata‘itahi, i te mau vahi ato‘a e tei reira outou ei melo no teie ekalesia, ia ti‘a mai i ni‘a e ma te hoê himene i roto i to outou aau ia haere i mua, ma te ora i te evanelia, ma te here i te Fatu, e ia patu i te basileia. E haere ana‘e tatou paato‘a i mua e ia tape‘a i te faaroo, o te Atua Mana Hope ho‘i to tatou puai ».25
E te mau taea‘e e te mau tuahine, ua piihia tatou ia tere i te vahi teitei a‘e.
E nehenehe ta tatou e ape i te mauiui e te ati rahi e tupu mai ei hopearaa no te haapa‘o ore.
E nehenehe ta tatou e farii i te hau, te oaoa, e te ora mure ore ia haapa‘o ana‘e tatou i te mau parau a te mau peropheta, ia farii ana‘e tatou i te faaurûraa a te Varua Maitai, e ia faaî ana‘e tatou i to tatou mau aau i te here i to tatou Metua i te Ao ra e i to tatou mau taata tupu.
Te vaiiho atu nei au i to‘u iteraa papû, e ia haamaitai mai te Fatu i te feia ato‘a o te haere atu na ni‘a i te mau e‘a o te mau pĭpĭ e o te tere atu i te hoê vahi teitei a‘e, i roto i te i‘oa o Iesu Mesia, Amene.