Ko ha Faifekau Kei Siʻi
Ko e fakamanatu ia e ʻaho fāʻeleʻi ʻo hoku kaumeʻa lelei tahá, pea ko e hoko ʻeni hono taʻu 13. Ne u fakavave ke kumi ha meʻaʻofa maʻana ki muʻa pea fai e akó, ka naʻe ʻikai ke u maʻu ha meʻa. Ne u sio atu leva ki he Tohi ʻa Molomoná. Ne u fakakaukau ke u ʻahiʻahi ʻoange ia ko ha meʻaʻofa maʻana. Ne u ongoʻi lelei ʻi hoku lotó ka ne u kiʻi manavasiʻi he kuo teʻeki ai ke u foaki ha Tohi ʻa Molomona ki ha taha ki muʻa. Naʻá ku manavasiʻi naʻa ʻikai te ne tali.
ʻI heʻeku aʻu ki ʻapiakó, naʻá ku kumi ia ʻo talaange naʻe ʻi ai ha tohi makehe ne u ʻomi maʻana. Naʻá ne toʻo e tohí ʻo sio ki ha laʻitā ʻo hoku fāmilí ʻi he tafaʻaki ki muʻá. Naʻá ku talaange ko e Tohi ʻa Molomona ia, ko ha tohi ʻokú ne fakahā mai e moʻoní ki hono ʻuhinga ʻoku tau ʻi he māmaní aí. Ne u kole fakamolemole ange foki he ʻikai ke u ʻoange ha meʻaʻofa lelei ange aí.
Naʻá ne sio fakahangatonu mai ki hoku matá peá ne talamai ko e meʻa lelei taha ia kuó u ʻoange maʻaná. Ne ongo ʻene leá ki hoku lotó pea ne u meimei tangi. Ne u ongoʻi kuó u ʻosi hoko pē au ko ha faifekau! ʻOku ʻikai te u faʻa tatali ke u taʻu motuʻa feʻunga ka u ʻalu ʻo ngāue fakafaifekau ke u lava ʻo vahevahe ʻa e ongoongoleleí mo e kakai kehé ʻo hangē ko hoku kaumeʻá.