Kau ʻi he Konifelenisí Hono Fanongonongo ʻo ha Temipale Foʻou ʻe Nima

Naʻe fakaava ʻe Palesiteni Tōmasi S. Monisoni ʻa e Konifelenisi Lahi Fakavaeuataʻu Hono 179 ʻo e Siasí naʻe fakahoko he Tokonaki mo e Sāpate ko hono 3 mo e 4 ʻo ʻOkatopa 2009, ʻaki hano fanongonongo ha ngaahi feituʻu ʻe tuʻu ai ha temipale foʻou ʻe nima ʻe langa ʻi he kahaʻú ʻi Pilikihami Siti, ʻi ʻIutā ʻo e USA; Konisepisioni ʻi Sileí; Fotaleisa ʻi Palāsila; Footi Lotateila ʻi Fololita ʻo e USA; pea mo Saipolo ʻi Siapaní.

Naʻe kau atu e kāingalotu ʻi he funga ʻo e māmaní ki he konifelenisí ʻi ha ngaahi lea fakafonua kehekehe ʻe 92 mei he Senitā Konifelenisí ʻo fakafou ʻi he televīsoné, satelaité, ʻInitanetí pe ngaahi fakamafola letioó. ʻE lava ke maʻu atu hano hiki tatau ʻo e fakamafolá ʻi he DVD mo e CD pe fakahangatonu mei he ʻinitanetí.

ʻOku feʻunga ai mo ha temipale kotoa ʻe 21 kuo fanongonongo pe lolotonga langá. Ko ʻene ʻosi pē hono langa ʻe ngaahi temipale ko ʻeni ʻe 21, ʻe aʻu leva ai e fakakātoa ʻo e ngaahi temipale ʻo e Siasí ʻi he funga ʻo e māmaní ki he temipale ʻe 151.

Naʻe pehē ʻe Palesiteni Monisoni, “ʻOku hokohoko atu pē ʻetau langa temipalé. Ko ʻemau fakaʻamú ke malava ʻo maʻu ʻe he tokolahi taha ʻo e kāingalotú ha faingamālie ke nau ō ki he temipalé pea ʻikai ke nau fai ha fuʻu fononga lōloa ki ai.”

Ko e temipale ko ia ʻi Pilikihami Sití, ko e temipale ʻaki ia hono 14 ʻe tuʻu ʻi ʻIutaá; naʻe toki fakatapui ʻi ʻIutā he konga ki muʻa ʻo e taʻu ní ʻa e Temipale Tuleipa ʻIutaá pea mo e Temipale ʻAkuila ʻIutaá.

ʻOku lolotonga ʻi ai ha temipale ʻe 13 ʻoku ngāue ʻaki ʻi Saute ʻAmelika. Ko e temipale ko ia ʻi Konisepisioni ʻi Sileí, ko e temipale ʻaki ia hono ua ke tuʻu ʻi Sileí.

ʻE hoko e temipale ʻi Fotaleisa ʻi Palāsilá, ko e temipale ia hono ono ʻi Palāsilá. Naʻe fanongonongo ʻi Mē ʻo e 2007 ha temipale ke tuʻu ʻi Manaesi pea ʻoku ʻi ai ha temipale ʻe 4 ʻoku lolotonga fakaʻaongaʻi ai.

ʻE feau ʻe he temipale ʻi Footi Lotateila ʻi Folōlitá e ngaahi fie maʻu ʻa e kāingalotu ʻi Folōlita Sauté pea mo e ʻOtu Motu Pahāmá, pea ko e temipale ia hono ua ke tuʻu ʻi Folōlita.

Ko e Temipale Saipolo Siapaní ko e temipale ia hono tolu ke tuʻu he fonua ko iá, hili e tuʻu ai ʻa e Temipale Tokioó pea mo e Temipale Fukuoka Siapaní.

Naʻe pehē ʻe Palesiteni Monisoni ko e peseti ʻe 83 ʻo e kāingalotu ʻo e Siasí ʻoku nau nofo ʻi loto ʻi he maile ʻe 200 (kilomita ʻe 320) mei he temipale ofi tahá. Naʻá ne tānaki mai ʻo pehē, “ʻE hokohoko atu e tupu ʻa e peseti ko iá ʻi heʻetau langa ha ngaahi temipale foʻou ʻi he funga ʻo e māmaní.”