Ko Hono Liliu ʻEku Ngaahi Taumuʻá
Kalēsita Ualeni, ʻAlesona, USA
ʻI he houalotu sākalamēnití he Sāpate ʻe taha, ne u fakafanongo fakalelei ai ki ha lea ʻa ha tokotaha ʻo kau ki he ʻinisititiutí. Naʻá ne vahevahe mai e lea ʻa ʻEletā L. Tomu Peuli ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē, “Kuo fakatupulaki ʻeku moʻuí [ʻe he ʻinisititiutí], pea ʻoku ou ʻiloʻi te ne fai e meʻa tatau maʻau. Te ne ʻātakaiʻi koe ʻaki ha paletuʻa ko ha maluʻi ke ke hao ai mei he ngaahi ʻahiʻahi mo e ngaahi faingataʻa ʻo e māmaní.1 Ko e taimi ia ne u ʻiloʻi ai kuo fakaeʻa kiate au ʻa hono moʻoni ʻo e ngaahi lea ʻa ʻEletā Peulí. Ne u houngaʻia ʻi he ngaahi tāpuaki ne u maʻú tupu mei heʻeku ʻalu ki he ʻinisititiutí.
Ki muʻa siʻi atú, ne u kamata ʻi ha kalasi ʻinisititiuti naʻe akoʻi ai e ngaahi akonaki ʻa ʻĪsaiá. ʻOku kei hoko ia ko e kalasi kuó ne liliu taha ʻeku moʻuí ʻo aʻu mai ki he ʻahó ni. Ne hoko e semesitā ko iá ko ha taimi puputuʻu kiate au; ne ʻikai fenāpasi kotoa ʻeku ngaahi taumuʻá mo e ngaahi meʻa ne u fakamuʻomuʻá pea mo e ngaahi tefitoʻi moʻoni ʻo e ongoongoleleí. Neongo ia, ne u maʻu ʻinisititiuti maʻu pē mo kau ki he ngaahi fealēleaʻaki fakatāutaha mo e faiako ʻinisititiutí ʻo fekauʻaki mo e tokāteline ʻo e Siasí. ʻI he liliu ʻeku ngaahi fakakaukaú he fakalau atu ʻa e taimí, naʻe faifai pē peá u liliu fakalelei mo māmālie ʻeku ngaahi taumuʻá ke feʻunga mo e palani ʻa e ʻEikí maʻakú.
ʻI heʻeku toki fanongo ki hono fakaʻaongaʻi e lea ʻa ʻEletā Peulí he houalotu sākalamēniti he Sāpate ko iá, ne u toki ʻiloʻi pau ai hono faitāpuekina au ʻe he ngaahi taumuʻa foʻoú ni. Naʻe ʻilonga ʻaupito ʻa e lelei ange ʻa ʻeku moʻuí ʻi he taimi ne u ʻalu ai ki he ʻinisititiutí. Ne u fakaongoongo ange ki he Laumālié pea siʻisiʻi mo ʻeku faʻa tō ʻi he ngaahi ʻahiʻahí. Kuo lelei ange hoku ʻulungāangá mo ʻeku fakakaukaú ʻi heʻeku ʻalu ki he ʻinisititiutí.