Fekumi ki ha Himi ʻOku ou Manako Aí
Naʻe naʻinaʻi ʻemau palesiteni fakamisioná ki he kau faifekau ʻi he Misiona Kana ʻAkalaá ke nau “tokanga taha ki he ngāué.” Naʻá ne ʻiloa ʻi hono fakaʻaongaʻi ʻo e kupuʻi lea ko ʻení. ʻI haʻamau konifelenisi fakasouni ʻe taha, naʻá ne fokotuʻu mai e ngaahi founga ʻe lava ke mau fakahoko ai ʻení, pea ko e tefitoʻi meʻa mahuʻinga ʻi heʻene lisí ko ha himi ʻokú te manako ai.
Naʻá ne talamai ke mau fili ha himi ʻoku mau manako aí, ako maʻuloto ia, pea hivaʻi ia ʻi he taimi ʻoku ʻahiʻahiʻi ai kimautolu pe te mau loto-mamahí. Ne u fakakaukau ki he lea ko ʻení ʻi he ʻahó kakato.
Naʻá ku taʻelata. Kuo teʻeki tohi mai ha taha ʻi hoku fāmilí kimuí ni mai, pea ne u ongoʻi loto-mamahi. Naʻe siʻisiʻi ange ʻeku tokanga ki he ngāué. Ko e momeniti ʻeni naʻe fie maʻu ai ke u fili ha himi ke ne fakafiefiaʻi hoku laumālié. Ne u ʻiloʻi e ngaahi himi lahi ʻi heʻetau tohi himi lanumatá, ka ko e fē himi ne u saiʻia taha aí?
Ne u toʻo mai ha tohi himi motuʻa he pō ko iá ʻo huke hono ʻū peesi kuo mapelupelú, ko e kumi ha himi ʻe ʻuhingamālie mo fakafiemālie kiate au. Ne ʻalu hake ha fakakaukau he taimi pē ko iá. Naʻe ʻaʻahi ange ʻa ʻEletā Seletoni F. Saili ʻo e Kau Fitungofulú heʻene kei Palesiteni he ʻĒlia ʻAfilika Hihifó, ki heʻemau kulupu he senitā akoʻanga fakafaifekaú, ʻo lea fekauʻaki mo e Fakaleleí. Naʻá ne fakaʻosiʻaki ʻene pehē, “Kapau naʻe mahino kiate kimoutolu kau faifekau kei talavou ʻa e Fakalelei ʻa hotau ʻEiki ko Sīsū Kalaisí, he ʻikai toe fie maʻu ha ngaahi lao ia ki he ngāue fakafaifekaú.”
Ko e faʻahinga himi ia ne u fie maʻú. Naʻe ʻikai te u kei puputuʻu. Kapau te u maʻu ha himi fekauʻaki mo e Fakaleleí, te u ongoʻi e ʻofa ʻa hoku Fakamoʻuí, te u ongoʻi fiemālie, pea te u tokanga taha ki he meʻa ʻokú Ne finangalo ke u faí.
Naʻe faifai peá u fili ʻa e himi fika 68, “ʻOku Moʻui Hoku Huhuʻí.”
ʻI he ʻaho ní ʻoku ou fakamālō ki heʻeku palesiteni fakamisioná ʻi heʻene faleʻi fakapotopotó. Kuó u ako maʻuloto ʻeni ha himi ʻoku ou manako ai, ʻa ia ʻoku ou fakalaulauloto maʻu pē ki ai mo manatuʻi ke u hivaʻi he taimi ʻo e loto-mamahí, ʻahiʻahí, mo e faingataʻá. “[ʻOku ou ʻilo ʻoku moʻui hoku Huhuʻí. Toki lea fakafiemālie ka ko ʻeni. … [ʻOkú Ne moʻui ke tāpuakiʻi au he taimi ʻo e faingataʻá.]”