Ngaahi Fakakaukau Maʻá e Efiafi Fakafāmili ʻi ʻApí

ʻE lava ke ke fakaʻaongaʻi e ngaahi fakakaukau ko ʻení ki hoʻo faiako ʻi loki ako mo ʻapí. ʻE lava pē ʻo liliu ke feʻunga ʻa e ngaahi fakakaukaú ni ki ho fāmilí pe kalasí.

“Ko Hono Fakatupulaki Hoʻo Ako ki he Tokāteline mo e Ngaahi Fuakavá,” p. 10: Aleaʻi mo e fānau lalahi angé ʻa e ngaahi founga kehekehe ke ke ʻalu ai ki he Lautohi Faka-Sāpaté kuó ke mateuteu ke ako mo kau ʻi he lēsoní. Fakaafeʻi kinautolu ke nau fokotuʻu ha taumuʻa pau ke nau toe mateuteu lelei ange ai ki he Lautohi Faka-Sāpaté he taʻú ni, pe fokotuʻu ha taumuʻa fakafāmili ke mou ngāue fakataha ki ai. Tokoni ki he fānau iiki angé ʻi hono fokotuʻu ha ngaahi taumuʻa ʻe feʻunga mo e meʻa te nau lavá, hangē ko e ʻalu mo ʻenau folofolá ki he kalasí, aʻu ki ai he taimi totonu, lotua e faiakó, pe hiki honau nimá. Aleaʻi e ngaahi founga te mou lava ʻo fetokoniʻaki ai ke aʻusia hoʻomou ngaahi taumuʻá.

“Ko ha Faʻifaʻitakiʻanga ʻo e Kakai Tuí,” p. 36: Tuku ke hiki ʻe he kau mēmipa ʻo e fāmilí ʻa e ngaahi founga kuo nau mamata ai ki he hoko ʻa ha niʻihi “ko ha faʻifaʻitakiʻanga ʻo e kakai tuí.” Mou talanoa ki hoʻomou ngaahi lisí pea aleaʻi e ngaahi founga ʻe lava ke hoko ai e mēmipa takitaha ʻo e fāmilí ko ha faʻifaʻitakiʻanga lelei. Fokotuʻu ha ngaahi taumuʻa ke fakahoko ai ʻeni.

“Ko e Fakaʻaliʻali Talēnití,” p. K8: Lau e fakamatalá pea fakamahinoʻi ʻa e talēniti ne ʻiloʻi ʻe Maile ʻokú ne maʻú. Tuku ke fakamatalaʻi ʻe he tokotaha kotoa pē ʻa e talēniti ʻo e tokotaha ʻi hono tafaʻaki toʻohemá ke tokoni ke ʻiloʻi ʻe he kau mēmipa ʻo e fāmilí honau ngaahi talēniti ʻoku ʻikai ke ʻiloʻí. ʻE lava pē ke mou hokohoko atu e founga ko ʻení ʻo tuʻo lahi kapau ʻe feʻunga e taimí. Fakaʻosiʻaki hono lau ʻo e Molonai 7:47 mo e lea ʻa ʻEletā L. Tomu Peuli he tafaʻakí.

“Ko e Uike ʻo Pení,” p. K14: Lau e fakamatalá pea fakatokangaʻi ʻa e fie maʻu ke loto-toʻa ʻa Peni ʻi heʻene kole ki heʻene kui tangatá ke ʻoua ʻe fakatau he ʻaho Sāpaté. Aleaʻi e founga ʻe lava ke loto-toʻa ai e kau mēmipa ʻo e fāmilí ʻi heʻenau feinga ke tauhi e ngaahi fekaú. Fakafaivaʻi ha ngaahi meʻa ʻe fie maʻu ai ʻa e loto-toʻa ke fili ʻa e totonú.